ನಿಮ್ಮ ವಾಹನ ಮನೆ ಮುಂದಿದ್ದರೂ ಫಾಸ್ಟ್ ಟ್ಯಾಗ್ ಶುಲ್ಕ ಕಟ್ ಆಗಿದೆಯಾ? ಶುಲ್ಕ ಹಿಂಪಡೆಯಲು ಹೀಗೆ ಮಾಡಿ

ನವದೆಹಲಿ: ನೀವು ನಿಮ್ಮ ವಾಹನವನ್ನು ನಿಮ್ಮ ಮನೆಯ ಮುಂದೆಯೇ ಪಾರ್ಕಿಂಗ್ ಮಾಡಿರುತ್ತೀರಿ. ಆದರೆ, ನಿಮ್ಮ ಮೊಬೈಲಿಗೆ ಒಂದು ಸಂದೇಶ ಬರುತ್ತೆ. ನಿಮ್ಮ ವೆಹಿಗಲ್ ಯಾವುದೋ ಹೆದ್ದಾರಿಯ ಟೋಲ್ ನಲ್ಲಿ ಸಾಗಿದೆ, ಅದಕ್ಕೆ ಇಂತಿಷ್ಟು ಶುಲ್ಕವನ್ನು ನಿಮ್ಮ ಫಾಸ್ಟ್ ಟ್ಯಾಗ್ ಖಾತೆಯಿಂದ ಕಟ್ ಮಾಡಿಕೊಳ್ಳಲಾಗಿದೆ ಎಂದು! ಆ ಮೆಸೇಜ್ ನೋಡಿದ ಕೂಡಲೇ ತಲೆಬಿಸಿಯಾಗುತ್ತದೆ. ಅನವಶ್ಯಕವಾಗಿ ನಮ್ಮ ಫಾಸ್ಟ್ ಟ್ಯಾಗ್ ವ್ಯಾಲೆಟ್ ನಿಂದ ಹಣ ಹೋಯ್ತಲ್ಲಾ ಅಂತ. ಆಗು ಶುರುವಾಗುತ್ತೆ ನೋಡಿ ಪೀಕಲಾಟ!ಆಗ ನೀವು ನಿಮ್ಮ ವಾಹನ ಫಾಸ್ಟ್ ಟ್ಯಾಗ್ ನ ಕಸ್ಟಮರ್ ಕೇರ್ ಗೆ ಫೋನ್ ಮಾಡುತ್ತೀರಿ. ನಡೆದಿದ್ದೆಲ್ಲವನ್ನೂ ವಿವರಿಸುತ್ತೀರಿ. ಅತ್ತ ಆ ಕಸ್ಟಮರ್ ಕೇರ್ ಮಹಾಶಯ, ಕೂಡಲೇ ನಿಮ್ಮ ಮನೆಯ ಮುಂದೆ ಕಾರು ನಿಂತಿರುವುದಕ್ಕೆ ಸಾಕ್ಷಿಯಾಗಿ ಅದರ ನಂಬರ್ ಪ್ಲೇಟ್ ಇರುವ ಪೋಟೋಗಳನ್ನು, ಕಾರಿನ ಆರ್ ಸಿ ಕಾರ್ಡ್ ಫೋಟೋವನ್ನು ಹಾಗೂ ಫಾಸ್ಟ್ ಟ್ಯಾಗ್ ಖಾತೆಯ ಡಿಟೇಲ್ಸ್ ಕಳಿಸಿ ಅಂತ ಹೇಳಿ ಒಂದು ಆ ವಿವರಗಳನ್ನು ಕಳಿಸಬೇಕಾದ ಒಂದು ಇ-ಮೇಲ್ ಐಡಿ ಕೊಡುತ್ತಾನೆ. ನೀವು ಕೂಡಲೇ ಮನೆಯಿಂದ ಆಚೆ ಹೋಗಿ ಕಾರಿನ ಹಿಂದೆ, ಮುಂದೆ ಇರುವ ನಂಬರ್ ಪ್ಲೇಟ್ ಕಾಣುವ ಹಾಗೆ ಫೋಟೋ ತೆಗೆದು ಆತ ಹೇಳಿರುವ ಇ-ಮೇಲ್ ಗೆ ವಿವರಗಳನ್ನು ಆತ ಸೂಚಿಸಿದ ಇ-ಮೇಲ್ ಐಡಿಗೆ ಕಳುಹಿಸುತ್ತೀರಿ.

ಟೋಲ್‌ ಗೇಟ್‌ಗಳಲ್ಲಿ ಹೊಸ ನಿಯಮ: ಫಾಸ್ಟ್‌ಟ್ಯಾಗ್‌ ಬ್ಯಾಲೆನ್ಸ್‌ ಇಲ್ಲದಿದ್ದರೆ ದಂಡ!

ಆದರೆ, ಅದಾಗಿ ಕೆಲವು ದಿನಗಳಾದ ನಂತರ ಹಣ ನಿಮ್ಮ ಫಾಸ್ಟ್ ಟ್ಯಾಗ್ ಖಾತೆಗೆ ಜಮೆಯಾಗುತ್ತದೆ. ಬಾರದಿದ್ದರೆ ಅಷ್ಟೇ ನೀವು ಮತ್ತೆ ಕಸ್ಟಮರ್ ಕೇರ್ ಸಿಬ್ಬಂದಿಯ ಕೈಕಾಲು ಬೀಳಬೇಕು ಅಷ್ಟೇ…

ಶುಲ್ಕ ಕಡಿತ ತಪ್ಪಿಗೆ ಹೊಸ ಹೆಜ್ಜೆ

ಇನ್ನು ಮುಂದೆ ಇಂಥದ್ದಕ್ಕೆಲ್ಲಾ ಕಡಿವಾಣ ಬೀಳಲಿದೆ. ಏಕೆಂದರೆ, ರಾಷ್ಟ್ರದ ಎಲ್ಲಾ ಟೋಲ್ ಗಳ ಸುಗಮ ಕಾರ್ಯನಿರ್ವಹಣಗಾಗಿಯೇ ಕೇಂದ್ರದ ಸಾರಿಗೆ ಇಲಾಖೆ ಸ್ಥಾಪಿಸಿರುವ ಇಂಡಿಯನ್ ಹೈವೇ ಮ್ಯಾನೇಜ್ಮೆಂಟ್ ಕಮಿಟಿ (ಐಎಚ್ಎಂಸಿಎಲ್) ಇಂಥ ತಪ್ಪುಗಳು ಆಗದಿರುವಂತೆ, ಆ ಮೂಲಕ ಸಾರ್ವಜನಿಕರಿಗೆ ಸುಮ್ಮನೇ ಕಿರಿಕಿರಿ ಉಂಟಾಗುವುದನ್ನು ತಡೆಯಲು ಹೊಸ ಹೆಜ್ಜೆಯಿಟ್ಟಿದೆ. ಪ್ರತಿ ತಿಂಗಳು, ಏನಿಲ್ಲವೆಂದರೂ ತಪ್ಪು ಶುಲ್ಕ ಕಡಿತಕ್ಕೆ ಸಂಬಂಧಿಸಿದಂತೆ 50 ದೂರುಗಳು ದಾಖಲಾಗುತ್ತಿವೆ. ಇದನ್ನು ತಡೆಯಲು ಕೇಂದ್ರ ಸರ್ಕಾರ ಹೊಸ ಹೆಜ್ಜೆಯಿಟ್ಟಿದೆ.

FASTag : ಫಾಸ್ಟ್ಯಾಗ್ ಎಂದರೇನು? ಅದು ಹೇಗೆ ಕೆಲಸ ಮಾಡುತ್ತದೆ? ಪ್ರಯೋಜನಗಳೇನು?

ಟೋಲ್ ಸಿಬ್ಬಂದಿಯಿಂದ ಆಗುವ ಯಡವಟ್ಟುಗಳಿವು!

ಅಸಲಿಗೆ, ಇಂಥ ತಪ್ಪುಗಳು, ಟೋಲ್ ಸಿಬ್ಬಂದಿಯ ಅಚಾತುರ್ಯದಿಂದ ಆಗುತ್ತವೆ. ಮ್ಯಾನ್ಯುಯೆಲ್ ಆಗಿ ಕೆಲವು ವಾಹನಗಳು ಟೋಲ್ ಗಳಲ್ಲಿ ಹಣ ಕೊಟ್ಟು ಮುಂದೆ ಸಾಗುತ್ತವೆ. ಅಂಥ ಸಂದರ್ಭಗಳಲ್ಲಿ ವಾಹನಗಳ ಚಾಲಕರಿಂದ ಹಣ ಪಡೆಯುವ ಟೋಲ್ ಗಳ ಕೌಂಟರ್ ನಲ್ಲಿರುವ ಸಿಬ್ಬಂದಿ ವಾಹನಗಳ ಸಂಖ್ಯೆಯನ್ನು ಎಂಟ್ರಿ ಮಾಡಬೇಕಾದರೆ ತಪ್ಪು ಮಾಡಿದಾಗ ಯಾರದ್ದೋ ಶುಲ್ಕ ಯಾರಿಗೋ ಅನ್ವಯವಾಗಿ, ಅವರ ಫಾಸ್ಟ್ ಟ್ಯಾಗ್ ನಲ್ಲಿರುವ ಶುಲ್ಕ ಕಟ್ ಆಗುತ್ತದೆ. ಇಂಥ ತಪ್ಪುಗಳನ್ನು ತಡೆಯಲು ಐಎಚ್ಎಂಸಿಎಲ್ ವತಿಯಿಂದ ಕೆಲವು ಹೆಜ್ಜೆಗಳನ್ನು ಇಡಲಾಗಿದೆ.

ತಪ್ಪಾಗಿ ಕಟ್ ಶುಲ್ಕ ಮರಳಿ ಪಡೆಯಲು ಇರುವ ಮಾರ್ಗಸೂಚಿಯೇನು?

ಅನಗತ್ಯವಾಗಿ ಶುಲ್ಕ ಕಟ್ ಆದಾಗ ಏನು ಮಾಡಬೇಕು ಎಂಬ ಮಾರ್ಗಸೂಚಿಯನ್ನು ಐಎಚ್ಎಂಸಿಎಲ್ ತಿಳಿಸಿದೆ. ಹೀಗೆ, ತಪ್ಪಾಗಿ ಶುಲ್ಕ ಕಟ್ ಆದಾಗ, ಸಂಬಂಧಪಟ್ಟ ಫಾಸ್ಟ್ ಟ್ಯಾಗ್ ಕಸ್ಟಮರ್ ಗಳು, 1033 ನಂಬರಿಗೆ ಕರೆ ಮಾಡಬಹುದು. ಅಥವಾ falsededuction@ihmcl.com ಎಂಬ ಇಮೇಲ್ ವಿಳಾಸಕ್ಕೆ ತಪ್ಪಾಗಿ ಶುಲ್ಕ ಕಟ್ ಆಗಿರುವುದರ ಡಿಟೇಲ್ಸ್ ಕಳಿಸಬಹುದು. ಆಗ ಐಎಚ್ಎಂಸಿಎಲ್, ಇದರ ಬಗ್ಗೆ ತನಿಖೆ ಆರಂಭಿಸುತ್ತದೆ. ಒಂದು ವೇಳೆ, ತಪ್ಪಾಗಿ ಶುಲ್ಕ ಕಟ್ ಆಗಿರುವುದು ಸಾಬೀತಾದರೆ, ಕಸ್ಟಮರ್ ಗೆ ಆ ಶುಲ್ಕವನ್ನು ಮರಳಿ ತಲುಪಿಸಲಾಗುತ್ತದೆ. ಜೊತೆಗೆ, ತಪ್ಪು ಶುಲ್ಕ ಕಟ್ ಆಗಲು ಕಾರಣವಾದ ಟೋಲ್ ಕಂಪನಿಗೆ 1 ಲಕ್ಷ ರೂ. ದಂಡ ವಿಧಿಸಲಾಗುತ್ತದೆ ಎಂದು ಐಎಚ್ಎಂಸಿಎಲ್ ಪ್ರಕಟಣೆ ನೀಡಿದೆ.