ಮಾರ್ಚ್ ಶುರುವಲ್ಲೇ ಕುಸಿತದ ಆಘಾತ, ಎಫ್‌ಡಿಐ ಇಳಿಕೆ, ಉತ್ಪಾದನೆ ಕುಂಠಿತ, ಷೇರುಪೇಟೆ ಪತನ!

ಹೊಸದಿಲ್ಲಿ: ಹಣಕಾಸು ವರ್ಷದ ಕೊನೆಯ ತಿಂಗಳ ಶುರುವಿನಲ್ಲೇ ‘ಕುಸಿತ’ದ ವರದಿಗಳು ಹೊರಬೀಳುತ್ತಿವೆ. ಇದು ಹೂಡಿಕೆದಾರರನ್ನು ಬೆಚ್ಚಿ ಬೀಳಿಸಿದೆ.ದೇಶದಲ್ಲಿ ವಿದೇಶಿ ನೇರ ಬಂಡವಾಳ ಹೂಡಿಕೆ ಪ್ರಮಾಣ ಡಿಸೆಂಬರ್‌ ತ್ರೈಮಾಸಿಕದಲ್ಲಿ ಶೇ. 5.6ರಷ್ಟು ಕುಸಿತವಾಗಿದ್ದರೆ, ತಯಾರಿಕಾ ವಲಯದ ಬೆಳವಣಿಗೆ ಫೆಬ್ರವರಿಯಲ್ಲಿ 14 ತಿಂಗಳಲ್ಲೇ ಕನಿಷ್ಠ ಮಟ್ಟಕ್ಕೆ ಇಳಿಕೆ ಕಂಡಿದೆ.

ಗುರಿ ತಲುಪದ ಎಫ್‌ಡಿಐ

ಜಾಗತಿಕ ಆರ್ಥಿಕ ಅನಿಶ್ಚಿತ ಸನ್ನಿವೇಶದಿಂದಾಗಿ 2024-25ರ ಹಣಕಾಸು ವರ್ಷದ ಡಿಸೆಂಬರ್‌ ತ್ರೈಮಾಸಿಕದಲ್ಲಿ ದೇಶದ ವಿದೇಶಿ ನೇರ ಹೂಡಿಕೆ (ಎಫ್‌ಡಿಐ) ಪ್ರಮಾಣ ಶೇ. 5.6ರಷ್ಟು ಕುಸಿದಿದೆ ಎಂದು ಕೇಂದ್ರ ಸರಕಾರ ಸೋಮವಾರ ತಿಳಿಸಿದೆ.

2023-24ರ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ 1 ಲಕ್ಷ ಕೋಟಿ ರೂ.ಗೂ ಹೆಚ್ಚು ಹೂಡಿಕೆಯಾಗಿತ್ತು. ಪ್ರಸಕ್ತ ವರ್ಷ ಇದೇ ಅವಧಿಯಲ್ಲಿ 95,198 ಕೋಟಿ ರೂ. ವಿದೇಶಿ ನೇರ ಬಂಡವಾಳ ಹೂಡಿಕೆಯಾಗಿದೆ. ಜೂನ್‌ ತ್ರೈಮಾಸಿಕದಲ್ಲಿ 1.41 ಲಕ್ಷ ಕೋಟಿ ರೂ. ಹಾಗೂ ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ 1.18 ಲಕ್ಷ ಕೋಟಿ ರೂ. ಹೂಡಿಕೆಯಾಗಿದೆ ಎಂದು ಕೈಗಾರಿಕಾ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನ ಇಲಾಖೆ (ಡಿಪಿಐಐಟಿ) ತಿಳಿಸಿದೆ.

ನಕಾರಾತ್ಮಕ ಪ್ರಗತಿ

ಬೇಡಿಕೆ ಕೊರತೆ ಮತ್ತು ಮಂದಗತಿಯ ಉತ್ಪಾದನೆಯಿಂದ ದೇಶದ ತಯಾರಿಕಾ ವಲಯದ ಬೆಳವಣಿಗೆ ಫೆಬ್ರವರಿಯಲ್ಲಿ 14 ತಿಂಗಳಲ್ಲೇ ಕನಿಷ್ಠ ಮಟ್ಟಕ್ಕೆ ಕುಸಿದಿದೆ ಎಂದು ತಿಂಗಳ ಸಮೀಕ್ಷಾ ವರದಿಯೊಂದು ತಿಳಿಸಿದೆ. ಎಚ್‌ಎಸ್‌ಬಿಸಿ ಇಂಡಿಯಾದ ಮ್ಯಾನ್ಯುಫ್ಯಾಕ್ಚರಿಂಗ್‌ ಪರ್ಚೇಸಿಂಗ್‌ ಮ್ಯಾನೇಜರ್ಸ್‌ ಇಂಡೆಕ್ಸ್‌ (ಪಿಎಂಐ) ಫೆಬ್ರವರಿಯಲ್ಲಿ 56.3 ಅನ್ನು ದಾಖಲಿಸಿದೆ. ಇದು ಜನವರಿಯಲ್ಲಿ57.7 ರಷ್ಟಿತ್ತು. ಸೂಚ್ಯಂಕಗಳು 50ಕ್ಕಿಂತ ಕಡಿಮೆ ಇದ್ದರೆ ನಕಾರಾತ್ಮಕ ಪ್ರಗತಿ ಎಂದು ಅರ್ಥೈಸಲಾಗುತ್ತದೆ. 50ಕ್ಕಿಂತ ಹೆಚ್ಚಿದ್ದರೆ ಸಕಾರಾತ್ಮಕ ಬೆಳವಣಿಗೆ ಎಂದು ಪರಿಗಣಿಸಲಾಗುತ್ತದೆ.

ಮೇಲೇಳದ ಷೇರುಪೇಟೆ

ಇನ್ನು, ಷೇರುಪೇಟೆ ಸೋಮವಾರವೂ ಕುಸಿತ ದಾಖಲಿಸಿತು. ಮುಂಬಯಿ ಷೇರುಪೇಟೆ ಸೂಚ್ಯಂಕ ‘ಸೆನ್ಸೆಕ್ಸ್‌’ 112.16 ಅಂಕ ಕುಸಿದು, 73,085.94ರಲ್ಲಿ ಕೊನೆಗೊಂಡಿತು. ರಾಷ್ಟ್ರೀಯ ಷೇರುಪೇಟೆ ಸೂಚ್ಯಂಕ ‘ನಿಫ್ಟಿ’ಯೂ ಇಳಿಕೆ ಕಂಡು, ಸತತ 9 ವಹಿವಾಟುಗಳಲ್ಲಿ ನಷ್ಟ ಅನುಭವಿಸಿದಂತಾಯಿತು. ದಿನದಂತ್ಯದಲ್ಲಿ 5.40 ಅಂಕ ಇಳಿಕೆಯಾಗಿ 22,119.30ರಲ್ಲಿ ವಹಿವಾಟು ಮುಗಿಸಿತು. ಒಂದು ಹಂತದಲ್ಲಿ 120 ಅಂಕ ಕೆಳಕ್ಕೆ ಬಿದ್ದು, 22,004.70ಕ್ಕೆ ಕುಸಿದು ಹೂಡಿಕೆದಾರರನ್ನು ತೀವ್ರ ಆತಂಕಕ್ಕೆ ದೂಡಿತ್ತು.

ರಿಲಯನ್ಸ್‌ ಇಂಡಸ್ಟ್ರೀಸ್‌, ಬಜಾಜ್‌ ಫಿನ್‌ಸರ್ವ್, ಎಚ್‌ಡಿಎಫ್‌ಸಿ ಬ್ಯಾಂಕ್‌, ಅದಾನಿ ಪೋರ್ಟ್ಸ್, ಮಾರುತಿ ಸುಜುಕಿ ಇಂಡಿಯಾ, ಹಿಂದೂಸ್ತಾನ್‌ ಯೂನಿಲಿವರ್‌, ಸನ್‌ ಫರ್ಮಾ ಮತ್ತು ಏಷ್ಯನ್‌ ಪೇಂಟ್ಸ್‌ ಷೇರುಗಳು ನಷ್ಟಕ್ಕೀಡಾದವು. ಆಲ್ಟ್ರಾಟೆಕ್‌ ಸಿಮೆಂಟ್‌, ಭಾರ್ತಿ ಏರ್‌ಟೆಲ್‌, ಎನ್‌ಟಿಪಿಸಿ, ಇನ್ಫೋಸಿಸ್‌, ಬಜಾಜ್‌ ಫೈನಾನ್ಸ್‌, ಮಹೀಂದ್ರಾ ಅಂಡ್‌ ಮಹೀಂದ್ರಾ, ಲಾರ್ಸ್‌ನ್‌ ಆ್ಯಂಡ್‌ ಟರ್ಬೊ ಮತ್ತು ಎಸ್‌ಬಿಐ ಷೇರುಗಳು ಲಾಭ ಗಳಿಸಿದವು.

ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್‌ಐಐ) ಶುಕ್ರವಾರ 11,639.02 ಕೋಟಿ ರೂ.ಗಳ ಈಕ್ವಿಟಿಗಳನ್ನು ಮಾರಾಟ ಮಾಡಿದ್ದಾರೆ ಎಂದು ವಿನಿಮಯ ಅಂಕಿ-ಅಂಶಗಳು ತಿಳಿಸಿವೆ.

ಕರುನಾಡಿನತ್ತ ಆಕರ್ಷಣೆ

ಪ್ರಸಕ್ತ ಹಣಕಾಸು ವರ್ಷದ ಮೊದಲ 9 ತಿಂಗಳ ಅವಧಿಯಲ್ಲಿ ಮಹಾರಾಷ್ಟ್ರ 1.45 ಲಕ್ಷ ಕೋಟಿ ರೂ. ಎಫ್‌ಡಿಐ ಆಕರ್ಷಿಸಿದೆ. ಗುಜರಾತ್‌ 48,545 ಕೋಟಿ ರೂ. ಮತ್ತು ಕರ್ನಾಟಕ 39,289 ಕೋಟಿ ರೂ. ಹೂಡಿಕೆ ಸ್ವೀಕರಿಸಿದೆ ಎಂದು ಕೇಂದ್ರ ಸರಕಾರ ತಿಳಿಸಿದೆ.