ನಿಮ್ಮ ಅಪಪ್ರಚಾರ ದೇಶದ ಜನರ ನಂಬಿಕೆಯನ್ನು ಅಲುಗಾಡಿಸಲಿಲ್ಲ; ಮಹಾ ಕುಂಭದ ಜಂಭ ನಮ್ಮದು ಎಂದ ಯೋಗಿ!

ಲಖನೌ: ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಪ್ರಯಾಗ್‌ರಾಜ್‌ನಲ್ಲಿ ನಡೆದ ಮಹಾಕುಂಭ ಮೇಳದ ಬಗ್ಗೆ “ಋಣಾತ್ಮಕ ಪ್ರಚಾರ” ಮಾಡಿದ್ದಕ್ಕಾಗಿ ವಿರೋಧ ಪಕ್ಷವನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ. ಉತ್ತರ ಪ್ರದೇಶ ವಿಧಾನಸಭೆಯಲ್ಲಿ ಮಾತನಾಡಿದ ಅವರು, “ತಪ್ಪು ಮಾಹಿತಿ ಹರಡುವ ಪ್ರಯತ್ನಗಳ ಹೊರತಾಗಿಯೂ, ದೇಶದ ಜನರ ನಂಬಿಕೆಯನ್ನು ಅಲುಗಾಡಿಸಲು ವಿರೋಧ ಪಕ್ಷಗಳಿಗೆ ಸಾಧ್ಯವಾಗಲಿಲ್ಲ..” ಎಂದು ಮಾರ್ಮಿಕವಾಗಿ ಹೇಳಿದ್ದಾರೆ.”ಮಹಾಕುಂಭ ಮೇಳವು ಇಂತಹ ಭವ್ಯ ಕಾರ್ಯಕ್ರಮವನ್ನು ಆಯೋಜಿಸುವ ರಾಜ್ಯದ ಸಾಮರ್ಥ್ಯವನ್ನು ಪ್ರದರ್ಶಿಸಿದೆ. ಇದು ರಾಜ್ಯದ ಶಕ್ತಿಯನ್ನು ದೇಶಕ್ಕೆ ಮಾತ್ರವಲ್ಲ, ಭಾರತದ ಸಾಮರ್ಥ್ಯವನ್ನು ಪ್ರಪಂಚಕ್ಕೂ ತೋರಿಸಿದೆ. ಆದರೆ ವಿಪಕ್ಷಗಳು ದೇಶದ ಜನರ ನಂಬಿಕೆಯನ್ನು ಪ್ರಶ್ನೆ ಮಾಡುವಂತೆ ಮಹಾಕುಂಭ ಮೇಳವನ್ನು ಅಪಹಾಸ್ಯಕ್ಕೆ ಗುರಿ ಮಾಡಿದವು..” ಎಂದು ಯೋಗಿ ಆದಿತ್ಯನಾಥ್‌ ಕಿಡಿಕಾರಿದರು.

“ಸಮಾಜವಾದಿ ಪಕ್ಷ (SP) ಅದರ ಸಂಸ್ಥಾಪಕ ಡಾ. ರಾಮ್ ಮನೋಹರ್ ಲೋಹಿಯಾ ಅವರ ಆದರ್ಶಗಳಿಂದ ದೂರ ಸರಿದಿದೆ. ಪ್ರಯಾಗ್‌ರಾಜ್ ಮಹಾಕುಂಭ ಮೇಳದ ಯಶಸ್ಸನ್ನು ಅದಕ್ಕೆ ಸಹಿಸಿಕೊಳ್ಳಲಾಗುತ್ತಿಲ್ಲ. ಇದೇ ಕಾರಣಕ್ಕೆ ಮಹಾಕುಂಭ ಮೇಳದ ಬಗ್ಗೆ ಇಲ್ಲಸಲ್ಲದ ಆರೋಪ ಮಾಡುತ್ತಿಎ..” ಎಂದು ಯುಪಿ ಸಿಎಂ ಹರಿಹಾಯ್ದರು.

45 ದಿನಗಳ ಕಾಲ ನಡೆದ ಪ್ರಯಾಗರಾಜ್‌ ಮಹಾಕುಂಭ ಮೇಳ, ಭಾರತ ಮತ್ತು ಪ್ರಪಂಚದಾದ್ಯಂತ 66 ಕೋಟಿಗೂ ಹೆಚ್ಚು ಭಕ್ತರನ್ನು ಸೆಳೆದಿದೆ. ಇದು ಭಾರತದ ಆಧ್ಯಾತ್ಮಿಕ ಶಕ್ತಿಯನ್ನು ಜಗತ್ತಿಗೆ ಪರಿಚಯಿಸಿದೆ. ಆದರೆ ವಿಪಕ್ಷಗಳು ಈ ಧಾರ್ಮಿಕ ಕೂಡದ ಬಗ್ಗೆ ಹರಡಿದ ಅಪಪ್ರಚಾರ ಮತ್ತು ತಪ್ಪು ಮಾಹಿತಿ, ದೇಶದ ಜನರ ನಂಬಿಕೆಯನ್ನು ಅಲುಗಾಡಿಸಲಿಲ್ಲ ಎಂಬುದು ಸಂತಸದ ಸಂಗತಿ..” ಎಂದು ಯೋಗಿ ಆದಿತ್ಯನಾಥ್‌ ಹೇಳಿದರು.

“ಮಹಾಕುಂಭ ಮೇಳದ ಬಗ್ಗೆ ನಕಾರಾತ್ಮಕತೆಯನ್ನು ಹರಡುವ ನಿಮ್ಮ ಪ್ರಯತ್ನಗಳು ವಿಫಲವಾಗಿವೆ. ನೀವು ಕಾರ್ಯತಂತ್ರದಿಂದ ನಕಾರಾತ್ಮಕತೆಯನ್ನು ಹರಡಲು ಪ್ರಯತ್ನಿಸಿದ್ದೀರಿ. ಆದರೆ ಉತ್ತರ ಪ್ರದೇಶದ ಜನರಾಗಲಿ ಅಥವಾ ದೇಶದ ಜನರಾಗಲಿ ನಿಮ್ಮ ಮಾತುಗಳನ್ನು ನಂಬಲಿಲ್ಲ. ಶೀಘ್ರದಲ್ಲೇ ಸಾರ್ವಜನಿಕರು ನಿಮ್ಮ ಮಾತುಗಳನ್ನು ಕೇಳುವುದನ್ನು ನಿಲ್ಲಿಸುತ್ತಾರೆ..” ಎಂದು ಉತ್ತರ ಪ್ರದೇಶ ಮುಖ್ಯಮಂತ್ರಿ ವಿಪಕ್ಷಗಳತ್ತ ವ್ಯಂಗ್ಯದ ಬಾಣ ಬಿಟ್ಟರು.

“ಪ್ರಯಾಗ್‌ರಾಜ್‌ನ ಪವಿತ್ರ ಮತ್ತು ಸಾಂಪ್ರದಾಯಿಕ ನಗರದ ಸುಸ್ಥಿರ ಅಭಿವೃದ್ಧಿಗಾಗಿ, ಮಹಾಕುಂಭ ಮೇಳ ಸಾಕಷ್ಟು ಕೊಡುಗೆ ನೀಡಿದೆ. ಈ ಕಾರ್ಯಕ್ರಮವು ಉತ್ತರ ಪ್ರದೇಶ ಸರ್ಕಾರವು ನಗರದ ಮೂಲಸೌಕರ್ಯವನ್ನು ಗಮನಾರ್ಹವಾಗಿ ಸುಧಾರಿಸಲು ಅವಕಾಶ ಮಾಡಿಕೊಟ್ಟಿದೆ.
ಭಕ್ತರ ಅಗಾಧ ಭಾಗವಹಿಸುವಿಕೆಯು, ಭವಿಷ್ಯದಲ್ಲಿ ಇಂತಹ ಬೃಹತ್‌ ಧಾರ್ಮಿಕ ಕಾರ್ಯಕ್ರಮಗಳನ್ನು ಆಯೋಜಿಸುವ ಬಗ್ಗೆ ಸರ್ಕಾರಕ್ಕೆ ಅಗತ್ಯ ಜ್ಞಾನವನ್ನೂ ಒದಗಿಸಿದೆ..” ಎಂದು ಯೋಗಿ ಆದಿತ್ಯನಾಥ್‌ ಇದೇ ವೇಳೆ ಹೇಳಿದರು.

ಕುಂಭಮೇಳದಲ್ಲಿ ಯಾರ್ಯಾರಿಗೆ ಏನೇನು ಕಂಡಿತು, ಏನೆಲ್ಲಾ ದೊರಕಿತು : ಸಿಎಂ ಯೋಗಿ ಕೊಟ್ಟ ಸ್ಟನ್ನಿಂಗ್ ಉತ್ತರ
“ವಿಪಕ್ಷಗಳು ಅದರಲ್ಲೂ ವಿಶೇಷವಾಗಿ ಸಮಾಜವಾದಿ ಪಕ್ಷವು ಪ್ರಯಾಗರಾಜ್‌ ಮಹಾಕುಂಭ ಮೇಳದ ಬಗ್ಗೆ ಅಪಪ್ರಚಾರ ನಡೆಸುವ ಮೂಲಕ, ರಾಷ್ಟ್ರದ ನಂಬಿಕೆಯನ್ನು ಕುಗ್ಗಿಸುವ ಕೆಲಸಕ್ಕೆ ಕೈಹಾಕಿತು. ಸಮಾಜವಾದಿ ಪಕ್ಷದ ಪ್ರಸ್ತುತ ನಾಯಕತ್ವವು ಲೋಹಿಯಾ ಅವರ ನಡವಳಿಕೆ, ಮೌಲ್ಯಗಳು ಮತ್ತು ತತ್ವಗಳನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿದೆ ಎಂಬುದಕ್ಕೆ ಇದು ಸಾಕ್ಷಿ..” ಎಂದು ಸಿಎಂ ಯೋಗಿ ಅಸಮಾಧಾನ ಹೊರಹಾಕಿದರು.