ಮುಂದಿನ ವರ್ಷ ಮತ್ತೆ ಕುಸಿಯಲಿದೆ ಜಿಡಿಪಿ ಬೆಳವಣಿಗೆ, 8 – 8.5% ಏರಿಕೆಯ ನಿರೀಕ್ಷೆ – ಆರ್ಥಿಕ ಸಮೀಕ್ಷೆ

ಹೊಸದಿಲ್ಲಿ: ಕೇಂದ್ರ ಹಣಕಾಸು ಸಚಿವೆ ನಿರ್ಮಾಲಾ ಸೀತಾರಾಮನ್‌ ಸೋಮವಾರ 2021-22ನೇ ಸಾಲಿನ ಆರ್ಥಿಕ ಸಮೀಕ್ಷೆಯ ವರದಿಯನ್ನು ಲೋಕಸಭೆಯಲ್ಲಿ ಮಂಡಿಸಿದರು. ಸಮೀಕ್ಷೆಯಲ್ಲಿ 2022-23ನೇ ಸಾಲಿನಲ್ಲಿ ದೇಶದ ಜಿಡಿಪಿ ಬೆಳವಣಿಗೆ ದರ ಶೇ. 8 – 8.5ರಷ್ಟು ಇರಲಿದೆ ಎಂದು ಅಂದಾಜು ಮಾಡಲಾಗಿದೆ.

ಸೋಮವಾರದಿಂದ ಬಹುನಿರೀಕ್ಷಿತ ಬಜೆಟ್‌ ಅಧಿವೇಶನ ಆರಂಭವಾಗಿದ್ದು, ಜಂಟಿ ಅಧಿವೇಶನವನ್ನು ಉದ್ದೇಶಿಸಿ ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಭಾಷಣ ಮಾಡುವುದರೊಂದಿಗೆ ಕಲಾಪಕ್ಕೆ ಚಾಲನೆ ಸಿಕ್ಕಿತು. ಬಳಿಕ ನಿರ್ಮಲಾ ಸೀತಾರಾಮನ್‌ ಆರ್ಥಿಕ ಸಮೀಕ್ಷೆ ವರದಿಯನ್ನು ಲೋಕಸಭೆ ಮುಂದಿಟ್ಟರು.

ಬಜೆಟ್‌ ಮಂಡನೆಗೂ ಮುನ್ನ ಆರ್ಥಿಕ ಸಮೀಕ್ಷೆಯ ವರದಿಯನ್ನು ಲೋಕಸಭೆ ಮುಂದೆ ಮಂಡಿಸುವುದು ರೂಢಿ. ನಾಳೆ ಅಂದರೆ ಮಂಗಳವಾರ 2022-23ನೇ ಸಾಲಿನ ಕೇಂದ್ರ ಬಜೆಟ್‌ ಮಂಡನೆಯಾಗಲಿದ್ದು, ಅದಕ್ಕೂ ಮುನ್ನ ಸಮೀಕ್ಷೆ ವರದಿಯನ್ನು ಸದನದ ಮುಂದಿಡಲಾಯಿತು. ವರದಿಯ ಮುಖ್ಯ ಅಂಶಗಳು ಹೀಗಿವೆ.

ಮುಂದಿನ ವರ್ಷದ ಜಿಡಿಪಿ ಬೆಳವಣಿಗೆ ಎಷ್ಟು? ಸೋಮವಾರದ ಆರ್ಥಿಕ ಸಮೀಕ್ಷೆ ಮೇಲೆ ಎಲ್ಲರ ಕಣ್ಣು
* ಬಹುಮುಖ್ಯವಾಗಿ 2022-23ನೇ ಆರ್ಥಿಕ ವರ್ಷದಲ್ಲಿ ದೇಶದ ಬೆಳವಣಿಗೆ ದರ ಶೇ. 8 – 8.5ರ ನಡುವೆ ಇರಲಿದೆ ಎಂದು ಆರ್ಥಿಕ ಸಮೀಕ್ಷೆ ಅಂದಾಜಿಸಿದೆ. ಈ ವರ್ಷ ಶೇ. 9.2 ಬೆಳವಣಿಗೆ ದರ ಇರಲಿದೆ ಎಂದು ಅಂದಾಜಿಸಲಾಗಿದ್ದು, ಇದಕ್ಕೆ ಹೋಲಿಸಿದರೆ ಮುಂದಿನ ವರ್ಷದ ಬೆಳವಣಿಗೆ ಸ್ವಲ್ಪ ಮಟ್ಟಿಗೆ ಕಡಿಮೆ ಇರಲಿದೆ.

* ಪ್ರಸಕ್ತ ವರ್ಷದಲ್ಲಿ ಕೃಷಿ ಕ್ಷೇತ್ರ ಶೇ. 3.9, ಕೈಗಾರಿಕಾ ವಲಯ ಶೇ. 11.8, ಸೇವಾ ವಲಯ ಶೇ. 8.2 ದರದಲ್ಲಿ ಬೆಳವಣಿಗೆ ಕಾಣಲಿದೆ ಎಂದು ಸಮೀಕ್ಷೆ ತಿಳಿಸಿದೆ.

* ಮುಂದುವರಿದ ಮತ್ತು ಉದಯೋನ್ಮುಖ ಆರ್ಥಿಕತೆಗಳಲ್ಲಿ ಹಣದುಬ್ಬರವು ಜಾಗತಿಕ ಸಮಸ್ಯೆಯಾಗಿ ಕಾಣಿಸಿಕೊಂಡಿದೆ. ಭಾರತವು ಆಮದು ಮಾಡಿಕೊಳ್ಳುವ ವಸ್ತುಗಳ ಹಣದುಬ್ಬರದ ಬಗ್ಗೆ ಎಚ್ಚರದಿಂದಿರಬೇಕು, ವಿಶೇಷವಾಗಿ ಇಂಧನ ಬೆಲೆಗಳ ಮೇಲೆ ಜಾಗ್ರತೆ ವಹಿಸಬೇಕು ಎಂದು ಸಮೀಕ್ಷೆ ತಿಳಿಸಿದೆ.

* ಮೂರನೇ ಅಲೆಯ ಹೊರತಾಗಿಯೂ ಭಾರತದ ಬಳಕೆ (ಕನ್ಸಂಪ್ಶನ್‌) ಸದೃಢವಾಗಿದೆ. 2021-22 ರಲ್ಲಿ 7.0 ರಷ್ಟು ಬೆಳವಣಿಗೆಯನ್ನು ಸಾಧಿಸಿದ್ದು, ಇದಕ್ಕೆ ಸರಕಾರದ ವೆಚ್ಚ ಹೆಚ್ಚಾಗಿದ್ದೂ ಪ್ರಮುಖ ಕಾರಣವಾಗಿದೆ.

* ಸಮೀಕ್ಷೆಯು ಆರ್ಥಿಕತೆಯ ವಿವಿಧ ಕ್ಷೇತ್ರಗಳ ಸ್ಥಿತಿ ಮತ್ತು ಬೆಳವಣಿಗೆಯನ್ನು ವೃದ್ಧಿಸಲು ಕೈಗೊಳ್ಳಬೇಕಾದ ಸುಧಾರಣೆ ಕ್ರಮಗಳನ್ನು ವಿವರಿಸಿದೆ.

* ಭಾರತದ ಆರ್ಥಿಕತೆ ಸುಧಾರಿಸಲು ಪೂರೈಕೆ ಸರಣಿಯಲ್ಲಿ ಆಗಿರುವ ತೊಂದರೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದು, ಪೂರೈಕೆ ಸರಪಳಿಯ ಅಡೆತಡೆಗಳಿಂದ ಚೇತರಿಸಿಕೊಳ್ಳುವುದು ನಿಧಾನ ಮತ್ತು ದುಬಾರಿ ವ್ಯವಹಾರವಾಗಿದೆ ಎಂದು ಹೇಳಿದೆ.

* ಸರ್ಕಾರದ ಸಾಲವು ಇಲ್ಲಿಂದ ನಂತರ ಕಡಿಮೆಯಾಗುವ ನಿರೀಕ್ಷೆಯಿದೆ. ಕೇಂದ್ರ ಸರ್ಕಾರದ ಸಾಲವು 2019-20 ರಲ್ಲಿ ಜಿಡಿಪಿಯ ಶೇ. 49.1 ರಿಂದ 2020-21 ರಲ್ಲಿ ಜಿಡಿಪಿಯ ಶೇ. 59.3ಕ್ಕೆ ಏರಿಕೆಯಾಗಿದ್ದು, ಈಗ ಆರ್ಥಿಕತೆಯ ಚೇತರಿಕೆಯೊಂದಿಗೆ ಅದು ಕಡಿಮೆಯಾಗುವ ನಿರೀಕ್ಷೆಯಿದೆ.

* ಅಮೆರಿಕ ಮತ್ತು ಚೀನಾ ನಂತರ ಭಾರತವು ವಿಶ್ವದ ಮೂರನೇ ಅತಿದೊಡ್ಡ ಸ್ಟಾರ್ಟಪ್ ಪರಿಸರ ವ್ಯವಸ್ಥೆಯನ್ನು ಹೊಂದಿದೆ. 2016-17ರಲ್ಲಿ ದೇಶದಲ್ಲಿದ್ದ 733 ಸ್ಟಾರ್ಟಪ್‌ಗಳ ಸಂಖ್ಯೆ ಈಗ 14,000ಕ್ಕೆ ಏರಿಕೆಯಾಗಿದೆ. 2021ರಲ್ಲಿ ದಾಖಲೆಯ 44 ಸ್ಟಾರ್ಟ್‌ಅಪ್‌ಗಳು ಯುನಿಕಾರ್ನ್ ಸ್ಥಾನಮಾನವನ್ನು ಪಡೆದುಕೊಂಡಿವೆ. ಒಟ್ಟಾರೆ ದೇಶದಲ್ಲಿರುವ ಯುನಿಕಾರ್ನ್‌ಗಳ ಸಂಖ್ಯೆ 83ಕ್ಕೆ ಏರಿಕೆಯಾಗಿದೆ.

* ಭಾರತದ ಬಂಡವಾಳ ಮಾರುಕಟ್ಟೆಗಳು ಅತ್ಯುತ್ತಮವಾಗಿ ಕಾರ್ಯನಿರ್ವಹಿಸಿವೆ. ಪ್ರಮುಖ ಅಭಿವೃದ್ಧಿಶೀಲ ಆರ್ಥಿಕತೆಗಳ ಮಾರುಕಟ್ಟೆಗಳನ್ನು ತೆಗೆದುಕೊಂಡಾಗ ಭಾರತೀಯ ಮಾರುಕಟ್ಟೆಯ ಪ್ರದರ್ಶನ ಅತ್ಯುತ್ತಮವಾಗಿದೆ.

* ಏಪ್ರಿಲ್‌ನಿಂದ ನವೆಂಬರ್‌ ಅವಧಿಯಲ್ಲಿ 75 ಕಂಪನಿಗಳು ಷೇರು ಮಾರುಕಟ್ಟೆ ಪ್ರವೇಶಿಸಿದ್ದು 89,066 ಕೋಟಿ ರೂ. ಸಂಗ್ರಹಿಸಿವೆ. ಭಾರತದಲ್ಲಿ ಯುಪಿಐ ಪಾವತಿ ಹೆಚ್ಚುತ್ತಿದ್ದು, ಸದ್ಯಕ್ಕೆ ದೇಶದ ಅತೀ ದೊಡ್ಡ ಚಿಲ್ಲರೆ ಪಾವತಿ ವ್ಯವಸ್ಥೆಯಾಗಿದೆ.

* ಏರ್ ಇಂಡಿಯಾದ ಖಾಸಗೀಕರಣವು ಮಹತ್ವದ್ದಾಗಿದೆ. ಹೂಡಿಕೆ ಹಿಂಪಡೆದು ಆದಾಯವನ್ನು ಗಳಿಸುವ ವಿಷಯದಲ್ಲಿ ಮಾತ್ರವಲ್ಲದೆ ಖಾಸಗೀಕರಣವನ್ನು ಉತ್ತೇಜಿಸಲು ಸಹ ಇದು ಬಹುಮುಖ್ಯವಾಗಿದೆ.

ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್‌ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.