ಒಂದೇ ವರ್ಷದಲ್ಲಿ ಶೇ.100ರಷ್ಟು ಕೋವಿಡ್‌ ಲಸಿಕೆ ಗುರಿ ತಲುಪಿದ ಕರ್ನಾಟಕ!

ಬೆಂಗಳೂರು: ಹದಿನೆಂಟು ವರ್ಷ ಮೇಲ್ಪಟ್ಟವರಿಗೆ ನೀಡುವ ಕೋವಿಡ್‌ ಲಸಿಕೆಯ ಮೊದಲ ಡೋಸ್‌ ವಿತರಣೆಯಲ್ಲಿ ರಾಜ್ಯವು ಶೇ.100ರಷ್ಟು ಗುರಿ ಸಾಧಿಸಿದೆ. ಒಂದು ವರ್ಷ, 7 ದಿನಗಳ ಅವಧಿಯಲ್ಲಿ ಮೊದಲ ಲಸಿಕೆಯ ಗುರಿ ತಲುಪಲಾಗಿದೆ.

ನಾಲ್ಕು ಕೋಟಿ ವಯಸ್ಕರಿಗೆ ಲಸಿಕೆ ನೀಡಿದ ರಾಜ್ಯಗಳ ಪೈಕಿ ಕರ್ನಾಟಕ ಮೊದಲ ಸ್ಥಾನದಲ್ಲಿದೆ. ರಾಜ್ಯದಲ್ಲಿ 18 ವರ್ಷ ಮೇಲ್ಪಟ್ಟ 4,89,16,000 ಮಂದಿಯನ್ನು ಲಸಿಕೆಗೆ ಅರ್ಹ ಎಂದು ಗುರುತಿಸಲಾಗಿತ್ತು. ಭಾನುವಾರದ ವೇಳೆಗೆ 4,89,29,819 ಮಂದಿ ಮೊದಲ ಡೋಸ್‌ ಲಸಿಕೆ ಪಡೆದಿದ್ದಾರೆ.

ಶೇ.85ರಷ್ಟು ಮಂದಿ ಎರಡನೇ ಡೋಸ್‌ ಪೂರ್ಣಗೊಳಿಸಿದ್ದಾರೆ. ಉಳಿದಂತೆ 15-17 ವರ್ಷದವರಿಗೆ ನೀಡುವ ಲಸಿಕೆಯಲ್ಲಿ ಶೇ.68ರಷ್ಟು ಗುರಿ ಸಾಧನೆಯಾಗಿದೆ. 4.8 ಲಕ್ಷ ಮಂದಿ ಮುನ್ನೆಚ್ಚರಿಕಾ ಡೋಸ್‌ ಪಡೆದುಕೊಂಡಿದ್ದಾರೆ.

ರಾಜ್ಯಾದ್ಯಂತ ಸೆಕೆಂಡ್ ಡೋಸ್ ಲಸಿಕಾ ಕಾರ್ಯಕ್ಕೆ ಮತ್ತಷ್ಟು ವೇಗ: ಡಾ. ಕೆ. ಸುಧಾಕರ್‌

18 ಜಿಲ್ಲೆಗಳಲ್ಲಿ ಶೇ.100ರಷ್ಟು ಲಸಿಕೆ: ಕೊಡಗು, ವಿಜಯಪುರ, ಚಿಕ್ಕಬಳ್ಳಾಪುರ, ಗದಗ, ಮೈಸೂರು, ರಾಮನಗರ, ಕೋಲಾರ, ಹಾಸನ, ಬಾಗಲಕೋಟ, ಬೆಳಗಾವಿ, ದಾವಣಗೆರೆ, ಬೀದರ್‌, ತುಮಕೂರು, ಕೊಪ್ಪಳ, ಧಾರವಾಡ, ಚಾಮರಾಜನಗರ ಮತ್ತು ಚಿತ್ರದುರ್ಗ ಜಿಲ್ಲೆಗಳಲ್ಲಿ ವಯಸ್ಕರ ಮೊದಲ ಡೋಸ್‌ ನೀಡಿಕೆಯಲ್ಲಿ ಶೇ.100ರಷ್ಟು ಗುರಿ ಸಾಧನೆಯಾಗಿದೆ. ಈವರೆಗೂ ಮೊದಲ ಡೋಸ್‌, ಎರಡನೇ ಡೋಸ್‌, ಮಕ್ಕಳ ಲಸಿಕೆ ಹಾಗೂ ಮೂರನೇ ಡೋಸ್‌ ಸೇರಿ 9.33 ಕೋಟಿ ಡೋಸ್‌ ಲಸಿಕೆ ವಿತರಿಸಲಾಗಿದೆ. ರಾಜ್ಯದಲ್ಲಿ 2021ರ ಡಿಸೆಂಬರ್‌ 25ರ ವೇಳೆಗೆ ಶೇ.97ರಷ್ಟು ವಯಸ್ಕರಿಗೆ ಮೊದಲ ಡೋಸ್‌ ನೀಡಲಾಗಿತ್ತು. ಆದರೆ, ಕೊನೆಯ ಶೇ.03ರಷ್ಟು ಮಂದಿಗೆ ಲಸಿಕೆ ನೀಡುವುದಕ್ಕೆ ಸುಮಾರು ಒಂದು ತಿಂಗಳ ಸಮಯ ತೆಗೆದುಕೊಳ್ಳಲಾಯಿತು.

ಯುವ ಸಮುದಾಯಕ್ಕೆ ಕೊರೊನಾ ಲಸಿಕೆ: ಮೊದಲ ದಿನದ ಗುರಿ 6.38 ಲಕ್ಷ, ಸಾಧನೆ 4.03 ಲಕ್ಷ

ವೇಗ ನೀಡಿದ ಲಸಿಕೆ ಮೇಳ
ರಾಜ್ಯ ಸರಕಾರವು ಲಸಿಕೆ ಅಭಿಯಾನಕ್ಕೆ ವೇಗ ನೀಡಲು ಆಗಸ್ಟ್‌ ನಂತರ ಪ್ರತಿ ಬುಧವಾರ ಲಸಿಕೆ ಮೇಳ ಹಮ್ಮಿಕೊಳ್ಳುತ್ತಾ ಬಂದಿದೆ. ಇದು ಲಸಿಕಾ ವೇಗವನ್ನು ಹೆಚ್ಚಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಅಲ್ಲದೇ, ಆರೋಗ್ಯ ಸಿಬ್ಬಂದಿ, ಆಶಾ ಕಾರ್ಯಕರ್ತೆಯರು ಮನೆಮನೆಗೆ ಹೋಗಿ ಲಸಿಕೆ ಬಗ್ಗೆ ಅರಿವು ಮೂಡಿಸಿದ್ದರು. ಲಸಿಕೆ ಪಡೆಯದೇ ಇರುವವರನ್ನು ಗುರುತಿಸಿ ಲಸಿಕೆ ನೀಡುವ ಕೆಲಸವನ್ನು ಆರೋಗ್ಯ ಸಿಬ್ಬಂದಿ ಸಮರ್ಥವಾಗಿ ನಿಭಾಯಿಸಿದ ಹಿನ್ನೆಲೆಯಲ್ಲಿ ಒಂದು ವರ್ಷದಲ್ಲಿಯೇ ಗುರಿ ತಲುಪುವುದಕ್ಕೆ ಸಾಧ್ಯವಾಯಿತು.

ಲಸಿಕೆ ವಿತರಣೆ

• ಮೊದಲ ಡೋಸ್‌ – 5.10 ಕೋಟಿ
• ಎರಡನೇ ಡೋಸ್‌ – 4.17 ಕೋಟಿ
• ಮುನ್ನೆಚ್ಚರಿಕೆ ಡೋಸ್‌ – 4.8 ಲಕ್ಷ
• ಒಟ್ಟು ಡೋಸ್‌- 9.33 ಕೋಟಿ