ಭರ್ಜರಿ ವ್ಯಾಪಾರದ ನಡುವೆಯೂ ಡಿಸೆಂಬರ್‌ ತ್ರೈಮಾಸಿಕದಲ್ಲಿ ಟಾಟಾ ಮೋಟಾರ್ಸ್‌ಗೆ 1,451 ಕೋಟಿ ರೂ. ನಷ್ಟ!

ಹೊಸದಿಲ್ಲಿ: ಆಟೋ ಮೊಬೈಲ್‌ ವಲಯದ ದೈತ್ಯ ಕಂಪನಿ ಟಾಟಾ ಮೋಟಾರ್ಸ್ ಡಿಸೆಂಬರ್‌ ತ್ರೈಮಾಸಿಕದಲ್ಲಿ 1,451.05 ಕೋಟಿ ರೂ. ನಿವ್ವಳ ನಷ್ಟ ಅನುಭವಿಸಿದೆ. ಹಿಂದಿನ ವರ್ಷದ ಇದೇ ತ್ರೈಮಾಸಿಕದಲ್ಲಿ ಕಂಪನಿ 2,941.48 ಕೋಟಿ ರೂ. ಲಾಭ ಗಳಿಸಿತ್ತು.

ಇನ್ನು ಕಾರ್ಯಾಚರಣೆಗಳಿಂದ ಕಂಪನಿಯು ಒಟ್ಟು 72,229.29 ಕೋಟಿ ರೂ. ಆದಾಯ ಗಳಿಸಿದೆ. ಕಳೆದ ವರ್ಷದ ಇದೇ ತ್ರೈಮಾಸಿಕದಲ್ಲಿ ಗಳಿಸಿದ 75,653.79 ಕೋಟಿ ರೂ. ಆದಾಯಕ್ಕೆ ಹೋಲಿಸಿದರೆ ಈ ಬಾರಿ ಆದಾಯದಲ್ಲಿ ಶೇ. 4.52ರಷ್ಟು ಕುಸಿತ ದಾಖಲಾಗಿದೆ. ‘ಇಟಿ ನೌ’ ಸಮೀಕ್ಷೆಯಲ್ಲಿ ರೂ. 1,000 ಕೋಟಿ ರೂ. ನಷ್ಟ ಮತ್ತು 72,760 ಕೋಟಿ ರೂ. ಆದಾಯದ ಅಂದಾಜು ವ್ಯಕ್ತವಾಗಿತ್ತು.

ಚಿಪ್ ಕೊರತೆಯಿಂದ ಕಂಪನಿಯ ಬ್ರಿಟನ್‌ ಮೂಲದ ಅಂಗ ಸಂಸ್ಥೆಯಾದ ಜಾಗ್ವಾರ್ ಲ್ಯಾಂಡ್ ರೋವರ್‌ನ (ಜೆಎಲ್‌ಆರ್‌) ಮಾರಾಟವು ಕುಸಿತ ಕಂಡಿದೆ. ವಾಹನಗಳ ಮಾರಾಟವು ಶೇ. 37.6 ರಷ್ಟು ಕುಸಿತ ಕಂಡಿದ್ದು 80,126 ವಾಹನಗಳಿಗೆ ಇಳಿಕೆಯಾಗಿದೆ. ಆದಾಯ 4.7 ಬಿಲಿಯನ್ ಪೌಂಡ್‌ಗೆ ಏರಿಕೆಯಾಗಿದ್ದು, ಎರಡನೇ ತ್ರೈಮಾಸಿಕಕ್ಕೆ ಹೋಲಿಸಿದರೆ ಶೇ. 22ರಷ್ಟು ಹೆಚ್ಚಾಗಿದೆ.

ಸೆಪ್ಟೆಂಬರ್‌ ತ್ರೈಮಾಸಿಕದಲ್ಲಿ ಟಾಟಾ ಮೋಟಾರ್ಸ್‌ಗೆ ಬರೋಬ್ಬರಿ 4,442 ಕೋಟಿ ರೂ. ನಷ್ಟ!
ಚಿಪ್ ಪೂರೈಕೆಯ ಪರಿಸ್ಥಿತಿಯು ಕ್ರಮೇಣ ಸುಧಾರಿಸುತ್ತಿದೆ ಎಂದು ಕಂಪನಿ ತಿಳಿಸಿದ್ದು, ಎರಡನೇ ತ್ರೈಮಾಸಿಕಕ್ಕೆ ಹೋಲಿಸಿದರೆ ಮೂರನೇ ತ್ರೈಮಾಸಿಕದಲ್ಲಿ ಶೇ. 41ರಷ್ಟು ಉತ್ಪಾದನೆ ಹೆಚ್ಚಾಗಿದ್ದು 72,184 ಯೂನಿಟ್‌ಗಳಿಗೆ ಏರಿಕೆಯಾಗಿದೆ ಎಂದು ಕಂಪನಿ ಹೇಳಿದೆ. ಎಬಿಟ್‌ ಮಾರ್ಜಿನ್‌ ಶೇ. 1.4 ರಷ್ಟಿದ್ದು, ಮೂರನೇ ತ್ರೈಮಾಸಿಕದಲ್ಲಿ ನಗದು ಹರಿವು 164 ಮಿಲಿಯನ್‌ ಪೌಂಡ್‌ನಷ್ಟಿತ್ತು.

ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಟಾಟಾ ಮೋಟಾರ್ಸ್ ಇಂಡಿಯಾದ ಕಾರ್ಯಾಚರಣೆಗಳಿಂದ ಆದಾಯ ಹೆಚ್ಚಾಗಿದೆ. ಆದಾಗ್ಯೂ ಸರಕುಗಳ ಹಣದುಬ್ಬರವು ಲಾಭದ ಇಳಿಕೆಗೆ ಕಾರಣವಾಗಿದೆ ಎಂದು ಕಂಪನಿ ಹೇಳಿದೆ. ವಾಣಿಜ್ಯ ವಾಹನ (ಇವಿ) ಆದಾಯವು ಶೇ. 28.7 ರಷ್ಟು ಏರಿಕೆಯಾಗಿದ್ದರೆ, ಪ್ರಯಾಣಿಕ ವಾಹನ (ಪಿವಿ) ಆದಾಯವು ಶೇ. 72.3 ರಷ್ಟು ಹೆಚ್ಚಾಗಿದೆ. “ಪ್ರಯಾಣಿಕ ವಾಹನ ಮಾರಾಟವು ತೀವ್ರ ಏರಿಕೆ ಕಂಡಿದ್ದು, ಈ ವರ್ಷ ಅತ್ಯಧಿಕ ಮಾರಾಟ ದಾಖಲಿಸಿದೆ. ಮೂರನೇ ತ್ರೈಮಾಸಿಕದಲ್ಲಿ ಎಲೆಕ್ಟ್ರಿಕ್‌ ವಾಹನಗಳ ಮಾರಾಟವು ಹೊಸ ದಾಖಲೆಯ 5,592 ಯುನಿಟ್‌ಗಳಿಗೆ ಏರಿಕೆಯಾಗಿದೆ,” ಎಂದು ಕಂಪನಿ ಹೇಳಿದೆ.

ಓಮಿಕ್ರಾನ್ ನಡುವೆಯೂ ಸದ್ಯಕ್ಕೆ ಬೇಡಿಕೆ ಬಲವಾಗಿಯೇ ಇದೆ ಎಂದು ಟಾಟಾ ಮೋಟಾರ್ಸ್ ಹೇಳಿದೆ. ಸೆಮಿಕಂಡಕ್ಟರ್‌ ಪೂರೈಕೆ ಪರಿಸ್ಥಿತಿ ಸುಧಾರಿಸುತ್ತಿದ್ದು, ಹಣದುಬ್ಬರದ ಆತಂಕಗಳು ಮಾತ್ರ ಮುಂದುವರಿದಿವೆ ಎಂದು ತಿಳಿಸಿದೆ.

“ಕಳೆದ ಎರಡು ವರ್ಷಗಳಲ್ಲಿ, ವ್ಯವಹಾರದ ಸ್ಥಿರತೆಯು ಸುಧಾರಿಸಿದೆ ಮತ್ತು ಅದು ಈಗ ಆಂತರಿಕವಾಗಿ ಪ್ರಬಲವಾಗಿದೆ. ತಕ್ಷಣದ ಪೂರೈಕೆ ಮತ್ತು ವೆಚ್ಚದ ಸವಾಲುಗಳನ್ನು ಪರಿಹರಿಸಿದಲ್ಲಿ ನಾಲ್ಕನೇ ತ್ರೈಮಾಸಿಕ ಮತ್ತು ಮುಂದಿನ ದಿನಗಳಲ್ಲಿ ಕಾರ್ಯಕ್ಷಮತೆ ಮತ್ತಷ್ಟು ಸುಧಾರಿಸುವ ನಿರೀಕ್ಷೆಯಲ್ಲಿದ್ದೇವೆ,” ಎಂಬುದಾಗಿ ಟಾಟಾ ಮೋಟಾರ್ಸ್‌ ಅಂದಾಜಿಸಿದೆ.

“ನಮ್ಮ ಉತ್ಪನ್ನಗಳಿಗೆ ಬಲವಾದ ಬೇಡಿಕೆಯನ್ನು ನೋಡುತ್ತಲೇ ಇದ್ದೇವೆ. ಇದು ನಮ್ಮ ವಾಹನಗಳ ಮೇಲಿರುವ ಗ್ರಾಹಕರ ಅಪೇಕ್ಷೆಯನ್ನು ಒತ್ತಿಹೇಳುತ್ತಿದೆ. ಜಾಗತಿಕ ಮಟ್ಟದಲ್ಲಿ ಆರ್ಡರ್‌ಗಳು ದಾಖಲೆಯ ಮಟ್ಟದಲ್ಲಿದೆ. ಈ ತ್ರೈಮಾಸಿಕದಲ್ಲಿ ವಿತರಣೆಗಳು ಇನ್ನೂ ಆರಂಭವಾಗಬೇಕಿದ್ದು, ಅದಕ್ಕೂ ಮೊದಲೇ ಹೊಸ ರೇಂಜ್ ರೋವರ್‌ಗೆ ನಂಬಲಸಾಧ್ಯವಾದ 30,000 ಯುನಿಟ್‌ ಬೇಡಿಕೆ ಬಂದಿದೆ,” ಎಂದು ಜಾಗ್ವಾರ್ ಲ್ಯಾಂಡ್ ರೋವರ್‌ನ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಥಿಯೆರಿ ಬೊಲೊರೆ ಹೇಳಿದ್ದಾರೆ.

ಸೆಮಿಕಂಡಕ್ಟರ್‌ ಪೂರೈಕೆ, ಕಚ್ಚಾ ವಸ್ತುಗಳ ವೆಚ್ಚಗಳು ಮತ್ತು ಹೆಚ್ಚುತ್ತಿರುವ ಕೊರೊನಾದ ನಡುವೆಯೇ ವಾಣಿಜ್ಯ, ಪ್ರಯಾಣಿಕ ಮತ್ತು ಎಲೆಕ್ಟ್ರಿಕ್ ವಾಹನಗಳ ಬೇಡಿಕೆಯನ್ನು ಉಳಿಸಿಕೊಳ್ಳಲಿದ್ದೇವೆ ಎಂದು ನಾವು ನಿರೀಕ್ಷಿಸುತ್ತೇವೆ ಎಂದು ಟಾಟಾ ಮೋಟಾರ್ಸ್ ಕಾರ್ಯನಿರ್ವಾಹಕ ನಿರ್ದೇಶಕ ಗಿರೀಶ್ ವಾಘ್ ಹೇಳಿದ್ದಾರೆ.

ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್‌ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.