ಬ್ಯಾಡಗಿ ಮೆಣಸಿನಕಾಯಿ ಮಾರುಕಟ್ಟೆಗೆ ಹುಬ್ಬಳ್ಳಿ ಎಪಿಎಂಸಿ ಪೈಪೋಟಿ, ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ ಆವಕ

• ಕಾಶಪ್ಪ ಕರದಿನ ಹುಬ್ಬಳ್ಳಿ

ಹುಬ್ಬಳ್ಳಿ ಅಮರಗೋಳ ಎಪಿಎಂಸಿ ಮಾರುಕಟ್ಟೆಗೆ ಹಿಂದೆಂದಿಗಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಒಣ ಮೆಣಸಿನಕಾಯಿ ಅವಕವಾಗುತ್ತಿದ್ದು, ಅತಿ ದೊಡ್ಡ ಮಾರುಕಟ್ಟೆಯಲ್ಲಿ ಹೊಸ ಕಳೆ ಕಾಣಿಸತೊಡಗಿದೆ. ಇದರೊಂದಿಗೆ ಸುತ್ತಲಿನ ಐದಾರು ಜಿಲ್ಲೆಗಳ ಮೆಣಸಿನಕಾಯಿ ಬೆಳೆಗಾರರಿಗೆ ಹುಬ್ಬಳ್ಳಿ ಮಾರುಕಟ್ಟೆ ಹೊಸ ಆಶಾಭಾವನೆ ಮೂಡಿಸಿದೆ.

ಕಳೆದ ಒಂದು ತಿಂಗಳಿಂದ ಹುಬ್ಬಳ್ಳಿ ಎಪಿಎಂಸಿ ಮಾರುಕಟ್ಟೆಯಲ್ಲಿ ದಿನದಿಂದ ದಿನಕ್ಕೆ ಹೆಚ್ಚಿನ ಸಂಖ್ಯೆಯ ರೈತರು ಮೆಣಸಿನಕಾಯಿ ಮಾರಾಟಕ್ಕೆ ಅಗಮಿಸುತ್ತಿರುವುದನ್ನು ಗಮನಿಸಿದರೆ ದೂರದ ಬ್ಯಾಡಗಿ ಮಾರುಕಟ್ಟೆಯೊಂದಿಗೆ ಹುಬ್ಬಳ್ಳಿ ಮಾರುಕಟ್ಟೆ ಆರೋಗ್ಯಕರ ಪೈಪೋಟಿಯತ್ತ ಹೆಜ್ಜೆ ಹಾಕುತ್ತಿದೆ. ಬ್ಯಾಡಗಿ ಮಾರುಕಟ್ಟೆಗಿಂತ ಹುಬ್ಬಳ್ಳಿಯಲ್ಲಿ ಸ್ಪರ್ಧಾತ್ಮಕ ದರ ಸಿಗುತ್ತಿರುವುದು ಮತ್ತು ರೈತರಿಗೆ ಸಾಗಣೆಯಲ್ಲಿ ಕಡಿಮೆ ಖರ್ಚು ಮತ್ತು ಉತ್ಪನ್ನದಲ್ಲಿ ಹೆಚ್ಚು ಆದಾಯ ದೊರೆಯುತ್ತಿದೆ. ಇದು ಬೆಳೆಗಾರರಿಗೆ ವರದಾನವಾಗಿ ಪರಿಣಮಿಸುತ್ತಿದೆ ಎನ್ನುತ್ತಿದ್ದಾರೆ ರೈತರು.

ಖರೀದಿದಾರರು ಮತ್ತು ವ್ಯಾಪಾರಸ್ಥರೂ

ಪೂರಕವಾಗಿ ಸ್ಥಳೀಯ ಎಪಿಎಂಸಿ ಆಡಳಿತ ಮಂಡಳಿಯು ಮೆಣಸಿನಕಾಯಿ ಖರೀದಿದಾರರು ಹಾಗೂ ವ್ಯಾಪಾರಸ್ಥರ ಮಧ್ಯೆ ಸೌಹಾರ್ದ ವಾತಾವರಣ ಸೃಷ್ಟಿಸುವಲ್ಲಿ ಯಶಸ್ವಿಯಾಗಿದೆ. ಇದು ಎಪಿಎಂಸಿಯಲ್ಲಿ ದೊಡ್ಡ ಬೆಳವಣಿಗೆ ಎಂದೇ ವಿಶ್ಲೇಷಿಸಲಾಗುತ್ತಿದೆ. ಈ ಮೊದಲು ಖರೀದಿದಾರರು ಮತ್ತು ವ್ಯಾಪಾರಸ್ಥರ ಮಧ್ಯೆ ಅಷ್ಟೊಂದು ಹಿತಕರ ವಾತಾವರಣದ ಸನ್ನಿವೇಶ ಇದ್ದಿರಲಿಲ್ಲ. ಇದು ವಿಶೇಷವಾಗಿ ಒಣ ಮೆಣಸಿನಕಾಯಿ ವಹಿವಾಟಿನ ಮೇಲೆ ಪ್ರತಿಕೂಲ ಪರಿಣಾಮ ಬೀರುತಿತ್ತು. ಇದೀಗ ಎಲ್ಲವೂ ತಿಳಿಯಾಗಿ ಪರಸ್ಪರ ಹೊಂದಾಣಿಕೆ ಭಾವನೆ ಸೃಷ್ಟಿಯಾಗಿದೆ. ಹಾಗಾಗಿ ಮೆಣಸಿನಕಾಯಿ ಮಾರುಕಟ್ಟೆಗೆ ಶುಕ್ರದೆಸೆ ಶುರುವಾಗಿದೆ ಎನ್ನುತ್ತಾರೆ ಎಪಿಎಂಸಿ ಆಡಳಿತ ಮಂಡಳಿಯ ಮೂಲಗಳು.

ಬ್ಯಾಡಗಿ ಮಾರುಕಟ್ಟೆಗೆ ದಾಖಲೆಯ 2.28 ಲಕ್ಷ ಮೆಣಸಿನಕಾಯಿ ಚೀಲ ಆವಕ, ದರದಲ್ಲಿ ಮುಂದುವರಿದ ಸ್ಥಿರತೆ
45 ಸಾವಿರವರೆಗೆ ಆವಕ

ಬ್ಯಾಡಗಿಯಲ್ಲಿ2 ಲಕ್ಷದವರೆಗೆ ಮೆಣಸಿನಕಾಯಿ ಚೀಲಗಳು ಆವಕವಾಗುತ್ತಿರುವ ಸಂದರ್ಭದಲ್ಲಿ ಹುಬ್ಬಳ್ಳಿ ಎಪಿಎಂಸಿ ಇತಿಹಾಸದಲ್ಲಿ ಅತಿ ಹೆಚ್ಚು 20 ಸಾವಿರ ಚೀಲಗಳು ಆವಕವಾಗುತ್ತಿದ್ದವು. ಆದರೆ, ಈ ವರ್ಷದ ಹಂಗಾಮಿನಲ್ಲಿ ಆವಕದ ಪ್ರಮಾಣ 45 ಸಾವಿರ ಚೀಲಗಳವರೆಗೆ ತಲುಪಿದೆ. ಕಳೆದ ವಾರ 45 ಸಾವಿರಕ್ಕೂ ಹೆಚ್ಚು ಮೆಣಸಿಕಾಯಿ ಚೀಲಗಳು ಆವಕವಾಗಿದ್ದವು. ಜ. 27ರಂದು ಮತ್ತೆ 34 ಸಾವಿರಕ್ಕೂ ಹೆಚ್ಚು ಚೀಲಗಳನ್ನು ಮಾರಾಟಕ್ಕೆ ತರಲಾಗಿತ್ತು. ಅದಕ್ಕೂ ಮೊದಲು ದಿನವೊಂದಕ್ಕೆ ಸರಾಸರಿ 20 ಸಾವಿರ ಮೆಣಸಿಕಾಯಿ ಚೀಲಗಳು ಮಾರುಕಟ್ಟೆಗೆ ಬಂದಿವೆ. ಮುಂದಿನ ದಿನಗಳಲ್ಲಿ ಇನ್ನು ಹೆಚ್ಚಿನ ಪ್ರಮಾಣದ ಮೆಣಸಿನಕಾಯಿ ಬರಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸುತ್ತಾರೆ ಎಪಿಎಂಸಿ ಅಧ್ಯಕ್ಷ ಸುರೇಶ ಕಿರೇಸೂರ.

ದರದಲ್ಲಿ ಕಾಣದ ವ್ಯತ್ಯಾಸ

ಬ್ಯಾಡಗಿಯಲ್ಲಿನ ದರದಷ್ಟೇ ಹುಬ್ಬಳ್ಳಿ ಮಾರುಕಟ್ಟೆಯಲ್ಲೂ ಸಿಗುತ್ತಿದೆ. ಬ್ಯಾಡಗಿಯಲ್ಲೂ ಸರಾಸರಿ 20 ರಿಂದ 25 ಸಾವಿರ ರೂ.ಗಳವರೆಗೆ ಮಾರಾಟವಾಗುತ್ತದೆ. ಹುಬ್ಬಳ್ಳಿಯಲ್ಲಿ ಸಹ ಇದೇ ಸರಾಸರಿಯಲ್ಲಿ ಖರೀದಿಯಾಗುತ್ತಿದೆ ಎಂದು ಎಪಿಎಂಸಿ ಅಧ್ಯಕ್ಷ ಸುರೇಶ ಕಿರೇಸೂರ ತಿಳಿಸಿದ್ದಾರೆ.

ಇಲ್ಲಿಯೂ ಅವರೇ..?

ಹುಬ್ಬಳ್ಳಿ ಮಾರುಕಟ್ಟೆಯಲ್ಲಿ ಬ್ಯಾಡಗಿಯ ಖರೀದಿದಾರರೇ ಮೆಣಸಿನಕಾಯಿ ಟೆಂಡರ್‌ ಹಾಕುತ್ತಿದ್ದಾರೆ. ಹೆಚ್ಚಿನ ಉತ್ಪನ್ನವನ್ನೂ ಅವರೇ ಖರೀದಿಸುತ್ತಿದ್ದಾರೆ. ಬಹಳಷ್ಟು ಖರೀದಿದಾರರು ಹುಬ್ಬಳ್ಳಿಯಲ್ಲಿಯೇ ಮನೆ ಮಾಡಿಕೊಂಡಿದ್ದು, ಇಲ್ಲಿಯೇ ವಹಿವಾಟು ನಡೆಸಲು ಇಚ್ಛೆ ವ್ಯಕ್ತಪಡಿಸುತ್ತಿದ್ದಾರೆ. ಅಲ್ಲದೇ ಕುಟುಂಬದ ಸದಸ್ಯರೊಬ್ಬರನ್ನು ಹುಬ್ಬಳ್ಳಿ ಮಾರುಕಟ್ಟೆ ವಹಿವಾಟನ್ನು ನಿರ್ವಹಿಸಲು ನಿಯೋಜಿಸುತ್ತಿದ್ದಾರೆ. ನಿಧಾನಕ್ಕೆ ಇಲ್ಲಿಯೇ ಹೆಚ್ಚಿನ ವಹಿವಾಟು ಮುಂದುವರಿಸಲು ಆಸಕ್ತಿ ವಹಿಸಿದ್ದಾರೆ ಎಂದು ಎಪಿಎಂಸಿ ಮೂಲಗಳು ತಿಳಿಸಿವೆ.

“ಹುಬ್ಬಳ್ಳಿ ಎಪಿಎಂಸಿಯಲ್ಲಿರೈತರಿಗೆ ಅನುಕೂಲವಾಗುವಂತೆ ಒಣ ಮೆಣಸಿನಕಾಯಿ ಖರೀದಿದಾರರಿಗೆ ಇತರ ವ್ಯಾಪರಸ್ಥರಂತೆ ಎಲ್ಲ ರೀತಿಯ ಸೌಲಭ್ಯ ಕಲ್ಪಿಸಲಾಗುತ್ತಿದೆ. ದಾಸ್ತಾನು ಮತ್ತು ತೂಕ ಮಾಡಲು ಯಾವುದೇ ಸಮಸ್ಯೆ ಇಲ್ಲದಂತೆ ನೋಡಿಕೊಳ್ಳುತ್ತೇವೆ. ರೈತರಿಗೆ ಸಾಗಣೆ ವೆಚ್ಚ ಉಳಿತಾಯವಾಗುತ್ತದೆಯಲ್ಲದೇ ಬ್ಯಾಡಗಿಯಲ್ಲಿನ ದರದಷ್ಟೇ ಇಲ್ಲಿಯೂ ದೊರೆಯುತ್ತದೆ. ವ್ಯಾಪಾರಸ್ಥರು ಮತ್ತು ಖರೀದಿದಾರರ ಮಧ್ಯೆ ಹೊಂದಾಣಿಕೆ ಸರಿದೂಗಿಸಿ ಮಾರುಕಟ್ಟೆಯಲ್ಲಿ ವಹಿವಾಟು ಹೆಚ್ಚಿಸಲಾಗುತ್ತಿದೆ. ಒಟ್ಟಾರೆ ಹುಬ್ಬಳ್ಳಿ ಮಾರುಕಟ್ಟೆಯಲ್ಲಿ ರೈತರಿಗೆ ಉತ್ತಮ ದರ ಸಿಗುವುದರ ಜತೆಗೆ ಉಳಿತಾಯವೂ ಆದಂತಾಗುತ್ತದೆ,” ಎಂದು ವಿವರಿಸುತ್ತಾರೆ ಸುರೇಶ ಕಿರೇಸೂರ.