Karnataka news paper

WPL 2025- ಅರ್ಧಶತಕದೊಂದಿಗೆ ಗುಡುಗಿದ ಹರ್ಲಿನ್ ಡಿಯೋಲ್ : ನಡುಗಿದ ಅಗ್ರಸ್ಥಾನಿ ದಿಲ್ಲಿ ಕ್ಯಾಪಿಟಲ್ಸ್


ಲಖನೌ: ಹರ್ಲಿನ್‌ ಡಿಯೋಲ್‌ ಅವರ ಸಿಡಿಲಬ್ಬರದ ಅರ್ಧಶತಕದ ಬಲದಿಂದ ಗುಜರಾತ್‌ ಜಯಂಟ್ಸ್‌ ತಂಡ ಮಹಿಳಾ ಪ್ರೀಮಿಯರ್‌ ಲೀಗ್‌ನ 17ನೇ ಪಂದ್ಯದಲ್ಲಿ ದಿಲ್ಲಿ ಕ್ಯಾಪಿಟಲ್ಸ್‌ ವಿರುದ್ಧ 5 ವಿಕೆಟ್‌ ರೋಚಕ ಗೆಲುವು ದಾಖಲಿಸಿದೆ. ಈ ಜಯದೊಂದಿಗೆ ಒಟ್ಟು 8 ಅಂಕ ಗಳಿಸಿದ ಜಯಂಟ್ಸ್‌, ಗುಂಪಿನಲ್ಲಿ ದ್ವಿತೀಯ ಸ್ಥಾನಕ್ಕೇರಿದೆ. ಇಷ್ಟೇ ಅಂಕಗಳನ್ನು ಹೊಂದಿರುವ ಮುಂಬಯಿ ರನ್‌ರೇಟ್‌ ಆಧಾರದಲ್ಲಿ 3ನೇ ಸ್ಥಾನ ಪಡೆದಿದೆ.

ಏಕನಾ ಕ್ರಿಕೆಟ್‌ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಪಂದ್ಯದಲ್ಲಿ ದಿಲ್ಲಿ ನೀಡಿದ 178 ರನ್‌ ಗುರಿ ಬೆನ್ನಟ್ಟಿದ ಗುಜರಾತ್‌, 3 ಎಸೆತಗಳು ಇರುವಂತೆಯೇ 5 ವಿಕೆಟ್‌ ನಷ್ಟಕ್ಕೆ ಗುರಿ ಭೇದಿಸಿತು. ಸವಾಲಿನ ಗುರಿ ಬೆಂಬತ್ತಿ ಹೊರಟ ಗುಜರಾತ್ ಎರಡನೇ ಓವರ್ ನಲ್ಲಿ 4 ರನ್ ಗಳಿಸುವಷ್ಟರಲ್ಲೇ ಡಿ ಹೇಮಲತಾ(1) ಅವರ ವಿಕೆಟ್ ಅನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು.

ಮೂನಿ- ಹರ್ಲಿನ್ ಜೊತೆಯಾಟ

ಆದರೆ ಬರ್ತ್ ಮೂನಿ(44) ಮತ್ತು ಹರ್ಲಿನ್ ಡಿಯೋಲ್ ಅವರು ಎರಡನೇ ವಿಕೆಟ್ ಗೆ 85 ರನ್ ಜೊತೆಯಾಟವಾಡಿದ್ದರಿಂದ ದಿಲ್ಲಿಗೆ ಪಂದ್ಯವನ್ನು ಹಿಡಿತಕ್ಕೆ ತೆಗೆದುಕೊಳ್ಳಲು ಕಷ್ಟವಾಯಿತು. 35 ಎಸೆತಗಳನ್ನು ಎದುರಿಸಿದ ಮೂನಿ 6 ಬೌಂಡರಿಗಳಿದ್ದ 44 ರನ್ ಗಳಿಸಿ ಔಟಾದರು.

ಇದಾದ ಬಳಿಕ ಆಶ್ಲೆ ಗಾರ್ಡನರ್ (22) ಮತ್ತು ಡಾಟಿನ್ (24) ಅವರು ಹರ್ಲಿನ್ ಡಿಯೋಲ್ ಗೆ ಸಾಥ್ ನೀಡಿದರು. ಅಂತಿಮ ಓವರ್ ನಲ್ಲಿ ಗುಜರಾತ್ ಗೆಲುವಿಗೆ 9 ರನ್ ಗಳ ಅಗತ್ಯವಿತ್ತು. ಕಾಶ್ಮಿ ಗೌತಮ್ (9 ನಾಟೌಟ್) ಜೊತೆ ಸೇರಿ ಹರ್ಲಿನ್ ತಂಡವನ್ನು ಗೆಲುವಿನ ದಡ ಸೇರಿಸಿದರು. 49 ಎಸೆತಗಳನ್ನು ಎದುರಿಸಿದ ಹರ್ಲಿನ್ 9 ಬೌಂಡರಿ ಮತ್ತು 1 ಸಿಕ್ಸರ್ ಗಳನ್ನು ಸಿಡಿಸಿದರು. ಅವರಿಗೆ ಅರ್ಹವಾಗಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಒಲಿದು ಬಂತು. ದಿಲ್ಲಿ ಪರ ಶಿಖಾ ಪಾಂಡೆ ಮತ್ತು ಜೆಸ್ ಜೋನಾಸ್ಸೆನ್ ತಲಾ 2 ವಿಕೆಟ್ ಕಬಳಿಸಿದರು.

ಇದಕ್ಕೂ ಮೊದಲು ಚಾಸ್ ಸೋತು ಬ್ಯಾಟಿಂಗ್ ಗೆ ಇಳಿಸಲ್ಪಟ್ಟ ದಿಲ್ಲಿ ಕ್ಯಾಪಿಟಲ್ಸ್ ತಂಡ ಮೆಗ್‌ ಲ್ಯಾನಿಂಗ್‌(92; 57 ಎಸೆತ, 15 ಫೋರ್‌, 1 ಸಿಕ್ಸರ್‌) ಮತ್ತು ಶಫಾಲಿ ವರ್ಮ(40; 27ಎಸೆತ) ಅವರ ಸಿಡಿಲಬ್ಬರದ ಬ್ಯಾಟಿಂಗ್‌ ಸಾಹಸದಿಂದ ಸವಾಲಿನ ಮೊತ್ತ ಪೇರಿಸಿತು. ಮೆಗ್‌ ಮತ್ತು ಶಫಾಲಿ ಮೊದಲ ವಿಕೆಟ್‌ಗೆ 83 ರನ್‌ ಗಳಿಸಿ ತಂಡಕ್ಕೆ ಉತ್ತಮ ಅಡಿಪಾಯ ಹಾಕಿದರು. ದಿಲ್ಲಿ20 ಓವರ್‌ಗಳಲ್ಲಿ5 ವಿಕೆಟ್‌ಗೆ 177 ರನ್‌ ಕಲೆಹಾಕಿತು. ಗುಜರಾತ್ ಜೈಂಟ್ಸ್ ಪರ ಮೇಘ್ನ ಸಿಂಗ್ 3 ವಿಕೆಟ್‌ ಕಬಳಿಸಿದರು. ಡಿಯೇಂಡ್ರಾ ಡಾಟಿನ್ 2 ವಿಕೆಟ್ ಪಡೆದರು.

ಸಂಕ್ಷಿಪ್ತ ಸ್ಕೋರ್‌

  • ದಿಲ್ಲಿ: 20 ಓವರ್‌ಗಳಲ್ಲಿ5 ವಿಕೆಟ್‌ಗೆ 177(ಲ್ಯಾನಿಂಗ್‌ 92, ಶಫಾಲಿ 40; ಮೇಘ್ನ 35ಕ್ಕೆ 3, ಡಿಯಾಂಡ್ರಾ 37ಕ್ಕೆ 2).
  • ಗುಜರಾತ್‌: 19.3 ಓವರ್‌ಗಳಲ್ಲಿ5 ವಿಕೆಟ್‌ಗೆ 178 (ಹರ್ಲಿನ್‌ 70, ಮೂನಿ 44; ಶಿಖಾ 31ಕ್ಕೆ 2, ಜೊನಾಸ್ಸನ್‌ 38ಕ್ಕೆ 2)



Read more

[wpas_products keywords=”deal of the day sale today offer all”]