ಉತ್ತರ ಪ್ರದೇಶದಲ್ಲಿ ಕಾಂಗ್ರೆಸ್‌ ಸಮಾವೇಶದಲ್ಲಿ ಕಾಲ್ತುಳಿತ: ಬಿಜೆಪಿ ವಿರುದ್ಧ ಪಿತೂರಿ ಆರೋಪ..!

ಲಖನೌ (ಉತ್ತರ ಪ್ರದೇಶ): ಚುನಾವಣೆಗೆ ಸಜ್ಜುಗೊಂಡಿರುವ ಉತ್ತರ ಪ್ರದೇಶದಲ್ಲಿ ಬಾಲಕಿಯರಿಗಾಗಿ ಕಾಂಗ್ರೆಸ್‌ ಏರ್ಪಡಿಸಿದ್ದ ಮ್ಯಾರಥಾನ್‌ನಲ್ಲಿ ಕಾಲ್ತುಳಿತದ ಸನ್ನಿವೇಶ ಉಂಟಾಗಿ ಅನೇಕ ಬಾಲಕಿಯರು ಗಾಯಗೊಂಡಿದ್ದಾರೆ. ಕೋವಿಡ್‌ ಸೋಂಕು ಭೀತಿ ಉಲ್ಬಣಿಸಿರುವ ನಡುವೆಯೇ ನಡೆದ ಈ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದವರಾರೂ ಮಾಸ್ಕ್‌ ಧರಿಸದೇ ನಿಯಮಗಳ ಉಲ್ಲಂಘನೆ ಮಾಡಿದ್ದು ಸಹ ಟೀಕೆಗೆ ಗುರಿಯಾಗಿದೆ.

ಅತಿ ಹೆಚ್ಚು ಜನಸಂಖ್ಯೆ ಹೊಂದಿದ ರಾಜ್ಯ ಉತ್ತರ ಪ್ರದೇಶವು ಮಾರ್ಚ್ ತಿಂಗಳಲ್ಲಿ ಚುನಾವಣೆ ಎದುರಿಸಲಿದೆ. ಗೆಲುವಿನ ಪೈಪೋಟಿಗಿಳಿದಿರುವ ಪ್ರಮುಖ ಪಕ್ಷಗಳು ನಿತ್ಯವೂ ಸರಣಿ ಸಮಾವೇಶಗಳನ್ನು ನಡೆಸಿ ಮತದಾರರ ಒಲವು ಗಿಟ್ಟಿಸಲು ಕಸರತ್ತು ನಡೆಸಿವೆ.

ಕಾಂಗ್ರೆಸ್‌ ಪಕ್ಷವು ಮಂಗಳವಾರ ಬರೇಲಿಯಲ್ಲಿ ‘ಲಡಕಿ ಹೂಂ, ಲಡ್‌ ಸಕ್ತಿ ಹೂಂ’ (ನಾನು ಹುಡುಗಿ, ನಾನು ಹೋರಾಡಬಲ್ಲೆ) ಹೆಸರಿನಲ್ಲಿ ಬಾಲಕಿಯರ ಮ್ಯಾರಾಥಾನ್‌ ಹಮ್ಮಿಕೊಂಡಿತ್ತು. ವ್ಯವಸ್ಥಿತ ಸಂಯೋಜನೆಯಿಲ್ಲದೇ ನಡೆದ ಈ ಕಾರ್ಯಕ್ರಮದಲ್ಲಿ ದಿಢೀರ್‌ ನೂಕುನುಗ್ಗಲು ಉಂಟಾಗಿ ಕಾಲ್ತುಳಿತದ ಸನ್ನಿವೇಶ ನಿರ್ಮಾಣವಾಯಿತು. ‘ಅನೇಕ ಬಾಲಕಿಯರು ಗಾಯಗೊಂಡಿದ್ದು, ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ’ ಎಂದು ಪೊಲೀಸರು ತಿಳಿಸಿದ್ದಾರೆ.

ಯು.ಪಿ ಚುನಾವಣಾ ಅಖಾಡಕ್ಕೆ ಶ್ರೀ ಕೃಷ್ಣ ಎಂಟ್ರಿ: ಕನಸಲ್ಲಿ ಬರುವ ಗೋಪಾಲ ಓಟು ಕೊಡುವನೇ? ಶಾಪ ನೀಡುವನೇ?
ಪಿತೂರಿಯ ಆಯಾಮ: ನೂಕುನುಗ್ಗಲಿಗೆ ತಮ್ಮ ಲೋಪ ಒಪ್ಪಿಕೊಳ್ಳದ ಕಾಂಗ್ರೆಸ್‌ ಮುಖಂಡರು, ಬಿಜೆಪಿ ವಿರುದ್ಧ ಪಿತೂರಿ ಆರೋಪ ಮಾಡಿದ್ದಾರೆ. ‘ನೂಕು ನುಗ್ಗಲಿನಲ್ಲಿ ಕೆಲವು ಬಾಲಕಿಯರು ಗಾಯಗೊಂಡಿರುವುದು ನಿಜ. ಗಾಯದ ಸ್ವರೂಪ, ಮತ್ತಿತರೆ ವಿವರಗಳ ಬಗ್ಗೆ ಹೆಚ್ಚಿನ ಮಾಹಿತಿ ಇಲ್ಲ. ಈ ಘಟನೆಯ ಹಿಂದೆ ಕಾಣದ ಕೈಗಳ ಪಿತೂರಿ ಇದೆ. ಬಿಜೆಪಿ ನೇತೃತ್ವದ ಉತ್ತರ ಪ್ರದೇಶ ಸರಕಾರವೇ ಇಂತಹದ್ದೊಂದು ಪಿತೂರಿ ಮಾಡಿರಲೂಬಹುದು’ ಎಂದು ರಾಜ್ಯ ಕಾಂಗ್ರೆಸ್‌ ವಕ್ತಾರ ಅಶೋಕ್‌ ಸಿಂಗ್‌ ಆರೋಪಿಸಿದ್ದಾರೆ.

‘ಮ್ಯಾರಾಥಾನ್‌ ಕಾರ್ಯಕ್ರಮದ ಬಗ್ಗೆ ನಾವು ಸಾಕಷ್ಟು ಮುಂಚಿತವಾಗಿಯೇ ಜಿಲ್ಲಾ ಆಡಳಿತದ ಗಮನಕ್ಕೆ ತಂದಿದ್ದೆವು. ಕಾರ್ಯಕ್ರಮ ಶುರುವಾಗುವ ಮುನ್ನ ಸಹ ಮಾಹಿತಿ ನೀಡಿದ್ದೆವು. ಇದರ ಬಗ್ಗೆ ತಲೆ ಕೆಡಿಸಿಕೊಳ್ಳದ ಅಧಿಕಾರಿಗಳು, ಭದ್ರತಾ ವ್ಯವಸ್ಥೆ ಮಾಡದೇ ದೂರ ಉಳಿದರು. ಮ್ಯಾರಾಥಾನ್‌ಗೆ ಆಡಳಿತ ಸಹಕಾರ ನೀಡಲೇ ಇಲ್ಲ’ ಎಂದು ಅವರು ದೂರಿದರು.

ಶ್ರೀ ಕೃಷ್ಣ ಕನಸಲ್ಲಿ ಬರ್ತಾನೆ.. ಈ ಬಾರಿ ಉತ್ತರ ಪ್ರದೇಶದಲ್ಲಿ ನೀವೇ ಗೆಲ್ತೀರಿ ಅನ್ತಾನೆ: ಅಖಿಲೇಶ್‌ ಯಾದವ್‌
ಮಾಸ್ಕ್‌ ಮರೆತ ಸ್ಪರ್ಧಿಗಳು: ಚುನಾವಣೆ ನಡೆಯುವ ರಾಜ್ಯಗಳಲ್ಲಿ ಸೋಂಕು ನಿಯಂತ್ರಣಕ್ಕೆ ಸರಕಾರಗಳು ಎಲ್ಲಿಲ್ಲದ ಕಸರತ್ತು ನಡೆಸಿವೆ. ತಜ್ಞರು ಕೂಡ ಈ ರಾಜ್ಯಗಳಲ್ಲಿ ಮಾಸ್ಕ್‌ ಧಾರಣೆಗೆ ಆದ್ಯತೆ ನೀಡಬೇಕು ಎಂದು ಸಲಹೆ ಮಾಡಿದ್ದಾರೆ. ಈ ನಡುವೆಯೇ ನಡೆದ ಕಾಂಗ್ರೆಸ್‌ ಮಹಿಳಾ ಘಟಕದ ‘ಲಡಕಿ ಹೂಂ, ಲಡ್‌ ಸಕ್ತಿ ಹೂಂ’ ಮ್ಯಾರಾಥಾನ್‌ನಲ್ಲಿ ಕೋವಿಡ್‌ ನಿರ್ಬಂಧ ನಿಯಮಗಳನ್ನು ಸಂಪೂರ್ಣ ಗಾಳಿಗೆ ತೂರಲಾಗಿತ್ತು. ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ನೂರಾರು ಮಹಿಳೆಯರು ಹಾಗೂ ಬಾಲಕಿಯರು ಮಾಸ್ಕ್‌ ಧರಿಸಿರಲಿಲ್ಲ, ಸಾಮಾಜಿಕ ಅಂತರವೂ ಕಣ್ಮರೆಯಾಗಿತ್ತು.

‘ಇಂತಹ ಕಾರ್ಯಕ್ರಮಗಳಿಂದ ಸೋಂಕು ಪ್ರಸರಣಕ್ಕೆ ಸಾವಿರ ಪಟ್ಟು ವೇಗ ಲಭಿಸುತ್ತದೆ. ರಾಜಕಾರಣಿಗಳಿಗೆ ತಮ್ಮ ಬೇಳೆ ಬೇಯಿಸಿಕೊಳ್ಳುವುದು ಮುಖ್ಯವಾಗಿರುತ್ತದೆ. ಜನರ ಸುರಕ್ಷತೆ ನಗಣ್ಯ. ಇಂತಹ ಕಾರ್ಯಕ್ರಮಗಳನ್ನು ನಿರ್ಬಂಧಿಸದಿದ್ದರೆ ಸೋಂಕು ಮಟ್ಟ ಹಾಕುವುದು ಕಡು ಕಷ್ಟ’ ಎಂದು ಆರೋಗ್ಯ ವಲಯದ ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.

‘ಆಕಸ್ಮಿಕ ಹಿಂದೂಗಳು’: ರಾಹುಲ್ ಗಾಂಧಿ ವಿರುದ್ಧ ಯೋಗಿ ಆದಿತ್ಯನಾಥ್ ಟೀಕಾಪ್ರಹಾರ