RRR ಸಿನಿಮಾದಲ್ಲಿ ರಾಮ್ ಚರಣ್ ತೇಜ, ಜ್ಯೂ ಎನ್‌ಟಿಆರ್; ಹೀರೋ ಯಾರು ಎಂದಿದ್ದಕ್ಕೆ ರಾಜಮೌಳಿ ಕೊಟ್ಟ ಉತ್ತರ ಏನಾಗಿತ್ತು?

ದೊಡ್ಡ ತಾರಾ ಬಳಗ, ಖ್ಯಾತ ನಿರ್ದೇಶಕ, ಟ್ರೈಲರ್‌, ಹಾಡುಗಳಿಂದ ಭಾರೀ ನಿರೀಕ್ಷೆ ಮೂಡಿಸಿರುವ RRR ಸಿನಿಮಾ ಜನವರಿ 7ರಂದು ವಿಶ್ವದಾದ್ಯಂತ ಕನ್ನಡ, ತೆಲುಗು, ತಮಿಳು, ಮಲಯಾಳಂ, ಹಿಂದಿ ಭಾಷೆಯಲ್ಲಿ ರಿಲೀಸ್ ಆಗಲಿದೆ. ಹೀಗಾಗಿ ಈ ಚಿತ್ರದ ಪ್ರಚಾರ ಮಾಡಲು ಬೆಂಗಳೂರಿಗೆ ಆಗಮಿಸಿ, ಚಿತ್ರತಂಡ ಸುದ್ದಿಗೋಷ್ಠಿ ನಡೆಸಿ ಸಿನಿಮಾ ಬಗ್ಗೆ ಮಾಧ್ಯಮದವರ ಒಟ್ಟಿಗೆ ಒಂದಷ್ಟು ಮಾಹಿತಿ ಹಂಚಿಕೊಂಡರು.

ಜ್ಯೂನಿಯರ್ ಎನ್‌ಟಿಆರ್, ಆಲಿಯಾ ಭಟ್, ಅಜಯ್ ದೇವಗನ್, ರಾಮ್ ಚರಣ್ ತೇಜ ಮುಂತಾದವರು ನಟಿಸಿರುವ RRR ಸಿನಿಮಾಕ್ಕೆ ಎಸ್ ಎಸ್ ರಾಜಮೌಳಿ ನಿರ್ದೇಶನ ಮಾಡಿದ್ದಾರೆ. ರಾಜಮೌಳಿ ಅವರಿಗೆ ಈ ಸಿನಿಮಾದ ಹೀರೋ ಯಾರು ಎಂಬ ಪ್ರಶ್ನೆ ಎದುರಾಗಿದೆ. ಅದಕ್ಕೆ ಅವರು ಉತ್ತರವನ್ನು ನೀಡಿದ್ದಾರೆ. ನಾನೇ ಹೀರೋ..ಎಂದು ಆರಂಭದಲ್ಲಿ ಅವರು ಕಾಮಿಡಿ ಮಾಡಿದ್ದಾರೆ. ತದನಂತರದಲ್ಲಿ “ಜ್ಯೂನಿಯರ್ ಎನ್‌ಟಿಆರ್‌ ಮತ್ತು ರಾಮ್‌ಚರಣ್‌ ತೇಜ ನಟಿಸಿರುವ ‘ಆರ್‌ಆರ್‌ಆರ್‌’ ಸಿನಿಮಾಗೆ ಅವರಿಬ್ಬರೂ ನಾಯಕರಲ್ಲ, ಬದಲಿಗೆ ಆ ಸಿನಿಮಾದ ಕಥೆ ಮತ್ತು ಅವರಿಬ್ಬರನ್ನು ಹಾಕಿಕೊಂಡು ಸಿನಿಮಾ ಮಾಡಬೇಕು ಎಂದು ಬಂದ ಆಲೋಚನೆಯೇ ನಾಯಕ” ಎಂದು ಹೇಳಿದ್ದಾರೆ ನಿರ್ದೇಶಕ ರಾಜಮೌಳಿ.

‘ಈ ಸಿನಿಮಾದಲ್ಲಿಇಬ್ಬರು ಮಾಸ್‌ ಹೀರೋಗಳಿದ್ದಾರೆ. ಆದರೆ ಅವರಿಗಿಂತಲೂ ಸಿನಿಮಾ ಕಥೆ ಮತ್ತು ಆಲೋಚನೆಯೇ ಮುಖ್ಯ. ‘ಬಾಹುಬಲಿ’ ಸಿನಿಮಾವನ್ನು ಕನ್ನಡ ಬಿಟ್ಟು ಉಳಿದೆಲ್ಲಾಭಾಷೆಗೂ ಡಬ್‌ ಮಾಡಿ ಬಿಡುಗಡೆ ಮಾಡಿದಾಗ ನನಗೆ ಹಲವು ಜನ ಸೋಷಿಯಲ್‌ ಮೀಡಿಯಾದಲ್ಲಿ ಮೆಸೇಜ್‌ ಮಾಡಿದ್ದರು. ಕನ್ನಡ ಭಾಷೆಗೆ ಯಾಕೆ ಮಾಡಲಿಲ್ಲಎಂದು ಪ್ರಶ್ನೆ ಕೇಳಿದ್ದರು. ನಾನು ಮೂಲತಃ ಕನ್ನಡದವನು. ಈ ಬಾರಿ ಕನ್ನಡಕ್ಕೆ ಡಬ್‌ ಮಾಡಲೇಬೇಕು ಎಂದು ತೀರ್ಮಾನಿಸಿ ಮಾಡಿಸಿದ್ದೇನೆ’ ಎಂದು ಹೇಳಿದರು.

ಈ ಸಿನಿಮಾದ ಟ್ರೈಲರ್‌ಗೆ ಮಾತ್ರವಲ್ಲದೆ, ಇಡೀ ಸಿನಿಮಾಗೂ ನಟರಾದ ಜೂ. ಎನ್‌ಟಿಆರ್‌ ಮತ್ತು ರಾಮ್‌ಚರಣ್‌ ಕನ್ನಡದಲ್ಲಿಯೇ ಡಬ್ಬಿಂಗ್‌ ಮಾಡಿದ್ದಾರೆ. ಈ ವಿಷಯವನ್ನು ಇಬ್ಬರೂ ನಟರು ಖುಷಿಯಿಂದ ಹೇಳಿಕೊಂಡರು. ‘ನಮ್ಮಿಬ್ಬರಿಗೂ ಕನ್ನಡದಲ್ಲಿಡಬ್‌ ಮಾಡಲು ಆಜಾದ್‌ ವರದರಾಜ್‌ ಎಂಬವರು ಸಹಾಯ ಮಾಡಿದರು. ತೆರೆ ಮೇಲೆ ನಾವೇನಾದರೂ ಉತ್ತಮವಾದ ಕನ್ನಡ ಮಾತನಾಡಿದ್ದೇವೆ ಎಂದರೆ ಅದರ ಸಂಪೂರ್ಣ ಕ್ರೆಡಿಟ್‌ ವರದರಾಜ್‌ ಅವರಿಗೆ ಹೋಗುತ್ತದೆ. ಗುರುಗಳ ರೀತಿ ಅವರು ನಮಗೆ ಹೇಳಿಕೊಟ್ಟು ಡಬ್‌ ಮಾಡಿಸಿದರು’ ಎಂದರು ರಾಮ್‌ಚರಣ್‌ ಮತ್ತು ಜೂ.ಎನ್‌ಟಿಆರ್‌.

ಹಿಂದಿನ ಎಲ್ಲಾ ದಾಖಲೆಗಳು ಉಡೀಸ್: ಹೊಸ ಇತಿಹಾಸ ಸೃಷ್ಟಿಸಿದ RRR ಟ್ರೈಲರ್..!

‘ಬೆಂಗಳೂರಿಗೆ ಆಗಾಗ ಬರುತ್ತಿರುತ್ತೇನೆ. ದಕ್ಷಿಣ ಭಾರತದ ಸಿನಿಮಾ ವಿಚಾರಕ್ಕೆ ಬಂದಿದ್ದು ಈಗ ಮಾತ್ರ. ಬೆಂಗಳೂರು ಕೂಲ್‌ ಸಿಟಿ’ ಎಂದು ಹೇಳಿದರು ನಟಿ ಅಲಿಯಾ ಭಟ್‌.

ಕನ್ನಡದಲ್ಲಿ ಇಡೀ ಸಿನಿಮಾ ಡಬ್ ಮಾಡಿದ ತಾರಕ್!
RRR ಟ್ರೈಲರ್‌ನಲ್ಲಿ ಜ್ಯೂನಿಯರ್ ಎನ್‌ಟಿಆರ್ ಹಾಗೂ ರಾಮ್ ಚರಣ್ ಕನ್ನಡದಲ್ಲಿಯೇ ಡಬ್ ಮಾಡಿರುವುದು ಗೊತ್ತಾಗಿತ್ತು. ಇವರಿಬ್ಬರ ಕನ್ನಡ ಧ್ವನಿ ಕೇಳಿ ಕನ್ನಡಿಗರು ಹಿರಹಿರ ಹಿಗ್ಗಿದ್ದಾರೆ. ಕೇವಲ ಟ್ರೈಲರ್‌ನಲ್ಲಿ ಮಾತ್ರವಲ್ಲ, ಇಡೀ ಸಿನಿಮಾವನ್ನೂ ಕನ್ನಡದಲ್ಲಿಯೇ ಡಬ್ ಮಾಡಿದ್ದೇನೆ ಅಂತಾ ಎನ್‌ಟಿಆರ್ ನಗುತ್ತಲೇ ಉತ್ತರಿಸಿದರು.

RRR Trailer: ಮತ್ತೊಮ್ಮೆ ಕನ್ನಡಿಗರ ಮನಗೆದ್ದ ಜೂ.ಎನ್‌ಟಿಆರ್, ರಾಮ್‌ ಚರಣ್, ರಾಜಮೌಳಿ!

ಕನ್ನಡ ಸಿನಿಮಾ ಮಾಡ್ತಾರೆ ರಾಮ್ ಚರಣ್ ತೇಜ
ರಾಜಮೌಳಿ ಡೈರೆಕ್ಷನ್ ಬಗ್ಗೆ ಹೊಗಳಿಕೆ ಮಾತುಗಳನ್ನಾಡಿದ ಮೆಗಾ ಪವರ್ ಸ್ಟಾರ್ ರಾಮ್ ಚರಣ್ ಕನ್ನಡ ಸಿನಿಮಾ ಮಾಡ್ತೇನೆ. ಒಳ್ಳೆ ಕಥೆ ಹಾಗೂ ಡೈರೆಕ್ಟರ್ ಸಿಕ್ಕರೇ ಕನ್ನಡ ಸಿನಿಮಾ ಮಾಡ್ತೇನೆ ಅಂತಾ ಮನದಾಳದ ಮಾತು ಹಂಚಿಕೊಂಡರು.

ಕೆವಿಎನ್ ಜೊತೆ ರಾಜಮೌಳಿ ಸಿನಿಮಾ!
RRR ಸಿನಿಮಾದ ಕನ್ನಡ ವಿತರಣೆ ಹಕ್ಕು ಪ್ರತಿಷ್ಠಿತ ಪ್ರೊಡಕ್ಷನ್ ಹೌಸ್ KVN ಪಾಲಾಗಿದೆ. ಕೋಟಿ ಕೋಟಿ ಕೊಟ್ಟು RRR ವಿತರಣೆ ಹಕ್ಕು ಪಡೆದಿರುವ KVN ಜೊತೆ ರಾಜಮೌಳಿ ಸಿನಿಮಾ ಮಾಡ್ತಾರಾ ಅನ್ನೋ ಪತ್ರಕರ್ತರೊಬ್ಬರ ಪ್ರಶ್ನೆ ಜಕ್ಕಣ್ಣಗಾರು, ಸಿನಿಮಾ ಮಾಡುವ ಇಂಗಿತ ವ್ಯಕ್ತಪಡಿಸಿದ್ರು.

ಕನ್ನಡ ರೈಟ್ಸ್ ಕಾಂಪಿಟೇಷನ್ ಇತ್ತು !
RRR ಸಿನಿಮಾದ ಕನ್ನಡ ವಿತರಣೆ ಹಕ್ಕು ಪಡೆಯಲು ದೊಡ್ಡ ಬೇಡಿಕೆ ಇತ್ತು. ಆ ಸ್ಪರ್ಧೆ ನಡುವೆ KVN, RRR ಸಿನಿಮಾದ ವಿತರಣೆ ಹಕ್ಕನ್ನು ಖರೀದಿ ಮಾಡಿದೆ. ಕೆವಿಎನ್ ಸಂಸ್ಥೆಯ ವೆಂಕಟ್ ಮಾತನಾಡಿ “ಬಾಹುಬಲಿ ಸಿನಿಮಾವನ್ನು ಕರುನಾಡ ಮಂದಿಗೆ ತೋರಿಸುವ ಇಚ್ಛೆ ಇತ್ತು. ಆದರೆ ಬಾಹುಬಲಿ ಕನ್ನಡದಲ್ಲಿ ಬರಲಿಲ್ಲ. ಆದರೆ RRR ಸಿನಿಮಾ ಕನ್ನಡಕ್ಕೆ ಡಬ್ ಆಗಿದೆ. ಹೀಗಾಗಿ ತಾವೇ ಕನ್ನಡ ವಿತರಣೆ ಹಕ್ಕನ್ನು ಎಷ್ಟೇ ಸ್ಪರ್ಧೆಯಿದ್ದರೂ ಕೂಡ ಖರೀದಿ ಮಾಡಿರುವುದಾಗಿ ಹೇಳಿದ್ದಾರೆ.