ಅಮೆರಿಕದಲ್ಲಿ 5ಜಿ ಕಾಟ!: ಏರ್ ಇಂಡಿಯಾ ವಿಮಾನಗಳ ಸಂಚಾರ ರದ್ದು

ಹೊಸದಿಲ್ಲಿ: ಸತತ ಎರಡನೇ ದಿನ ಏರ್ ಇಂಡಿಯಾ ವಿಮಾನಯಾನ ಸಂಸ್ಥೆಯು ಭಾರತ- ಅಮೆರಿಕ ಮಾರ್ಗದ ತನ್ನ ಬಹುತೇಕ ವಿಮಾನಗಳ ಹಾರಾಟವನ್ನು ರದ್ದುಗೊಳಿಸಿದೆ. ಅಮೆರಿಕದಲ್ಲಿ 5G ಸಂವಹನದ ಪ್ರಕ್ರಿಯೆಗಳು ನಡೆಯುತ್ತಿರುವ ಕಾರಣ, ವಿಮಾನಗಳ ಸುರಕ್ಷತೆಗೆ ಸಂಬಂಧಿಸಿದಂತೆ ಕಳವಳ ಉಂಟಾಗಿದೆ. ಹಾಗೆಯೇ, ವಿಮಾನಗಳ ಮಾರ್ಗದರ್ಶಿ ವ್ಯವಸ್ಥೆ ಮೇಲೆ ಅದು ಅಪಾಯಕಾರಿ ಪರಿಣಾಮ ಬೀರುವ ಸಾಧ್ಯತೆ ಇರುವುದರಿಂದ ವಿಮಾನ ಸಂಚಾರ ವಿಚಾರದಲ್ಲಿ ಆತಂಕ ಮೂಡಿದೆ.

ಅಮೆರಿಕಕ್ಕೆ ಗುರುವಾರ ಭಾರತದಿಂದ ಹೊರಡಬೇಕಿದ್ದ ಮೂರು ವಿಮಾನಗಳು, ಹಾಗೂ ಆರು ಮರಳಿ ಬರಬೇಕಾದ ವಿಮಾನಗಳ ಹಾರಾಟವನ್ನು ರದ್ದುಗೊಳಿಸಲಾಗಿದೆ ಎಂದು ವಿಮಾನಯಾನ ಸಂಸ್ಥೆಯ ಮೂಲಗಳು ತಿಳಿಸಿವೆ. ಬುಧವಾರ ಕೂಡ ಏರ್ ಇಂಡಿಯಾ ಎಂಟು ಮರಳುವ ವಿಮಾನಗಳನ್ನು ರದ್ದುಗೊಳಿಸಿತ್ತು.
ಏರ್‌ ಇಂಡಿಯಾ ಗೆದ್ದ ಟಾಟಾಗಳಿಗೆ ಸಾಲ ನೀಡಲು ಬ್ಯಾಂಕ್‌ಗಳ ಪೈಪೋಟಿ, ₹35,000 ಕೋಟಿ ಲೋನ್‌ ಆಫರ್‌!
ಬುಧವಾರ ಮುಂಜಾನೆ ಹೊರಡಬೇಕಿದ್ದ ಮೂರು ವಿಮಾನಗಳ 734 ಪ್ರಯಾಣಿಕರಿಗೆ ಹೋಟೆಲ್‌ಗಳಲ್ಲಿ ವ್ಯವಸ್ಥೆ ಮಾಡಲಾಗಿದೆ. ಅಲ್ಲಿ ಸಿಲುಕಿರುವ ಪ್ರಯಾಣಿಕರನ್ನು ಕರೆತರಲು ಬೋಯಿಂಗ್ 777 ವಿಮಾನಗಳ ಕಾರ್ಯಾಚರಣೆಗೆ ಅನುಮೋದನೆ ಸಿಗಲಿದೆ ಎಂದು ಏರ್ ಇಂಡಿಯಾ ಆಶಯ ವ್ಯಕ್ತಪಡಿಸಿದೆ.

ಪ್ರಮುಖ ವಿಮಾಣ ನಿಲ್ದಾಣಗಳ ಸುತ್ತಲೂ 5ಜಿ ನೆಟ್‌ವರ್ಕ್ ಅಳವಡಿಕೆ ಕಾರ್ಯವನ್ನು ಮುಂದೂಡಲು ಸೇವಾ ಪೂರೈಕೆದಾರರು ಒಪ್ಪಿಕೊಂಡಿದ್ದಾರೆ ಎಂದು ಅಮೆರಿಕ ಅಧ್ಯಕ್ಷ ಜೋ ಬೈಡನ್ ತಿಳಿಸಿದ್ದಾರೆ.

ಗುರುವಾರ ರದ್ದುಗೊಂಡ ಏರ್ ಇಂಡಿಯಾ ವಿಮಾನಗಳಲ್ಲಿ ದಿಲ್ಲಿಯಿಂದ ನ್ಯೂವರ್ಕ್, ಷಿಕಾಗೋ ಮತ್ತು ಸ್ಯಾನ್ ಫ್ರಾನ್ಸಿಸ್ಕೋಗೆ ತೆರಳುವ ವಿಮಾನಗಳು ಸೇರಿವೆ. ಏರ್ ಇಂಡಿಯಾ ಪ್ರಸ್ತುತ ದಿಲ್ಲಿ- ನ್ಯೂಯಾರ್ಕ್, ಮತ್ತು ದಿಲ್ಲಿ-ವಾಷಿಂಗ್ಟನ್- ದಿಲ್ಲಿ ಮಾರ್ಗಗಳಲ್ಲಿ ಸಂಚಾರ ನಡೆಸುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ. ಮುಂಬಯಿ-ನ್ಯೂವರ್ಕ್ ಮಾರ್ಗದ ಸಂಚಾರದ ಕುರಿತು ಇನ್ನೂ ನಿರ್ಧಾರ ತೆಗೆದುಕೊಂಡಿಲ್ಲ. ವಾಷಿಂಗ್ಟನ್ ವಿಮಾನ ನಿಲ್ದಾಣದಲ್ಲಿ 5ಜಿ ಸಿ-ಬ್ಯಾಂಡ್ ಟ್ರಾನ್ಸ್‌ಮಿಷನ್ ಸ್ಟೇಷನ್ ಅನ್ನು ತನ್ನ ವ್ಯಾಪ್ತಿಯಲ್ಲಿ ಹೊಂದಿಲ್ಲ. ಹೀಗಾಗಿ ಈ ಸ್ಥಳದ ವಿಮಾನಗಳ ಹಾರಾಟಕ್ಕೆ ತೊಂದರೆಯಾಗುವುದಿಲ್ಲ ಎಂದು ಏರ್ ಇಂಡಿಯಾ ಮೂಲಗಳು ಹೇಳಿವೆ.
5ಜಿ ಹರಾಜು ಹಿನ್ನೆಲೆ, ಮೊಬೈಲ್‌ ಬಳಕೆದಾರರಿಗೆ ಕಾದಿದೆ ಮತ್ತೊಂದು ದರ ಏರಿಕೆ!
ಸಿ- ಬ್ಯಾಂಡ್ ಹೆಸರಿನ ರೇಡಿಯೋ ತರಂಗಾಂತರಗಳಲ್ಲಿನ ಫ್ರೀಕ್ವೆನ್ಸಿಗಳನ್ನು ಬಳಸುವ 5ಜಿ ಸೇವೆಗಳಿಂದಾಗಿ ಅನೇಕ ಸವಾಲುಗಳು ಎದುರಾಗಿವೆ. ವಿಮಾನಗಳಲ್ಲಿ ಅಳವಡಿಕೆ ಮಾಡಿರುವ ರೇಡಿಯೋ ಅಲ್ಟಿಮೀಟರ್‌ನಲ್ಲಿ ಬಳಸುವ ಫ್ರೀಕ್ವೆನ್ಸಿಗಳಿಗೆ ಈ ಸಿ-ಬ್ಯಾಂಡ್ ಫ್ರೀಕ್ವೆನ್ಸಿಗಳು ಬಹಳ ಹತ್ತಿರವಾಗಿವೆ. ಹಾರಾಟದಲ್ಲಿರುವ ವಿಮಾನದಲ್ಲಿ ನೆಲದಿಂದ ವಿಮಾನದ ಎತ್ತರದ ನಿಖರ ಮಾಹಿತಿಯನ್ನು ನೀಡುವ ಏಕೈಕ ಸೆನ್ಸರ್ ರೇಡಿಯೋ ಅಲ್ಟಿಮೀಟರ್ ಆಗಿರುವುದರಿಂದ, ಇದಕ್ಕೆ ಸಂಬಂಧಿಸಿದ ಯಾವುದೇ ಅಡ್ಡಿಗಳು ಭಾರಿ ಅಪಾಯಕಾರಿಯಾಗಬಹುದು.

5ಜಿ ಅಳವಡಿಕೆಯಾದ ಬಳಿಕ ಎಲ್ಲ ಕಡಿಮೆ ಗೋಚರತೆಯ ವಿಮಾನ ಭೂಸ್ಪರ್ಶಗಳನ್ನು ನಿಷೇಧಿಸಿ ಅಮೆರಿದಕ ವಿಮಾನಯಾನ ನಿಯಂತ್ರಣ ಸಂಸ್ಥೆಯಾದ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (FAA) ಡಿಸೆಂಬರ್‌ನಲ್ಲಿ ಆದೇಶ ಹೊರಡಿಸಿತ್ತು. ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವ ಸಲುವಾಗಿ 5ಜಿ ಅಳವಡಿಕೆಯನ್ನು ಜನವರಿ 5ಕ್ಕೆ ಮುಂದೂಡಲಾಗಿತ್ತು.

ವಿಮಾನಯಾನ ಸಂಸ್ಥೆಗಳಿಗೆ ತಾತ್ಕಾಲಿಕ ಪರಿಹಾರವನ್ನು ಎಫ್‌ಎಎ ನೀಡಿದೆ. ಬೋಯಿಂಗ್ 777 ಮತ್ತು 787 ಸೇರಿದಂತೆ 5ಜಿ ಸಿ- ಬ್ಯಾಂಡ್ ಅಡ್ಡಿಗಳನ್ನು ಸಮರ್ಥವಾಗಿ ನಿಭಾಯಿಸಬಲ್ಲ ರೇಡಿಯೋ ಅಲ್ಟಿಮೀಟರ್ ಮಾಡೆಲ್‌ಗಳ ಪಟ್ಟಿಯನ್ನು ಎಫ್ಎಎ ಬಿಡುಗಡೆ ಮಾಡಿದೆ. ಈ ಅನುಮೋದನೆ ಹೊಂದಿದ ಅಲ್ಟಿಮೀಡರ್‌ಗಳನ್ನು ಹೊಂದಿರುವ ಬೋಯಿಂಗ್ ವಿಮಾನಗಳನ್ನು ಜನವರಿ 31ರವರೆಗೂ ಕಡಿಮೆ ಗೋಚರತೆಯ ಲ್ಯಾಂಡಿಂಗ್‌ಗಳಲ್ಲಿ ಹಾರಾಟಕ್ಕೆ ಬಳಸಬಹುದು ಎಂದು ಅದು ಹೇಳಿದೆ.

ವಾಣಿಜ್ಯ ಕ್ಷೇತ್ರದ 20 ಕ್ಕೂ ಹೆಚ್ಚು ವಲಯಗಳಿಗೆ ಸಂಬಂಧಿಸಿದ ಅತ್ಯುತ್ತಮ ಲೇಖನಗಳು ಮತ್ತು ಉದ್ಯಮಕ್ಕೆ ಸಂಬಂಧಿಸಿದ ಆಳವಾದ ಮಾಹಿತಿಗಾಗಿ ನೀವು ಎಕನಾಮಿಕ್ ಟೈಮ್ಸ್‌ ಓದಬಹುದು. ಮಾಹಿತಿಯುಕ್ತ ಲೇಖನಗಳನ್ನು ಓದಲು ಎಕನಾಮಿಕ್ ಟೈಮ್ಸ್ ಇಲ್ಲಿ ಕ್ಲಿಕ್ ಮಾಡಿ.