ಭಾರತದಲ್ಲಿ ಕೋವಿಡ್ ಪ್ರಕರಣಗಳಲ್ಲಿ ಇಳಿಕೆ: ಶೇ 15.5ಕ್ಕೆ ಕುಸಿದ ಪಾಸಿಟಿವಿಟಿ ದರ

ಹೊಸದಿಲ್ಲಿ: ಸತತ ಐದು ದಿನ ಮೂರು ಲಕ್ಷಕ್ಕೂ ಅಧಿಕ ಕೋವಿಡ್ 19 ಪ್ರಕರಣಗಳನ್ನು ಕಂಡಿದ್ದ ಭಾರತ, ಮಂಗಳವಾರ ಕೊಂಚ ಸಮಾಧಾನಕರ ಸ್ಥಿತಿಗೆ ಮರಳಿದೆ. ದೇಶದಲ್ಲಿ ಕಳೆದ 24 ಗಂಟೆಗಳಲ್ಲಿ 2,55,874 ಮಂದಿಗೆ ಕೊರೊನಾ ವೈರಸ್ ಸೋಂಕು ತಗುಲಿದೆ. ಸೋಮವಾರ ದಾಖಲಾದ 3.06 ಲಕ್ಷ ಪ್ರಕರಣಗಳಿಗೆ ಹೋಲಿಸಿದರೆ ಇದು ಶೇ 16.39ರಷ್ಟು ಕಡಿಮೆ ಪ್ರಕರಣವಾಗಿದೆ.

ಜಾಗತಿಕ ಮಟ್ಟದಲ್ಲಿ ಅಮೆರಿಕದ ನಂತರದ ಸ್ಥಾನದಲ್ಲಿರುವ ಭಾರತದ ಒಟ್ಟು ಕೋವಿಡ್ ಪ್ರಕರಣಗಳ ಸಂಖ್ಯೆ 3.98 ಕೋಟಿಗೆ ಮುಟ್ಟಿದೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಬಿಡುಗಡೆ ಮಾಡಿರುವ ವರದಿ ತಿಳಿಸಿದೆ. ಒಂದು ದಿನದಲ್ಲಿ 50,190 ಪ್ರಕರಣಗಳ ಕುಸಿತದೊಂದಿಗೆ ದೈನಂದಿನ ಪಾಸಿಟಿವಿಟಿ ದರ ಕೂಡ ಶೇ 15.52ರಷ್ಟು ಕುಸಿತ ಕಂಡಿದೆ.
ರಾಜ್ಯದಲ್ಲಿ 46,426 ಹೊಸ ಕೋವಿಡ್‌ ಪ್ರಕರಣ, 32 ಸೋಂಕಿತರ ಸಾವು!
ಕಳೆದ 24 ಗಂಟೆಗಳಲ್ಲಿ 614 ಕೋವಿಡ್ ರೋಗಿಗಳು ಮೃತಪಟ್ಟಿದ್ದಾರೆ. ಹಾಗೆಯೇ 2,67,753 ಮಂದಿ ಸೋಂಕಿತರು ಚೇತರಿಸಿಕೊಂಡಿದ್ದಾರೆ. ಒಟ್ಟು ಚೇತರಿಕೆ ಸಂಖ್ಯೆ 3,70,71,898ಕ್ಕೆ ಏರಿಕೆಯಾಗಿದ್ದು, ಶೇ 93.15ರಷ್ಟು ಚೇತರಿಕೆ ದರವಿದೆ.

ದೇಶದ ಸಕ್ರಿಯ ಪ್ರಕರಣಗಳ ಸಂಖ್ಯೆ ಶೇ 5.62ರ ದರದೊಂದಿಗೆ 22,36,842 ಇದೆ. ವಾರದ ಪಾಸಿಟಿವಿಟಿ ದರ ಶೇ 17.17ರಷ್ಟಿದೆ. ಸೋಮವಾರ ದೈನಂದಿನ ಪಾಸಿಟಿವಿಟಿ ದರ ಶೇ 20.75ರಷ್ಟಿತ್ತು. ಕೋವಿಡ್ ಸಂಬಂಧಿ ಸಾವಿನ ಸಂಖ್ಯೆ 4,90,462ಕ್ಕೆ ತಲುಪಿದೆ.

ಭಾರತದ ಕೋವಿಡ್ ಲಸಿಕಾಕರಣವು 162.92 ಕೋಟಿ ಡೋಸ್ ದಾಖಲಾಗಿದೆ. ಭಾರತದ ಕನಿಷ್ಠ ಶೇ 72ರಷ್ಟು ವಯಸ್ಕ ಜನಸಂಖ್ಯೆ ಎರಡೂ ಡೋಸ್ ಲಸಿಕೆಯನ್ನು ಪಡೆದುಕೊಂಡಿದೆ. 15- 18 ವರ್ಷದ ಶೇ 52ರಷ್ಟು ಮಕ್ಕಳಿಗೆ ಮೊದಲ ಡೋಸ್ ಲಸಿಕೆ ನೀಡಲಾಗಿದೆ. ಕಳೆದ 24 ಗಂಟೆಗಳಲ್ಲಿ 16,49,108 ಮಂದಿಯನ್ನು ಕೋವಿಡ್ ಪರೀಕ್ಷೆಗೆ ಒಳಪಡಿಸಲಾಗಿದೆ.
ಓಮಿಕ್ರಾನ್ ಸಮುದಾಯ ಪ್ರಸರಣದ ಹಂತದಲ್ಲಿದೆ, ನಗರಗಳಲ್ಲಿ ಅದರದ್ದೇ ಪಾರುಪತ್ಯ: ಇನ್ಸಾಕಾಗ್ ವರದಿ
ಸೋಮವಾರ ಭಾರತದಲ್ಲಿಯೇ ಅತಿ ಹೆಚ್ಚು ಕೋವಿಡ್ ಪ್ರಕರಣಗಳು ಕರ್ನಾಟಕದಲ್ಲಿ ದಾಖಲಾಗಿದೆ. ರಾಜ್ಯದಲ್ಲಿ ಸೋಮವಾರ 46,426 ಕೊರೊನಾ ಸೋಂಕು ಪ್ರಕರಣಗಳು ದೃಢಪಟ್ಟಿವೆ. ಈ ಅವಧಿಯಲ್ಲಿ ಸೋಂಕಿನಿಂದಾಗಿ 32 ಮೃತಪಟ್ಟಿದ್ದಾರೆ. ಒಂದೇ ದಿನ 41,703 ಮಂದಿ ಸೋಂಕಿತರು ಗುಣವಾಗಿದ್ದಾರೆ. ಈ ಮೂಲಕ ಇದುವರೆಗೆ ಒಟ್ಟು 31,62,977 ಮಂದಿ ಸೋಂಕಿತರು ಗುಣವಾಗಿದ್ದಾರೆ. ಆದರೆ, ರಾಜ್ಯದಲ್ಲಿ ಸಕ್ರಿಯ ಪ್ರಕರಣಗಳ ಸಂಖ್ಯೆ 3,62,487ಕ್ಕೆ ಏರಿಕೆಯಾಗಿದೆ.ಕರ್ನಾಟಕ ಐಸಿಎಂಆರ್‌ನ ಪರೀಕ್ಷಾ ನೀತಿಯಂತೆ ರೋಗ ಲಕ್ಷಣ ಇರುವವರನ್ನು ಮಾತ್ರ ಪರೀಕ್ಷೆಗೆ ಒಳಪಡಿಸುತ್ತಿಲ್ಲ. ಲಕ್ಷಣ ಇಲ್ಲದವರ ಪರೀಕ್ಷೆಯನ್ನು ಕೂಡ ಮುಂದುವರಿಸಿದೆ. ಈ ಕಾರಣದಿಂದ ಅಧಿಕ ಪ್ರಕರಣಗಳು ದಾಖಲಾಗುತ್ತಿವೆ.

ಕರ್ನಾಟಕದ ಜತೆ ಪೈಪೋಟಿ ನೀಡುತ್ತಿದ್ದ ಮಹಾರಾಷ್ಟ್ರದಲ್ಲಿ ಹೊಸ ಪ್ರಕರಣಗಳಲ್ಲಿ ಸಾಕಷ್ಟು ಇಳಿಕೆಯಾಗಿದೆ. ಸೋಮವಾರ 28,286 ಮಂದಿಯಲ್ಲಿ ಸೋಂಕು ಖಚಿತವಾಗಿದೆ. 36 ಮಂದಿ ಸೋಂಕಿತರು ಮೃತಪಟ್ಟಿದ್ದಾರೆ. ಒಟ್ಟು ಸೋಂಕಿತರ ಸಂಖ್ಯೆ 75,35,511 ಇದೆ. ತಮಿಳುನಾಡಿನಲ್ಲಿ 30,215 ಮಂದಿಗೆ ಸೋಂಕು ತಗುಲಿದೆ.