- ಅವಿನಾಶ್‌ ದಮ್ನಳ್ಳಿ, ಮೈಸೂರು
ಕೊರೊನಾ ಕಾಲದಲ್ಲಿ ಸ್ವಂತ ವಾಹನ ಹೊಂದಬೇಕೆಂಬ ಬಯಕೆ ಸೆಕೆಂಡ್‌ ಹ್ಯಾಂಡ್‌ ಕಾರುಗಳಿಗೂ ಬೇಡಿಕೆ ಸೃಷ್ಟಿಸಿದೆ. ಕೋವಿಡ್‌ ಕಾಲದ ಬದಲಾದ ಪರಿಸ್ಥಿತಿಯಲ್ಲಿ ಸಾರ್ವಜನಿಕ ಸಾರಿಗೆ ಬಳಸಲು ಹಿಂದೇಟು ಹಾಕುವಂತಾಗಿದೆ. ಪರಿಣಾಮ ಸ್ವಂತ ವಾಹನ ಬಳಕೆಗೆ ಜನ ಆದ್ಯತೆ ನೀಡುತ್ತಿದ್ದಾರೆ. ಇದು ಸೆಕೆಂಡ್‌ ಹ್ಯಾಂಡ್‌ ವಾಹನಗಳ ಮಾರಾಟದ ಮೇಲೆಯೂ ಸಕಾರಾತ್ಮಕ ಪರಿಣಾಮ ಬೀರಿದೆ.
ಸ್ವಂತ ವಾಹನ ಕೊಳ್ಳಬೇಕೆಂಬ ಆಸೆ ಇದ್ದರೂ ಆರ್ಥಿಕ ಪರಿಸ್ಥಿತಿ ಬೆಂಬಲ ನೀಡದ ಪರಿಣಾಮ ತಮ್ಮ ಅನುಕೂಲಕ್ಕೆ ತಕ್ಕಂತೆ ಸೆಕೆಂಡ್‌ ಹ್ಯಾಂಡ್‌ ಕಾರುಗಳನ್ನು ಕೊಳ್ಳಬಹುದಾಗಿದೆ. ಇದರಿಂದಾಗಿ ಬಳಸಿದ ಕಾರುಗಳ ಮಾರಾಟದ ಮೇಲೆ ಪರಿಣಾಮ ಬೀರಿದೆ. ಮಾರುತಿ ಸುಜುಕಿ, ಹುಂಡೈ, ಟಾಟಾ ಮೋಟಾರ್ಸ್, ಕಿಯಾ, ಟೊಯೋಟಾ, ಹೋಂಡಾ, ರೆನಾಲ್ಟ್‌, ಫೋರ್ಡ್‌ ಸೇರಿದಂತೆ ನಾನಾ ಕಂಪೆನಿಗಳ ಬಳಸಿದ ಕಾರು ಮಾರಾಟ ಮಾಡುವ ಡೀಲರ್‌ಗಳು ಇದರಿಂದ ಉತ್ತಮ ವಹಿವಾಟು ನಡೆಸುವಂತಾಗಿದೆ.
ಸೆಕೆಂಡ್‌ ಹ್ಯಾಂಡ್‌ ಕಾರಿಗೆ ಸಖತ್‌ ಡಿಮ್ಯಾಂಡ್‌, ಮೂರು ತಿಂಗಳಲ್ಲಿ 2 ಸಾವಿರ ಕಾರು ಮಾರಾಟ!
ಮರುಪಾವತಿ ವಿಸ್ತರಣೆ ಪರಿಣಾಮ
ಕೋವಿಡ್‌ ಮೊದಲ ಅಲೆ ಅವಧಿಯಲ್ಲಿ ಲಾಕ್‌ಡೌನ್‌ ಘೋಷಿಸಿದ್ದ ವೇಳೆ ಸಾಕಷ್ಟು ಮಂದಿಗೆ ವಾಹನ ಸಾಲ ಕಂತು ಪಾವತಿ ಕಷ್ಟವಾಗಿತ್ತು. ಇದರಿಂದಾಗಿ ಸಾಕಷ್ಟು ಗ್ರಾಹಕರು ಕಂತಿನ ಸಂಖ್ಯೆ ವಿಸ್ತರಣೆ, ಮೊತ್ತ ಕಡಿಮೆ, ಮರುಪಾವತಿ ಅವಧಿ ವಿಸ್ತರಣೆಗೆ ಬ್ಯಾಂಕ್‌ಗಳಿಗೆ ಮನವಿ ಸಲ್ಲಿಸಿದ್ದರು. ಇದಕ್ಕೆ ಬಹುತೇಕ ಎಲ್ಲ ಖಾಸಗಿ ಬ್ಯಾಂಕ್‌ಗಳಿಂದ ಒಪ್ಪಿಗೆಯೂ ಸಿಕ್ಕಿತ್ತು. ಇದಾದ ನಂತರ ಕೆಲವು ಹೊಸ ವಾಹನ ಸಾಲಗಳಿಗೆ ಅರ್ಜಿ ಸಲ್ಲಿಸಿದ ವೇಳೆ ಕೇಳಿದ ಮೊತ್ತದ ಸಾಲ ಮಂಜೂರಿಗೆ ಬ್ಯಾಂಕ್‌ಗಳು ನಿರಾಕರಿಸಿದ್ದವು. ಹೀಗಾಗಿ ಹೊಸ ಸಾಲ ಮಂಜೂರಾತಿಗೆ ಸಾಕಷ್ಟು ಅಡ್ಡಿಗಳು ಎದುರಾಗಿದೆ. ಹೀಗಾಗಿ ತಮ್ಮ ಹಣಕಾಸಿನ ಅನುಕೂಲಕ್ಕೆ ತಕ್ಕಂತೆ ಬಳಸಿದ ಕಾರುಗಳನ್ನು ಕೊಳ್ಳಲು ಕೆಲ ಗ್ರಾಹಕರು ಮುಂದಾಗಿದ್ದಾರೆ ಎನ್ನುತ್ತಾರೆ ಎಚ್‌ಡಿಎಫ್‌ಸಿ ಬ್ಯಾಂಕ್‌ ಸೇಲ್ಸ್‌ ವಿಭಾಗದ ಅಧಿಕಾರಿ.
ಬಳಸಿದ ಕಾರಿಗೆ ಹೆಚ್ಚಿದ ಬೇಡಿಕೆ, ಸೆಕೆಂಡ್‌ ಹ್ಯಾಂಡ್‌ ಕಾರು ಕಂಪನಿಗಳಲ್ಲೀಗ ಹೊಸ ನೇಮಕಗಳದ್ದೇ ಸದ್ದು!
ಪೂರೈಕೆ ಕಡಿಮೆ
ಕೋವಿಡ್‌ 2ನೇ ಅಲೆ ವೇಳೆ ಘೋಷಿಸಿದ್ದ ಲಾಕ್‌ಡೌನ್‌ ಹಿನ್ನೆಲೆಯಲ್ಲಿ ಬಹುತೇಕ ಎಲ್ಲ ಕಾರು ತಯಾರಿಕಾ ಕಂಪೆನಿಗಳ ಉತ್ಪಾದನೆ ಮೇಲೆ ಪರಿಣಾಮ ಬೀರಿದೆ. ಜತೆಗೆ ವರ್ಷಾಂತ್ಯದಲ್ಲಿ ನವೆಂಬರ್‌, ಡಿಸೆಂಬರ್‌ನಲ್ಲಿ ಬಹುತೇಕ ಕಂಪೆನಿಗಳು ಉತ್ಪಾದನೆಯನ್ನು ಕಡಿಮೆ ಮಾಡುತ್ತವೆ. ಹೀಗಾಗಿ ಎರಡು-ಮೂರು ಕಂಪೆನಿಗಳನ್ನು ಹೊರತು ಪಡಿಸಿ ಬಹುತೇಕ ಕಂಪೆನಿಗಳ ಕಾರು ಡಿಲಿವರಿ ಅವಧಿ ಕನಿಷ್ಠ ನಾಲ್ಕರಿಂದ ಐದು ತಿಂಗಳಾಗಿದೆ. ಈ ನಡುವೆ ಕೆಲ ಗ್ರಾಹಕರು ಇದೆಲ್ಲ ಉಸಾಬರಿ ಬೇಡವೆಂದು ಸೆಕೆಂಡ್‌ ಹ್ಯಾಂಡ್‌ ಕಾರು ಖರೀದಿಗೆ ಮುಂದಾಗುತ್ತಿದ್ದಾರೆ ಎನ್ನುತ್ತಾರೆ ಕುವೆಂಪುನಗರದ ಕಾರ್‌ ಡೀಲರ್‌ ಉಮೇಶ್‌.
ಕ್ರೆಡಿಟ್‌ ಸ್ಕೋರ್‌ ಕಡಿಮೆ ಪರಿಣಾಮ
ಲಾಕ್‌ಡೌನ್‌ ಅವಧಿಯಲ್ಲಿ ಸಾಕಷ್ಟು ಗ್ರಾಹಕರಿಗೆ ಸಾಲ ಮರುಪಾವತಿ ಕಷ್ಟವಾಗಿತ್ತು. ಕಂತು ಪಾವತಿ ವಿಳಂಬ, ಅವಧಿ ವಿಸ್ತರಣೆಗೆ ಮನವಿ ಸೇರಿದಂತೆ ನಾನಾ ಕಾರಣಗಳಿಂದ ಕ್ರೆಡಿಟ್‌ ಸ್ಕೋರ್‌ ಕಡಿಮೆಯಾಗಿದೆ. ಹೀಗಾಗಿ ಹೆಚ್ಚಿನ ಮೊತ್ತದ ವಾಹನ ಸಾಲ ನೀಡಿಕೆ ಕಷ್ಟವಾಗಿದೆ. ಇನ್ನು ಸೆಕೆಂಡ್‌ ಹ್ಯಾಂಡ್‌ ವಾಹನಗಳಿಗೂ ಸಾಲ ಸೌಲಭ್ಯ ಲಭ್ಯವಿದೆ. ಹೀಗಾಗಿ ಕೆಲವರು ತಮ್ಮ ಕ್ರೆಡಿಟ್‌ ಸ್ಕೋರ್‌ಗೆ ಅನುಗುಣವಾಗಿ ಹೊಸ ಕಾರು ಖರೀದಿ ಬದಲು ಸೆಕೆಂಡ್‌ ಹ್ಯಾಂಡ್‌ ವಾಹನ ಕೊಳ್ಳಲು ಮುಂದಾಗುತ್ತಿದ್ದಾರೆ ಎನ್ನುತ್ತಾರೆ ಎಚ್‌ಡಿಎಫ್‌ಸಿ ಬ್ಯಾಂಕಿನ ಕಾರ್‌ ಲೋನ್‌ ವಿಭಾಗದ ಅಧಿಕಾರಿ.
ಇಬ್ಬರು ಮಕ್ಕಳು, ಪತಿ ಹಾಗೂ ಪತ್ನಿ ದ್ವಿಚಕ್ರ ವಾಹನದಲ್ಲಿ ಸಂಚಾರ ಅಸಾಧ್ಯ. ಹೀಗಾಗಿ ಮಧ್ಯಮ ವರ್ಗದವರು ಕೂಡ ಕಡಿಮೆ ಬೆಲೆಯ ಕಾರೊಂದನ್ನು ಖರೀದಿಸುವ ಮನಸ್ಥಿತಿಯಲ್ಲಿದ್ದಾರೆ. ಹೊಸ ಕಾರು ಖರೀದಿಗೆ ಆರ್ಥಿಕ ಪರಿಸ್ಥಿತಿ ಅಸಾಧ್ಯ. ಹೀಗಾಗಿ ಸೆಕೆಂಡ್‌ ಹ್ಯಾಂಡ್‌ ಕಾರು ಖರೀದಿಯತ್ತ ಗಮನ ನೀಡುತ್ತಾರೆ. ಜತೆಗೆ ಕೈಗೆಟುಕುವ ದರದಲ್ಲಿ ಕಾರುಗಳ ಲಭ್ಯತೆ ಇರುವುದರಿಂದ ಅನುಕೂಲವಾಗಲಿದೆ. 2 ಲಕ್ಷ ರೂ.ನಿಂದ ಹಿಡಿದು ಗ್ರಾಹಕರ ಬಜೆಟ್‌ ತಕ್ಕಂತೆ ಗುಣಮಟ್ಟದ ಕಾರುಗಳು ಲಭ್ಯವಿವೆ ಎನ್ನುತ್ತಾರೆ ಕುವೆಂಪುನಗರದ ಮೆಟ್ರೋ ಮಾರ್ವಲ್ಸ್‌ನ ಚಂದ್ರಶೇಖರ್‌.
Read more
[wpas_products keywords=”deal of the day sale today offer all”]