LIC IPO: ಮುಂದಿನ ವಾರವೇ ಎಲ್‌ಐಸಿ ಐಪಿಒ ದಾಖಲೆ ಸಲ್ಲಿಕೆ, ದಿನಗಣನೆ ಆರಂಭ

ಹೊಸದಿಲ್ಲಿ: ಕೇಂದ್ರ ಸರಕಾರ ಮುಂದಿನ ವಾರವೇ ಮಾರುಕಟ್ಟೆ ನಿಯಂತ್ರಕ ‘ಸೆಬಿ’ಗೆ ಎಲ್‌ಐಸಿಯ ಮೆಗಾ ಆರಂಭಿಕ ಸಾರ್ವಜನಿಕ ಷೇರು ಕೊಡುಗೆಗೆ ಸಂಬಂಧಿಸಿದ ಕರಡು ದಾಖಲೆಗಳನ್ನು ಸಲ್ಲಿಸುವ ಸಾಧ್ಯತೆಯಿದೆ. ಷೇರು ವಿತರಣೆಯ ಒಂದು ಭಾಗವನ್ನು ಆಂಕರ್ ಹೂಡಿಕೆದಾರರಿಗೆ ಕಾಯ್ದಿರಿಸಲಾಗುತ್ತದೆ ಎಂದು ಉನ್ನತ ಅಧಿಕಾರಿಯೊಬ್ಬರು ಬುಧವಾರ ತಿಳಿಸಿದ್ದಾರೆ.

ಸುದ್ದಿ ಸಂಸ್ಥೆಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಹೂಡಿಕೆ ಮತ್ತು ಸಾರ್ವಜನಿಕ ಆಸ್ತಿ ನಿರ್ವಹಣಾ ಇಲಾಖೆಯ (ಡಿಐಪಿಎಎಂ) ಕಾರ್ಯದರ್ಶಿ ತುಹಿನ್ ಕಾಂತಾ ಪಾಂಡೆ, ವಿಮಾ ನಿಯಂತ್ರಕ ಇಲಾಖೆಯ ಅನುಮೋದನೆಗಾಗಿ ಕಾಯಲಾಗುತ್ತಿದೆ. ನಂತರ ಷೇರು ಮಾರಾಟದ ಗಾತ್ರವನ್ನು ವಿವರಿಸುವ ಕರಡು ಪ್ರಾಸ್ಪೆಕ್ಟಸ್ ಅನ್ನು ಸಲ್ಲಿಸಲಾಗುವುದು ಎಂದು ಹೇಳಿದ್ದಾರೆ.

ಸೆಬಿಯ ಅನುಮೋದನೆಯ ನಂತರ ಮಾರ್ಚ್‌ನಲ್ಲಿ ಎಲ್‌ಐಸಿ ಷೇರು ಮಾರುಕಟ್ಟೆಗೆ ಪ್ರವೇಶಿಸುವ ಸಾಧ್ಯತೆಯಿದೆ ಎಂದು ಅವರು ವಿವರಿಸಿದ್ದಾರೆ. ಪ್ರಸಕ್ತ ಹಣಕಾಸು ವರ್ಷದಲ್ಲಿ 78,000 ಕೋಟಿ ರೂಪಾಯಿಗಳ ಅಂದಾಜು ಆದಾಯದ ಕೊರತೆಯನ್ನು ಪೂರೈಸಲು ಎಲ್‌ಐಸಿ ಐಪಿಒ ಸರ್ಕಾರಕ್ಕೆ ನಿರ್ಣಾಯಕವಾಗಿದೆ. ಏರ್ ಇಂಡಿಯಾದ ಖಾಸಗೀಕರಣ ಮತ್ತು ಇತರ ಸರಕಾರಿ ಸ್ವಾಮ್ಯದ ಕಂಪನಿಗಳಲ್ಲಿನ ಷೇರು ಮಾರಾಟದಿಂದ ಸರ್ಕಾರ ಇದುವರೆಗೆ ಸುಮಾರು 12,000 ಕೋಟಿ ರೂ. ಸಂಗ್ರಹಿಸಿದೆ.

ಎಲ್‌ಐಸಿ ಐಪಿಒದಲ್ಲಿ ವಿದೇಶಿ ಹೂಡಿಕೆಗೂ ಅವಕಾಶ, ಎಫ್‌ಡಿಐ ನೀತಿಯಲ್ಲಿ ಬದಲಾವಣೆ ಸಾಧ್ಯತೆ

ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ತಮ್ಮ 2022-23ರ ಬಜೆಟ್ ಭಾಷಣದಲ್ಲಿ, ‘ಎಲ್ಐಸಿಯ ಆರಂಭಿಕ ಸಾರ್ವಜನಿಕ ಷೇರು ಕೊಡುಗೆ ಶೀಘ್ರದಲ್ಲೇ ನಿರೀಕ್ಷಿಸಲಾಗಿದೆ’ ಎಂದು ಹೇಳಿದ್ದರು. ಜೀವ ವಿಮಾ ನಿಗಮದ (ಎಲ್‌ಐಸಿ) ಎಂಬೆಡೆಡ್ ಮೌಲ್ಯವನ್ನು ತಲುಪಲಾಗಿದೆ ಮತ್ತು ಈಗ ವಿಮಾ ನಿಯಂತ್ರಕ ಐಆರ್‌ಡಿಎಐನಿಂದ ಅನುಮತಿ ಪಡೆಯಬೇಕಾಗಿದೆ ಎಂದು ಪಾಂಡೆ ಹೇಳಿದ್ದಾರೆ.

“7-10 ದಿನಗಳಲ್ಲಿ, ಎಲ್‌ಐಸಿ ಐಪಿಒಗಾಗಿ ಡಿಆರ್‌ಹೆಚ್‌ಪಿ (ಡ್ರಾಫ್ಟ್ ರೆಡ್ ಹೆರಿಂಗ್ ಪ್ರಾಸ್ಪೆಕ್ಟಸ್) ಸಲ್ಲಿಸಲಾಗುವುದು. ಅನೌಪಚಾರಿಕವಾಗಿ, ನಾವು ವಿವಿಧ ವಿಷಯಗಳ ಬಗ್ಗೆ ಮಾಹಿತಿಗಾಗಿ ಸೆಬಿ ಜತೆ ಸಮಾಲೋಚಿಸುತ್ತಿದ್ದೇವೆ. ಷೇರು ಬಿಡುಗಡೆಯ ಗಾತ್ರವನ್ನು ಡಿಆರ್‌ಹೆಚ್‌ಪಿಯಲ್ಲಿ ನಮೂದಿಸಲಾಗುವುದು,” ಎಂದು ಅವರು ಮಾಹಿತಿ ನೀಡಿದ್ದಾರೆ.

ಆರಂಭಿಕ ಸಾರ್ವಜನಿಕ ಕೊಡುಗೆ (ಐಪಿಒ)ಯನ್ನು ಬಿಡುಗಡೆ ಮಾಡುವ ಮತ್ತು ತರುವಾಯ ಮಾರ್ಚ್‌ನೊಳಗೆ ಎಲ್‌ಐಸಿಯನ್ನು ಷೇರು ಮಾರುಕಟ್ಟೆಯಲ್ಲಿ ಪಟ್ಟಿ ಮಾಡುವ ಗುರಿಯನ್ನು ಸರ್ಕಾರ ಹೊಂದಿದೆ ಎಂದು ಅವರು ತಿಳಿಸಿದ್ದಾರೆ.

LIC IPOದಲ್ಲಿ ಭಾರೀ ಬದಲಾವಣೆ, ಅನುಮಾನ ಹುಟ್ಟುಹಾಕಿದ ಸರಕಾರದ ಬಜೆಟ್‌ ಘೋಷಣೆ
“ಐಆರ್‌ಎಫ್‌ಸಿ ಮತ್ತು ರೈಲ್‌ಟೆಲ್‌ನ ಐಪಿಒಗಳ ಸಂದರ್ಭದಲ್ಲಿ ಮಾಡಿದಂತೆ ಐಪಿಒದ ಒಂದು ಭಾಗವನ್ನು ಆಂಕರ್ ಹೂಡಿಕೆದಾರರಿಗೆ ಕಾಯ್ದಿರಿಸಲಾಗುವುದು,” ಎಂದು ಪಾಂಡೆ ಮಾಹಿತಿ ನೀಡಿದ್ದಾರೆ. ಎಲ್‌ಐಸಿ ಐಪಿಒ ಗಾತ್ರದ ಶೇ. 10ರಷ್ಟನ್ನು ಪಾಲಿಸಿದಾರರಿಗೆ ಕಾಯ್ದಿರಿಸಲಾಗುತ್ತದೆ.

ಆಕ್ಚುರಿಯಲ್ ಸಂಸ್ಥೆ ಮಿಲಿಮನ್ ಅಡ್ವೈಸರ್ಸ್ ಎಲ್‌ಎಲ್‌ಪಿ ಇಂಡಿಯಾ ಎಲ್‌ಐಸಿಯ ಎಂಬೆಡೆಡ್ ಮೌಲ್ಯವನ್ನು ರೂಪಿಸಿದ್ದರೆ, ಡೆಲಾಯ್ಟ್ ಮತ್ತು ಎಸ್‌ಬಿಐ ಕ್ಯಾಪ್ಸ್‌ಗಳನ್ನು ಪ್ರಿ-ಐಪಿಒ ವಹಿವಾಟು ಸಲಹೆಗಾರರಾಗಿ ನೇಮಿಸಲಾಗಿದೆ. ಎಂಬೆಡೆಡ್ ಮೌಲ್ಯ ವಿಧಾನದ ಅಡಿಯಲ್ಲಿ, ವಿಮಾ ಕಂಪನಿಗಳ ಭವಿಷ್ಯದ ಲಾಭದ ಪ್ರಸ್ತುತ ಮೌಲ್ಯವನ್ನು ಅವರ ಪ್ರಸ್ತುತ ನಿವ್ವಳ ಆಸ್ತಿ ಮೌಲ್ಯದಲ್ಲಿ (ಎನ್‌ಎವಿ) ಸೇರಿಸಲಾಗಿದೆ.

ಎಲ್‌ಐಸಿಯಲ್ಲಿ ವಿದೇಶಿ ಹೂಡಿಕೆ ಪ್ರಸ್ತಾವನೆಗೆ ಶೀಘ್ರದಲ್ಲೇ ಕೇಂದ್ರ ಸಂಪುಟ ಅಸ್ತು?
ಗೋಲ್ಡ್ಮನ್ ಸ್ಯಾಚ್ಸ್ (ಇಂಡಿಯಾ) ಸೆಕ್ಯುರಿಟೀಸ್ ಪ್ರೈವೇಟ್ ಲಿಮಿಟೆಡ್, ಸಿಟಿಗ್ರೂಪ್ ಗ್ಲೋಬಲ್ ಮಾರ್ಕೆಟ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ ಮತ್ತು ನೋಮುರಾ ಫೈನಾನ್ಷಿಯಲ್ ಅಡ್ವೈಸರಿ ಅಂಡ್ ಸೆಕ್ಯುರಿಟೀಸ್ (ಇಂಡಿಯಾ) ಪ್ರೈವೇಟ್ ಲಿಮಿಟೆಡ್ ಸೇರಿದಂತೆ 10 ಮರ್ಚೆಂಟ್ ಬ್ಯಾಂಕರ್‌ಗಳನ್ನು ಸರ್ಕಾರವು ದೇಶದ ಅತಿದೊಡ್ಡ ವಿಮಾ ಕಂಪನಿಯ ಮೆಗಾ ಐಪಿಒ ನಿರ್ವಹಿಸಲು ನೇಮಿಸಿದೆ.

ಎಲ್‌ಐಸಿಯಲ್ಲಿ ವಿದೇಶಿ ಹೂಡಿಕೆದಾರರಿಗೂ ಪಾಲನ್ನು ಪಡೆಯಲು ಅವಕಾಶ ನೀಡುವ ಬಗ್ಗೆಯೂ ಸರ್ಕಾರ ಚಿಂತನೆ ನಡೆಸುತ್ತಿದೆ. ಸೆಬಿ ನಿಯಮಗಳ ಪ್ರಕಾರ, ವಿದೇಶಿ ಬಂಡವಾಳ ಹೂಡಿಕೆದಾರರಿಗೆ (ಎಫ್‌ಪಿಐ) ಸಾರ್ವಜನಿಕ ಕೊಡುಗೆಯಲ್ಲಿ ಷೇರುಗಳನ್ನು ಖರೀದಿಸಲು ಅನುಮತಿ ಇದೆ. ಆದರೆ ಈ ಐಪಿಒದಲ್ಲಿ ಎಫ್‌ಐಐ/ಎಫ್‌ಪಿಐ ಹೂಡಿಕೆಗಾಗಿ ಎಫ್‌ಡಿಐ ನೀತಿಯನ್ನು ಬದಲಾವಣೆ ಮಾಡಬೇಕಾಗಿದೆ. ಕಾರಣ ಎಲ್‌ಐಸಿ ಒಂದು ನಿಗಮವಾಗಿದ್ದು, ವಿಮಾ ಕಂಪನಿಯಲ್ಲ.

ಆರ್ಥಿಕ ವ್ಯವಹಾರಗಳ ಸಂಪುಟ ಸಮಿತಿಯು ಕಳೆದ ವರ್ಷದ ಜುಲೈನಲ್ಲಿ ಎಲ್‌ಐಸಿಯ ಐಪಿಒ ಪ್ರಸ್ತಾವನೆಗೆ ಅನುಮತಿ ನೀಡಿತ್ತು.

ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್‌ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.