ಸ್ವಚ್ಛತಾ ವಾಹನಗಳಿಗೆ ಬರಲಿದ್ದಾರೆ ಮಹಿಳಾ ಸಾರಥಿ; ಆಡಳಿತದಲ್ಲಿ ಮಾದರಿ ಹೆಜ್ಜೆ ಇಟ್ಟ ಮೈಸೂರು ಪಾಲಿಕೆ!

ಹರೀಶ ಎಲ್‌. ತಲಕಾಡು ಮೈಸೂರು
ಮೈಸೂರು: ನಗರದಲ್ಲಿ ಸ್ವಚ್ಛತಾ ವಾಹನಗಳನ್ನು ಇನ್ನು ಮುಂದೆ ಪುರುಷರು ಮಾತ್ರವಲ್ಲ ಮಹಿಳೆಯರು ಸಹ ನಿರ್ವಹಣೆ ಮಾಡಲಿದ್ದಾರೆ.

ರೈಲ್ವೆ ಮತ್ತು ಕೆಎಸ್‌ಆರ್‌ಟಿಸಿ ಮಾದರಿಯಲ್ಲಿ ನಗರದಲ್ಲಿಯೂ ಕಸ ವಿಲೇವಾರಿ ಮಾಡುವ ಸ್ವಚ್ಛತಾ ವಾಹನಗಳನ್ನು ಚಾಲನೆ ಮಾಡಲು ಮಹಿಳಾ ಪೌರ ಕಾರ್ಮಿಕರನ್ನು ನಿಯೋಜಿಸಲು ಮಹಾನಗರ ಪಾಲಿಕೆ ಮುಂದಾಗಿದೆ. ಈ ಮೂಲಕ ಮನೆ ಮನೆಗೂ ಕಸ ಸಂಗ್ರಹಕ್ಕೆ ಮಾತ್ರ ತೆರಳುತ್ತಿದ್ದ ಮಹಿಳಾ ಪೌರ ಕಾರ್ಮಿಕರನ್ನು ವಾಹನ ಚಾಲನೆಗೂ ಬಳಸಿಕೊಳ್ಳುವ ಮೂಲಕ ಲಿಂಗ ಸಮಾನತೆ ತತ್ವವನ್ನು ಪಾಲಿಕೆ ಆಡಳಿತದಲ್ಲಿ ಅಳವಡಿಸಿಕೊಳ್ಳುವ ಮೂಲಕ ಮಾದರಿಯಾಗಲಿದೆ.

ಶೀಘ್ರದಲ್ಲಿಯೇ ವಾರ್ಡ್‌ಗೆ ಒಂದರಂತೆ ಸ್ವಚ್ಛತಾ ವಾಹನಗಳನ್ನು ಖರೀದಿ ಮಾಡುತ್ತಿರುವ ಪಾಲಿಕೆ, ಅದರಲ್ಲಿ 10 ವಾಹನಗಳಿಗೆ ಮಹಿಳಾ ಚಾಲಕರನ್ನು ನಿಯೋಜಿಸುವ ಮೂಲಕ ಪ್ರಾಯೋಗಿಕವಾಗಿ ಅನುಷ್ಠಾನಕ್ಕೆ ತರಲಿದೆ. ಚಾಲನೆಯಲ್ಲಿ ಆಸಕ್ತಿ ಇರುವ ಮಹಿಳಾ ಪೌರ ಕಾರ್ಮಿಕರನ್ನು ಗುರುತಿಸಿ, ಅವರಿಗೆ ಚಾಲನಾ ತರಬೇತಿ ನೀಡಿ ಅವರನ್ನು ಸ್ವಚ್ಛತಾ ವಾಹನಗಳಿಗೆ ಚಾಲಕರಾಗಿ ನಿಯೋಜಿಸಲಾಗುವುದು ಎನ್ನುತ್ತಾರೆ ಪಾಲಿಕೆ ಆಯುಕ್ತ ಜಿ.ಲಕ್ಷ್ಮಿಕಾಂತ್‌ ರೆಡ್ಡಿ.
ಮೈಸೂರು ಪಾಲಿಕೆ ಆದಾಯ ಸುಧಾರಣೆ; ಕೋವಿಡ್‌ ಸಂಕಷ್ಟ ಕಾಲದಲ್ಲೂ ರೆವಿನ್ಯೂ ಸಂಗ್ರಹದಲ್ಲಿ ಶೇ.67 ಸಾಧನೆ!
ಹೊಸದಿಲ್ಲಿ ಮಾದರಿ ಅನುಷ್ಠಾನ
ನಗರದ 65 ವಾರ್ಡ್‌ಗಳಲ್ಲಿ ಸ್ವಚ್ಛತಾ ಕಾರ್ಯಕ್ಕಾಗಿ 2000 ಪೌರ ಕಾರ್ಮಿಕರು ಇದ್ದು, ಅದರಲ್ಲಿ 850 ಮಂದಿ ಮಹಿಳೆಯರೇ ಇದ್ದಾರೆ. ಮನೆ ಮನೆಯಿಂದ ಕಸ ಸಂಗ್ರಹಿಸಲು 130ಕ್ಕೂ ಹೆಚ್ಚು ಮೂರು ಮತ್ತು ನಾಲ್ಕು ಚಕ್ರದ ವಾಹನಗಳಿವೆ. ಅಗತ್ಯಕ್ಕೆ ತಕ್ಕಂತೆ ಈ ವಾಹನಗಳು ಇರದ ಕೆಲ ವಾರ್ಡ್‌ಗಳಲ್ಲಿ ತಳ್ಳುವ ಗಾಡಿಗಳ ಮೂಲಕವೇ ಮಹಿಳಾ ಪೌರ ಕಾರ್ಮಿಕರು ಕಸ ಸಂಗ್ರಹ ಮಾಡುತ್ತಿದ್ದಾರೆ. ಈಗ ಮತ್ತೆ ಹೊಸದಾಗಿ 65 ಸ್ವಚ್ಛತಾ ವಾಹನಗಳನ್ನು ಖರೀದಿ ಮಾಡುತ್ತಿರುವ ಪಾಲಿಕೆ, ಪ್ರಾರಂಭಿಕ ಹಂತವಾಗಿ 10 ವಾಹನಗಳಿಗೆ ಮಹಿಳಾ ಪೌರ ಕಾರ್ಮಿಕರನ್ನು ಚಾಲಕರಾಗಿ ನಿಯೋಜಿಸಲಿದೆ. ಹೊಸದಿಲ್ಲಿಯ ಸ್ಥಳೀಯ ಸಂಸ್ಥೆ ಮಾದರಿಯಲ್ಲಿ ಚಾಲನೆಯಲ್ಲಿ ಆಸಕ್ತಿ ಇರುವ ಪೌರ ಕಾರ್ಮಿಕ ಮಹಿಳೆಯರನ್ನು ಗುರುತಿಸಿ ಅವರಿಗೆ ತರಬೇತಿ ಕೊಡಿಸಿದ ಬಳಿಕ, ಮಹಿಳಾ ಚಾಲಕರಾಗಿ ನಿಯೋಜನೆ ಮಾಡಲಾಗುತ್ತದೆ ಎನ್ನುತ್ತಾರೆ ಪಾಲಿಕೆ ಆರೋಗ್ಯಾಧಿಕಾರಿ ಡಾ.ನಾಗರಾಜು.
ಮೈಸೂರು ಪಾಲಿಕೆಗೆ ನೀರೇ ಭಾರ; ಗ್ರಾಹಕರ ನಿರಾಸಕ್ತಿ, 219 ಕೋಟಿ ರೂ.ಬಿಲ್‌ ಬಾಕಿ!
ನಗರ ಪಾಲಿಕೆಯಲ್ಲಿ ಸ್ವಚ್ಛತಾ ವಾಹನಗಳ ಚಾಲಕರಾಗಿ ಪುರುಷ ಪೌರ ಕಾರ್ಮಿಕರಿದ್ದು, ಮಹಿಳೆಯರಿಗೂ ಅವಕಾಶ ನೀಡುವ ನಿಟ್ಟಿನಲ್ಲಿ 10 ಮಂದಿ ಮಹಿಳಾ ಪೌರ ಕಾರ್ಮಿಕರಿಗೆ ಚಾಲನೆಯ ತರಬೇತಿ ನೀಡಿ, ಅವರನ್ನು ಚಾಲಕರಾಗಿ ನಿಯೋಜನೆ ಮಾಡಿಕೊಳ್ಳುವ ಉದ್ದೇಶವಿದೆ. ಈ ಬಗ್ಗೆ ಕೌನ್ಸಿಲ್‌ ಸಭೆಯಲ್ಲಿ ಚರ್ಚೆ ನಡೆಸಿ ಅನುಮೋದನೆ ಪಡೆಯುವ ಮೂಲಕ ಅನುಷ್ಠಾನಗೊಳಿಸಲಾಗುವುದು.
ಜಿ.ಲಕ್ಷ್ಮಿ ಕಾಂತ್‌ ರೆಡ್ಡಿ, ಆಯುಕ್ತ, ಮೈಸೂರು ಮಹಾನಗರಪಾಲಿಕೆ
ಟೆಕ್‌ಜಾಬ್‌ಗೆ ಮಹಿಳೆಯರು ಬೆಸ್ಟ್‌; ಪುರುಷರಿಗಿಂತ ಮಹಿಳೆಯರೇ ಹೆಚ್ಚು ಸಮರ್ಥರು ಎಂದಿದೆ ಹೊಸ ಅಧ್ಯಯನ
ಪೌರ ಕಾರ್ಮಿಕ ಮಹಿಳೆಯನ್ನು ಕೇವಲ ಸ್ವಚ್ಛತಾ ಕಾರ್ಯಕ್ಕೆ ಬಳಸಿಕೊಳ್ಳಲಾಗುತ್ತಿದ್ದು, ಈಗ ಸ್ವಚ್ಛತಾ ವಾಹನಗಳ ಚಾಲಕರಾಗಿ ನೇಮಕ ಮಾಡಿಕೊಳ್ಳಲು ಮುಂದಾಗಿರುವುದು ಒಳ್ಳೆಯ ಬೆಳವಣಿಗೆ. ತಳ್ಳುವ ಗಾಡಿ ಮೂಲಕ ಕಸ ಸಂಗ್ರಹಿಸುತ್ತಿದ್ದ ಪೌರ ಕಾರ್ಮಿಕ ಮಹಿಳೆಯರು, ಆಟೋ ಟಿಪ್ಪರ್‌ಗಳ ಮೂಲಕ ಕಸ ಸಂಗ್ರಹಿಸಬಹುದು. ಈ ಮಹಿಳಾ ಚಾಲಕರ ಸಂಖ್ಯೆ ಹೆಚ್ಚಾಗುವ ಮೂಲಕ ಸ್ವಚ್ಛತಾ ಕಾರ್ಯದಲ್ಲಿಯೂ ಸಹ ಮಹಿಳೆಯರಿಗೆ ಸಮಾನತೆ ಸಿಗಲಿ.
-ಶಾಂತಮ್ಮ ವಡಿವೇಲು, ಪಾಲಿಕೆ ಸದಸ್ಯೆ