ಜಾತಿ, ಆದಾಯ, ಆರ್‌ಟಿಸಿ, ವಂಶವೃಕ್ಷ ಪ್ರಮಾಣ ಪತ್ರಗಳ ಶುಲ್ಕ ದಿಢೀರ್‌ ಏರಿಕೆ

ಕಂದಾಯ ಇಲಾಖೆಯ ಸೇವೆಗಳ ಶುಲ್ಕ ಹೆಚ್ಚಳ ಮಾಡುವ ಮೂಲಕ ಕೋವಿಡ್‌ ಆರ್ಥಿಕ ಸಂಕಷ್ಟದಿಂದ ತತ್ತರಿಸಿ ಹೋಗಿರುವ ರೈತರು ಮತ್ತು ಜನಸಾಮಾನ್ಯರಿಗೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ. ಜಾತಿ, ಆದಾಯ ಪ್ರಮಾಣಪತ್ರ, ಆರ್‌ಟಿಸಿ, ವಂಶವೃಕ್ಷ, ವ್ಯವಸಾಯಗಾರರ ದೃಢೀಕರಣ ಪತ್ರ ಸೇರಿದಂತೆ ಇತರ 54 ಸೇವೆಗಳಿಗಾಗಿ ನಿತ್ಯ ಲಕ್ಷಾಂತರ ಮಂದಿ ಅರ್ಜಿ ಸಲ್ಲಿಸುತ್ತಾರೆ. ಪ್ರತಿಯೊಂದು ಪ್ರಮಾಣಪತ್ರ ಪಡೆಯಲು ಸಾರ್ವಜನಿಕರು 40 ರೂ. ಶುಲ್ಕ ತೆರಬೇಕಾಗಿದೆ. ಫೆ. 7ರಿಂದಲೇ ಶುಲ್ಕ ಹೆಚ್ಚಳ ಮಾಡಿ ಆದೇಶ ಹೊರಡಿಸಲಾಗಿದೆ.

ಭೂ ಸರ್ವೆ ದರ ಹೆಚ್ಚಳಕ್ಕೆ ಎಂಎಲ್‌ಸಿ ದಿನೇಶ್‌ ಗೂಳಿಗೌಡ ಅಸಮಾಧಾನ

ಕಂದಾಯ ಇಲಾಖೆಯ ವಿವಿಧ ಸೇವೆಗಳು ಹಾಗೂ ಇತರೆ ಇಲಾಖೆಯ ಸೇವೆಗಳನ್ನು ಒದಗಿಸಲು ರಾಜ್ಯಾದ್ಯಂತ ಹೋಬಳಿ ಮಟ್ಟದಲ್ಲಿ 769 ಅಟಲ್‌ಜೀ ಜನಸ್ನೇಹಿ ಕೇಂದ್ರಗಳು, 122 ಫ್ರಂಟ್‌ ಆಫೀಸ್‌ಗಳನ್ನು ಸ್ಥಾಪಿಸಲಾಗಿದೆ. ಈ ಕೇಂದ್ರಗಳಲ್ಲಿ ಜಾತಿ, ಆದಾಯ, ವಾಸ ಸ್ಥಳ ದೃಢೀಕರಣ, ಆರ್‌ಟಿಸಿ ಹಾಗೂ ಭೂಮಿ ಸೇವೆಗಳಿಗೆ ಸಂಬಂಧಿಸಿದ ಇತರ ಪ್ರಮಾಣಪತ್ರಗಳನ್ನು ವಿತರಣೆ ಮಾಡಲಾಗುತ್ತದೆ. ಪ್ರತಿ ಪ್ರಮಾಣಪತ್ರಗಳ ಶುಲ್ಕವನ್ನು 25 ರೂ. ನಿಂದ 40 ರೂ.ಗಳಿಗೆ ಏರಿಕೆ ಮಾಡಲಾಗಿದೆ. ನಾಗರಿಕರು ಸ್ವ ಇಚ್ಛೆಯಿಂದ ಅಂಚೆ ಅಥವಾ ಸ್ಪೀಡ್‌ ಪೋಸ್ಟ್‌ ಮೂಲಕ ಪಡೆಯಲು ಇಚ್ಛಿಸಿದರೆ, ಅದಕ್ಕೆ ಪ್ರತ್ಯೇಕ ಶುಲ್ಕ ನಿಗದಿಪಡಿಸಲಾಗಿದೆ.

2006ರಲ್ಲಿ ಇ-ಆಡಳಿತ ಇಲಾಖೆಯು ಖಾಸಗಿ ಸಹಭಾಗಿತ್ವದೊಂದಿಗೆ ಅನುಷ್ಠಾನಗೊಳಿಸಿದ ನೆಮ್ಮದಿ ಯೋಜನೆಯನ್ನು 2012ರಲ್ಲಿ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆಯಿಂದ ಕಂದಾಯ ಇಲಾಖೆಯನ್ನು ವರ್ಗಾಯಿಸಲಾಯಿತು. ಈ ಸಂದರ್ಭದಲ್ಲಿ ವಿವಿಧ ಪ್ರಮಾಣಪತ್ರಗಳಿಗೆ ನಿಗದಿಪಡಿಸಿದ್ದ 15 ರೂ. ಶುಲ್ಕವನ್ನು 25 ರೂ.ಗಳಿಗೆ ಹೆಚ್ಚಿಸಲಾಯಿತು. ಈ ಸೇವೆಗಳ ವಿತರಣೆಯಿಂದ ಸಂಗ್ರಹಿಸಲಾಗುವ ಬಳಕೆದಾರರ ಶುಲ್ಕದಿಂದ ತಾಂತ್ರಿಕ ಸಂಪನ್ಮೂಲಗಳ ನೇಮಕ, ಡೇಟಾ ಎಂಟ್ರಿ ಆಪರೇಟರ್‌ಗಳು, ಹಾರ್ಡ್‌ವೇರ್‌, ಸ್ಟೇಷನರಿ ಮತ್ತು ಇತರೆ ವೆಚ್ಚಗಳು, ಬಿಎಸ್‌ಎನ್‌ಎಲ್‌ ಅಂತರ್ಜಾಲ ಸಂಪರ್ಕ, ಮೊಬೈಲ್‌ ಶುಲ್ಕಗಳು ಮತ್ತು ಇತರ ಖರ್ಚುಗಳನ್ನು ನಿರ್ವಹಿಸುವುದು ಅಗತ್ಯವಾಗಿರುತ್ತದೆ. ಹಾಗಾಗಿ, ಈ ಮೊತ್ತವನ್ನು 50 ರೂ.ಗಳಿಗೆ ಏರಿಕೆ ಮಾಡಬೇಕು ಎಂದು ಅಟಲ್‌ಜೀ ಜನಸ್ನೇಹಿ ನಿರ್ದೇಶನಾಲಯದ ನಿರ್ದೇಶಕರು ಪ್ರಸ್ತಾವನೆ ಸಲ್ಲಿಸಿದ್ದರು.

ಎಸ್‌ಬಿಐ ಬ್ಯಾಂಕ್‌ ಲಾಕರ್‌ಗಳ ಶುಲ್ಕದಲ್ಲಿ ಹೆಚ್ಚಳ : ಮಾರ್ಚ್‌ 31ರಿಂದಲೇ ಅನ್ವಯ

ಪ್ರಮಾಣಪತ್ರವೊಂದಕ್ಕೆ 40 ರೂ.ಶುಲ್ಕ
ಸಾರ್ವಜನಿಕರೇ ಖುದ್ದಾಗಿ ಕೇಂದ್ರಗಳಿಗೆ ಭೇಟಿ ನೀಡಿ ಪಡೆಯುವ ಪ್ರತಿಯೊಂದು ಪ್ರಮಾಣಪತ್ರಕ್ಕೆ 40 ರೂ. ಪಾವತಿಸಬೇಕಾಗುತ್ತದೆ. ಸಾಧಾರಣ ಅಂಚೆ ಮೂಲಕ ಪಡೆಯಲು 45 ರೂ., ನೋಂದಾಯಿತ ಅಂಚೆ 60 ರೂ. ಹಾಗೂ ಸ್ಪೀಡ್‌ ಅಂಚೆಗೆ 70 ರೂ. ಶುಲ್ಕ ನಿಗದಿ ಮಾಡಲಾಗಿದೆ.