Karnataka news paper

6 ಲಕ್ಷ ಕೊಟ್ರೆ 18 ಲಕ್ಷ..! ‘ಟ್ರಿಪ್ಲಿಂಗ್’ ವಂಚಕ ನಗರಸಭೆ ಸದಸ್ಯ ‘ಪತ್ನಿಯರ’ ಸಮೇತ ಅಂದರ್..!


ಹೈಲೈಟ್ಸ್‌:

  • ದೊಡ್ಡಬಳ್ಳಾಪುರ ಮೂಲದ ವ್ಯಕ್ತಿಗೆ ಹಣದ ಟ್ರಿಪ್ಲಿಂಗ್‌ ಆಮಿಷ
  • ನಗರಸಭಾ ಸದಸ್ಯ ಚಂದ್ರಶೇಖರ್‌ ಹಾಗೂ ಆತನ ಇಬ್ಬರು ಪತ್ನಿಯರ ಬಂಧನ
  • ಒಟ್ಟು ಒಂಬತ್ತು ಜನರನ್ನು ಚಿತ್ರದುರ್ಗ ಬಡಾವಣೆ ಪೊಲೀಸರು ಬಂಧಿಸಿದ್ದಾರೆ

ಚಿತ್ರದುರ್ಗ: ದೊಡ್ಡಬಳ್ಳಾಪುರ ಮೂಲದ ವ್ಯಕ್ತಿಗೆ ಹಣದ ಟ್ರಿಪ್ಲಿಂಗ್‌ ಆಮಿಷವೊಡ್ಡಿ ವಂಚಿಸಿದ ಆರೋಪದ ಮೇಲೆ ನಗರಸಭಾ ಸದಸ್ಯ ಚಂದ್ರಶೇಖರ್‌ ಹಾಗೂ ಆತನ ಇಬ್ಬರು ಪತ್ನಿಯರನ್ನೊಳಗೊಂಡಂತೆ ಒಂಬತ್ತು ಜನರನ್ನು ಚಿತ್ರದುರ್ಗ ಬಡಾವಣೆ ಪೊಲೀಸರು ಬಂಧಿಸಿದ್ದಾರೆ.

ದೊಡ್ಡಬಳ್ಳಾಪುರ ತಾಲೂಕು ದೊಡ್ಡ ಬೆಲವಂಗಲ ಗ್ರಾಮದ ವಾಸಿ ನಾಗರಾಜ್‌, ‘ಚಂದ್ರಶೇಖರ್‌ ತಮಗೆ 6 ಲಕ್ಷ ರೂ. ಗಳನ್ನು 18 ಲಕ್ಷ ಕೊಡುವುದಾಗಿ ಹೇಳಿ ವಂಚಿಸಿದ್ದಾರೆ’ ಎಂದು ಡಿಸೆಂಬರ್ 6 ರಂದು ದೂರು ಸಲ್ಲಿಸಿದ್ದರು. ಈ ದೂರನ್ನು ಆಧರಿಸಿ, ಕಾರ್ಯಾಚರಣೆ ನಡೆಸಿದ ಪೊಲೀಸರು ಚಂದ್ರಶೇಖರ್‌ ಮತ್ತು ಸಹಚರರನ್ನು ಬಂಧಿಸಿದ್ದಾರೆ.

ಚಿತ್ರದುರ್ಗದ ನಗರಸಭೆ ಸದಸ್ಯ ಚಂದ್ರಶೇಖರ್‌, ಆತನ ಪತ್ನಿಯರಾದ ತೇಜಸ್ವಿನಿ, ದೇವಕಿ ಹಾಗೂ ಎಸ್‌. ಕೆ. ರಾಕೇಶ ಹಾಗೂ ಕಡೂರು ತಾಲೂಕಿನ ಬಿ. ಕೋಡಿಹಳ್ಳಿ ಗ್ರಾಮದ ಕೆ. ಟಿ. ಮೂರ್ತಿ, ಕೆ. ಟಿ. ನವೀನ್‌, ಇದೇ ತಾಲೂಕಿನ ಹೋರಿ ತಿಮ್ಮನಹಳ್ಳಿ ಗ್ರಾಮದ ಪ್ರದೀಪ, ಬೆಂಗಳೂರಿನ ಎಲ್‌ಐಸಿ ಕಾಲೊನಿಯ ವರುಣ್‌ ಕಾರ್ತಿಕ್‌, ವೀರಪ್ಪ ರೆಡ್ಡಿ ಲೇ ಔಟ್‌ನ ಬಾಬು ಬಂಧಿತರು. ಬಂಧಿತರಿಂದ 2.05 ಲಕ್ಷ ರೂ ನಗದು, ಕೃತ್ಯಕ್ಕೆ ಬಳಿಸಿದ ಮೊಬೈಲ್‌ ಮತ್ತು ಕಾರನ್ನು ವಶಕ್ಕೆ ತೆಗೆದುಕೊಂಡಿದ್ದಾರೆ. ಉಳಿದ ಆರೋಪಿಗಳ ಕಾರ್ಯ ಮುಂದುವರಿದಿದೆ.

ಪ್ರಕರಣದ ಹಿನ್ನೆಲೆ: ದೊಡ್ಡಬಳ್ಳಾಪುರ ತಾಲೂಕಿನ ದೊಡ್ಡ ಬೆಲವಂಗಲ ಗ್ರಾಮದ ನಾಗರಾಜ್‌ ಎಂಬುವರಿಗೆ ಚಿಕ್ಕಮಗಳೂರು ಜಿಲ್ಲೆಯ ಕಡೂರು ತಾಳೂಕಿನ ಕೋಡಿಹಳ್ಳಿ ಗ್ರಾಮದ ಮೂರ್ತಿ, ಮಂಜುನಾಥ ಎಂಬುವರು ನಾಲ್ಕು ವರ್ಷಗಳಿಂದ ಪರಿಚಿತರು. ಇವರು ಚಿತ್ರದುರ್ಗ ನಗರದ ಚಂದ್ರಶೇಖರ ಜತೆ ವ್ಯವಹಾರ ಮಾಡುತ್ತಿದ್ದು, ಅವರು ಒಂದು ಪಟ್ಟು ಹಣಕ್ಕೆ ಮೂರು ಪಟ್ಟು ಹಣ ಕೊಡುವ ವ್ಯವಹಾರ ಮಾಡುತ್ತಿದ್ದಾರೆ. ನೀವು ಅವರೊಂದಿಗೆ ವ್ಯವಹಾರ ಮಾಡಿ ಹಣ ಪಡೆಯಬಹುದು ಎನ್ನುವ ಅಮಿಷವೊಡ್ಡಿದ್ದಾರೆ.

ಈ ಅಮಿಷಕ್ಕೆ ಒಳಗಾದ ನಾಗರಾಜ್‌ ಆರು ಲಕ್ಷ ರೂ. ಗಳನ್ನು ಚಿತ್ರದುರ್ಗಕ್ಕೆ ತಂದಿದ್ದಾರೆ. ಚಿತ್ರದುರ್ಗ ನಗರದ ಜೈಲ್‌ ರಸ್ತೆಯಲ್ಲಿರುವ ಕೆಇಬಿ ಸ್ಟೇಶನ್‌ ಹತ್ತಿರ ಚಂದ್ರಶೇಖರ್‌ ಭೇಟಿ ಮಾಡಿದ್ದಾರೆ. ಚಿಕ್ಕಮಗಳೂರಿನ ಮೂರ್ತಿ, ಮಂಜುನಾಥ ಹೇಳಿದ ವ್ಯಕ್ತಿ ನಾನೇ ಎಂದು ಹೇಳಿದಾಗ, ನಾಗರಾಜ್‌ರಿಂದ ಆರು ಲಕ್ಷರೂ ಪಡೆದಿದ್ದಾರೆ. ನಂತರ ಅವರಿಗೆ ಒಂದು ಬ್ಯಾಗನ್ನು ನೀಡಿ ಇದರಲ್ಲಿ 18 ಲಕ್ಷ ರೂ ಇದೆ. ಸುರಕ್ಷಿತವಾಗಿ ತೆಗೆದುಕೊಂಡು ಹೋಗಿ ಎಂದು ಹೇಳಿ ಕಳುಹಿಸಿದ್ದಾರೆ. ನಂತರ ನಾಗರಾಜ್‌ಗೆ ಚಂದ್ರಶೇಖರ್‌ ಕೊಟ್ಟ ಹಣದ ಬಗ್ಗೆ ಸಂಶಯ ಬಂದು ‘ನನ್ನ ಹಣ ನನಗೆ ಕೊಡಿ’ ಎಂದು ಫೋನ್‌ ಮಾಡಿದ್ದಾರೆ. ಹಣ ವಾಪಸು ಸಿಗದೇ ಇದ್ದಾಗ ವಂಚನೆ ಎಸಗಿದ್ದಾರೆನ್ನುವುದು ತಿಳಿದು ಚಿತ್ರದುರ್ಗ ಬಡಾವಣೆ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.

ಪತ್ನಿಯರೂ ಭಾಗಿ: ಈಗ ಹಣವನ್ನು ಟ್ರಿಪ್ಲಿಂಗ್‌ ಮಾಡುವುದಾಗಿ ವಂಚಿಸಿರುವ ಚಂದ್ರಶೇಖರ್‌ಗೆ ಡಬ್ಲಿಂಗ್‌ ಚಂದ್ರ ಎನ್ನುವ ಅನ್ವರ್ಥ ನಾಮವೇ ಇದೆ. ಇದನ್ನೊಂದು ವೃತ್ತಿಯಂತೆಯೇ ನಿರ್ವಹಿಸುತ್ತಾ ಬಂದಿರುವ ಚಂದ್ರಶೇಖರ್‌ ಹಲವು ಬಾರಿ ಬಂಧನಕ್ಕೆ ಒಳಗಾಗಿರುವ ಹಿನ್ನೆಲೆ ಇದೆ. ಚಿತ್ರದುರ್ಗ ಸೇರಿದಂತೆ ಬೇರೆ ಜಿಲ್ಲೆಗಳಲ್ಲೂ ಹಲವು ಪ್ರಕರಣ ದಾಖಲಾಗಿವೆ. ಬಹಳಷ್ಟು ಸಾರಿ ಪೊಲೀಸರು, ರಾಜಕಾರಣಿಗಳ ಅಪವಿತ್ರ ಮೈತ್ರಿಯಿಂದಲೇ ಬಚಾವಾಗಿದ್ದಾರೆ. ಹಣವನ್ನು ವಂಚಿಸುವ ಕೃತ್ಯದಲ್ಲಿ ಪತ್ನಿಯರನ್ನೂ ಭಾಗಿಯಾಗಿಸಿಕೊಂಡಿರುವುದು ಈಗಿನ ಬಂಧನದ ಹೊಸ ಆಯಾಮವಾಗಿದೆ.

ಮೇಲ್ಮನೆ ಮತದಾರರಿಗೆ ನೆನಪಾದ ರಾಬಿನ್‌ಹುಡ್‌..! ಕಾಂಚಾಣದ ಆಟಕ್ಕೆ ವೋಟರ್ಸ್ ಸಮರ್ಥನೆ..!
ಹಣ ವಂಚನೆಯ ಜಾಲಕ್ಕೆ ಅನುಕೂಲವಾಗುವಂತೆ ರಾಜ್ಯದ ನಾನಾ ಜಿಲ್ಲೆಗಳಲ್ಲಿ ಪ್ರತಿನಿಧಿಗಳನ್ನೂ ಸಹಾ ನಿಯೋಜಿಸಿಕೊಂಡಿದ್ದಾನೆ. ಈ ಪ್ರತಿನಿಧಿಗಳು ತಮಗೆ ಪರಿಚಿತರಾದ ಶ್ರೀಮಂತ ಸ್ನೇಹಿತರು, ಹಿತೈಷಿಗಳನ್ನು, ಬಂಧುಗಳನ್ನು ಕರೆ ತಂದು ಈ ವಂಚನೆಯ ಜಾಲಕ್ಕೆ ಸಿಲುಕಿಸುತ್ತಾರೆ. ಎಷ್ಟೋ ಬಾರಿ ಹಣ ಕಳೆದುಕೊಂಡವರು ಸಾರ್ವಜನಿಕ ಜೀವನದಲ್ಲಿ ಮರ್ಯಾದೆಗೆ ಅಂಜಿ ದೂರು ನೀಡಿದೆ ಹಿಂದೆ ಸರಿದಿರುವ ಪ್ರಕರಣಗಳೂ ಇವೆ.

ಆಶ್ಚರ್ಯವೆಂದರೆ, ಚಿತ್ರದುರ್ಗದ ತಮ್ಮ ನಿವಾಸದಲ್ಲೇ ಗಿರಾಕಿಗಳಿಗೆ ಮೋಸದ ಬಲೆ ಹೆಣೆಯಲಾಗುತ್ತಿತ್ತು. ಗಿರಾಕಿಗಳು ಮೋಸ ಹೋಗಲು, ನಂಬಲು ಅಗತ್ಯವಿರುವ ಎಲ್ಲ ತಂತ್ರಗಳನ್ನು ಕುಟುಂಬದ ಸದಸ್ಯರ ಜತೆ ಮಾಡುತ್ತಿದ್ದ. ಫಿಲ್ಟರ್‌ ಮಾಡಿದ ಅಳತೆಯಲ್ಲಿ ಕಟ್‌ ಮಾಡಿದ ಕಪ್ಪು ಬಣ್ಣದ ಪೇಪರ್‌ ಕಟಿಂಗ್‌ಗಳನ್ನು ಒಂದೊಂದು ಕಟ್ಟು ಮಾಡಿ, ಮೇಲ್ಭಾಗ ಮತ್ತು ಕೆಳಭಾಗದಲ್ಲಿ ಒಂದು ಅಸಲಿ ನೋಟುಗಳನ್ನು ಇಟ್ಟು ಬ್ಯಾಗ್‌ನಲ್ಲಿ ತುಂಬಿ ಮೂರು ಪಟ್ಟು ಹಣ ಇದೆ ಎಂದ ಗಿರಾಕಿಗಳಿಗೆ ನೀಡುವ ನೀಡುವ ಪರಿಪಾಠ ರೂಢಿಸಿಕೊಂಡಿದ್ದ.

ನಕಲಿ ನೋಂದಣಿ, ತೆರಿಗೆ ಗುಳುಂ: ಬೆಂಗಳೂರಿನ ಆರ್‌ಟಿಒ ಕಚೇರಿಗಳಲ್ಲಿ ಕೋಟ್ಯಂತರ ರೂ. ಲೂಟಿ!
ಪೊಲೀಸ್‌ ತಂತ್ರಗಾರಿಕೆ: ನಗರದಲ್ಲಿ ಯಾವುದಾದರೂ ರಸ್ತೆಗೆ ಕರೆಸಿಕೊಂಡು ಗಿರಾಕಿಗಳಿಗೆ ಮೂರು ಪಟ್ಟು ಹಣ ಇದೆ ತೆಗೆದುಕೊಂಡು ಹೋಗಿ ಎಂದು ಹೇಳುವುದು, ಅದೇ ಸಮಯದಲ್ಲಿ ಚಂದ್ರಶೇಖರ್‌ ಕಡೆಯವರೇ ಪೊಲೀಸರ ಸಮವಸ್ತ್ರದಲಿ ವಿಜಿಲ್‌ ಹಾಕುತ್ತಾ ಬಂದು ಪೊಲೀಸ್‌ ಎಂದು ಹೇಳಿ ಅಲ್ಲಿಂದ ತಪ್ಪಿಸಿಕೊಂಡು ಓಡಿ ಹೋಗುವ ತಂತ್ರಗಾರಿಕೆ ಮಾಡುತ್ತಾ ಬಂದಿದ್ದಾರೆ. ನಂತರ ಸ್ವಿಚ್‌ ಆಫ್‌ ಮಾಡಿಕೊಂಡು ಕೈ ಎತ್ತುವುದು ಚಂದ್ರಶೇಖರ್‌ ರೂಢಿಸಿಕೊಂಡು ಬಂದಿರುವ ಚಾಳಿಯಾಗಿದೆ.

ಕೆಮಿಕಲ್‌ ಬಳಸಿ ನಂಬಿಸುತ್ತಿದ್ದ

ತಾನು ಗಿರಾಕಿಗಳಿಗೆ ನೀಡುವ ನೋಟುಗಳ ಬಗ್ಗೆ ಖಾತ್ರಿ ಬರುವಂತೆ ಮಾಡಲು ಕೆಮಿಕಲ್‌ ಬಳಸಿ ನಂಬಿಸುತ್ತಿದ್ದ. ತಾನು ನೀಡಿರುವ ಕಪ್ಪು ನೋಟುಗಳುಳ್ಳ ಬ್ಯಾಗ್‌ನಿಂದ ಒಂದೆರಡು ನೋಟು ಹೊರ ತೆಗೆದು ಅವುಗಳನ್ನು ಕೆಮಿಕಲ್‌ನಿಂದ ತೊಳೆದು ಅಸಲಿ ನೋಟು ಎಂದು ತೋರಿಸುತ್ತಿದ್ದ. ನೀವು ಕೂಡಾ ಇದೇ ಕೆಮಿಕಲ್‌ನಿಂದ ತೊಳೆದರೆ ಅಸಲಿ ನೋಟು ಬರುತ್ತದೆ. ನಿಮಗೆ ಅನುಮಾನ ಇದ್ದಲ್ಲಿ ಬ್ಯಾಂಕ್‌ಗೆ ಹೋಗಿ ಚೆಕ್‌ ಮಾಡಿಕೊಳ್ಳಿ ಎಂದು ಹೇಳಿ ನಂಬಿಸುತ್ತಿದ್ದ.

ಗದಗದಲ್ಲಿ ಬೆಳೆ ವಿಮೆ ಹೆಸರಿನಲ್ಲಿ ಹಣ ಲೂಟಿ: ರೈತರ ಹೆಸರಿನಲ್ಲಿ ಅನ್ಯರಿಂದ ದಂಧೆ..?



Read more