ವಿದೇಶಿ ದೇಣಿಗೆ ಪರವಾನಗಿ ನವೀಕರಣ: ಕೇಂದ್ರದ ವಿರುದ್ಧ ಅರ್ಜಿ ಸಲ್ಲಿಸಿದ್ದ ಎನ್‌ಜಿಒಗೆ ಹಿನ್ನಡೆ

ಹೊಸದಿಲ್ಲಿ: ಸುಮಾರು 6,000 ಎನ್‌ಜಿಒಗಳಿಗೆ ವಿದೇಶಿ ದೇಣಿಗೆ ಸ್ವೀಕರಿಸುವ ಅಗತ್ಯವಿರುವ ಪರವಾನಗಿ ನವೀಕರಿಸಲು ಕೇಂದ್ರ ಸರ್ಕಾರ ನಿರಾಕರಿಸಿರುವುದನ್ನು ಪ್ರಶ್ನಿಸಿ ಸಲ್ಲಿಸಿರುವ ಅರ್ಜಿಗೆ ಮಧ್ಯಂತರ ಪರಿಹಾರ ನೀಡಲು ಸುಪ್ರೀಂಕೋರ್ಟ್ ಮಂಗಳವಾರ ನಿರಾಕರಿಸಿದೆ.

ಭಾರತವು ಪ್ರಸ್ತುತ ಕೋವಿಡ್ ಸೋಂಕಿನ ಮೂರನೇ ಅಲೆ ಎದುರಿಸುತ್ತಿದೆ. ಈ ಎನ್‌ಜಿಒಗಳು ಈಗಾಗಲೇ ಲಕ್ಷಾಂತರ ಭಾರತೀಯರಿಗೆ ನೆರವು ನೀಡಿವೆ. ಈಗ ತಮ್ಮ ವಿದೇಶಿ ದೇಣಿಗೆ ಸಂಗ್ರಹ ಪರವಾನಗಿಗಳನ್ನು ರದ್ದುಗೊಳಿಸಿರುವುದು ಕೋವಿಡ್ 19 ಪರಿಹಾರ ಕಾರ್ಯಗಳಿಗೆ ತೀವ್ರ ಹಿನ್ನಡೆ ಉಂಟುಮಾಡುತ್ತಿದೆ ಎಂದು ಅಮೆರಿಕ ಮೂಲದ ಎನ್‌ಜಿಒ ಗ್ಲೋಬಲ್ ಪೀಸ್ ಅರ್ಜಿ ಸಲ್ಲಿಸಿತ್ತು. ಕೇಂದ್ರ ಸರ್ಕಾರದ ಕ್ರಮವು ನೆರವಿನ ಅಗತ್ಯವಿರುವ ನಾಗರಿಕರ ಸಹಾಯ ಮಾಡುವುದನ್ನು ನಿರಾಕರಿಸುವಂತಿದೆ ಎಂದು ಅದು ಆರೋಪಿಸಿತ್ತು.
ಎನ್‌ಜಿಒಗಳಿಗೆ ಆಘಾತ ನೀಡಿದ ಕೇಂದ್ರ ಸರ್ಕಾರ: 12 ಸಾವಿರಕ್ಕೂ ಅಧಿಕ ಸಂಸ್ಥೆಗಳ ವಿದೇಶಿ ದೇಣಿಗೆಗೆ ತಡೆ
ಅಂತಿಮ ಗಡುವಿನ ಒಳಗೆ ನವೀಕರಣಕ್ಕೆ ಅರ್ಜಿ ಸಲ್ಲಿಸಿದ್ದ 11,594 ಎನ್‌ಜಿಒಗಳ ವಿದೇಶಿ ದೇಣಿಗೆ ಸ್ವೀಕಾರದ ಅಧಿಕಾರವನ್ನು ಈಗಾಗಲೇ ವಿಸ್ತರಣೆ ಮಾಡಲಾಗಿದೆ ಎಂಬ ಕೇಂದ್ರ ಸರ್ಕಾರದ ವಿವರಣೆಯನ್ನು ನ್ಯಾಯಮೂರ್ತಿಗಳಾದ ಎಎಂ ಖಾನ್ವಿಲ್ಕರ್, ದಿನೇಶ್ ಮಹೇಶ್ವರಿ ಮತ್ತು ಸಿ.ಟಿ ರವಿಕುಮಾರ್ ಅವರನ್ನು ಒಳಗೊಂಡ ನ್ಯಾಯಪೀಠ ಒಪ್ಪಿಕೊಂಡಿತು.

ಈ ಅರ್ಜಿ ದಾಖಲಿಸುವ ಹಿಂದಿನ ಉದ್ದೇಶವನ್ನು ಪ್ರಶ್ನಿಸಿದ ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ, ನವೀಕರಣಕ್ಕೆ ಅರ್ಜಿ ಸಲ್ಲಿಸಿದ್ದ ಸಾವಿರಾರು ಎನ್‌ಜಿಒಗಳು ಈಗಾಗಲೇ ವಿಸ್ತರಣೆಯನ್ನು ಪಡೆದುಕೊಂಡಿವೆ ಎಂದು ಹೇಳಿದರು. ಈ ಅರ್ಜಿದಾರ ಅಮೆರಿಕ ಮೂಲದವರು ಎಂಬುದನ್ನು ಅವರು ಉಲ್ಲೇಖಿಸಿದರು.

‘ಈ ಸಾರ್ವಜನಿಕ ಉಪಕಾರಿ ಎನ್‌ಜಿಒ ಅಮೆರಿಕ ಮೂಲದ್ದು. ಇದು ಹ್ಯೂಸ್ಟನ್‌ನಲ್ಲಿ ನೆಲೆ ಹೊಂದಿದೆ. ನವೀಕರಣಕ್ಕೆ ಅರ್ಜಿ ಸಲ್ಲಿಸಿದ ಎಲ್ಲ ಎನ್‌ಜಿಒಗಳ ಪರವಾನಗಿಗಳನ್ನು ವಿಸ್ತರಿಸಲಾಗಿದೆ. ಈ ಅರ್ಜಿ ಸಲ್ಲಿಸಿದ್ದರ ಉದ್ದೇಶ ಏನು ಎನ್ನುವುದು ನನಗೆ ಗೊತ್ತಿಲ್ಲ. ಆದರೆ ಇಲ್ಲಿ ಏನೋ ಸರಿಯಿಲ್ಲ’ ಎಂದು ಅನುಮಾನ ವ್ಯಕ್ತಪಡಿಸಿದರು.

ಎನ್‌ಜಿಒಗಳು ಉತ್ತಮ ಕೆಲಸ ಮಾಡುತ್ತಿದ್ದು, ಕೋವಿಡ್ ಸೋಂಕು ರಾಷ್ಟ್ರೀಯ ವಿಪತ್ತು ಆಗಿರುವ ಸಂದರ್ಭದಲ್ಲಿ ಅವುಗಳ ಅನುದಾನ ಸಂಗ್ರಹಕ್ಕೆ ವಿಸ್ತರಣೆ ನೀಡಬೇಕು ಎಂದು ಅರ್ಜಿಯಲ್ಲಿ ಒತ್ತಾಯಿಸಲಾಗಿತ್ತು. ಈ ಅರ್ಜಿಯಲ್ಲಿ ಎನ್‌ಜಿಒ ಮಿಷನರೀಸ್ ಆಫ್ ಚಾರಿಟಿ ಹೆಸರನ್ನು ಕೂಡ ಉಲ್ಲೇಖಿಸಲಾಗಿದೆ. ಆದರೆ ಕೇಂದ್ರ ಸರ್ಕಾರ ಜ.6ರಂದೇ ಇದರ ಪರವಾನಗಿ ನವೀಕರಣ ಮಾಡಿತ್ತು.
ವಿದೇಶಿ ದೇಣಿಗೆ ಪಡೆಯಲು ಎನ್‌ಜಿಒಗಳಿಗೆ ಎಸ್‌ಬಿಐ ಖಾತೆ ಕಡ್ಡಾಯ
ಆಕ್ಸ್‌ಫಾಮ್ ಇಂಡಿಯಾ ಟ್ರಸ್ಟ್‌, ಜಾಮಿಯಾ ಮಿಲಿಯಾ ಇಸ್ಲಾಮಿಯಾ, ಇಂಡಿಯನ್ ಮೆಡಿಕಲ್ ಅಸೋಸಿಯೇಷನ್ ಮತ್ತು ಲೆಪ್ರೊಸಿ ಮಿಷನ್ ಸೇರಿದಂತೆ 12 ಸಾವಿರಕ್ಕೂ ಅಧಿಕ ಎನ್‌ಜಿಒಗಳ ಪರವಾನಗಿಗಳು ಕಳೆದ ಕೆಲವು ತಿಂಗಳಲ್ಲಿ ಅವಧಿ ಮುಗಿದಿದ್ದು, ಅವುಗಳ ಎಫ್‌ಸಿಆರ್‌ಎ ಪರವಾನಗಿ ಅಂತ್ಯಗೊಂಡಿದ್ದವು. ವಿದೇಶಿ ದೇಣಿಗೆ ನಿಯಂತ್ರಣ ಕಾಯ್ದೆ ಅಡಿ 22,762 ಎನ್‌ಜಿಒಗಳು ನೋಂದಣಿಯಾಗಿವೆ. ಅವು ವಿದೇಶಿ ದೇಣಿಗೆಯನ್ನು ಪಡೆಯಬೇಕೆಂದರೆ ಪರವಾನಗಿಯನ್ನು ಹೊಂದಿರಲೇಬೇಕು. ದೇಶಾದ್ಯಂತ ಬಡವರು, ರೋಗಿಗಳು ಮತ್ತು ನಿರ್ಗತಿಕರಿಗೆ ಅನಾಥಾಲಯ ಮತ್ತು ಆಶ್ರಮಗಳನ್ನು ನಿರ್ವಹಿಸುತ್ತಿರುವ ಮಿಷನರೀಸ್ ಆಫ್ ಚಾರಿಟಿಯ 250ಕ್ಕೂ ಅಧಿಕ ಖಾತೆಗಳಿಗೆ ವಿದೇಶಿ ಅನುದಾನ ಸಿಗದಂತೆ ಎಫ್‌ಸಿಆರ್‌ಎ ಪರವಾನಗಿಯನ್ನು ನವೀಕರಿಸದೆ ಇರಲು ‘ಪ್ರತಿಕೂಲ ಮಾಹಿತಿಗಳು’ ಕಾರಣ ಎಂದು ಗೃಹ ಸಚಿವಾಲಯ ತಿಳಿಸಿತ್ತು.