ಮೈಸೂರು: ಆಂಧ್ರಪ್ರದೇಶದಲ್ಲಿ ಹೆಚ್ಚು ಕಾಣಸಿಗುವ ರೇಸಸ್‌ ಮಂಕಿ (ರೇಸಸ್‌ ಮೆಕಾಕ್‌) ನಾಗರಹೊಳೆ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಕಾಣಿಸಿಕೊಂಡು ಅಚ್ಚರಿ ಮೂಡಿಸಿದೆ. ವನ್ಯಜೀವಿ ಪ್ರಿಯರು ಹಾಗೂ ಅರಣ್ಯ ಸಿಬ್ಬಂದಿ ಈ ಅಪರೂಪದ ಮಂಕಿಯನ್ನು ಕಣ್ತುಂಬಿಕೊಂಡು ಸಂತಸಪಟ್ಟಿದ್ದಾರೆ.
ಹುಣಸೂರು ತಾಲೂಕಿನ ವೀರನ ಹೊಸಳ್ಳಿ ಗೇಟ್‌ನಿಂದ ಕುಟ್ಟಿಗೆ ತೆರಳುವ ಮಾರ್ಗದಲ್ಲಿ ಮೂರ್ಕಲ್‌ ಸಮೀಪ ಮುಖ್ಯ ರಸ್ತೆಯಲ್ಲೇ ಅರಣ್ಯ ಇಲಾಖೆ ಸಫಾರಿ ಬಸ್‌ ಹಾಗೂ ಜೆಎಲ್‌ಆರ್‌ ಕಿಂಗ್ಸ್‌ನಿಂದ ಸಫಾರಿಗೆ ಬಂದಿದ್ದ ಪ್ರವಾಸಿಗರಿಗೆ ರೇಸಸ್‌ ಮಂಕಿ ದರ್ಶನ ನೀಡಿದೆ. ಸಾಮಾನ್ಯವಾಗಿ ಕರ್ನಾಟಕದ ಮೃಗಾಲಯಗಳಲ್ಲಿ ಮಾತ್ರ ಕಾಣ ಸಿಗುವ ಈ ರೇಸಸ್‌ ಮಂಕಿ ನಾಗರಹೊಳೆ ಅಭಯಾರಣ್ಯದಲ್ಲಿ ಕಾಣಿಸಿಕೊಂಡಿರುವುದು ಆಶ್ಚರ್ಯಕ್ಕೆ ಕಾರಣವಾಗಿದೆ. ಸಫಾರಿ ಬಸ್‌ನಲ್ಲಿದ್ದ ಕೆಲವು ವನ್ಯಜೀವಿ ಛಾಯಾಗ್ರಾಹಕರು ಸಮೀಪದಿಂದಲೇ ಅಪರೂಪದ ಅತಿಥಿಯನ್ನು ಕ್ಯಾಮೆರಾದಲ್ಲಿ ಸೆರೆ ಹಿಡಿದಿದ್ದಾರೆ.
ಕೋವಿಡ್ ನಿರ್ಬಂಧದ ಮಧ್ಯೆ ಕೋತಿ ಅಂತ್ಯಸಂಸ್ಕಾರದಲ್ಲಿ 1,500 ಮಂದಿ ಭಾಗಿ, ಇಡೀ ಗ್ರಾಮಕ್ಕೇ ತಿಥಿಯೂಟ!
ಏನಿದು ರೇಸಸ್‌ ಮಂಕಿ?: ಸ್ಥಳೀಯ ಕೋತಿಗಳಿಗೂ ಈ ರೇಸಸ್‌ ಮಂಕಿಗೂ ಸಾಕಷ್ಟು ವ್ಯತ್ಯಾಸವಿದೆ. ಇದರ ಹಿಂಭಾಗ ಕಂದು ಬಣ್ಣದಿಂದ ಕೂಡಿರುತ್ತದೆ. ಹೆಚ್ಚು ಕೂದಲು ಹೊಂದಿರುವ ಈ ಕೋತಿ, ತಲೆ ಮೇಲಿನ ಕೂದಲು ಕ್ಯಾಪ್‌ನಂತೆ ಕಾಣುತ್ತದೆ. ಬಾಲವೂ ಸ್ವಲ್ಪ ಚಿಕ್ಕದಾಗಿರುತ್ತದೆ. ಉತ್ತರ ಹಾಗೂ ಮಧ್ಯ ಭಾರತದಲ್ಲಿ ಸಾಮಾನ್ಯವಾಗಿ ಕಾಣ ಸಿಗುತ್ತದೆ. ಅದರಲ್ಲೂ ಆಂಧ್ರ ಹಾಗೂ ತೆಲಂಗಾಣದಲ್ಲಿ ಹೆಚ್ಚಾಗಿ ಕಂಡು ಬರುತ್ತವೆ. ಆದರೆ, ಇದೀಗ ನಾಗರಹೊಳೆಗೆ ರೇಸಸ್‌ ಮಂಕಿ ಹೇಗೆ ಬಂತು ಎಂಬುದು ಯಕ್ಷಪ್ರಶ್ನೆಯಾಗಿದೆ.
‘ಸದ್ಯ ನಾಗರಹೊಳೆಯಲ್ಲಿ ಕಾಣಿಸಿಕೊಂಡಿರುವ ರೇಸಸ್‌ ಮಂಕಿ ಒಂಟಿಯಾಗಿದೆ. ಬೇರೆ ಕೋತಿಗಳು ಇದನ್ನು ಸೇರಿಸಿಕೊಂಡಿಲ್ಲ ಎನಿಸುತ್ತದೆ. ನಾಗರಹೊಳೆಗೆ ಬಂದಿದ್ದಾದರೂ ಹೇಗೆ ಎಂಬ ಪ್ರಶ್ನೆ ಕಾಡತೊಡಗಿದೆ. ಆಂಧ್ರ ಇಲ್ಲವೇ ತೆಲಂಗಾಣದಿಂದ ಸರಕು ಸಾಗಣೆ ವಾಹನದಲ್ಲಿ ಬಂದಿರಬಹುದೇ ಎಂಬ ಅನುಮಾನವೂ ವ್ಯಕ್ತವಾಗುತ್ತಿದೆ. ನೆಲದ ಮೇಲೆ ಕುಳಿತು ಹುಲ್ಲು, ಹಣ್ಣು ತಿನ್ನುತ್ತವೆ. ಸಾಮಾನ್ಯವಾಗಿ ಬೃಹತ್‌ ವಾಹನಗಳಲ್ಲಿ ಆಹಾರ ಪದಾರ್ಥಗಳು ಇರಬಹುದೆಂದು ಮರದ ಮೇಲಿಂದ ಹಾರಿ ಕುಳಿತುಕೊಂಡು ನಾಗರಹೊಳೆಗೆ ಬಂದಿರುವ ಶಂಕೆಯೂ ಇದೆ’ ಎಂದು ವೈಲ್ಡ್‌ ಲೈಫ್‌ ಕನ್ಸರ್ವೇಷನ್‌ ಫೌಂಡೇಷನ್‌ ಮುಖ್ಯಸ್ಥ ರಾಜಕುಮಾರ್‌ ತಿಳಿಸಿದ್ದಾರೆ.
Viral Video: ಗಾಳಿಪಟ ಹಾರಿಸಿ ಖುಷಿಪಟ್ಟ ಕೋತಿ! : ಅಚ್ಚರಿ ಮೂಡಿಸುತ್ತದೆ ಈ ದೃಶ್ಯ
ಏನಿದರ ವಿಶೇಷ?: ಗಟ್ಟಿಮುಟ್ಟಾಗಿ ಕಾಣುವ ರೇಸಸ್‌ ಮಂಕಿ ಹೆಚ್ಚು ಬುದ್ಧಿವಂತ, ಉತ್ಸಾಹಭರಿತ ಪ್ರಾಣಿ. ಗಂಡು ಕೋತಿ ಬೆಳೆಯುತ್ತಿದ್ದಂತೆ ಗುಂಪು ತೊರೆದರೆ, ಹೆಣ್ಣು ಮಂಕಿ ಗುಂಪಿನಲ್ಲಿ ಇರಲು ಇಷ್ಟಪಡುತ್ತದೆ. ಸಾಮಾನ್ಯವಾಗಿ 20 ರಿಂದ 200 ಸಂಖ್ಯೆಯ ಗುಂಪಿನಲ್ಲಿ ರೇಸಸ್‌ ಮಂಕಿ ಇರುತ್ತದೆ. ಉತ್ತರ ಭಾರತವಲ್ಲದೆ ನೇಪಾಳ, ದಕ್ಷಿಣ ಚೀನಾ, ಆಗ್ನೇಯ ಏಷ್ಯಾದಲ್ಲೂ ಇವುಗಳ ಸಂತತಿ ಹೆಚ್ಚಾಗಿ ಕಂಡು ಬರುತ್ತದೆ. ಸದ್ಯ ಆಂಧ್ರದಿಂದ ಕೆಳಭಾಗಕ್ಕೂ ಇದರ ಸಂತತಿ ಬರುತ್ತಿದ್ದು, ತನ್ನ ಆವಾಸ ಸ್ಥಾನ ವಿಸ್ತರಿಸಿಕೊಳ್ಳುತ್ತಿರಬಹುದು ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು ಅಂದಾಜಿಸಿದ್ದಾರೆ.
‘ಕರ್ನಾಟಕದ ಇತರೆ ಭಾಗಗಳಲ್ಲಿ ರೇಸಸ್‌ ಮಂಕಿ ಇರುವಿಕೆ ಬಗ್ಗೆ ಎಲ್ಲಿಯೂ ಪುರಾವೆ ಕಂಡು ಬಂದಿಲ್ಲ. ಗುಂಪಿನಲ್ಲಿ ಬಂದ ನೂರಾರು ಪಕ್ಷಿಗಳೊಂದಿಗೆ ಬೇರೆ ಜಾತಿಯ ಒಂದು ಹಕ್ಕಿ ಬರುವಂತೆ ಈ ರೇಸಸ್‌ ಮಂಕಿ ಯಾವುದೋ ಸರಕು ಸಾಗಣೆ ವಾಹನದ ಮೂಲಕ ಬಂದಿರಬಹುದು. ಇವು ಸಾಮಾನ್ಯ ಕೋತಿಗಳಂತಲ್ಲ. ಆಕ್ರಮಣಕಾರಿ ಮನೋಭಾವ ಹೊಂದಿರುತ್ತವೆ’ ಎನ್ನುತ್ತಾರೆ, ವನ್ಯಜೀವಿ ತಜ್ಞ ಸಪ್ತ ಗಿರೀಶ್‌.
ಮಾರಾಟಕ್ಕಿಟ್ಟ ತರಕಾರಿಗಳ ನಡುವೆ ಹೋಗಿ ಕುಳಿತ ಕೋತಿ: ನೆಟ್ಟಿಗರಿಂದ ತಮಾಷೆಯ ಪ್ರತಿಕ್ರಿಯೆ
Read more
[wpas_products keywords=”deal of the day sale today offer all”]