ಬಜೆಟ್ 2022: ಹೆಚ್ಚಲಿದೆಯೇ ‘ಪಾಪದ ತೆರಿಗೆ’? ತಂಬಾಕು ಉತ್ಪನ್ನಗಳ ಸುಂಕ ಏರಿಕೆ ಸಾಧ್ಯತೆ

ಹೊಸದಿಲ್ಲಿ: ಜನರ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುವಂತಹ ಉತ್ಪನ್ನಗಳ ಮೇಲೆ ‘ಪಾಪದ ತೆರಿಗೆ‘ (Sin Tax) ವಿಧಿಸುವುದನ್ನು ಸರ್ಕಾರ ಪಾಲಿಸಿಕೊಂಡು ಬಂದಿದೆ. ಈ ಸರಕುಗಳ ಪಟ್ಟಿಯಲ್ಲಿ ಪ್ರಮುಖವಾಗಿ ಬರುವ ‘ಪಾಪದ ತೆರಿಗೆ’ ವಸ್ತುಗಳೆಂದರೆ ಆಲ್ಕೋಹಾಲ್ ಮತ್ತು ತಂಬಾಕು. ಇವುಗಳ ಬಳಕೆಯನ್ನು ನಿಯಂತ್ರಿಸುವ ಸಲುವಾಗಿ ಸರ್ಕಾರ ಈ ಸರಕುಗಳ ಮೇಲೆ ಅಧಿಕ ದರದ ತೆರಿಗೆ ವಿಧಿಸಲು ಬಯಸುತ್ತದೆ. ಹಾಗೆಯೇ ಈ ತೆರಿಗೆಗಳಿಂದ ಬರುವ ಆದಾಯವನ್ನು ಕಲ್ಯಾಣ ಕಾರ್ಯಕ್ರಮಗಳಿಗೆ ಅನುದಾನ ವಿತರಿಸಲು ಬಳಸುತ್ತದೆ.

ಭಾರತ ಸರ್ಕಾರವು ಕಳೆದ ಎರಡು ವರ್ಷಗಳಿಂದ ಈ ಉತ್ಪನ್ನಗಳ ಮೇಲಿನ ತೆರಿಗೆಯನ್ನು ಏರಿಕೆ ಮಾಡಿಲ್ಲ. ಆದರೆ ಕೆಲವು ತಿಂಗಳ ಹಿಂದೆ, ಸಾರ್ವಜನಿಕ ಆರೋಗ್ಯದ ದೃಷ್ಟಿಯಿಂದ ಎಲ್ಲ ತಂಬಾಕು ಉತ್ಪನ್ನಗಳನ್ನು ಒಳಗೊಳ್ಳುವಂತಹ ಸಮಗ್ರ ತೆರಿಗೆ ನೀತಿ ಪ್ರಸ್ತಾಪವನ್ನು ಸಿದ್ಧಗೊಳಿಸಲು ಪರಿಣತರ ಸಮಿತಿಯನ್ನು ಸರ್ಕಾರ ರಚಿಸಿತ್ತು.
ಮಧ್ಯಮ ವರ್ಗದ ಹಿತಾಸಕ್ತಿಗೆ ಕೇಂದ್ರದ ಬಜೆಟ್‌ನಲ್ಲಿ ಏನೇನು ಇರಲಿದೆ?
ಈ ಬೆಳವಣಿಗೆಯ ಹಿನ್ನೆಲೆಯಲ್ಲಿ ಪರಿಣತರು, ತಂಬಾಕು ಉತ್ಪನ್ನಗಳ ಮೇಲೆ ಅಧಿಕ ‘ಪಾಪದ’ ತೆರಿಗೆಯನ್ನು ವಿಧಿಸುವ ನಿರೀಕ್ಷೆ ಹೊಂದಿದ್ದಾರೆ. ತಂಬಾಕು ಉತ್ಪನ್ನಗಳು ಶೇ 28ರ ಜಿಎಸ್‌ಟಿ ಸ್ಲ್ಯಾಬ್ ಅಡಿಯಲ್ಲಿ ಬರುತ್ತವೆ. ಹಾಗೆಯೇ ತಂಬಾಕು ಎಲೆಗಳು ಶೇ 5ರಷ್ಟು ತೆರಿಗೆಗೆ ಒಳಪಡುತ್ತದೆ.

ಸಮಾಜಕ್ಕೆ ಹಾನಿಕರವಾದ ವಸ್ತುಗಳು ಮತ್ತು ಸೇವೆಗಳ ಮೇಲೆ ಸಿನ್ ಟ್ಯಾಕ್ಸ್ ಹೇರಿಕೆ ಮಾಡಲಾಗುತ್ತದೆ. ತಂಬಾಕು, ಜೂಜು ಸಂಸ್ಥೆಗಳು, ಮದ್ಯ, ಸಿಗರೇಟ್ ಮುಂತಾದವು ಇವುಗಳಲ್ಲಿ ಸೇರಿವೆ. ಹಾನಿಕಾರಕ ವಸ್ತುಗಳ ಬಳಕೆಯನ್ನು ತಗ್ಗಿಸಲು ಅಥವಾ ನಿರ್ಮೂಲನೆ ಮಾಡಲು ಅವುಗಳನ್ನು ಮತ್ತಷ್ಟು ದುಬಾರಿ ಮಾಡುವುದು ಈ ತೆರಿಗೆ ಹಿಂದಿನ ಉದ್ದೇಶ. ಈ ರೀತಿಯ ತೆರಿಗೆ ಭಾರತ ಸೇರಿದಂತೆ ಅನೇಕ ದೇಶಗಳಲ್ಲಿ ಬಳಕೆಯಲ್ಲಿದೆ.