ಹೈಲೈಟ್ಸ್‌:
- ಇಂದ್ರಾ ನೂಯಿ ಹಾದಿಯಲ್ಲಿ ಭಾರತದ ಲೀನಾ ನಾಯರ್‌
- ಯುನಿಲೆವರ್‌ನಲ್ಲಿ ಎಚ್‌ಆರ್‌ ಮುಖ್ಯಸ್ಥರಾಗಿರುವ ಲೀನಾ ನಾಯರ್‌
- ಫ್ರಾನ್ಸ್‌ ಮೂಲದ ಲಕ್ಸುರಿ ಫ್ಯಾಶನ್‌ ಗ್ರೂಪ್‌ ಶನೆಲ್‌ನ ನೂತನ ಸಿಇಒ ಆಗಿ ನೇಮಕ
ಇದರೊಂದಿಗೆ ಪೆಪ್ಸಿಕೊದ ಸಿಇಒ ಆಗಿದ್ದ ಇಂದ್ರಾ ನೂಯಿ ಅವರಂತೆ ಜಾಗತಿಕ ಮಟ್ಟದ ಕಂಪನಿಗೆ ಸಿಇಒ ಆಗಿ ಹೊರಹೊಮ್ಮಿದ ಎರಡನೇ ಭಾರತೀಯ ಮಹಿಳೆಯಾಗಿ ಲೀನಾ ನಾಯರ್‌ ಮೂಡಿಬಂದಿದ್ದಾರೆ.
ಎಫ್‌ಎಂಸಿಜಿ ದಿಗ್ಗಜ ಯುನಿಲೆವರ್‌ನ ಮಾನವ ಸಂಪನ್ಮೂಲ ವಿಭಾಗದ (ಎಚ್‌ಆರ್‌) ಮುಖ್ಯಸ್ಥರಾಗಿರುವ ಲೀನಾ ನಾಯರ್‌, ಮಹಾರಾಷ್ಟ್ರದ ಕೊಲ್ಲಾಪುರದಲ್ಲಿ ಹುಟ್ಟಿ ಬೆಳೆದವರು. ವಿಶೇಷವೆಂದರೆ ಲೀನಾ ನಾಯರ್‌ ಅವರ ಮಾರ್ಗದರ್ಶಕಿ ಇಂದ್ರಾ ನೂಯಿ ಅವರೇ ಆಗಿದ್ದಾರೆ. ಶನೆಲ್‌ನ ಸಿಇಒ ಆಗಿ ಲೀನಾ ನಾಯರ್‌ ಅವರು ಲಂಡನ್‌ನಲ್ಲಿರುವ ಕಚೇರಿಯಿಂದ ಕಾರ್ಯನಿರ್ವಹಿಸಲಿದ್ದಾರೆ.
ಶನೆಲ್‌ ಕಂಪನಿಯ ಗ್ಲೋಬಲ್‌ ಸಿಇಒ ಆಗಿ ಆಯ್ಕೆ ಆಗಿರುವುದಕ್ಕೆ ಸಂತಸ ವ್ಯಕ್ತಪಡಿಸಿರುವ ಲೀನಾ ನಾಯರ್‌, ಇದು ತಮಗೆ ಲಭಿಸಿರುವ ಅತಿ ದೊಡ್ಡ ಗೌರವವಾಗಿದ್ದು, ಇದಕ್ಕಾಗಿ ನಾನು ಆಭಾರಿಯಾಗಿರುವೆ ಎಂದು ತಿಳಿಸಿದ್ದಾರೆ.
50 ವರ್ಷಕ್ಕೆ ಸ್ಟಾರ್ಟಪ್‌ ಆರಂಭಿಸಿ 1 ಲಕ್ಷ ಕೋಟಿ ರೂ. ಮೌಲ್ಯದ ಕಂಪನಿ ಕಟ್ಟಿದ ಫಲ್ಗುಣಿ ನಾಯರ್‌!
ಯುನಿಲೆವರ್‌ನಲ್ಲಿ ಕಳೆದ 30 ವರ್ಷಗಳಿಂದ ಸುದೀರ್ಘ ಅವಧಿಯಲ್ಲಿ ಅನೇಕ ವಿಷಯಗಳನ್ನು ಕಲಿತುಕೊಂಡಿದ್ದೇನೆ. ಬೆಳವಣಿಗೆಗೆ ವಿಫುಲ ಅವಕಾಶಗಳೂ ಲಭಿಸಿತ್ತು ಎಂದು ಅವರು ಸ್ಮರಿಸಿದ್ದಾರೆ. ಮುಂದಿನ ವರ್ಷದ ಆರಂಭದಲ್ಲಿ ಅಂದರೆ 2022ರ ಜನವರಿಯಲ್ಲಿ ಲೀನಾ ನಾಯರ್‌ ಅವರು ಯುನಿಲಿವರ್‌ನಿಂದ ನಿರ್ಗಮಿಸಲಿದ್ದಾರೆ.
ಕೊಲ್ಲಾಪುರದ ಹಾಲಿ ಕ್ರಾಸ್‌ ಕಾನ್ವೆಂಟ್‌ ಸ್ಕೂಲ್‌ನಲ್ಲಿ ಓದಿರುವ ಲೀನಾ ನಾಯರ್‌, ಸಾಂಗ್ಲಿಯ ವಾಲ್‌ಚಂದ್‌ ಕಾಲೇಜ್‌ ಆಫ್‌ ಎಂಜಿನಿಯರಿಂಗ್‌ನಲ್ಲಿ ಟೆಲಿಕಮ್ಯುನಿಕೇಶನ್ಸ್‌ ವಿಷಯದಲ್ಲಿ ಎಂಜಿನಿಯರಿಂಗ್‌ ಪದವಿ ಗಳಿಸಿದರು. ಹಿಂದೂಸ್ಥಾನ್‌ ಯುನಿಲೆವರ್‌ ಲಿ. (ಎಚ್‌ಯುಎಲ್‌ – ಯುನಿಲೆವರ್‌ನ ಭಾರತೀಯ ವಿಭಾಗ) 1992ರಲ್ಲಿ ಟ್ರೈನಿ ಆಗಿ ಸೇರಿದ್ದರು. ಇದೀಗ ಅದೇ ಸಂಸ್ಥೆಯಲ್ಲಿ ಉನ್ನತ ಹುದ್ದೆಗೇರಿದ್ದಾರೆ.