ಭಾರತದಲ್ಲಿ ಮೂರನೇ ಅಲೆ ಹೆಸರಿನಲ್ಲಿ ಕೋವಿಡ್ -19 ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಿದ್ದು, ವಿವಿಧ ಭೌತಿಕ ಚಿಲ್ಲರೆ ವ್ಯಾಪಾರಿಗಳು ಮತ್ತು ರೆಸ್ಟೋರೆಂಟ್‌ಗಳು ತಮ್ಮ ವಿಸ್ತರಣಾ ಯೋಜನೆಗಳನ್ನು ತಡೆಹಿಡಿದಿವೆ. ಆದರೆ ಇದೇ ವೇಳೆ ಆನ್ಲೈನ್ ದಿನಸಿ ವ್ಯಾಪಾರಿಗಳಾದ ಬ್ಲಿಂಕಿಟ್, ಬಿಗ್ಬಾಸ್ಕೆಟ್ ಮತ್ತು ಮಿಲ್ಕ್‌ಬಾಸ್ಕೆಟ್‌ನಂತಹ ಸಂಸ್ಥೆಗಳು ಹೆಚ್ಚುತ್ತಿರುವ ಬೇಡಿಕೆಯ ಲಾಭವನ್ನು ಪಡೆಯಲು ಆಕ್ರಮಣಕಾರಿ ರೀತಿಯಲ್ಲಿ ತಮ್ಮ ಸಂಪರ್ಕ ಜಾಲ ವಿಸ್ತರಿಸಿಕೊಳ್ಳುತ್ತಿವೆ.
ಖಚಿತವಾಗಿ ಹೇಳುವುದಾದರೆ, ಕಳೆದ ಎರಡು ವರ್ಷಗಳಲ್ಲಿ ಸಾಂಕ್ರಾಮಿಕ ರೋಗ ಉಲ್ಬಣಗೊಂಡಂತೆಲ್ಲಾ ಲಕ್ಷಾಂತರ ಭಾರತೀಯರು ಆನ್ಲೈನ್ ಮೂಲಕ ದಿನಸಿ ತರಿಸಿಕೊಳ್ಳುವುದಕ್ಕೆ ಹೆಚ್ಚು ಆಕರ್ಷಿತರಾಗಿದ್ದು, ಆನ್ಲೈನ್ ದಿನಸಿ ಪ್ಲಾಟ್‌ಫಾರ್ಮ್‌ಗಳು ಈಗಾಗಲೇ ವಿಸ್ತರಣೆ ಹಾದಿಯಲ್ಲಿದ್ದವು. ಆದರೆ ಭಾರತದಲ್ಲಿ ನಡೆಯುತ್ತಿರುವ ಮೂರನೇ ಅಲೆಯು ಅವರನ್ನು ಇನ್ನಷ್ಟು ಆಕ್ರಮಣಕಾರಿಯಾಗಿರಲು ಪ್ರೇರೇಪಿಸಿದೆ.
“ಈ ಅಲೆಯಲ್ಲಿ ಒಂದು ವಿಷಯ ಬದಲಾಗಿದೆ. ಅದೇನೆಂದರೆ ನಮ್ಮ ವಿಸ್ತರಣೆಯ ವೇಗವು ದ್ವಿಗುಣಗೊಂಡಿದೆ,” ಎನ್ನುತ್ತಾರೆ ಬ್ಲಿಂಕಿಟ್‌ನ ಪೂರೈಕೆ ಸರಪಳಿಯ ಮುಖ್ಯಸ್ಥ ರೋಹಿತ್ ಶರ್ಮಾ.
ಬ್ಲಿಂಕಿಟ್ ಡಿಸೆಂಬರ್ ವರೆಗೆ ಸುಮಾರು 300 ಡಾರ್ಕ್ ಸ್ಟೋರ್‌ಗಳನ್ನು ನಡೆಸುತ್ತಿತ್ತು. ತದನಂತರ ಮತ್ತೆ 200 ಸ್ಟೋರ್‌ಗಳನ್ನು ಆರಂಭಿಸಿದ್ದು, ಪ್ರತಿಯೊಂದೂ ಸುಮಾರು 3,000 ಚದರ ಅಡಿಗಳಷ್ಟು ವಿಸ್ತಾರ ಹೊಂದಿವೆ. “ನಾವು ಮಾರ್ಚ್ ವೇಳೆಗೆ ಡಾರ್ಕ್ ಸ್ಟೋರ್‌ಗಳ ಸಂಖ್ಯೆಯನ್ನು ದ್ವಿಗುಣಗೊಳಿಸಲಿದ್ದು 1,000ಕ್ಕೆ ಏರಿಕೆ ಮಾಡುತ್ತೇವೆ,” ಎಂದು ಶರ್ಮಾ ಹೇಳಿದ್ದಾರೆ.
ಸುಮಾರು 40 ನಗರಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಬ್ಲಿಂಕಿಟ್, ದೇಶದ ಪೂರ್ವ ವಲಯ, ಪಂಜಾಬ್, ಭೋಪಾಲ್ ಮತ್ತು ನಾಸಿಕ್‌ಗೆ ತನ್ನ ಸೇವೆಯನ್ನು ವಿಸ್ತರಿಸುತ್ತಿದೆ.
ಬ್ಲಿಂಕಿಟ್‌ನ ಪ್ರತಿಸ್ಪರ್ಧಿ ಹಾಗೂ ಆನ್ಲೈನ್ ದಿನಸಿ ಡೆಲಿವರಿಯಲ್ಲಿ ಮುಂಚೂಣಿಯಲ್ಲಿರುವ ಟಾಟಾ ಮಾಲೀಕತ್ವದ ಬಿಗ್ಬಾಸ್ಕೆಟ್ 10 – 20 ನಿಮಿಷಗಳಲ್ಲಿ ಉತ್ಪನ್ನಗಳನ್ನು ತಲುಪಿಸುವ ಅದರ ಎಕ್ಸ್‌ಪ್ರೆಸ್ ವಿತರಣಾ ಸೇವೆಯಾದ ‘ಬಿಬಿ ನೌ’ ಅನ್ನು ಪ್ರಾರಂಭಿಸಲು ಯೋಜಿಸಿದೆ. ಇದು ವೇಗವಾಗಿ ಬೆಳೆಯುತ್ತಿರುವ ತ್ವರಿತ ಡೆಲಿವರಿ ವಿಭಾಗಕ್ಕೆ ಕಂಪನಿಯನ್ನು ಎಳೆದು ತರಲಿದೆ. ಸದ್ಯಕ್ಕೆ ಈ ಕ್ಷೇತ್ರದಲ್ಲಿ ಬ್ಲಿಂಕಿಟ್, ಸ್ವಿಗ್ಗಿಯ ಇನ್‌ಸ್ಟಾಮಾರ್ಟ್‌, ಡುಂಜೋ ಮತ್ತು ಜೆಪ್ಟೋ ಸಕ್ರಿಯವಾಗಿವೆ.
ಬಿಗ್‌ಬಾಸ್ಕೆಟ್‌ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಟಿಕೆ ಬಾಲಕುಮಾರ್ ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದು, “ತಮ್ಮ ಕಂಪನಿಯು ಅಸ್ತಿತ್ವದಲ್ಲಿರುವ ವೇರ್‌ಹೌಸಿಂಗ್ ಸಾಮರ್ಥ್ಯವನ್ನು ಸುಮಾರು ಶೇ. 40ರಷ್ಟು ಹೆಚ್ಚಿಸಲು ಯೋಜಿಸಿದೆ ಮತ್ತು ಏಪ್ರಿಲ್‌ನಿಂದ ಪ್ರಾರಂಭವಾಗುವ ಮುಂಬರುವ ಆರ್ಥಿಕ ವರ್ಷದಲ್ಲಿ 300ಕ್ಕೂ ಹೆಚ್ಚು ಡಾರ್ಕ್ ಸ್ಟೋರ್‌ಗಳನ್ನು ತೆರೆಯಲಿದೆ,” ಎಂದು ಹೇಳಿದ್ದಾರೆ. “ಇದರಿಂದ ನಮ್ಮ ದೈನಂದಿನ ಆರ್ಡರ್‌ಗಳ ಸಂಖ್ಯೆಯನ್ನು ಈಗಿರುವ 3,00,000 ದಿಂದ 5,00,000ಕ್ಕೆ ಹೆಚ್ಚಿಸಲು ಸಾಧ್ಯವಾಗಲಿದೆ,” ಎಂದು ಅವರು ಮಾಹಿತಿ ನೀಡಿದ್ದಾರೆ.
ಕೋವಿಡ್ ಅಲೆಯ ಈ ಅವಧಿಯ್ಲಿ ವಿವಿಧ ನಗರಗಳಲ್ಲಿ ಆರ್ಡರ್‌ಗಳು ಶೇ. 30 ರಿಂದ 40ರಷ್ಟು ಹೆಚ್ಚಾಗಿವೆ ಎಂದು ಆನ್ಲೈನ್ ದಿನಸಿ ವ್ಯಾಪಾರಿಗಳು ಹೇಳಿದ್ದಾರೆ.
ಮಿಲ್ಕ್‌ಬಾಸ್ಕೆಟ್ ಪ್ರಸ್ತುತ ಎನ್‌ಸಿಆರ್‌ ಭಾಗದಲ್ಲಿ ದಿನಕ್ಕೆ ಸುಮಾರು 70,000 ಆರ್ಡರ್‌ಗಳನ್ನು ಪೂರೈಸುತ್ತಿದೆ. ಈ ಪ್ರದೇಶದಲ್ಲಿ ಅದರ ಹೊಸ 1,50,000 ಚದರ ಅಡಿಗಳ ಗೋದಾಮು ಮುಂದಿನ ತಿಂಗಳು ಸಿದ್ಧವಾಗಲಿದೆ. ‘ಹೆಚ್ಚುವರಿ ಬೇಡಿಕೆಯಿದೆ’ ಎಂದು ಮಿಲ್ಕ್‌ಬಾಸ್ಕೆಟ್‌ನ ಯೋಜನೆಗಳ ಬಗ್ಗೆ ತಿಳಿದಿರುವ ವ್ಯಕ್ತಿಯೊಬ್ಬರು ಹೇಳಿದ್ದು, ಈಗಾಗಲೇ ತಮ್ಮ ಸಾಮರ್ಥ್ಯದ ಶೇ. 110ರಷ್ಟು ಡೆಲಿವರಿ ನೀಡುತ್ತಿರುವುದಾಗಿ ತಿಳಿಸಿದ್ದಾರೆ.
ಮಿಲ್ಕ್‌ ಬಾಸ್ಕೆಟ್‌ ದಿಲ್ಲಿ ಎನ್‌ಸಿಆರ್‌, ಹೈದರಾಬಾದ್‌, ಬೆಂಗಳೂರು ಮತ್ತು ಚೆನ್ನೈನಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದು ಇದೀಗ ಜೈಪುರ ಪ್ರವೇಶಿಸಲು ಸಜ್ಜಾಗಿದೆ.
ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.
Read more…
[wpas_products keywords=”deal of the day”]