ಇನ್ನು ಮುಂದೆ 7 ದಿನ ಹೋಮ್ ಐಸೋಲೇಷನ್: ಮಾರ್ಗಸೂಚಿ ಪರಿಷ್ಕರಿಸಿದ ಕೇಂದ್ರ ಸರ್ಕಾರ

ಹೊಸದಿಲ್ಲಿ: ಭಾರತವು ಮೂರನೇ ಅಲೆ ಕೋವಿಡ್ ಸನ್ನಿವೇಶಕ್ಕೆ ಒಳಗಾಗುತ್ತಿರುವ ಸೂಚನೆ ಮಧ್ಯೆ ಕೇಂದ್ರ ಆರೋಗ್ಯ ಸಚಿವಾಲಯ ಬುಧವಾರ ಲಘು ಹಾಗೂ ಲಕ್ಷಣರಹಿತ ಕೋವಿಡ್ ಸೋಂಕಿತರ ಹೋಮ್ ಐಸೋಲೇಷನ್ ಮಾರ್ಗಸೂಚಿಯನ್ನು ಪರಿಷ್ಕರಣೆ ಮಾಡಿದೆ.

ಲಘು ಲಕ್ಷಣವುಳ್ಳ ಹಾಗೂ ಲಕ್ಷಣರಹಿತ ಸೋಂಕಿತರನ್ನು ಆಸ್ಪತ್ರೆಯಿಂದ ಬಿಡುಗಡೆ ಮಾಡಬಹುದು ಮತ್ತು ಅವರು ಪಾಸಿಟಿವ್ ಬಂದು ಏಳು ದಿನಗಳ ಬಳಿಕ ಹಾಗೂ ಸತತ ಮೂರು ದಿನ ಜ್ವರದ ಲಕ್ಷಣಗಳು ಇಲ್ಲದೆ ಇದ್ದರೆ ಐಸೋಲೇಷನ್‌ನಿಂದ ಹೊರಬರಬಹುದು. ಹೋಮ್ ಐಸೋಲೇಷನ್ ಅವಧಿ ಮುಗಿದ ಬಳಿಕ ಮತ್ತೆ ಕೋವಿಡ್ 19 ಪರೀಕ್ಷೆಗೆ ಒಳಪಡುವ ಅಗತ್ಯವಿಲ್ಲ ಎಂದು ಅದು ತಿಳಿಸಿದೆ. ಇದಕ್ಕೂ ಮುನ್ನ ಲಕ್ಷಣಗಳು ಕಂಡುಬಂದ ಬಳಿಕ ಹತ್ತು ದಿನಗಳ ಕಾಲ ಹೋಮ್ ಐಸೋಲೇಷನ್‌ನಲ್ಲಿ ಇರಬೇಕಿತ್ತು.
ಒಂದೇ ದಿನದಲ್ಲಿ ದೇಶದ ಕೋವಿಡ್ ಪ್ರಕರಣ ಶೇ 55ರಷ್ಟು ಹೆಚ್ಚಳ: 58,097 ಮಂದಿಗೆ ಸೋಂಕು
‘ಜಾಗತಿಕವಾಗಿ ಹಾಗೂ ಭಾರತದಲ್ಲಿ ಕೂಡ ಬಹುತೇಕ ಕೋವಿಡ್ 19 ಪ್ರಕರಣಗಳು ಲಕ್ಷಣರಹಿತ ಅಥವಾ ಲಘು ಲಕ್ಷಣಗಳನ್ನು ಹೊಂದಿವೆ. ಅಂತಹ ಪ್ರಕರಣಗಳು ಸಾಮಾನ್ಯವಾಗಿ ಕನಿಷ್ಠ ಚಿಕಿತ್ಸೆಯೊಂದಿಗೆ ಚೇತರಿಕೆಯಾಗುತ್ತವೆ. ಸೂಕ್ತ ವೈದ್ಯಕೀಯ ಮಾರ್ಗದರ್ಶನ ಮತ್ತು ನಿಗಾವಣೆಯಲ್ಲಿ ಮನೆಯಲ್ಲಿಯೇ ಪ್ರತ್ಯೇಕವಾಗಿದ್ದು ಗುಣವಾಗುತ್ತದೆ’ ಎಂದು ಆರೋಗ್ಯ ಸಚಿವಾಲಯ ಹೇಳಿದೆ.

ಚಿಕಿತ್ಸೆ ನೀಡುವ ವೈದ್ಯಾಧಿಕಾರಿ ರೋಗಿಯು ಲಘು ಲಕ್ಷಣ ಅಥವಾ ಲಕ್ಷಣ ರಹಿತ ಪ್ರಕರಣ ಎಂದು ಗುರುತಿಸಬೇಕು. ಪರೀಕ್ಷೆ, ಕ್ಲಿನಿಕನ್ ನಿರ್ವಹಣೆ ಸಂಬಂಧಿತ ಮಾರ್ಗದರ್ಶನ, ಆಸ್ಪತ್ರೆ ಹಾಸಿಗೆ ನಿಯೋಜನೆ ಮುಂತಾದವುಗಳಿಗಾಗಿ ಕುಟುಂಬಕ್ಕೆ ಸೂಚಿತ ನಿಯಂತ್ರಣ ಕೊಠಡಿ ಸಂಪರ್ಕ ಸಂಖ್ಯೆಯನ್ನು ಕೂಡ ನೀಡಲಾಗುತ್ತದೆ.

ಅಂತಹ ರೋಗಿಗಳು ತಮ್ಮ ಮನೆಯಲ್ಲಿಯೇ ಸ್ವಯಂ ಐಸೋಲೇಟ್ ಆಗಲು ಹಾಗೂ ಮನೆಯವರ ಸಂಪರ್ಕದಿಂದ ದೂರ ಇರಲು ಸೌಲಭ್ಯ ಹೊಂದಿರಬೇಕು. ಸಂಪೂರ್ಣ ಡೋಸ್ ಲಸಿಕೆ ಪಡೆದ ಆರೈಕೆದಾರರು 24*7 ಸಹಾಯಕ್ಕಾಗಿ ಇರಬೇಕು.

60 ವರ್ಷ ಮೇಲಿನ ವಯಸ್ಕರು, ರಕ್ತದೊತ್ತಡ, ಸಕ್ಕರೆ ಕಾಯಿಲೆ, ಹೃದ್ರೋಗ, ಶ್ವಾಸಕೋಶ/ಯಕೃತ್ತು/ಮೂತ್ರಪಿಂಡ ಮುಂತಾದ ಕಾಯಿಲೆಗಳನ್ನು ಹೊಂದಿರುವ ವ್ಯಕ್ತಿಗಳಿಗೆ ಚಿಕಿತ್ಸೆ ನೀಡುವ ವೈದ್ಯಕೀಯ ಅಧಿಕಾರಿಯಿಂದ ಸೂಕ್ತ ತಪಾಸಣೆಗೆ ಒಳಗಾದ ಬಳಿಕವಷ್ಟೇ ಹೋಮ್ ಐಸೋಲೇಷನ್‌ಗೆ ಒಳಗಾಗಲು ಅವಕಾಶ ನೀಡಲಾಗುತ್ತದೆ. ರೋಗಿಯು ಮನೆಯ ಇತರೆ ಸದಸ್ಯರಿಂದ ಅಂತರವನ್ನು ಕಾಪಾಡಿಕೊಳ್ಳಬೇಕು.
ಓಮಿಕ್ರಾನ್ ಸೋಂಕು ಹೆಚ್ಚಾದರೂ, ಭಾರತಕ್ಕೆ ಅಪಾಯವಿಲ್ಲ: ತಜ್ಞರ ಅಭಿಪ್ರಾಯ
ಕೋವಿಡ್ ರೋಗಿ ಐಸೋಲೇಟ್ ಆಗಿರುವಾಗ ಮನೆಯ ಇತರೆ ಸದಸ್ಯರು ಹೋಮ್ ಕ್ವಾರೆಂಟೈನ್ ನಿಯಮಗಳನ್ನು ಪಾಲಿಸಬೇಕು. ರೋಗಿಗಳು ಮೂರು ಪದರದ ಕ್ಲಿನಿಕಲ್ ಮಾಸ್ಕ್ ಧರಿಸಬೇಕು. ದೇಹದ ಉಷ್ಣತೆಯ ಸ್ವಯಂ ತಪಾಸಣೆ, ಪಲ್ಸ್ ಮೀಟರ್ ಬಳಸಿ ಆಕ್ಸಿಜನ್ ಮಟ್ಟ ಪರಿಶೀಲನೆಗಳನ್ನು ಮಾಡಿಕೊಳ್ಳಬೇಕು.

ಕೋವಿಡ್ ರೋಗಿಗಳು ಸಾಕಷ್ಟು ನೀರು ಕುಡಿಯಬೇಕು. ಉಸಿರಾಟಕ್ಕೆ ಸಂಬಂಧಿಸಿದ ಕ್ರಿಯೆಗಳನ್ನು ಯಾವಾಗಲೂ ಪಾಲಿಸಬೇಕು. ಕೈಗಳನ್ನು ನಿರಂತರವಾಗಿ ಸ್ವಚ್ಛವಾಗಿಟ್ಟುಕೊಳ್ಳಬೇಕು. ಐಸೋಲೇಷನ್ ಪ್ರಕರಣಗಳ ಮೇಲೆ ಜಿಲ್ಲಾಡಳಿತ ಪ್ರತಿದಿನ ನಿಗಾ ವಹಿಸಬೇಕು ಎಂದು ಆರೋಗ್ಯ ಸಚಿವಾಲಯ ತನ್ನ ಪರಿಷ್ಕೃತ ಮಾರ್ಗಸೂಚಿಯಲ್ಲಿ ಸೂಚನೆ ನೀಡಿದೆ.