ರಾಜ್ಯಾದ್ಯಂತ 1,190 ಚಾರ್ಜಿಂಗ್‌ ಸ್ಟೇಶನ್‌ಗೆ ಸರಕಾರಿ ಸ್ಥಳ ಗುರುತು!

ಎಸ್‌.ಜಿ. ಕುರ್ಯ ಉಡುಪಿ
ರಾಜ್ಯದ 31 ಜಿಲ್ಲೆ ಮತ್ತು 240 ತಾಲೂಕು ಕೇಂದ್ರಗಳಲ್ಲಿ ಪರಿಸರ ಮಾಲಿನ್ಯ ನಿಯಂತ್ರಣಕ್ಕಾಗಿ 1,190 ಎಲೆಕ್ಟ್ರಿಕ್‌ ಚಾರ್ಜಿಂಗ್‌ ಸೆಂಟರ್‌ ಸ್ಥಾಪನೆಗೆ ಸರಕಾರಿ ಸ್ಥಳ ಗುರುತಿಸುವ ಪ್ರಕ್ರಿಯೆ ಅಂತಿಮವಾಗಿದೆ.

ಇಂಧನ ಇಲಾಖೆಯು ಸರಕಾರಿ ಕಟ್ಟಡಗಳ ಆವರಣದಲ್ಲಿ ಏಳು ಕಾರುಗಳನ್ನು ನಿಲ್ಲಿಸಲು ಹಾಗೂ ವಾಹನ ಚಾಲನೆ ಸಹಿತ 1,008 ಚದರಡಿ ಜಾಗದ ಅಗತ್ಯವನ್ನು ಪರಿಗಣಿಸಿ ಎಲೆಕ್ಟ್ರಿಕ್‌ ಚಾರ್ಜಿಂಗ್‌ ಸೆಂಟರ್‌ ಆರಂಭಕ್ಕೆ ಉದ್ದೇಶಿಸಲಾಗಿದೆ.

ಎಲೆಕ್ಟ್ರಿಕ್‌ ಮೊಬಿಲಿಟಿ ವಲಯಕ್ಕೆ ಅಗತ್ಯ ಉತ್ತೇಜನ, ಹೂಡಿಕೆ ಆಕರ್ಷಣೆ ನಿಟ್ಟಿನಲ್ಲಿ ರಾಜ್ಯ ವಾಣಿಜ್ಯ ಮತ್ತು ಕೈಗಾರಿಕಾ ಇಲಾಖೆ ಕರ್ನಾಟಕ ಎಲೆಕ್ಟ್ರಿಕ್‌ ವೆಹಿಕಲ್‌ ಆ್ಯಂಡ್‌ ಎನರ್ಜಿ ಸ್ಟೋರೇಜ್‌ ಪಾಲಿಸಿ 2017 ಜಾರಿಗೊಳಿಸಿದ್ದು ಈ ನಿಟ್ಟಿನಲ್ಲಿ ಬೆಸ್ಕಾಂ ರಾಜ್ಯ ನೋಡೆಲ್‌ ಏಜೆನ್ಸಿಯಾಗಿದೆ.

ದಿಲ್ಲಿಯಲ್ಲಿ₹2,500ಕ್ಕೆ ಎಲೆಕ್ಟ್ರಿಕ್‌ ವಾಹನಗಳ ಚಾರ್ಜಿಂಗ್‌ ಸ್ಟೇಷನ್‌ ಅಳವಡಿಕೆ!

2021-22ನೇ ಸಾಲಿನ ಬಜೆಟ್‌ ಮೂಲಕ ರಾಜ್ಯದಲ್ಲಿ ವಿದ್ಯುತ್‌ ವಾಹನಗಳ ಬಳಕೆಗೆ ಉತ್ತೇಜನ, ವಾಯು ಮಾಲಿನ್ಯ ನಿಯಂತ್ರಣಕ್ಕೆ 1,000 ವಿದ್ಯುತ್‌ ಚಾಲಿತ ವಾಹನ ಚಾರ್ಜಿಂಗ್‌ ಕೇಂದ್ರಗಳನ್ನು ಸಾರ್ವಜನಿಕ, ಖಾಸಗಿ ಸಹಭಾಗಿತ್ವದಲ್ಲಿ ಸ್ಥಾಪಿಸಲು ಉದ್ದೇಶಿಸಲಾಗಿದೆ. ಕೋವಿಡ್‌ ಸಹಿತ ಆರ್ಥಿಕ ಕಾರಣಗಳಿಗಾಗಿ ಯೋಜನೆ ನಿಧಾನಗತಿಯಲ್ಲಿದೆ.

ಯಾವ್ಯಾವ ಕಟ್ಟಡ ಪರಿಗಣನೆ?: ಜಿಲ್ಲಾಧಿಕಾರಿ ಕಚೇರಿ, ತಾಲೂಕು ಕಚೇರಿ, ಮಿನಿ ವಿಧಾನ ಸೌಧ, ಸರಕಾರಿ ಆಸ್ಪತ್ರೆ, ಬಸ್‌ ನಿಲ್ದಾಣ, ಸರಕಾರಿ ಕಾಲೇಜು ಸಹಿತ ಅನ್ಯ ಸರಕಾರಿ ಕಟ್ಟಡಗಳನ್ನು ಗುರುತಿಸಲಾಗಿದೆ. ಎಲೆಕ್ಟ್ರಿಕ್‌ ಚಾರ್ಜಿಂಗ್‌ ಸೆಂಟರ್‌ಗಳಿಗೆ ನೀಡುವ ವಿದ್ಯುತ್‌ನ್ನು ಎಲ್‌ಟಿ 6(ಬೀದಿದೀಪ, ನೀರು ಸರಬರಾಜು, ಪ್ರತಿ ಯುನಿಟ್‌ಗೆ 5 ರೂ.) ದರದಲ್ಲಿ ಪೂರೈಸಲಾಗುವುದು.

ರಾಜ್ಯದ ಏಳು ಮಹಾ ನಗರಗಳಲ್ಲಿಜಾರಿಯಲ್ಲಿರುವ ಸ್ಮಾರ್ಟ್‌ ಸಿಟಿ ಯೋಜನೆಯಡಿ ಒಟ್ಟು 600 ಇವಿಸಿಎಸ್‌ ಸ್ಥಾಪನೆಯಾಗಲಿದೆ. 31 ಜಿಲ್ಲೆಗಳಲ್ಲಿಸ್ಥಾಪನೆಯಾಗಲಿರುವ ಒಟ್ಟು 1,190 ಇವಿಎಸಿಎಸ್‌ಗಳ ಪೈಕಿ ಶೇ. 50.42ರಷ್ಟು ಸ್ಮಾರ್ಟ್‌ ಸಿಟಿಗಳಲ್ಲಿವೆ. ಶೀಘ್ರವೇ ಟೆಂಡರ್‌ ಕರೆದು ಇವಿಸಿಎಸ್‌ ಸ್ಥಾಪನೆ ನಿಟ್ಟಿನಲ್ಲಿಸರಕಾರಿ ಜಾಗ ಗುರುತಿಸಿ ಶೀಘ್ರವೇ ಅಂತಿಮಗೊಳಿಸಿ ಆದೇಶ ಹೊರಡಿಸಲು ಸಿದ್ಧತೆ ನಡೆದಿದೆ ಎಂದು ರಾಜ್ಯ ಇಂಧನ ಇಲಾಖಾಧಿಕಾರಿಗಳು ತಿಳಿಸಿದ್ದಾರೆ.

ಇಂಧನ ದುಬಾರಿ: ವಿದ್ಯುತ್‌ ಚಾರ್ಜಿಂಗ್‌ ಕೇಂದ್ರಗಳಿಗೆ ಡಿಮ್ಯಾಂಡ್‌; ಎಲೆಕ್ಟ್ರಿಕ್‌ ವಾಹನಗಳತ್ತ ಜನರ ಚಿತ್ತ!

ಸ್ಮಾರ್ಟ್‌ ಸಿಟಿ ವ್ಯಾಪ್ತಿಯಲ್ಲೆಷ್ಟು?

• ಬೆಂಗಳೂರು: 150
• ತುಮಕೂರು: 75
• ದಾವಣಗೆರೆ: 75
• ಧಾರವಾಡ: 75
• ಬೆಳಗಾವಿ: 75
• ಶಿವಮೊಗ್ಗ: 75
• ದಕ್ಷಿಣ ಕನ್ನಡ: 75

ವಿದ್ಯುತ್‌ ವಾಹನಗಳು ಈಗಾಗಲೇ ಹೆಚ್ಚಿನ ಸಂಖ್ಯೆಯಲ್ಲಿ ರಸ್ತೆಗಿಳಿಯಬೇಕಿದ್ದರೂ ವಿಳಂಬವಾಗಿದೆ. ಇನ್ನಾದರೂ ಸೂಕ್ತ ವ್ಯವಸ್ಥೆ, ಚಾರ್ಜಿಂಗ್‌ ಸೆಂಟರ್‌ಗಳು ಅಲ್ಲಲ್ಲಿ ಬರಬೇಕು. ಚಾರ್ಜಿಂಗ್‌ ನಿಟ್ಟಿನಲ್ಲಿ ಅರ್ಧ ಗಂಟೆ ತಗುಲಿದರೆ ಸಮಯ ಕಳೆಯಲು ಉಪಾಹಾರಗೃಹ, ವಿಶ್ರಾಂತಿ ಗೃಹ ಗಳ ಅಗತ್ಯವಿದೆ, ಉದ್ಯೋಗ ಸೃಷ್ಟಿಸಲಿದೆ. ಚಾರ್ಜಿಂಗ್‌ ಅಥವಾ ಬ್ಯಾಟರಿ ಬದಲಾವಣೆ ಗೊಂದಲವಿದ್ದು, ಶೀಘ್ರ ಚಾರ್ಜಿಂಗ್‌ ತಂತ್ರಜ್ಞಾನ ಬೇಕಿದೆ. ಬಳಸಿ ಎಸೆಯುವ ಸಂಸ್ಕೃತಿ ನಮ್ಮದಲ್ಲ. ಹೀಗಾಗಿ ಪೆಟ್ರೋಲ್‌, ಡೀಸೆಲ್‌ ವಾಹನಗಳನ್ನು ಅವಧಿಗೆ ಮೊದಲೇ ವಿದ್ಯುತ್‌ ವಾಹನವಾಗಿ ಪರಿವರ್ತಿಸುವ ತಂತ್ರಜ್ಞಾನಕ್ಕೆ ಒತ್ತು ನೀಡಬೇಕು, ಇನ್ನಷ್ಟು ಆವಿಷ್ಕಾರ, ಸಂಶೋಧನೆಗಳಾಗಬೇಕು. 2030ರೊಳಗೆ ಜಗತ್ತಿನ ಬಹುತೇಕ ರಾಷ್ಟ್ರಗಳ ರಸ್ತೆಗಳಲ್ಲಿ ಶೇ.50ರಷ್ಟು ವಿದ್ಯುತ್‌, ಸೋಲಾರ್‌, ಬ್ಯಾಟರಿ ಆಧಾರಿತ ವಾಹನಗಳು ಓಡಾಡುವಂತಾದರೆ ಮಾಲಿನ್ಯ ಕಡಿಮೆಯಾದೀತು.
-ಡಾ.ಎಚ್‌.ಎನ್‌. ಉದಯಶಂಕರ್‌, ತಜ್ಞರು, ಮಣಿಪಾಲ