2021ರಲ್ಲಿ ದಾಖಲೆಯ 5.5 ಬಿಲಿಯನ್‌ ಡಾಲರ್‌ ಲಾಭ ಬಾಚಿದ ಟೆಸ್ಲಾ: ಇವಿ ಮಾರುಕಟ್ಟೆಯಲ್ಲಿ ಮಸ್ಕ್‌ ಪಾರಮ್ಯ

ನ್ಯೂಯಾರ್ಕ್‌: ಅಮೆರಿಕ ಮೂಲಕ ಎಲೆಕ್ಟ್ರಿಕ್‌ ಕಾರುಗಳ ತಯಾರಿಕ ಕಂಪನಿ ಎಲಾನ್ ಮಸ್ಕ್‌ ಒಡೆತನದ ‘ಟೆಸ್ಲಾ‘ 2021ರಲ್ಲಿ ಬರೋಬ್ಬರಿ 5.5 ಬಿಲಿಯನ್‌ ಡಾಲರ್‌ ಲಾಭ ಗಳಿಸಿದೆ. ಆ ಮೂಲಕ ಎಲೆಕ್ಟ್ರಿಕ್‌ ಕಾರುಗಳ ಮಾರಾಟದಲ್ಲಿ ಪಾರಮ್ಯ ಮೆರೆದಿದೆ.

2021ರಲ್ಲಿ ಉಂಟಾದ ಸೆಮಿಕಂಡಕ್ಟರ್‌ಗಳ ಅಭಾವದ ನಡುವೆಯೂ ಟೆಸ್ಲಾ ದಾಖಲೆಯ ಲಾಭ ಗಳಿಸಿದೆ. ಈ ಅವಧಿಯಲ್ಲಿ ಕಾರುಗಳ ಮಾರಾಟ ಶೇ. 87 ರಷ್ಟು ಏರಿಕೆಯಾಗಿದ್ದು, ಟೆಸ್ಲಾದ ಒಟ್ಟು ಆದಾಯ ಶೇ. 71 ರಷ್ಟು ಏರಿಕೆಯಾಗಿದೆ. 2021ರಲ್ಲಿ ಟೆಸ್ಲಾ ಒಟ್ಟು 53.8 ಬಿಲಿಯನ್‌ ಡಾಲರ್‌ನಷ್ಟು ವಹಿವಾಟು ನಡೆಸಿದೆ ಎಂದು ಎಲಾನ್‌ ಮಸ್ಕ್‌ ತಿಳಿಸಿದ್ದಾರೆ.

ಬೆಂಗಳೂರಲ್ಲಿ ಟೆಸ್ಲಾ ಘಟಕ ಸ್ಥಾಪಿಸಿ: ಎಲಾನ್‌ ಮಸ್ಕ್‌ಗೆ ಆಹ್ವಾನ ನೀಡಿದ ಸಚಿವ ಮುರುಗೇಶ್‌ ನಿರಾಣಿ
ಸೆಮಿಕಂಡಕ್ಟರ್‌ ಅಭಾವದಿಂದಾಗಿ ಟೆಸ್ಲಾದ ತ್ರೈಮಾಸಿಕ ಕಾರು ಉತ್ಪಾದನೆಗೆ ಅಡಚಣೆಯಾದರೂ ಕೂಡ, ಕಾರುಗಳ ಮಾರಾಟ ಕಡಿಮೆಯಾಗದಂತೆ ಟೆಸ್ಲಾ ನೋಡಿಕೊಂಡಿತ್ತು. ಸೆಮಿಕಂಡಕ್ಟರ್‌ ಅಭಾವದ ಹೊಡೆತ ಈ ವರ್ಷವೂ ಪರಿಣಾಮ ಬೀರಲಿದ್ದು, ಉತ್ಪಾದನೆ ಹೆಚ್ಚಳ ಮಾಡುವ ಮೂಲಕ ಹೆಚ್ಚಿನ ವಹಿವಾಟು ನಡೆಸಲು ಯೋಜನೆ ಹಾಕಿಕೊಳ್ಳಲಾಗಿದೆ ಎಂದು ಟೆಸ್ಲಾ ಹೇಳಿದೆ.

ಸಲಕರಣೆ ಸಾಮರ್ಥ್ಯ, ಕಾರ್ಯಾಚರಣೆಯ ದಕ್ಷತೆ ಮತ್ತು ಸಾಮರ್ಥ್ಯದಿಂದಾಗಿ ಕಾರುಗಳ ಮಾರಾಟ ಹೆಚ್ಚಳವಾಗಿದೆ. ಸೆಮಿಕಂಡಕ್ಟರ್‌ ಸೇರಿ ಹಲವು ಕಚ್ಚಾ ವಸ್ತುಗಳ ಪೂರೈಕೆಯಲ್ಲಿ ವ್ಯತ್ಯಯವಾಗಿದ್ದರಿಂದ ತಯಾರಿಕಾ ಘಟಕಗಳು ಸಾಮರ್ಥ್ಯಕ್ಕಿಂತ ಕಡಿಮೆ ಕೆಲಸ ನಿರ್ವಹಿಸುತ್ತಿದೆ. 2022 ರಾದ್ಯಂತ ಇದರ ಪರಿಣಾಮ ಇರಲಿದೆ. ಇದಾದ್ಯೂ ಉತ್ಪಾದನಾ ಸಾರ್ಮಥ್ಯ ಹೆಚ್ಚಿಸುವ ಮೂಲಕ ಈ ವರ್ಷ ಶೇ.50 ರಷ್ಟು ಹೆಚ್ಚು ಪ್ರಗತಿ ಹೊಂದುವ ಗುರಿ ಹಾಕಿಕೊಳ್ಳಲಾಗಿದೆ ಎಂದು ಟೆಸ್ಲಾ ಹೇಳಿದೆ.

ಭಾರತದಲ್ಲಿ ‘ಟೆಸ್ಲಾ’ ಆರಂಭಿಸಲು ಅನೇಕ ಸವಾಲುಗಳಿವೆ ಎಂದ ಎಲಾನ್ ಮಸ್ಕ್
ಉತ್ಪಾದನಾ ಘಟಕ ಹೆಚ್ಚಿಸುವತ್ತ ಟೆಸ್ಲಾ ಗಮನ?

ಡಿಸೆಂಬರ್‌ 2021ಕ್ಕೆ ಅಂತ್ಯವಾದ ತ್ರೈಮಾಸಿಕದಲ್ಲಿ ಟೆಸ್ಲಾ 2.3 ಬಿಲಿಯನ್‌ ಡಾಲರ್‌ ಲಾಭ ಗಳಿಸಿತ್ತು. ಇದು 2020ರ ಇದೇ ತ್ರೈಮಾಸಿಕಕ್ಕೆ ಹೋಲಿಕೆ ಮಾಡಿದರೆ ಎಂಟು ಪಟ್ಟು ಹೆಚ್ಚು. ಇದೇ ತ್ರೈಮಾಸಿಕದಲ್ಲಿ ಆದಾಯ ಕೂಡ ಶೇ. 65ರಷ್ಟು ಹೆಚ್ಚಾಗಿ, ಒಟ್ಟು ಆದಾಯ 17.7 ಬಿಲಿಯನ್‌ ಡಾಲರ್‌ಗೆ ಮುಟ್ಟಿತ್ತು.

ಇನ್ನು ಉತ್ಪಾದನೆಯನ್ನು ಹೆಚ್ಚಿಸುವತ್ತ ಟೆಸ್ಲಾ ಗಮನ ಹರಿಸಿದ್ದು, ಅದಕ್ಕಾಗಿ ಉತ್ಪಾದನಾ ಘಟಕ ಹೆಚ್ಚಿಸಲು ಯೋಜನೆ ಹಾಕಿಕೊಂಡಿದೆ. ಈಗಾಗಲೇ ಕ್ಯಾಲಿಫೋರ್ನಿಯಾ ಹಾಗೂ ಶಾಂಘೈನಲ್ಲಿರುವ ಘಟಕಗಳಲ್ಲಿ ಉತ್ಪಾದನೆ ಹೆಚ್ಚಿಸಲು ಯೋಜನೆ ಹಾಕಿಕೊಳ್ಳಲಾಗಿದೆ. ಅದರ ಜತಗೆ ಜರ್ಮನಿ ಹಾಗೂ ಟೆಕ್ಸಾಸ್‌ನಲ್ಲಿ ಹೊಸ ಘಟಕ ಆರಂಭಿಸಲೂ ಮುಂದಾಗಿದೆ.

ಜರ್ಮನಿಯಲ್ಲಿ ಹೊಸ ಘಟಕ ಆರಂಭಿಸುವ ಬಗ್ಗೆ ಸ್ಥಳಿಯಾಡಳಿತ ಜತೆಗೆ ಅನುಮತಿ ಕೋರಲಾಗಿದೆ. ಈ ಬಗ್ಗೆ ಮಾತುಕತೆ ಜಾರಿಯಲ್ಲಿದೆ ಎಂದು ಟೆಸ್ಲಾ ಹೇಳಿದೆ.

ಟೆಸ್ಲಾದ ಆಮದು ಸುಂಕ ಕಡಿತ ಬೇಡಿಕೆ ಬಗ್ಗೆ ಕೇಂದ್ರದಿಂದ ಪರಿಶೀಲನೆ, ಹಲವು ಕಂಪನಿಗಳ ವಿರೋಧ
ಇನ್ನು ಹಲವು ಕಡೆ ತನ್ನ ಫ್ಯಾಕ್ಟರಿಗಳನ್ನು ಆರಂಭಿಸಲು ಎಲಾನ್ ಮಸ್ಕ್‌ ಅವರು ಯೋಜನೆ ಹಾಕಿಕೊಂಡಿದ್ದು, ಈ ವರ್ಷ ಖುದ್ದು ಅವರೇ ಅದನ್ನು ಘೋಷಣೆ ಮಾಡುವ ಸಾಧ್ಯತೆ ಇದೆ.

ಇನ್ನು ಭಾರತದಲ್ಲಿ, ತೆರಿಗೆ ವಿನಾಯಿತಿ ಸಿಗದ ಕಾರಣ ಈ ವರ್ಷವೂ ಟೆಸ್ಲಾದ ಫ್ಯಾಕ್ಟರಿ ಆರಂಭವಾಗುವುದು ಅನುಮಾನ. ಈ ಬಗ್ಗೆ ಖುದ್ದು ಮಸ್ಕ್‌ ಅವರೇ ಹೇಳಿದ್ದರು. ಈಗಾಗಲೇ ಬೆಂಗಳೂರಿನಲ್ಲಿ ಕಂಪನಿ ನೋಂದಣಿಯಾಗಿದೆ.