ಕಾಶ್ಮೀರ ಕುರಿತು ಪೋಸ್ಟ್‌: ಹ್ಯುಂಡೈ, ಕಿಯಾ, ಕೆಎಫ್‌ಸಿ, ಪಿಜ್ಜಾ ಹಟ್ ವಿರುದ್ಧ ಎಂಸಿಎಗೆ ದೂರು

PTI

ನವದೆಹಲಿ: ಕಾಶ್ಮೀರ ಕುರಿತು ಪೋಸ್ಟ್‌ ಮಾಡಿದ ವಿಚಾರಕ್ಕೆ ಸಂಬಂಧಿಸಿದಂತೆ ಭಾರತದ ಖ್ಯಾತ ಸಂಸ್ಥೆಗಳಾದ ಹ್ಯುಂಡೈ, ಕಿಯಾ, ಕೆಎಫ್‌ಸಿ, ಪಿಜ್ಜಾ ಹಟ್ ವಿರುದ್ಧ  ವಕೀಲರೊಬ್ಬರು ಎಂಸಿಎ (ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ)ಗೆ ದೂರು ಸಲ್ಲಿಕೆ ಮಾಡಿದ್ದಾರೆ.

ಹ್ಯುಂಡೈ ಇಂಡಿಯಾ, ಕೆಐಎ ಇಂಡಿಯಾ, ಕೆಎಫ್‌ಸಿ ಇಂಡಿಯಾ ಮತ್ತು ಪಿಜ್ಜಾ ಹಟ್ ಇಂಡಿಯಾ ವಿರುದ್ಧ ದೆಹಲಿ ಮೂಲದ ವಕೀಲರು ದೂರು ದಾಖಲಿಸಿದ್ದು, ನಮ್ಮ ದೇಶದ ಸಾರ್ವಭೌಮತ್ವವನ್ನು ಪ್ರಶ್ನಿಸಿದ ಆರೋಪದ ಅಪರಾಧಕ್ಕಾಗಿ ಈ ಕಂಪನಿಗಳ ನೋಂದಣಿ ರದ್ದುಗೊಳಿಸುವಂತೆ ಮತ್ತು ಈ ಕಂಪನಿಗಳ ವಿರುದ್ಧ ಎಫ್‌ಐಆರ್ ದಾಖಲಿಸುವಂತೆ ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ (ಎಂಸಿಎ) ಮತ್ತು ದೆಹಲಿ ಪೊಲೀಸರಿಗೆ ಮನವಿ ಮಾಡಿದ್ದಾರೆ. .

ದೂರುದಾರ ವಕೀಲ ವಿನೀತ್ ಜಿಂದಾಲ್ ಅವರು ಈ ಕಂಪನಿಗಳು ಇತ್ತೀಚೆಗೆ ತಮ್ಮ ಸಾಮಾಜಿಕ ಮಾಧ್ಯಮ ಖಾತೆಯಲ್ಲಿ ಆಕ್ಷೇಪಾರ್ಹ ಹೇಳಿಕೆಗಳು ಮತ್ತು ನಮ್ಮ ದೇಶದ ಸಾರ್ವಭೌಮತೆಗೆ ಸವಾಲು ಹಾಕುವ ಪೋಸ್ಟ್‌ಗಳನ್ನು ಪೋಸ್ಟ್ ಮಾಡಿವೆ. ಈ ಕಂಪನಿಯ ಹೇಳಿಕೆಗಳು ಮತ್ತು ಪೋಸ್ಟ್‌ಗಳು ಬಹುತೇಕ ಟ್ವಿಟರ್ ಖಾತೆ ಬಳಕೆದಾರರಿಂದ ಖಂಡನೆಗೆ ಗುರಿಯಾಗುತ್ತಿವೆ ಎಂದು ದೂರುದಾರರು ಹೇಳಿದ್ದಾರೆ.

ಇದನ್ನೂ ಓದಿ: ಕಾಶ್ಮೀರದ ಪ್ರತ್ಯೇಕತಾವಾದ ಬೆಂಬಲಿಸಿದ್ದಕ್ಕೆ ಈಗ ಕೆಎಫ್ ಸಿಗೆ ಮಂಗಳಾರತಿ!

ಜಿಂದಾಲ್ ಈ ಕಂಪನಿಗಳನ್ನು ನೋಂದಣಿ ರದ್ದುಗೊಳಿಸಲು ಮತ್ತು ಭಾರತದಲ್ಲಿ ವ್ಯಾಪಾರ ಮಾಡುವುದನ್ನು ನಿಷೇಧಿಸಲು MCA ಗೆ ವಿನಂತಿಸಿದರು. ಅಲ್ಲದೆ IPC ಮತ್ತು IT ಕಾಯಿದೆಯ ಸೆಕ್ಷನ್ 121A,153, 153a,504,505 ಅಡಿಯಲ್ಲಿ ಅಪರಾಧಕ್ಕಾಗಿ ಸದರಿ ಕಂಪನಿಗಳ ವಿರುದ್ಧ FIR ದಾಖಲಿಸಲು ದೆಹಲಿ ಪೊಲೀಸರನ್ನು ಕೋರಿದ್ದಾರೆ. 

ದೂರಿನಲ್ಲಿರುವಂತೆ, ಈ ಬಹುರಾಷ್ಟ್ರೀಯ ಕಂಪನಿಗಳು ಪಾಕಿಸ್ತಾನದಲ್ಲಿ ವ್ಯಾಪಾರ ಲಾಭ ಗಳಿಸಲು ಭಾರತದ ಸಾರ್ವಭೌಮತ್ವವನ್ನು ಗುರಿಯಾಗಿಸಿಕೊಂಡು ವಿವಾದಾತ್ಮಕ ಪೋಸ್ಟ್ ಮಾಡುತ್ತಿರುವುದು ಅತ್ಯಂತ ಶೋಚನೀಯವಾಗಿದೆ. ಈ MNC ಗಳು ಭಾರತದ ಸಾರ್ವಭೌಮತೆ ಮತ್ತು ಸಮಗ್ರತೆಗೆ ಸವಾಲು ಹಾಕಲು ಲಕ್ಷಾಂತರ ಬಳಕೆದಾರರು ಬಳಕೆ ಮಾಡುವ ಸಾರ್ವಜನಿಕ ವೇದಿಕೆಗಳಲ್ಲಿ ಕ್ರೂರವಾದ ಹೇಳಿಕೆಗಳನ್ನು ನೀಡಿವೆ ಮತ್ತು ಅವರ ಕ್ರಮಗಳು ರಾಷ್ಟ್ರೀಯ ಗಲಭೆಗಳು, ಕೋಮು ಸೌಹಾರ್ದತೆ ಧಕ್ಕೆಗೆ ಕಾರಣವಾಗಬಹುದು ಮತ್ತು ಭಾರತದ ವಿರುದ್ಧ ಯುದ್ಧವನ್ನು ನಡೆಸುವ ಕ್ರಿಯೆಯಾಗಿದೆ ಎಂದು ಆರೋಪಿಸಿದ್ದಾರೆ.

ಇದನ್ನೂ ಓದಿ: ಸಾಮಾಜಿಕ ಜಾಲತಾಣದಲ್ಲಿ #BoycottHyundai ಅಭಿಯಾನ ಏನು ಇದಕ್ಕೆ ಕಾರಣ?: ವಿವರ ಹೀಗಿದೆ…

ಕಾಶ್ಮೀರವು ಕಳೆದ ಹಲವು ವರ್ಷಗಳಿಂದ ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸೂಕ್ಷ್ಮ ವಿಷಯವಾಗಿದೆ ಮತ್ತು ಸಂಘರ್ಷಕ್ಕೆ ಕಾರಣವಾಗಿದೆ ಎಂದು ಎಲ್ಲರಿಗೂ ತಿಳಿದಿದೆ. ಕಾಶ್ಮೀರ ಭಾರತದ ಅವಿಭಾಜ್ಯ ಅಂಗ ಎಂಬುದು ಜಗತ್ತಿಗೆ ಗೊತ್ತಿರುವ ವಿಚಾರ. ಆದರೆ ಈ ಕಂಪನಿಗಳು ತಮ್ಮ ಸ್ವಹಿತಾಸಕ್ತಿ ಮತ್ತು ಪಾಕಿಸ್ತಾನದಿಂದ ವ್ಯಾಪಾರ ಲಾಭ ಗಳಿಸಲು ಈಗ ಸಾಮಾಜಿಕ ಮಾಧ್ಯಮ ವೇದಿಕೆಯ ಪೋಸ್ಟ್‌ಗಳನ್ನು ತಮ್ಮ ಬೆಂಬಲವನ್ನು ತೋರಿಸಲು ಮತ್ತು ಕಾಶ್ಮೀರಕ್ಕಾಗಿ ಆಕ್ಷೇಪಾರ್ಹ ಉಲ್ಲೇಖಗಳನ್ನು ಬಳಸಿ ಪ್ರಚಾರ ಮಾಡುವ ಮಟ್ಟಕ್ಕೆ ಹೋಗಿವೆ ಎಂದು ಆರೋಪಿಸಿದ್ದಾರೆ.