ಡಿಸೆಂಬರ್‌ ತ್ರೈಮಾಸಿಕದಲ್ಲಿ ರಿಲಯನ್ಸ್‌ಗೆ 18,549 ಕೋಟಿ ರೂ. ನಿವ್ವಳ ಲಾಭ, ಭರ್ಜರಿ 42% ಏರಿಕೆ!

ಹೊಸದಿಲ್ಲಿ: ರಿಲಯನ್ಸ್‌ ಇಂಡಸ್ಟ್ರೀಸ್‌ ಕಳೆದ ಅಕ್ಟೋಬರ್‌-ಡಿಸೆಂಬರ್‌ ತ್ರೈಮಾಸಿಕದಲ್ಲಿ ಬರೋಬ್ಬರಿ 18,549 ಕೋಟಿ ರೂ. ನಿವ್ವಳ ಲಾಭ ಗಳಿಸಿದೆ. 2020ರ ಇದೇ ಅವಧಿಯಲ್ಲಿ ಕಂಪನಿ 13,101 ಕೋಟಿ ರೂ. ನಿವ್ವಳ ಲಾಭ ಗಳಿಸಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ ಕಂಪನಿಯ ಲಾಭದಲ್ಲಿ ಶೇ. 41.58ರಷ್ಟು ಏರಿಕೆ ದಾಖಲಾಗಿದೆ.

ರಿಲಯನ್ಸ್‌ ರಿಟೇಲ್‌ ಲಾಭದಲ್ಲಿ ಶೇ. 23 ರಷ್ಟು ಏರಿಕೆ ದಾಖಲಾಗಿದ್ದರೆ, ಜಿಯೋ ಲಾಭ ಶೇ. 9ರಷ್ಟು ಹೆಚ್ಚಳವಾಗಿದೆ. ಇದರಿಂದ ಕಂಪನಿಯ ಲಾಭದಲ್ಲಿ ಭಾರೀ ಏರಿಕೆ ದಾಖಲಾಗಿದೆ.

ಒಟ್ಟು ನಾಲ್ಕು ಮಾದರಿಯ ವ್ಯವಹಾರಗಳನ್ನು ರಿಲಯನ್ಸ್‌ ನಿರ್ವಹಿಸುತ್ತದೆ. ತೈಲ ಸಂಸ್ಕರಣಾಗಾರಗಳು, ಪೆಟ್ರೋಕೆಮಿಕಲ್ ಘಟಕಗಳು ಮತ್ತು ಇಂಧನದ ಚಿಲ್ಲರೆ ವ್ಯಾಪಾರ ಒಂದು ಘಟಕವಾದರೆ, ಚಿಲ್ಲರೆ ವ್ಯಾಪಾರದಲ್ಲಿ ಮಳಿಗೆಗಳು ಮತ್ತು ಇ-ಕಾಮರ್ಸ್ ಕೂಡ ರಿಲಯನ್ಸ್‌ ಬಳಿಯಲ್ಲಿವೆ. ಟೆಲಿಕಾಂ ಸಂಸ್ಥೆ ಜಿಯೋವನ್ನು ಒಳಗೊಂಡ ಡಿಜಿಟಲ್ ಸೇವೆಗಳೂ ರಿಲಯನ್ಸ್‌ನ ಅಡಿಯಲ್ಲಿ ಬರುತ್ತವೆ. ಜತೆಗೆ ಇದೀಗ ಹೊಸದಾಗಿ ನವ ಇಂಧನದ ಉದ್ಯಮ ಕೂಡ ಸೇರ್ಪಡೆಯಾಗಿದೆ.

ಈ ಎಲ್ಲಾ ಉದ್ಯಮಗಳಿಂದ ಒಟ್ಟಾಗಿ ಸಮೂಹವು 2.09 ಲಕ್ಷ ಕೋಟಿ ರೂ. ಆದಾಯ ಗಳಿಸಿದೆ. ಈ ಮೂಲಕ ಕಳೆದ ವರ್ಷಕ್ಕೆ ಹೋಲಿಸಿದರೆ ಆದಾಯದಲ್ಲಿ ಶೇ. 52.2ರಷ್ಟು ಏರಿಕೆ ದಾಖಲಾಗಿದೆ. ಕಾರ್ಯಾಚರಣೆಗಳಿಂದ ಕಂಪನಿ ಗಳಿಸಿರುವ ಆದಾಯವು 1.91 ಲಕ್ಷ ಕೋಟಿ ರೂ.ಗೆ ಏರಿಕೆಯಾಗಿದ್ದು, ಒಂದು ವರ್ಷದ ಹಿಂದೆ ಇದು 1.24 ಲಕ್ಷ ಕೋಟಿ ರೂ. ಇತ್ತು.

BSNL ಹಿಂದಿಕ್ಕಿದ Jio, ಬ್ರಾಡ್‌ಬ್ಯಾಂಡ್‌ ಉದ್ಯಮದಲ್ಲಿಯೂ ಈಗ ರಿಲಯನ್ಸ್‌ ಜಿಯೋ ನಂ.1
ದೇಶಾದ್ಯಂತ ಲಾಕ್‌ಡೌನ್‌ ಸಡಿಲವಾಗಿದ್ದುದು ಹಾಗೂ ಹಬ್ಬಗಳ ಸೀಸನ್‌ ಚುರುಕಾಗಿದ್ದರಿಂದ ರಿಟೇಲ್‌ ವಹಿವಾಟು ಲಾಭದಾಯಕವಾಗಿತ್ತು. ಸಂಸ್ಕರಣೆ ಉದ್ಯಮದಲ್ಲಿ ಹೆಚ್ಚಿನ ಲಾಭ ಮತ್ತು ಮತ್ತು ಸುಧಾರಿತ ಬೆಲೆಗಳಿಂದ ಲಾಭ ಹೆಚ್ಚಾಗಿದೆ ಎಂದು ಅಧ್ಯಕ್ಷ ಮುಕೇಶ್‌ ಅಂಬಾನಿ ತಿಳಿಸಿದ್ದಾರೆ.

ಇದೇ ವೇಳೆ ರಿಲಯನ್ಸ್‌ ಅಮೆರಿಕದಲ್ಲಿದ್ದ ತನ್ನ ಗ್ಯಾಸ್‌ ಆಸ್ತಿಗಳನ್ನು ಮಾರಾಟ ಮಾಡುವ ಮೂಲಕ 2,872 ಕೋಟಿ ರೂ. ಗಳಿಸಿದೆ. ಆರ್‌ಐಎಲ್‌ನ ಟೆಲಿಕಾಂ ಸಂಸ್ಥೆ ಜಿಯೋ ಇನ್ಫೋಕಾಮ್ ಇದೇ ತ್ರೈಮಾಸಿಕದಲ್ಲಿ 3,615 ಕೋಟಿ ರೂ. ಲಾಭ ಗಳಿಸಿದೆ. ಕಳೆದ ವರ್ಷ ಇದೇ ತ್ರೈಮಾಸಿಕದಲ್ಲಿ 3,291 ಲಾಭ ಗಳಿಸಿತ್ತು. ಕಂಪನಿಯ ಲಾಭ ಗಳಿಕೆಯಲ್ಲಿ ಶೇ. 10ರಷ್ಟು ಏರಿಕೆ ದಾಖಲಾಗಿದೆ.

ರಿಲಯನ್ಸ್‌ನಿಂದ ಸಿಂಟೆಕ್ಸ್‌ ಇಂಡಸ್ಟ್ರೀಸ್‌ ಖರೀದಿ, ಅಂಬಾನಿ ಮಡಲಿಗೆ ಮತ್ತೊಂದು ಕಂಪನಿ?
ಜಿಯೋದ ಚಂದಾದಾರರ ಸಂಖ್ಯೆ ಹೆಚ್ಚಳವಾಗಿದ್ದು, ಬಜೆಟ್ ದರದ ಸ್ಮಾರ್ಟ್‌ಫೋನ್‌ ‘ಜಿಯೋಫೋನ್‌ ನೆಕ್ಸ್ಟ್‌’ನಿಂದಾಗಿ ಗ್ರಾಹಕರ ಸಂಖ್ಯೆ ಏಕಾಏಕಿ ಏರಿಕೆ ಕಂಡಿದೆ. ಮೂರನೇ ತ್ರೈಮಾಸಿಕದಲ್ಲಿ ಒಟ್ಟು 1.02 ಕೋಟಿ ಚಂದಾದಾರರು ನೆಟ್ವರ್ಕ್‌ಗೆ ಸೇರ್ಪಡೆಯಾಗಿದ್ದಾರೆ ಎಂದು ಕಂಪನಿ ತಿಳಿಸಿದೆ.

ಇನ್ನು ಹಬ್ಬದ ಋತುವಿನಲ್ಲಿ ವಿಭಾಗಗಳಾದ್ಯಂತ ಬೇಡಿಕೆ ಸುಧಾರಿಸಿದ ಪರಿಣಾಮ ಚಿಲ್ಲರೆ ವ್ಯಾಪಾರದಿಂದ ನಿವ್ವಳ ಲಾಭ ಶೇ. 23.4ರಷ್ಟು ಏರಿಕೆಯಾಗಿದ್ದು, ರಿಲಯನ್ಸ್‌ ರಿಟೇಲ್‌ ಲಾಭ 2,259 ಕೋಟಿ ರೂ.ಗೆ ತಲುಪಿದೆ. ಆಭರಣಗಳು, ಎಲೆಕ್ಟ್ರಾನಿಕ್ಸ್ ಮತ್ತು ಕಿರಾಣಿ ಮಳಿಗೆಗಳಲ್ಲಿ ಬೇಡಿಕೆ ಹೆಚ್ಚಿದ್ದೂ ಈ ಬೆಳವಣಿಗೆಗೆ ಕೊಡುಗೆ ನೀಡಿದೆ.

ನವೆಂಬರ್‌ನಲ್ಲಿ ಗ್ರಾಹಕರ ಸಂಖ್ಯೆ ಹೆಚ್ಚಿಸಿಕೊಂಡ ಏರ್‌ಟೆಲ್‌, ಜಿಯೋ; ವೊಡಾಫೋನ್‌ ಐಡಿಯಾಗೆ ಮತ್ತೆ ನಷ್ಟ!
ಇದೇ ತ್ರೈಮಾಸಿಕದಲ್ಲಿ ಕಂಪನಿಯು ಹೊಸದಾಗಿ 837 ಮಳಿಗೆಗಳನ್ನು ತೆರೆದಿದ್ದು, ಒಟ್ಟು ಮಳಿಗೆಗಳ ಸಂಖ್ಯೆ 14,412ಕ್ಕೆ ಏರಿಕೆಯಾಗಿದೆ. ಆದಾಯವು ಮೊದಲ ಬಾರಿಗೆ 50,000 ಕೋಟಿ ರೂಪಾಯಿಗಳ ಗಡಿಯನ್ನು ದಾಟಿದ್ದು, ಸಾಂಕ್ರಾಮಿಕ ಪೂರ್ವದ ಮಟ್ಟಕ್ಕಿಂತಲೂ ಹೆಚ್ಚಾಗಿದೆ.

ರಿಲಯನ್ಸ್‌ನ ತೈಲ ಮತ್ತು ಅನಿಲ ವಿಭಾಗದ ವಾರ್ಷಿಕ ಆದಾಯ ಶೇ. 500ರಷ್ಟು ಏರಿಕೆಯಾಗಿದ್ದು 2,559 ಕೋಟಿ ರೂ.ಗೆ ಹೆಚ್ಚಳವಾಗಿದೆ. ಕೆಜಿ-ಡಿ6 ಬ್ಲಾಕ್‌ನಲ್ಲಿ ಹೊಸ ಕ್ಷೇತ್ರಗಳಿಂದ ತೈಲ ಉತ್ಪಾದನೆ ಆರಂಭವಾಗಿರುವುದು ಇದಕ್ಕೆ ಕಾರಣವಾಗಿದೆ. ಒಟ್ಟಾರೆ ಉತ್ಪಾದನೆಯು ದಿನಕ್ಕೆ 18 ಮಿಲಿಯನ್ ಸ್ಟ್ಯಾಂಡರ್ಡ್ ಕ್ಯೂಬಿಕ್ ಮೀಟರ್‌ಗೆ ಏರಿಕೆಯಾಗಿದೆ.