ಮುಕೇಶ್‌ ಅಂಬಾನಿ ಹಿಂದಿಕ್ಕಿದ ಗೌತಮ್‌ ಅದಾನಿ ಈಗ ಏಷ್ಯಾದ ಅತೀ ಶ್ರೀಮಂತ ವ್ಯಕ್ತಿ!

ಸಣ್ಣ ಸರಕುಗಳ ವ್ಯಾಪಾರ ವ್ಯವಹಾರವನ್ನು ಬಂದರುಗಳು, ಗಣಿಗಳು ಮತ್ತು ಹಸಿರು ಇಂಧನಕ್ಕೂ ವಿಸ್ತರಿಸಿರುವ ಅದಾನಿ ಎಂಟರ್‌ಪ್ರೈಸಸ್‌ ಮಾಲೀಕ ಗೌತಮ್‌ ಅದಾನಿ ಈಗ ಏಷ್ಯಾದ ಶ್ರೀಮಂತ ವ್ಯಕ್ತಿಯಾಗಿ ಮೂಡಿ ಬಂದಿದ್ದಾರೆ.

ಸೋಮವಾರ 59 ವರ್ಷದ ಗೌತಮ್‌ ಅದಾನಿ ಆಸ್ತಿ 88.5 ಬಿಲಿಯನ್‌ ಡಾಲರ್‌ (6.6 ಲಕ್ಷ ಕೋಟಿ ರೂ.)ಗೆ ಏರಿಕೆಯಾಗಿದೆ. ಬ್ಲೂಂಬರ್ಗ್‌ ಬಿಲಿಯನೇರ್‌ ಇಂಡೆಕ್ಸ್ ಪ್ರಕಾರ ಅವರೀಗ ಸಿರಿವಂತರ ಪಟ್ಟಿಯಲ್ಲಿ ವಿಶ್ವದಲ್ಲೇ 10ನೇ ಸ್ಥಾನದಲ್ಲಿದ್ದು ಏಷ್ಯಾದಲ್ಲಿ ಮೊದಲ ಸ್ಥಾನಕ್ಕೇರಿದ್ದಾರೆ. ಈವರೆಗೆ ಈ ಸ್ಥಾನದಲ್ಲಿದ್ದ ಮುಕೇಶ್‌ ಅಂಬಾನಿಯನ್ನು ಅದಾನಿ ಹಿಂದಿಕ್ಕಿದ್ದಾರೆ. ಸದ್ಯ ಅಂಬಾನಿ ಬಳಿ 87.9 ಬಿಲಿಯನ್‌ ಡಾಲರ್‌ (6.55 ಲಕ್ಷ ಕೋಟಿ ರೂ.) ಆಸ್ತಿ ಇದೆ. ಈ ವರ್ಷವೊಂದರಲ್ಲೇ ಗೌತಮ್‌ ಅದಾನಿ ವೈಯಕ್ತಿಕ ಆಸ್ತಿಯಲ್ಲಿ 12 ಬಿಲಿಯನ್‌ ಡಾಲರ್‌ ಏರಿಕೆಯಾಗಿದ್ದು, ಈ ವರ್ಷ ವಿಶ್ವದಲ್ಲೇ ಈ ಪರಿ ಆಸ್ತಿ ಹೆಚ್ಚಿಸಿಕೊಂಡ ಏಕೈಕ ಬಿಲಿಯನೇರ್‌ ಆಗಿದ್ದಾರೆ.

ಕಲ್ಲಿದ್ದಲು ಮಾತ್ರವಲ್ಲದೆ ಅದಾನಿ ಗ್ರೂಪ್‌ ನವೀಕರಿಸಬಹುದಾದ ಇಂಧನ, ವಿಮಾನ ನಿಲ್ದಾಣಗಳು, ದತ್ತಾಂಶ ಕೇಂದ್ರಗಳು ಮತ್ತು ರಕ್ಷಣಾ ಕ್ಷೇತ್ರದತ್ತಲೂ ದೃಷ್ಟಿ ನೆಟ್ಟಿದೆ.

ಮುಕೇಶ್‌ ಅಂಬಾನಿ, ಗೌತಮ್‌ ಅದಾನಿ ಈಗ ಮಾರ್ಕ್‌ ಝುಕರ್‌ಬರ್ಗ್‌ಗಿಂತ ಶ್ರೀಮಂತರು!
“ಅದಾನಿ ಗ್ರೂಪ್ ಸರಿಯಾದ ಸಮಯದಲ್ಲಿ ಟ್ರೆಂಡಿಂಗ್‌ನಲ್ಲಿರುವ ಎಲ್ಲಾ ವಲಯಗಳನ್ನು ಗುರುತಿಸಿರುವುದು ಮಾತ್ರವಲ್ಲ, ಆ ವಲಯಗಳನ್ನು ಪ್ರವೇಶಿಸಿದೆ. ಇದರಿಂದ ವಿದೇಶಿ ಬಂಡವಾಳ ಹೂಡಿಕೆದಾರರನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿದೆ,” ಎನ್ನುತ್ತಾರೆ ಎಂದು ಮುಂಬೈ ಮೂಲದ ಬ್ರೋಕರೇಜ್ ಸಂಸ್ಥೆ ಎಚ್‌ಡಿಎಫ್‌ಸಿ ಸೆಕ್ಯುರಿಟೀಸ್ ಲಿಮಿಟೆಡ್‌ನ ರಿಟೇಲ್‌ ರಿಸರ್ಚ್‌ ಮುಖ್ಯಸ್ಥ ದೀಪಕ್ ಜಸಾನಿ. ಈ ವಲಯಗಳು ಹೆಚ್ಚಿನ ಬಂಡವಾಳ ಹೂಡಿಕೆಯನ್ನು ಬೇಡುವ ವಲಯಗಳಾಗಿದ್ದು, ಕಂಪನಿಯು ನಿಧಿಯನ್ನು ಸಂಗ್ರಹಿಸುವಲ್ಲಿ ಸ್ವಲ್ಪ ಸಮಸ್ಯೆಯನ್ನು ಎದುರಿಸಿದೆ ಎಂದು ಹೇಳಿದ್ದಾರೆ.

ಅದಾನಿ ಗ್ರೂಪ್‌ನ ಕೆಲವು ಪಟ್ಟಿಮಾಡಿದ ಷೇರುಗಳು ಕಳೆದ ಎರಡು ವರ್ಷಗಳಲ್ಲಿ ಶೇ. 600ಕ್ಕಿಂತ ಹೆಚ್ಚು ಏರಿಕೆ ಕಂಡಿವೆ. ಅದೇ 2020 ಅಂಬಾನಿಯ ವರ್ಷವಾಗಿತ್ತು. ತೈಲದಿಂದ ಜಿಯೋವರೆಗಿನ ದೈತ್ಯ ಉದ್ಯಮವನ್ನು ಮುನ್ನಡೆಸುತ್ತಿರುವ ರಿಲಯನ್ಸ್‌ ಇಂಡಸ್ಟ್ರೀಸ್‌ ಲಿ. ಫೇಸ್‌ಬುಕ್‌, ಗೂಗಲ್‌ ಸೇರಿದಂತೆ ಜಾಗತಿಕ ದೈತ್ಯರಿಂದ ಹೂಡಿಕೆಗಳನ್ನು ಪಡೆದುಕೊಂಡಿತ್ತು. ಆದರೆ ನಂತರ ಈ ಸ್ಥಾನಕ್ಕೆ ಅದಾನಿ ಬಂದು ಕುಳಿತರು. ಇದೀಗ ಅವರ ಸಂಸ್ಥೆಗಳಿಗೆ ಹೂಡಿಕೆ ನೀರಿನಂತೆ ಹರಿದು ಬರುತ್ತಿದೆ.

ಪಳೆಯುಳಿಕೆ ಇಂಧನಗಳು ಅಥವಾ ಕಲ್ಲಿದ್ದಲಿನ ಮೇಲೆ ತಮ್ಮ ಸಾಮ್ರಾಜ್ಯಗಳನ್ನು ನಿರ್ಮಿಸಿರುವ ಈ ಇಬ್ಬರೂ ಉದ್ಯಮಿಗಳು ಇದೀಗ ಹಸಿರು ಇಂಧನದತ್ತ ಹೊರಳುತ್ತಿದ್ದಾರೆ. ಅಂಬಾನಿ ಮುಂದಿನ ಮೂರು ವರ್ಷಗಳಲ್ಲಿ 76 ಬಿಲಿಯನ್‌ ಡಾಲರ್‌ ಹಣವನ್ನು ನವೀಕರಿಸಬಹುದಾದ ಇಂಧನಗಳಿಗೆ ವೆಚ್ಚ ಮಾಡುವುದಾಗಿ ಹೇಳಿದ್ದಾರೆ. 2030ರ ವೇಳೆಗೆ ಒಟ್ಟು 70 ಬಿಲಿಯನ್‌ ಡಾಲರ್‌ ಹೂಡಿಕೆ ಮಾಡುವುದಾಗಿ ಅದಾನಿ ವಾಗ್ದಾನ ಮಾಡಿದ್ದಾರೆ. ಈ ಮೂಲಕ ತನ್ನ ಸಮೂಹ ವಿಶ್ವದ ಅತಿದೊಡ್ಡ ನವೀಕರಿಸಬಹುದಾದ ಇಂಧನ ಉತ್ಪಾದಕ ಸಂಸ್ಥೆಯಾಗಬೇಕು ಎಂದು ಬಯಸಿದ್ದಾರೆ.

ಟೋಟಲ್ ಎಸ್‌ಇ ಮತ್ತು ವಾರ್‌ಬರ್ಗ್‌ ಪಿಂಕಸ್‌ ಎಲ್‌ಎಲ್‌ಸಿ ಸೇರಿದಂತೆ ಹಲವು ಸಂಸ್ಥೆಗಳು 2021ರಲ್ಲಿ ಅದಾನಿ ಕಂಪನಿಗಳಲ್ಲಿ ಹೂಡಿಕೆ ಮಾಡಿವೆ. ಫ್ರೆಂಚ್ ತೈಲ ದೈತ್ಯ ಟೋಟಲ್‌ ಜನವರಿ 2021ರಲ್ಲಿ ಅದಾನಿ ಗ್ರೀನ್ ಎನರ್ಜಿ ಲಿಮಿಟೆಡ್‌ನ ಶೇ. 20ರಷ್ಟು ಷೇರನ್ನು ಖರೀದಿಸಲು ಮತ್ತು ಸಂಸ್ಥೆಯ ಸೌರ ವಿದ್ಯುತ್‌ ಆಸ್ತಿಗಳಲ್ಲಿ ಶೇ. 50ರಷ್ಟು ಪಾಲನ್ನು ಖರೀದಿಸಲು ಒಪ್ಪಿಕೊಂಡಿತ್ತು. ಅಂದು ಕೇವಲ 2.5 ಬಿಲಿಯನ್ ಡಾಲರ್‌ ಮೌಲ್ಯದಲ್ಲಿ ಈ ಷೇರನ್ನು ಖರೀದಿಸಿತ್ತು. ಅಂದೇ ಅದಾನಿ ಗ್ರೀನ್‌ನ ಮಾರುಕಟ್ಟೆ ಬಂಡವಾಳ 20 ಬಿಲಿಯನ್‌ ಡಾಲರ್‌ ಆಗಿತ್ತು.

2021ರ ಮಾರ್ಚ್‌ನಲ್ಲಿ, ಅದಾನಿ ಪೋರ್ಟ್ಸ್ ಮತ್ತು ಸ್ಪೆಷಲ್ ಎಕನಾಮಿಕ್ ಝೋನ್ ಲಿಮಿಟೆಡ್‌ನ ಅರ್ಧ ಪ್ರತಿಶತ ಷೇರಿಗೆ ಬದಲಾಗಿ 110 ಮಿಲಿಯನ್ ಡಾಲರ್‌ ಹೂಡಿಕೆ ಮಾಡುವುದಾಗಿ ವಾರ್ಬರ್ಗ್ ಹೇಳಿದೆ.

ಇನ್ನೊಂದೆಡೆ ಹಸಿರು ಇಂಧನ ಯೋಜನೆ ಭಾಗವಾಗಿ ತನ್ನ ನವೀಕರಿಸಬಹುದಾದ ಇಂಧನ ಸಾಮರ್ಥ್ಯವನ್ನು 2025ರ ವೇಳೆಗೆ ಸುಮಾರು 8 ಪಟ್ಟು ಹೆಚ್ಚಿಸುವ ಯೋಜನೆಗಳನ್ನು ಅದಾನಿ ಹೊಂದಿದೆ. ಮೇನಲ್ಲಿ ಸಾಫ್ಟ್‌ಬ್ಯಾಂಕ್ ಗ್ರೂಪ್ ಕಾರ್ಪೊರೇಷನ್‌ನ ಸ್ಥಳೀಯ ನವೀಕರಿಸಬಹುದಾದ ವಿದ್ಯುತ್ ವ್ಯವಹಾರವನ್ನು 3.5 ಬಿಲಿಯನ್‌ ಡಾಲರ್‌ಗೆ ಖರೀದಿಸಲೂ ಅದಾನಿ ಸಂಸ್ಥೆ ಒಪ್ಪಿಕೊಂಡಿತ್ತು.

ಕೇವಲ ಮೂರು ವರ್ಷಗಳಲ್ಲಿ ಅದಾನಿ ದೇಶದ ಏಳು ವಿಮಾನ ನಿಲ್ದಾಣಗಳ ನಿರ್ವಹಣೆಯ ಜವಾಬ್ದಾರಿ ಪಡೆದುಕೊಂಡಿದ್ದು, ದೇಶದ ವಾಯು ಸಂಚಾರದ ಕಾಲು ಭಾಗದಷ್ಟು ನಿಯಂತ್ರಣ ಇದೀಗ ಸಂಸ್ಥೆಯ ಕೈಯಲ್ಲಿದೆ. ದೇಶದ ಅತಿದೊಡ್ಡ ವಿಮಾನ ನಿಲ್ದಾಣ ನಿರ್ವಾಹಕ ಸಂಸ್ಥೆಯಷ್ಟೇ ಅಲ್ಲದೇ, ದೇಶದ ವಿದ್ಯುತ್ ಉತ್ಪಾದಕ, ನಗರಗಳಲ್ಲಿ ಸರಕಾರೇತರ ಚಿಲ್ಲರೆ ಅನಿಲ ವ್ಯಾಪಾರ ಉದ್ಯಮದಲ್ಲೂ ಕಂಪನಿ ದೇಶದಲ್ಲಿ ಮುಂಚೂಣಿಯಲ್ಲಿದೆ.

ಅದಾನಿ ಗ್ರೀನ್ ಮತ್ತು ಅದಾನಿ ಟೋಟಲ್ ಗ್ಯಾಸ್ ಲಿಮಿಟೆಡ್‌ನ ಷೇರುಗಳು 2020ರಲ್ಲಿ ಷೇರು ಮಾರುಕಟ್ಟೆ ಪ್ರವೇಶಿಸಿದಂದಿನಿಂದ ಇಲ್ಲಿಯವರೆಗೆ ಶೇ. 1000 ದಷ್ಟು ಏರಿಕೆ ಕಂಡಿವೆ. ಮೂಲ ಕಂಪನಿ ಅದಾನಿ ಎಂಟರ್‌ಪ್ರೈಸಸ್ ಅದಾನಿ ಸಂಸ್ಥೆ ಇದೇ ವೇಳೆ ಶೇ. 730ರಷ್ಟು ಗಳಿಕೆ ಕಂಡಿದ್ದರೆ, ಅದಾನಿ ಟ್ರಾನ್ಸ್‌ಮಿಷನ್ ಲಿಮಿಟೆಡ್ ಈ ಅವಧಿಯಲ್ಲಿ ಶೇ. 500ಕ್ಕಿಂತ ಹೆಚ್ಚು ಹಾಗೂ ಅದಾನಿ ಪೋರ್ಟ್ಸ್‌ ಶೇ. 95ರಷ್ಟು ಮೇಲೇರಿವೆ. ಇದೇ ವೇಳೆ ಎಸ್‌&ಪಿ ಬಿಎಸ್‌ಇ ಸೆನ್ಸೆಕ್ಸ್ ಸೂಚ್ಯಂಕವು ಕೇವಲ ಶೇ. 40ರಷ್ಟು ಗಳಿಕೆ ಕಂಡಿದೆ.

ಅದಾನಿ ಗ್ರೂಪ್‌ ಆಸ್ಟ್ರೇಲಿಯಾದ ಕಲ್ಲಿದ್ದಲು ಗಣಿ ಕಾರ್ಮೈಕಲ್‌ನಲ್ಲಿ ಗಣಿಗಾರಿಗೆ ನಡೆಸುವುದಕ್ಕೆ ಭಾರೀ ವಿರೋಧ ಎದುರಿಸಿತ್ತು. ಇದರಿಂದ ಸಾಲ ಪಡೆಯುವುದು ಕಷ್ಟವಾದ ಹಿನ್ನೆಲೆಯಲ್ಲಿ ಇದೀಗ ತಾನೇ ಹಣ ಹೊಂದಿಸಿ ಗಣಿಗಾರಿಕೆಗೆ ಇಳಿದಿದೆ. ಇನ್ನೊಂದೆಡೆ ಪ್ರಧಾನಿ ಮೋದಿ ವಿರೋಧಿಗಳೂ ಅದಾನಿ ವಿರುದ್ಧ ಮುಗಿಬೀಳುತ್ತಾ ಬಂದಿದ್ದಾರೆ. ಮೋದಿ ಎಲ್ಲವನ್ನೂ ತನ್ನ ಮಿತ್ರ ಅದಾನಿ ಕೈಗಿಡುತ್ತಿದ್ದಾರೆ ಎಂಬುದು ಅವರ ಆರೋಪ. ಆದರೆ ಅದಾನಿ ಮಾತ್ರ ವಿರೋಧಿಗಳ ಆರೋಪಗಳನ್ನು ತಳ್ಳಿ ಹಾಕುತ್ತಲೇ ಉದ್ಯಮ ರಂಗದಲ್ಲಿ ಮೇಲಿಂದ ಮೇಲೆ ಏರುತ್ತಿದ್ದಾರೆ.

ಬಂದರುಗಳಂತಹ ಅದಾನಿ ಗ್ರೂಪ್‌ನ ಕೆಲವು ದೊಡ್ಡ ವ್ಯವಹಾರಗಳು ‘ಬಹುತೇಕ ಏಕಸ್ವಾಮ್ಯ’ವಾಗಿವೆ ಎನ್ನುತ್ತಾರೆ ಸ್ಥಳೀಯ ಬ್ರೋಕರೇಜ್ ಐಐಎಫ್‌ಎಲ್‌ ಸೆಕ್ಯುರಿಟೀಸ್ ಲಿಮಿಟೆಡ್‌ನ ನಿರ್ದೇಶಕ ಸಂಜೀವ್ ಭಾಸಿನ್. ಅನೇಕ ಅದಾನಿ ಕಂಪನಿಗಳು ಭಾರತದ ಕೈಗಾರಿಕೀಕರಣ ಮತ್ತು ಮೂಲಸೌಕರ್ಯ ಬೆಳವಣಿಗೆ ಜತೆ ನಿಕಟ ಸಂಬಂಧ ಹೊಂದಿದ್ದು, ಅವುಗಳು ಸೂಕ್ತವಾದ ಜಾಗದಲ್ಲಿದ್ದು ಇದ್ದನ್ನೇ ಬಂಡವಾಳ ಮಾಡಿಕೊಂಡಿವೆ ಎನ್ನುವುದು ಅವರ ವಿಶ್ಲೇಷಣೆ. ಪರಿಣಾಮ ಅದಾನಿ ಆಸ್ತಿ ಮೌಲ್ಯ ಒಂದೇ ಸಮನೆ ಮೇಲೇರುತ್ತಿದ್ದು, ಇದೀಗ ವಿಶ್ವದಲ್ಲೇ 10ನೇ ಸ್ಥಾನಕ್ಕೆ ಜಿಗಿದಿದ್ದಾರೆ.

ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್‌ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.