ಹೈಲೈಟ್ಸ್‌:
- 10 ಎಕರೆ ವಿಶಾಲ ಪ್ರದೇಶದಲ್ಲಿ, ಸುಮಾರು 1.85 ಕೋಟಿ ರೂ.ವೆಚ್ಚದಲ್ಲಿ ಮೈಸೂರು ಜಿಲ್ಲೆಯಲ್ಲೊಂದು ಗೋ ಶಾಲೆ ನಿರ್ಮಾಣ
- ಮೈಸೂರು ತಾಲೂಕು ಆಯರಹಳ್ಳಿಯಲ್ಲಿ ಇದಕ್ಕಾಗಿ ಜಾಗ ಗುರುತಿಸಲಾಗಿದ್ದು, ಈ ತಿಂಗಳ ಅಂತ್ಯದೊಳಗೆ ಭೂಮಿಪೂಜೆ ನಡೆಸಲು ಸಿದ್ಧತೆ
- ಗೋ ಶಾಲೆಯಲ್ಲಿ ಕೊಟ್ಟಿಗೆ, ಕೃಷಿ ಹೊಂಡ, ಮೇವು ಉತ್ಪಾದನೆ ಮತ್ತಿತರ ಚಟುವಟಿಕೆಗಳಿಗೂ ಯೋಜಿಸಲಾಗುತ್ತಿದೆ
ಮೈಸೂರು: 10 ಎಕರೆ ವಿಶಾಲ ಪ್ರದೇಶದಲ್ಲಿ, ಸುಮಾರು 1.85 ಕೋಟಿ ರೂ.ವೆಚ್ಚದಲ್ಲಿ ಜಿಲ್ಲೆಯಲ್ಲೊಂದು ಗೋ ಶಾಲೆ ನಿರ್ಮಾಣವಾಗಲಿದ್ದು, ಮುಂದಿನ ವಾರ ಕಾಮಗಾರಿ ಆರಂಭವಾಗಲಿದೆ.
‘ಜಿಲ್ಲೆಗೊಂದು ಗೋಶಾಲೆ’ ಕಾರ‍್ಯಕ್ರಮದಡಿ ಮೈಸೂರು ತಾಲೂಕು ಆಯರಹಳ್ಳಿಯಲ್ಲಿ ಇದಕ್ಕಾಗಿ ಜಾಗ ಗುರುತಿಸಲಾಗಿದ್ದು, ಈ ತಿಂಗಳ ಅಂತ್ಯದೊಳಗೆ ಭೂಮಿಪೂಜೆ ನಡೆಸಲು ಸಿದ್ಧತೆ ನಡೆದಿದೆ. ಸರ್ವೆ ನಂ.212ರಲ್ಲಿ ಕಂದಾಯ ಇಲಾಖೆಗೆ ಸೇರಿದ ಈ ಜಾಗವನ್ನು ಪಶುಪಾಲನಾ ಮತ್ತು ಪಶುವೈದ್ಯಕೀಯ ಸೇವಾ ಇಲಾಖೆಗೆ ಮಂಜೂರು ಮಾಡಿ ಆದೇಶ ಹೊರಡಿಸಲಾಗಿದೆ. ಮೊದಲ ಹಂತದಲ್ಲಿ 48 ಲಕ್ಷ ರೂ. ಮಂಜೂರಾಗಿರುವುದರಿಂದ ನಿರ್ಮಾಣ ಕಾಮಗಾರಿಗೆ ಸಕಲ ತಯಾರಿ ನಡೆಸಲಾಗಿದೆ.
ಇಲಾಖೆಯಿಂದಲೇ ನಿರ್ವಹಣೆ
ಪಶುಪಾಲನಾ ಇಲಾಖೆ ಮೂಲಕ, ಪಂಚಾಯತ್‌ರಾಜ್‌ ಎಂಜಿನಿಯರಿಂಗ್‌ ವಿಭಾಗದಿಂದ ಗೋಶಾಲೆ ನಿರ್ಮಿಸಲಾಗುತ್ತಿದ್ದು, ಇಲಾಖೆಯೇ ಅದರ ನಿರ್ವಹಣೆಯನ್ನೂ ಮಾಡಲಿದೆ. ಪ್ರಾರಂಭದಲ್ಲಿ 200ಕ್ಕೂ ಹೆಚ್ಚು ಗೋವುಗಳನ್ನು ಸಾಕಣೆ ಮಾಡಲು ಅನುವಾಗುವಂತೆ ನಿರ್ಮಿಸಲು ಉದ್ದೇಶಿಸಲಾಗಿದ್ದು, ಬಳಿಕ 600ರವರೆಗೂ ಸಲಹುವಂತೆ ಸೌಲಭ್ಯ ಕಲ್ಪಿಸಿಕೊಳ್ಳಲಾಗುತ್ತಿದೆ. ಎಲ್ಲವೂ ಅಂದುಕೊಂಡಂತಾದರೆ ತಾಲೂಕಿನಲ್ಲಿ ವರ್ಷದೊಳಗೆ ಗೋಶಾಲೆ ಕಾಮಗಾರಿ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ. ಗೋ ಶಾಲೆಯಲ್ಲಿ ಕೊಟ್ಟಿಗೆ, ಕೃಷಿ ಹೊಂಡ, ಮೇವು ಉತ್ಪಾದನೆ ಮತ್ತಿತರ ಚಟುವಟಿಕೆಗಳಿಗೂ ಯೋಜಿಸಲಾಗುತ್ತಿದೆ.
ಮಲೆನಾಡ ಜಲಸಿರಿಗಳ ನಡುವೆ ಇರುವ ಗೋಸ್ವರ್ಗ: ರಾಮ ಚಂದ್ರಾಪುರದ ಮಠದ ಗೋಶಾಲೆಯಲ್ಲಿವೆ 34 ತಳಿಯ ಗೋವುಗಳು
ಬರಡು, ಅನಾಥ ರಾಸುಗಳಿಗೆ ಆಶ್ರಯ
ಬರಡು ರಾಸುಗಳು, ರೈತರಿಗೆ ಬೇಡವಾದ, ಅನಾಥವಾದ, ವಯಸ್ಸಾದ, ರೋಗಗ್ರಸ್ತ, ಅಂಗವಿಕಲ ಜಾನುವಾರುಗಳು ಇನ್ನು ಮುಂದೆ ಬೀದಿಪಾಲಾಗದೆ ಗೋಶಾಲೆ ಮೂಲಕ ಪುನರ್ವಸತಿ ಕಲ್ಪಿಸಿದಂತಾಗುತ್ತದೆ. ಜತೆಗೆ ನಗರ ವ್ಯಾಪ್ತಿಯಲ್ಲಿ ಹೆಚ್ಚು ಬಿಡಾಡಿ ದನ-ಕರುಗಳಿದ್ದು, ಅವುಗಳನ್ನು ಈ ಗೋಶಾಲೆಗೆ ಸೇರಿಸುವುದರಿಂದ ನಗರ ವ್ಯಾಪ್ತಿಯ ಬಿಡಾಡಿ ರಾಸುಗಳಿಗೆ ಕಡಿವಾಣವೂ ಬೀಳುವ ನಿರೀಕ್ಷೆ ಇದೆ.
ಮೂರು ಸಾವಿರಕ್ಕೂ ಅಧಿಕ ರಾಸುಗಳಿಗೆ ನಿರ್ವಹಣಾ ವೆಚ್ಚ
ಸರಕಾರದ ಸಹಯೋಗದೊಂದಿಗೆ ಜಿಲ್ಲೆಯಲ್ಲಿ ಇದುವರೆಗೂ ನಾಲ್ಕು ಗೋ ಶಾಲೆಗಳು ಕಾರ್ಯನಿರ್ವಹಿಸುತ್ತಿವೆ. ಅದರಲ್ಲಿ ಪ್ರಮುಖವಾಗಿ ಮೈಸೂರು ಹೊರ ವಲಯದ ಪಿಂಜ್ರಾಪೋಲ್‌ ಒಂದರಲ್ಲೇ 3 ಸಾವಿರಕ್ಕೂ ಅಧಿಕ ಹಸುಗಳಿವೆ. ತಿ.ನರಸೀಪುರದಲ್ಲಿ 200, ಕೆ.ಆರ್‌.ನಗರದಲ್ಲಿ 57 ಹಾಗೂ ಸುತ್ತೂರಿನ ಗೋ ಶಾಲೆಯಲ್ಲಿ 55 ರಾಸುಗಳಿದ್ದು, ಇದರ ನಿತ್ಯ ಮೂಲ ಸೌಲಭ್ಯದ ವೆಚ್ಚದ ಶೇ.25ರಷ್ಟು ಹಣವನ್ನು ಸರಕಾರ ನೀಡುತ್ತಿತ್ತು. ಅದರಂತೆ ರಾಸುಗಳ ನಿರ್ವಹಣೆಯ ಖರ್ಚಿಗೆಂದು ಪ್ರತಿ ರಾಸುವಿಗೆ ದಿನಕ್ಕೆ 17.50ರೂ. ಅನುದಾನ ಸರಕಾರದಿಂದ ನೀಡಲಾಗುತ್ತಿದೆ.
ಗೋವೊಂದಕ್ಕೆ ದಿನಕ್ಕೆ 17 ರೂ. ಎಲ್ಲಿ ಸಾಕು? ಅನುದಾನ ಕೊರತೆಯಿಂದ ಗೋಶಾಲೆಗಳಲ್ಲಿ ಸಮಸ್ಯೆ
ಗೋಶಾಲೆಗೆ ಬರುವ ರಾಸುಗಳಾವುವು?
ಮಿಶ್ರತಳಿ ಹಸುಗಳ ಗಂಡು ಕರುಗಳಲ್ಲಿ ಬಹುತೇಕ ಕರುಗಳು, ಬಡಕಲು, ಬರಡು, ದುಡಿಮೆಗೆ ಬಳಸಲಾಗದ ಗೋವುಗಳ ಜತೆಗೆ ವಯಸ್ಸಾದ, ಗೋರಕ್ಷಕರಿಂದ ರಕ್ಷಿಸಲ್ಪಟ್ಟ, ಅನಾರೋಗ್ಯಕ್ಕೊಳಗಾದ, ಅಂಗವಿಕಲ ರಾಸುಗಳು ಗೋಶಾಲೆ ಸೇರುತ್ತವೆ.
ಜಿಲ್ಲೆಯಲ್ಲಿ ಗೋ ಶಾಲೆ ನಿರ್ಮಿಸಲು ಮೈಸೂರು ತಾಲೂಕು ಆಯರಹಳ್ಳಿ ಗ್ರಾಮದಲ್ಲಿ 10 ಎಕರೆ ಗುರುತಿಸಲಾಗಿದ್ದು, ಜಾಗವನ್ನು ಪಶುಪಾಲನಾ ಮತ್ತು ಪಶುವೈದ್ಯಕೀಯ ಸೇವಾ ಇಲಾಖೆಗೆ ಮಂಜೂರು ಮಾಡಲಾಗಿದೆ. ಇನ್ನೇನು ಕಟ್ಟಡ ನಿರ್ಮಾಣ ಕಾಮಗಾರಿ ಆಗಬೇಕಿದ್ದು, ಮೊದಲ ಹಂತದಲ್ಲಿ 48 ಲಕ್ಷ ರೂ. ಬಿಡುಗಡೆಯಾಗಿದೆ.
ಡಾ.ಬಿ.ಎನ್‌.ಷಡಕ್ಷರಮೂರ್ತಿ, ಉಪ ನಿರ್ದೇಶಕ, ಪಶುಪಾಲನಾ ಮತ್ತು ಪಶು ವೈದ್ಯಕೀಯ ಇಲಾಖೆ, ಮೈಸೂರು
Read more
[wpas_products keywords=”deal of the day sale today offer all”]