ಬೆಂಗಳೂರಿನ ಭುವನೇಶ್ವರಿ ನಗರ ಕೊಳಗೇರಿ ನಿವಾಸಿಗಳ ರಕ್ಷಣೆಗೆ ಬದ್ಧ: ಎಎಪಿ ರಾಜ್ಯಾಧ್ಯಕ್ಷ ಪೃಥ್ವಿ ರೆಡ್ಡಿ

ಒಕ್ಕಲೆಬ್ಬಿಸುವ ಆತಂಕದಲ್ಲಿರುವ ಭುವನೇಶ್ವರಿ ನಗರದ ಕೊಳಗೇರಿಗೆ ಭೇಟಿ ನೀಡಿದ ಪೃಥ್ವಿ ರೆಡ್ಡಿ, ಸ್ಥಳೀಯರೊಂದಿಗೆ ಚರ್ಚಿಸಿದರು. ನಂತರ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ‘ಆಮ್‌ ಆದ್ಮಿ ಪಾರ್ಟಿಯು ಕಳೆದ ಆರು ತಿಂಗಳಿನಿಂದ ಇಲ್ಲಿನ ಜನರೊಂದಿಗೆ ಸಂಪರ್ಕದಲ್ಲಿದೆ. ವಾರದ ಹಿಂದೆ ಎಎಪಿಯ ಅನೇಕ ಮುಖಂಡರು ಸ್ಥಳಕ್ಕೆ ಆಗಮಿಸಿ ಜನರಿಗೆ ಧೈರ್ಯ ತುಂಬುವ ಕೆಲಸ ಮಾಡಿದ್ದರು. ಬಲವಂತವಾಗಿ ಒಕ್ಕಲೆಬ್ಬಿಸುವುದರ ವಿರುದ್ಧ ನ್ಯಾಯಾಲಯದಿಂದ ತಡೆಯಾಜ್ಞೆ ತರುವುದರಲ್ಲಿ ಎಎಪಿಯ ಕಾನೂನು ಘಟಕ ಯಶಸ್ವಿಯಾಗಿದೆ’ ಎಂದು ತಿಳಿಸಿದರು.

‘ಸ್ಥಳೀಯ ಶಾಸಕರು ಹಾಗೂ ಸಚಿವರ ಆದೇಶದಂತೆ ಕೊಳಚೆ ನಿರ್ಮೂಲನಾ ಮಂಡಳಿಯ ಅಧಿಕಾರಿಗಳು ಮನೆಗಳನ್ನು ಹಂಚಿಕೆ ಮಾಡಿದ್ದಾರೆ. ಇದರಲ್ಲಿ ಭಾರೀ ಭ್ರಷ್ಟಾಚಾರವಾಗಿದ್ದು, ಹೆಚ್ಚು ಹಣ ನೀಡಿದವರಿಗೆ ಮನೆಗಳನ್ನು ವಿತರಣೆ ಮಾಡಲಾಗಿದೆ. ಇಲ್ಲಿನ ಬಡ ಹಾಗೂ ಮಧ್ಯಮ ವರ್ಗದ ನಿವಾಸಿಗಳ ಹಿತಾಸಕ್ತಿಯನ್ನು ಸಂಪೂರ್ಣ ಕಡೆಗಣಿಸಲಾಗಿದೆ. ಕಳೆದ ಮೂವತ್ತು ವರ್ಷಗಳಿಂದ ಇಲ್ಲೇ ವಾಸವಾಗಿರುವವರು ಹಕ್ಕುಪತ್ರಕ್ಕಾಗಿ ಸರ್ಕಾರಿ ಕಚೇರಿಗಳಿಗೆ ಅಲೆದಾಡುತ್ತಿದ್ದು, ಅವರ ಸಮಸ್ಯೆಗೆ ಸ್ಪಂದಿಸುವವರು ಇಲ್ಲವಾಗಿದೆ’ ಎಂದು ಪೃಥ್ವಿ ರೆಡ್ಡಿ ಬೇಸರ ವ್ಯಕ್ತಪಡಿಸಿದರು.

ಬೆಂಗಳೂರಿನ ರಸ್ತೆ ಗುಂಡಿಗಳ ವಿರುದ್ಧ ಬೃಹತ್ ಅಭಿಯಾನ: ಎಎಪಿಯಿಂದ ಸಹಿ ಸಂಗ್ರಹ
ಆಮ್‌ ಆದ್ಮಿ ಪಾರ್ಟಿಯ ಬೆಂಗಳೂರು ಕಾನೂನು ಘಟಕದ ಅಧ್ಯಕ್ಷರಾದ ಮಂಜುನಾಥ್‌ ಸ್ವಾಮಿ ಮಾತನಾಡಿ, ‘ಅತಿಕ್ರಮಣ ಪ್ರವೇಶದ ಆರೋಪದ ಹೊರಿಸಿ ಪೊಲೀಸರು ಸ್ಥಳೀಯರಿಗೆ ಬೆದರಿಕೆ ಹಾಕುತ್ತಿದ್ದಾರೆ. ಮನೆಗಳನ್ನು ಖಾಲಿ ಮಾಡದಿದ್ದರೆ ಬಲವಂತವಾಗಿ ಹೊರ ಹಾಕುವುದಾಗಿ ಹೇಳುತ್ತಿದ್ದಾರೆ. ನ್ಯಾಯಾಲಯದಿಂದ ತಡೆಯಾಜ್ಞೆ ತಂದಿರುವುದು ನಮಗೆ ಸಿಕ್ಕ ಮೊದಲ ಗೆಲುವಾಗಿದ್ದು, ಅವರಿಗೆಲ್ಲ ಹಕ್ಕುಪತ್ರ ಸಿಗುವವರೆಗೂ ನಮ್ಮ ಹೋರಾಟ ಮುಂದುವರಿಯಲಿದೆ. ಸರ್ಕಾರವೇನಾದರೂ ಕುತಂತ್ರ ಮಾರ್ಗ ಅನುಸರಿಸಿ ಬಲ ಪ್ರಯೋಗಿಸಿದರೆ ತೀವ್ರ ಪ್ರತಿಭಟನೆ ಮಾಡಲು ನಿರ್ಧರಿಸಿದ್ದೇವೆ. ಬಡವರ ಹಕ್ಕುಗಳನ್ನು ದಮನ ಮಾಡುವ ಬದಲು ಅವರಿಗೆ ನೆರವಾಗುವತ್ತ ಸರ್ಕಾರ ಹಾಗೂ ಕೊಳಗೇರಿ ಮಂಡಳಿಯ ಅಧಿಕಾರಿಗಳು ಯೋಚಿಸಲಿ’ ಎಂದು ಹೇಳಿದರು.

ಬೆಂಗಳೂರಿನಲ್ಲಿ ಆಮ್‌ ಆದ್ಮಿ ಪಾರ್ಟಿಗೆ ‘ವಕೀಲ್‌ ಸಾಬ್‌’ ಜಗದೀಶ್ ಸೇರ್ಪಡೆ
ಆಮ್‌ ಆದ್ಮಿ ಪಾರ್ಟಿಯ ಮುಖಂಡರಾದ ಸಂಚಿತ್‌ ಸೆಹ್ವಾನಿ, ಬಿ. ಟಿ. ನಾಗಣ್ಣ, ಚನ್ನಪ್ಪ ಗೌಡ, ಸುರೇಶ್‌ ರಾಥೋಡ್‌, ಸೀತಾರಾಮ್‌ ಗುಂಡಪ್ಪ, ಶರತ್‌ ಖಾದ್ರಿ, ಇಮ್ರಾನ್‌, ವಿಜಯ್ ಮತ್ತಿತರರು ಭಾಗವಹಿಸಿದ್ದರು.

ರಸ್ತೆ ಗುಂಡಿಗೆ ಶಿಕ್ಷಕಿ ಬಲಿ : ಬ್ಯಾಡರಹಳ್ಳಿಯಲ್ಲಿ ಎಎಪಿಯಿಂದ ಪ್ರತಿಭಟನೆ, ಮುಖಂಡರ ಬಂಧನ