ಈ ಹಿಂದೆಯೇ ಈ ಬೆಳವಣಿಗೆಯನ್ನು ಊಹಿಸಿದ್ದ ಬ್ಯಾಂಕುಗಳು ಈಗಾಗಲೇ ಸಾಕಷ್ಟು ಹಣವನ್ನು ಈ ಎನ್‌ಪಿಎಗಾಗಿ ಎತ್ತಿಟ್ಟಿವೆ. ಆದರೆ ಎನ್‌ಪಿಎ ಘೋಷಣೆಯ ನಂತರ ಕಂಪನಿಯ ವಿರುದ್ಧ ಯಾವುದೇ ಪೂರ್ವಭಾವಿ ಕ್ರಮವನ್ನು ತೆಗೆದುಕೊಳ್ಳಲು ನಾವು ಬಯಸುವುದಿಲ್ಲ ಎಂದು ಬ್ಯಾಂಕರ್‌ಗಳು ಹೇಳಿದ್ದು, ಈ ರೀತಿ ಕ್ರಮ ಕೈಗೊಂಡಲ್ಲಿ ಕಂಪನಿ ತನ್ನ ಮೌಲ್ಯವನ್ನೇ ಕಳೆದುಕೊಳ್ಳಬಹುದು ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.
ಅಂಬಾನಿಯೂ ಇಲ್ಲ, ಅಮೆಜಾನೂ ಇಲ್ಲ; ಸಾಲ ಕಟ್ಟಲಾಗದೆ ಸಂಕಷ್ಟಕ್ಕೆ ಸಿಲುಕಿದ ಫ್ಯೂಚರ್ ಗ್ರೂಪ್!
“ಒಂದೇ ವಿಷಯ ಏನೆಂದರೆ, ಎನ್‌ಪಿಎ ಎಂದು ಗುರುತಿಸಿದ ಮೇಲೆಯೂ ಫ್ಯೂಚರ್ ಗ್ರೂಪ್ ವಿರುದ್ಧ ತೆಗೆದುಕೊಳ್ಳಬೇಕಾದ ಮುಂದಿನ ಕ್ರಮವನ್ನು ಸ್ಥಗಿತಗೊಳಿಸಲಾಗಿದೆ. ಏಕೆಂದರೆ ಕಾರ್ಯಸಾಧು ಯೋಜನೆಯನ್ನು ಹಂಚಿಕೊಳ್ಳಲು ಮಾಲೀಕರಿಗೆ ಅವಕಾಶವನ್ನು ನೀಡಬೇಕು ಎಂದು ಭಾವಿಸುತ್ತೇವೆ,” ಎಂದು ಇನ್ನೋರ್ವ ಬ್ಯಾಂಕರ್ ಹೇಳಿದ್ದಾರೆ.
“ಒಂದು ಕಾರ್ಯಸಾಧ್ಯವಾದ ಯೋಜನೆಯನ್ನು ನೀಡುವಂತೆ ಕಂಪನಿಗೆ ಹೇಳಲಾಗಿದೆ. ಮತ್ತು ಅವರು ಅದರ ಮೇಲೆ ಕೆಲಸ ಮಾಡುತ್ತಿದ್ದಾರೆ ಎಂದು ಭಾವಿಸಿದ್ದೇವೆ,” ಎಂದು ಅವರು ತಿಳಿಸಿದ್ದಾರೆ.
ಅಮೆಜಾನ್ – ಅಂಬಾನಿ ಸ್ಪರ್ಧೆಯಲ್ಲಿ ಬಡವಾದ ಫ್ಯೂಚರ್ ಗ್ರೂಪ್, ಕಂಪನಿಗೆ ದಿವಾಳಿಯ ಆತಂಕ!
ಜನವರಿಯಲ್ಲಿ ಫ್ಯೂಚರ್ ರೀಟೇಲ್ ಲಿಮಿಟೆಡ್ (ಎಫ್‌ಆರ್‌ಎಲ್) ಬ್ಯಾಂಕ್‌ಗಳು ಮತ್ತು ಸಾಲದಾತರಿಗೆ 3,494.56 ಕೋಟಿ ರೂ. ಪಾವತಿಸಬೇಕಿತ್ತು. ಆದರೆ ಕಂಪನಿಯನ್ನು ಮಾರಾಟ ಮಾಡಿ ಹಣ ಪಾವತಿಸಲು ಹೊರಟಿದ್ದ ಮಾಲೀಕ ಕಿಶೋರ್ ಬಿಯಾನಿಗೆ ಇತ್ತ ಕಂಪನಿಯನ್ನೂ ಮಾರಾಟ ಮಾಡಲಾಗದೆ, ಅತ್ತ ಹಣವನ್ನೂ ಪಾವತಿಸಲು ಸಾಧ್ಯವಾಗಿಲ್ಲ. ಹೀಗಾಗಿ ಸದ್ಯ ದಾರಿ ಕಾಣದಾಗಿದ್ದಾರೆ.
ಕಿಶೋರ್ ಬಿಯಾನಿ ನೇತೃತ್ವದ ಫ್ಯೂಚರ್ ಗ್ರೂಪ್ ಸಂಸ್ಥೆಯು ಅಮೆಜಾನ್‌ನೊಂದಿಗೆ ನಡೆಯುತ್ತಿರುವ ವ್ಯಾಜ್ಯದಿಂದಾಗಿ ಆಸ್ತಿಗಳನ್ನು ಮಾರಾಟ ಮಾಡಲು ಸಾಧ್ಯವಾಗಿಲ್ಲ. ಇದರಿಂದ ತಮ್ಮ ಯೋಜನೆಗಳ ಮೇಲೆ ನೇರ ಪರಿಣಾಮ ಬೀರಿದೆ ಎಂದು ಹೇಳಿತ್ತು. ನಂತರ ಸುಪ್ರೀಂ ಕೋರ್ಟ್‌ಗೆ ಹೋಗಿದ್ದ ಕಂಪನಿ ತಮ್ಮ ಖಾತೆಗಳನ್ನು ಎನ್‌ಪಿಎ ಎಂದು ಘೋಷಿಸದಂತೆ ಸಾಲದಾತರಿಗೆ ಸೂಚನೆ ನೀಡುವಂತೆ ಮನವಿ ಮಾಡಿತ್ತು. ಜತೆಗೆ ಸಾಲ ಪಾವತಿ ಮಾಡಲು ಇನ್ನೂ ಹೆಚ್ಚಿನ ಸಮಯ ನೀಡುವಂತೆ ಕೋರಿಕೊಂಡಿತ್ತು.
ಅಮೆಜಾನ್‌ನ ತಕರಾರುಗಳನ್ನು ರದ್ದುಗೊಳಿಸಲು ಸಿಸಿಐ ಆದೇಶ ಬಳಸಲು ಮುಂದಾದ ಫ್ಯೂಚರ್ ಗ್ರೂಪ್
ಕೊರೊನಾ ಹಿನ್ನೆಲೆಯಲ್ಲಿ ಆರ್‌ಬಿಐ ಈ ಹಿಂದೆ ಸಾಲ ಪುನರ್‌ರಚನೆಗೆ ಅವಕಾಶ ಕಲ್ಪಿಸಿದ್ದಾಗ ಆಗಸ್ಟ್ 6, 2020ರಂದು ಎಫ್‌ಆರ್‌ಎಲ್ ಈ ಸೌಲಭ್ಯವನ್ನು ಪಡೆದುಕೊಂಡು ಡಿಸೆಂಬರ್ 31, 2021 ರಂದು ಅಥವಾ ಅದಕ್ಕೂ ಮೊದಲು ಒಟ್ಟು 3,494.56 ಕೋಟಿ ರೂ. ಪಾವತಿಸುವ ಯೋಜನೆಯನ್ನು ಆಯ್ಕೆ ಮಾಡಿಕೊಂಡಿತ್ತು.
ಆದರೆ ಅಂದುಕೊಂಡಂತೆ ಯಾವುದೂ ನಡೆಯದ ಹಿನ್ನೆಲೆಯಲ್ಲಿ ಫ್ಯೂಚರ್ ಗ್ರೂಪ್ ಸಾಲವನ್ನು ಬಾಕಿ ಉಳಿಸಿಕೊಂಡಿದೆ. ಬ್ಯಾಂಕ್‌ ಆಫ್‌ ಇಂಡಿಯಾ ಸಾಲ ನೀಡಿರುವ ಬ್ಯಾಂಕ್‌ಗಳನ್ನು ಮುನ್ನಡೆಸುತ್ತಿದ್ದು, ಅದು ಮೂರನೇ ತ್ರೈಮಾಸಿಕದಲ್ಲಿ ತನ್ನ ಲಾಭದಲ್ಲಿ ಶೇ. 47ರಷ್ಟು ಹಣವನ್ನು ಫ್ಯೂಚರ್ ಗ್ರೂಪ್‌ನ ಎನ್‌ಪಿಎಗಾಗಿಯೇ ತೆಗೆದಿಟ್ಟಿದೆ.
ಈ ಕುರಿತು ಸುಪ್ರೀಂ ಕೋರ್ಟ್‌ಗೆ ಪ್ರತಿಕ್ರಿಯೆ ನೀಡಿದ್ದ ಬ್ಯಾಂಕ್‌ಗಳು ಎಫ್‌ಆರ್‌ಎಲ್‌ಗೆ ನೀಡಿದ ಹಣವು ಠೇವಣಿದಾರರಿಗೆ ಸೇರಿದ್ದು, ಸಾರ್ವಜನಿಕ ಹಿತಾಸಕ್ತಿ ಕಾಪಾಡಲು ಕಂಪನಿಯ ಸಂಪೂರ್ಣ ಆಸ್ತಿಯನ್ನು ಅಮೆಜಾನ್ ಮತ್ತು ರಿಲಯನ್ಸ್‌ಗೆ 17,000 ರೂ. ಮೀಸಲು ಬೆಲೆಯೊಂದಿಗೆ ಮುಕ್ತ ಬಿಡ್‌ಗೆ ಒಳಪಡಿಸಬಹುದು ಎಂದು ತಿಳಿಸಿದ್ದವು.
ಇದಕ್ಕೂ ಮೊದಲು, ಫೆಬ್ರವರಿ 1 ರಂದು ನೀಡಿದ ತೀರ್ಪಿನಲ್ಲಿ ಸುಪ್ರೀಂ ಕೋರ್ಟ್ ದೆಹಲಿ ಹೈಕೋರ್ಟ್‌ ನೀಡಿದ್ದ ಮೂರು ಆದೇಶಗಳನ್ನು ರದ್ದುಗೊಳಿಸಿತ್ತು. ಈ ಆದೇಶದಲ್ಲಿ ಎಫ್‌ಆರ್‌ಎಲ್ ಮತ್ತು ಅದರ ನಿರ್ದೇಶಕರ ಆಸ್ತಿಗಳನ್ನು ಜಪ್ತಿ ಮಾಡುವುದು ಹಾಗೂ ರಿಲಯನ್ಸ್ ರಿಟೇಲ್‌ನೊಂದಿಗೆ ವಿಲೀನ ಒಪ್ಪಂದಕ್ಕೆ ತಡೆಯಾಗಿರುವ ಅಂತಿಮ ಆರ್ಬಿಟ್ರಲ್‌ ತೀರ್ಪಿಗೆ ತಡೆಯಾಜ್ಞೆ ನೀಡಲು ನಿರಾಕರಿಸಲಾಗಿತ್ತು. ಇದನ್ನು ಸುಪ್ರೀಂ ಕೋರ್ಟ್ ರದ್ದುಗೊಳಿಸಿ ಹೊಸ ತೀರ್ಪು ನೀಡಲು ಆದೇಶಿಸಿತ್ತು.
2020ರ ಆಗಸ್ಟ್‌ನಲ್ಲಿ ಫ್ಯೂಚರ್ ಗ್ರೂಪ್ ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್‌ನ ಅಂಗಸಂಸ್ಥೆಯಾದ ರಿಲಯನ್ಸ್ ರಿಟೇಲ್ ವೆಂಚರ್ಸ್ ಲಿಮಿಟೆಡ್‌ಗೆ ಚಿಲ್ಲರೆ ಮತ್ತು ಸಗಟು ವ್ಯಾಪಾರ ಹಾಗೂ ಲಾಜಿಸ್ಟಿಕ್ಸ್ ಮತ್ತು ವೇರ್‌ಹೌಸಿಂಗ್ ವ್ಯವಹಾರವನ್ನು ಮಾರಾಟ ಮಾಡಲು 24,713 ಕೋಟಿ ರೂಪಾಯಿಗಳ ಒಪ್ಪಂದವನ್ನು ಘೋಷಿಸಿತ್ತು.
ಆದರೆ ಇದಕ್ಕೆ ಇ-ಕಾಮರ್ಸ್ ದೈತ್ಯ ಅಮೆಜಾನ್ ವಿರೋಧ ವ್ಯಕ್ತಪಡಿಸಿತ್ತು. ಫ್ಯೂಚರ್ ರೀಟೇಲ್‌ನಲ್ಲಿ ಷೇರುದಾರರಾಗಿರುವ ಫ್ಯೂಚರ್ ಕೂಪನ್ಸ್ ಪ್ರೈವೇಟ್ ಲಿಮಿಟೆಡ್ (ಎಫ್‌ಸಿಪಿಎಲ್)ನಲ್ಲಿ ಅಮೆಜಾನ್ ಶೇ. 49 ರಷ್ಟು ಷೇರುಗಳನ್ನು ಹೊಂದಿದ್ದು, ಇದನ್ನೇ ಮುಂದಿಟ್ಟುಕೊಂಡು ಒಪ್ಪಂದಕ್ಕೆ ವಿರೋಧ ವ್ಯಕ್ತಪಡಿಸುತ್ತಾ ಬಂದಿದೆ.
ಈ ವಿವಾದವು ಪ್ರಸ್ತುತ ಸುಪ್ರೀಂ ಕೋರ್ಟ್ ಮತ್ತು ಸಿಂಗಾಪುರ್ ಇಂಟರ್ನ್ಯಾಷನಲ್ ಆರ್ಬಿಟ್ರೇಶನ್ ಸೆಂಟರ್ (SIAC) ಮುಂದಿದ್ದು, ಅಂತಿಮ ತೀರ್ಪು ಹೊರಬೀಳಬೇಕಿದೆ.
ರಿಲಯನ್ಸ್ ರೀಟೇಲ್ ವೆಂಚರ್ಸ್ ಎರಡನೇ ಬಾರಿಗೆ ಫ್ಯೂಚರ್ ಗ್ರೂಪ್‌ನೊಂದಿಗಿನ 24,713 ಕೋಟಿ ರೂ. ಒಪ್ಪಂದವನ್ನು ಪೂರ್ಣಗೊಳಿಸುವ ಅವಧಿಯನ್ನು ಮಾರ್ಚ್ 31, 2022 ಕ್ಕೆ ಮುಂದೂಡಿದೆ. ಇನ್ನೂ ನಿಯಂತ್ರಕರು ಮತ್ತು ನ್ಯಾಯಾಂಗದಿಂದ ಅನುಮತಿ ದೊರೆಯಬೇಕಿರುವುದರಿಂದ ಅದು ಒಪ್ಪಂದವನ್ನು ಮುಂದೂಡಿದೆ.
ಅಕ್ಟೋಬರ್ 2020ರಲ್ಲಿ, ಅಮೆಜಾನ್ ಪರವಾಗಿ ಇಎ (ತುರ್ತು ಮಧ್ಯಸ್ಥಗಾರ) ಮೂಲಕ ಮಧ್ಯಂತರ ಆದೇಶವನ್ನು ನೀಡಲಾಗಿತ್ತು. ಈ ಆದೇಶದಲ್ಲಿ ಎಫ್‌ಆರ್‌ಎಲ್‌ಗೆ ಒಪ್ಪಂದದಲ್ಲಿ ಮುಂದುವರಿಯದಂತೆ ಸೂಚನೆ ನೀಡಲಾಗಿತ್ತು. ಆದರೆ ನಂತರ ಸ್ಪರ್ಧಾತ್ಮಕ ಆಯೋಗ ಫ್ಯೂಚರ್ ಕೂಪನ್ಸ್‌ನಲ್ಲಿ ಅಮೆಜಾನ್ ಮಾಡಿದ್ದ ಹೂಡಿಕೆಯ ವಿರುದ್ಧ ತೀರ್ಪು ನೀಡುವುದರೊಂದಿಗೆ, ಈ ಕಾನೂನು ಸಮರವೀಗ ನಿರ್ಣಾಯಕ ಘಟ್ಟಕ್ಕೆ ಬಂದು ತಲುಪಿದೆ. ತೀರ್ಪು ಅಮೆಜಾನ್, ಮುಕೇಶ್‌ ಅಂಬಾನಿ ಮೇಲೆ ಅಂತಹ ದೊಡ್ಡ ಪರಿಣಾಮ ಬೀರುವುದಿಲ್ಲವಾದರೂ ಸಾಲ ಸುಳಿಯಲ್ಲಿರುವ ಕಿಶೋರ್ ಬಿಯಾನಿಗೆ ಇದು ಅಳಿವು – ಉಳಿವಿನ ಪ್ರಶ್ನೆಯಾಗಿದೆ.
ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.
Read more
[wpas_products keywords=”deal of the day sale today offer all”]