ಹೊಸಕೋಟೆಯಲ್ಲಿ ಬೇಬಿ ಟ್ಯಾಂಕರ್ ಬಳಸಿ ಪೆಟ್ರೋಲ್, ಡೀಸೆಲ್ ಕಳವು : ಒಂದೇ ಟ್ರಿಪ್ ನಲ್ಲಿ ಲಕ್ಷ ಹಣ ಗಳಿಕೆ

ಎಂ.ಪ್ರಶಾಂತ್‌ ಸೂಲಿಬೆಲೆ | ಮಹೇಶ್‌ ಮಲ್ಲಸಂದ್ರ ಹೊಸಕೋಟೆ

ರಾಜಕಾರಣದಲ್ಲಿ ರಾಜ್ಯದ ಗಮನಸೆಳೆದ ಹೊಸಕೋಟೆ ಈಗ ಖತರ್ನಾಕ್‌ ಐಡಿಯಗಳ ಮೂಲಕ ವಂಚಿಸುವ ದಂಧೆಯಲ್ಲೂಒಂದೆಜ್ಜೆ ಮುಂದಿಟ್ಟು ಗಮನಸೆಳೆದಿದೆ. ಒಂದು ಕಾಲದಲ್ಲಿ ಕಳ್ಳಭಟ್ಟಿ , ಫಿಲ್ಟರ್‌ ಮರಳು ಮಾಫಿಯಾ, ನಿಷೇಧಿತ ಕ್ಯಾಟ್‌ ಫಿಶ್‌ ಸಾಕಣೆ, ರಕ್ತ ಚಂದನ, ಗಾಂಜಾ ಮಾರಾಟ ಅಗೊಮ್ಮೆ ಈಗೊಮ್ಮೆ ಸದ್ದು ಮಾಡುತ್ತಿರುವ ನಡುವೆ ಟ್ಯಾಂಕರ್‌ನಲ್ಲೊಂದು ಪುಟ್ಟ ಮರಿ ಟ್ಯಾಂಕರ್‌ನ್ನಿಟ್ಟು ಡೀಸೆಲ್‌, ಪೆಟ್ರೋಲ್‌ ಕದಿಯುತ್ತಿದ್ದ ದಂಧೆಯೊಂದು ಹೊಸಕೋಟೆಯ ದೇವನಗುಂದಿಯಲ್ಲಿ ಬಯಲಾಗಿದೆ.

ಹೊಸಕೋಟೆ ದೇವನಗುಂದಿ ಬಳಿ ಇರುವ ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌ (ಐಒಸಿ) ಟರ್ಮಿನಲ್‌ಯಿಂದ ರಾಜ್ಯಾದ್ಯಂತ ಇರುವ ಪೆಟ್ರೋಲ್‌, ಡೀಸೆಲ್‌ ಬಂಕ್‌ಗಳಿಗೆ ನಿತ್ಯ ನೂರಾರು ಲಾರಿಗಳು ಇಂಧನ ಪೂರೈಕೆ ಮಾಡುತ್ತವೆ. ಆದರೆ ಟರ್ಮಿನಲ್‌ನಲ್ಲಿ ಟ್ಯಾಂಕ್‌ ಭರ್ತಿ ಮಾಡಿಕೊಳ್ಳುವ ಟ್ಯಾಂಕರ್‌ಗಳು ಬಂಕ್‌ ತಲುಪುವಷ್ಟರಲ್ಲಿ 50 ಲೀಟರ್‌ ಇಂಧನ ಕದಿಯಲಾಗುತ್ತಿತ್ತು. ಇದರ ಸುಳಿವು ಅರಿತ ಬಂಕ್‌ ಮಾಲೀಕರೊಬ್ಬರು ಕಾನೂನು ಮತ್ತು ಮಾಪನಶಾಸ್ತ್ರ ಇಲಾಖೆ ಅಧಿಕಾರಿಗಳಿಗೆ ದೂರು ನೀಡಿದ ಮೇಲೆ ದಂಧೆಯ ಕರಾಳ ಮುಖ ಬಯಲಾಗಿದೆ.

ಟ್ಯಾಂಕರ್‌ನೊಳಗೆ ರಹಸ್ಯವಾಗಿ ಮಿನಿ(ಬೇಬಿ) ಟ್ಯಾಂಕ್‌ ಇಟ್ಟು ಪೆಟ್ರೋಲ್‌, ಡೀಸೆಲ್‌ ಕದಿಯುವ ಮಾಫಿಯಾ ಬಂಕ್‌ ಮಾಲೀಕರನ್ನೇ ಬೆಚ್ಚಿ ಬೀಳಿಸಿದೆ. ಹಲವು ವರ್ಷಗಳಿಂದ ಬಂಕ್‌ ಮಾಲೀಕರು ಮೋಸ ಹೋಗಿರುವ ಅನುಮಾನ ವ್ಯಕ್ತವಾಗಿದೆ. ದೇವನಗುಂದಿ ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌ ಟರ್ಮಿನಲ್‌(ಐಒಸಿ)ಯಿಂದ ಇಂಧನ ಹೊತ್ತು ಸಾಗುವ 1200 ಟ್ಯಾಂಕರ್‌ಗಳಲ್ಲಿ ಶೇ. 80 ರಷ್ಟು ಟ್ಯಾಂಕರ್‌ಗಳು ಈ ದಂಧೆಯಲ್ಲಿ ಭಾಗಿಯಾಗಿರುವ ಅನುಮಾನ ವ್ಯಕ್ತವಾಗಿದೆ.

ಹಾಸನದಲ್ಲಿ ಪೆಟ್ರೋಲ್, ಡೀಸೆಲ್ ಕಳವು: ಇಬ್ಬರು ಆರೋಪಿಗಳ ಬಂಧನ

ಕಿರಾತಕ ದಂಧೆ:

ಬಂಕ್‌ ಮಾಲೀಕರೊಬ್ಬರು ನೀಡಿದ ದೂರಿನನ್ವಯ ದೇವನಗುಂದಿಯ ಎಚ್‌ಪಿಸಿಎಲ್‌ ಟರ್ಮಿನಲ್‌ನಲ್ಲಿ ಟ್ಯಾಂಕರ್‌ ಲಾರಿಗಳನ್ನು ಕಾನೂನು ಮಾಪನ ಶಾಸ್ತ್ರ ಇಲಾಖೆ ಅಧಿಕಾರಿಗಳು ಪರಿಶೀಲಿಸಿದ್ದಾರೆ. ಎಚ್‌ಪಿಸಿಎಲ್‌ ಅಧಿಕಾರಿಗಳ ಸಮ್ಮುಖದಲ್ಲಿ ಟ್ಯಾಂಕರ್‌ ಬಿಚ್ಚಿದಾಗ ಟ್ಯಾಂಕರ್‌ ಒಳಗೊಂದು ಬೇಬಿ ಟ್ಯಾಂಕ್‌ ಇಟ್ಟಿರುವುದು ಬೆಳಕಿಗೆ ಬಂದಿದೆ. ಟ್ಯಾಂಕರ್‌ನ ಕೊನೆ ಕಂಪಾರ್ಟ್‌ಮೆಂಟ್‌ಗೆ ಬೇಬಿ ಟ್ಯಾಂಕ್‌ ಅಳವಡಿಸಿ ಪ್ರತಿ ಟ್ರಿಪ್‌ಗೂ 50 ಲೀ. ನಷ್ಟು ಇಂಧನ ಕದಿಯುತ್ತಿದ್ದುದು ಪತ್ತೆಯಾಗಿದೆ.

ಮಾಪನ ಶಾಸ್ತ್ರ ಇಲಾಖೆ ಮುಖ್ಯಸ್ಥ ಶ್ರೀರೂಪ ಮಾರ್ಗದರ್ಶನದಲ್ಲಿ ಭಾಸ್ಕರ್‌ರಾವ್‌ ಮತ್ತು ಆಸಿಫ್‌ ನೇತೃತ್ವದ ತನಿಖಾ ದಳ ಬೇಬಿ ಟ್ಯಾಂಕ್‌ನ್ನು ಪತ್ತೆ ಮಾಡಿ ತನಿಖಾದಳ ಅಧಿಕಾರಿ ಮಹಮದ್‌ ಆಸೀಫ್‌ ಅವರು ಟ್ಯಾಂಕರ್‌ ಚಾಲಕ, ಕ್ಲೀನರ್‌, ಟ್ಯಾಂಕರ್‌ ಗುತ್ತಿಗೆದಾರ, ಮಾಲೀಕರ ವಿರುದ್ಧ ದೂರು ನೀಡಿದ್ದು ಅನುಗೊಂಡನಹಳ್ಳಿ ಪೊಲೀಸರು ಕ್ರಿಮಿನಲ್‌ ಪ್ರಕರಣ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.

ಸಿಕ್ಕಿ ಬಿದ್ದವರು!
ಇಂಥದೊಂದು ದಂಧೆಗೆ ಮೂಲ ಕಾರಣ ಟ್ಯಾಂಕರ್‌ನಲ್ಲಿಬೇಬಿ ಟ್ಯಾಂಕ್‌ ಇಟ್ಟು ವೆಲ್ಡ್‌ ಮಾಡಿದ ವೆಲ್ಡರ್‌ ಮೇಲೂ ಕೇಸ್‌ ಫಿಟ್‌ ಆಗಿದೆ. ಹಾಸನ ಮೂಲದ ಚಾಲಕ ಪ್ರವೀಣ್‌ಕುಮಾರ್‌, ಶಿವು, ಟ್ಯಾಂಕರ್‌ ಮಾಲೀಕರು. ಗುತ್ತಿಗೆದಾರ ಹಾಗೂ ಬೇಬಿ ಟ್ಯಾಂಕ್‌ ಫಿಟ್‌ ಮಾಡಿದ ವೆಲ್ಡರ್‌ ವಿರುದ್ಧ ಕ್ರಿಮಿನಲ್‌ ಧಾವೆ ಹೂಡಲಾಗಿದೆ. ಟ್ಯಾಂಕರ್‌ ಚಾಲಕ ಮತ್ತು ಕ್ಲೀನರ್‌ ಎಸ್ಕೇಪ್‌ ಆಗಿದ್ದಾರೆ. 2019 ರಿಂದಲೂ ಟ್ಯಾಂಕರ್‌ನೊಳಗೆ ಈ ರೀತಿ ಬೇಬಿ ಟ್ಯಾಂಕ್‌ ಇಟ್ಟು ಪ್ರತಿ ಟ್ರಿಪ್‌ಗೆ ಸುಮಾರು 50 ಲೀಟರ್‌ ಪೆಟ್ರೋಲ್‌ ಕದಿಯುತ್ತಿದ್ದುದು ತನಿಖೆಯಿಂದ ಗೊತ್ತಾಗಿದೆ.

ತಿಂಗಳಿಗೆ ಒಂದು ಲಕ್ಷ ಉಳಿತಾಯ!
ಈ ರೀತಿಯ ದಂಧೆಯಿಂದ ಬಂಕ್‌ ಮಾಲೀಕರಿಗೆ ಲಕ್ಷಾಂತರ ರೂ. ವಂಚಿಸಿ ಹಣವನ್ನು ವಾಮಮಾರ್ಗದಲ್ಲಿ ಜೇಬಿಗೆ ಇಳಿಸಿದರೆ, ವಂಚನೆಯಿಂದಾಗಿ ಬಂಕ್‌ ಮಾಲೀಕರ ಜೇಬಿಗೆ ಲಕ್ಷಾಂತರ ರೂ. ಖೋತಾ ಆಗುತ್ತಿತ್ತು. ದೇವನಗುಂದಿ ಟರ್ಮಿನಲ್‌ನಿಂದ ಸುಮಾರು 1200 ಟ್ಯಾಂಕರ್‌ಗಳಿಗೆ ಇಂಧನ ಪೂರೈಕೆಯಾಗುತ್ತದೆ. ಈ ಪೈಕಿ ಸುಮಾರು ಐದನೂರು ಟ್ಯಾಂಕರ್‌ ಈ ದಂಧೆಯಲ್ಲಿ ತೊಡಗಿವೆ ಎಂಬ ಆರೋಪ ಕೇಳಿ ಬರುತ್ತಿದೆ. ಟ್ಯಾಂಕರ್‌ ಬಾಡಿಗೆಗಿಂತಲೂ ಬೇಬಿ ಟ್ಯಾಂಕ್‌ ಆದಾಯವೇ ಜಾಸ್ತಿ.

ಅಕ್ರಮ ಮಾರಾಟದಲ್ಲೂ ಸೈ!
ದೇವನಗುಂದಿ ಸುತ್ತಮುತ್ತಲಿನ ಹಲವಾರು ಕಡೆ ಈ ರೀತಿ ಕದ್ದ ಪೆಟ್ರೋಲ್‌ ಹಾಗೂ ಡೀಸೆಲ್‌ ಅನ್ನು ಬಂಕ್‌ಗಳಲ್ಲಿ ಸರಕಾರ ನಿಗದಿ ಪಡಿಸಿರುವ ದರಕ್ಕಿಂತ 20 ರೂ.ಗಳಷ್ಟು ಕಡಿಮೆ ದರದಲ್ಲಿ ನೀಡಲಾಗುತ್ತಿದೆ. ಸೀಮೆ ಎಣ್ಣೆ ಕ್ಯಾನ್‌ ಹಾಗೂ ಕುಡಿಯುವ ನೀರಿನ ಕ್ಯಾನ್‌ಗಳಲ್ಲಿತುಂಬಿಸಿ ಅಕ್ರಮವಾಗಿ ಮಾರಾಟ ಮಾಡಲಾಗುತ್ತಿದೆ ಎನ್ನಲಾಗಿದೆ. ಟರ್ಮಿನಲ್‌ಗಳಲ್ಲಿ ಪೆಟ್ರೋಲ್‌ ಡೀಸೆಲ್‌ ತುಂಬಿಸಿಕೊಂಡ ಬಹುತೇಕ ಲಾರಿಗಳು ಐಒಸಿ ರಸ್ತೆ ಮೂಲಕ ಸಾಗಿ ಹೊಸಕೋಟೆ, ಮಾಲೂರು ಹೆದ್ದಾರಿಗೆ ತಲುಪಿ ಅಲ್ಲಿಂದ ನಿಗದಿತ ಸ್ಥಳಗಳಿಗೆ ಸಾಗುತ್ತವೆ. ದೇವನಗೊಂದಿ ಐಒಸಿ ರಸ್ತೆಯಲ್ಲಿಶೇ.70ರಿಂದ 80ರಷ್ಟು ಭಾಗ ಅರಣ್ಯ ಪ್ರದೇಶಕ್ಕೆ ಸೇರಿದ್ದು. ಅರಣ್ಯದ ಮರಗಿಡಗಳ ನಡುವೆ ನಿರ್ಜನ ಪ್ರದೇಶದಲ್ಲಿ ನೀಲಗಿರಿ ತೋಪುಗಳಲ್ಲಿಅಕ್ರಮವಾಗಿ ಪೆಟ್ರೋಲ್‌, ಡೀಸೆಲ್‌ ಕದಿಯಲಾಗುತ್ತಿತ್ತು.

ರಾಜ್ಯದಲ್ಲಿ ಪೆಟ್ರೋಲ್‌ ಟ್ಯಾಂಕರ್‌ಗಳ ವಹಿವಾಟು

ರಾಜ್ಯದಲ್ಲಿ12261 ಇಂಧನ ವಿತರಿಸುವ ಬಂಕ್‌ಗಳಿವೆ. ಬೆಂಗಳೂರು ಮತ್ತು ಸುತ್ತಮುತ್ತ ನಗರದಲ್ಲಿ 2000ಕ್ಕೂ ಹೆಚ್ಚು ಇಂಧನ ಬಂಕ್‌ಗಳಿವೆ. ದಿನಕ್ಕೆ ಸರಾಸರಿ 20ರಿಂದ 30 ಸಾವಿರ ಲೀಟರ್‌ ಒಂದು ಬಂಕ್‌ನಲ್ಲಿ ಮಾರಾಟ ಮಾಡಲಾಗುತ್ತದೆ. ಹಾಸನದಲ್ಲಿರುವ ಟರ್ಮಿನಲ್‌ ಮೂಲಕ ಶಿವಮೊಗ್ಗ, ದಾವಣಗೆರೆ, ಉತ್ತರ ಕರ್ನಾಟಕಕ್ಕೆ ಪೂಧರೈಕೆಯಾಗುತ್ತದೆ. ಎಲ್ಲಾ ಬಂಕ್‌ಗಳು ಸ್ವಂತ ಟ್ಯಾಂಕರ್‌ ಹೊಂದಿಲ್ಲ. ಹೊಂದಿದ್ದರೂ ಟರ್ಮಿನಲ್‌ಗೆ ಹೋಗಿ ಬರಲು ದಿನಗಳೇ ಬೇಕು. ಹೀಗಾಗಿ ಅನಿವಾರ್ಯವಾಗಿ ಖಾಸಗಿ ಟ್ಯಾಂಕ್‌ಗಳನ್ನೇ ಎಲ್ಲಾ ಬಂಕ್‌ ಮಾಲೀಕರು ನಂಬಲೇಬೇಕು. ಇನ್ನು ಬೆಂಗಳೂರು ಮತ್ತು ಸುತ್ತಮುತ್ತಲಿನ ಜಿಲ್ಲೆಗಳಿಗೆ ದೇವನಗುಂದಿ ಬಳಿಯಿರುವ ಐಒಸಿಎಲ್‌, ಎಚ್‌ಪಿಸಿಎಲ್‌, ಬಿಸಿಪಿಎಲ್‌ ಟರ್ಮಿನಲ್‌ ಗಳಿಂದ ಇಂಧನ ಪೂರೈಕೆ ಮಾಡಲಾಗುತ್ತಿದೆ. ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಗುತ್ತಿಗೆದಾರರು ಬೇಬಿ ಟ್ಯಾಂಕ್‌ ಮೂಲಕ ಇಂಧನ ಕದ್ದು ಕೋಟಿ ಕೋಟಿ ದುಡಿಮೆ ಮಾಡಿ ರಾತ್ರೋರಾತ್ರಿ ಶ್ರೀಮಂತರಾಗುತ್ತಿದ್ದಾರೆ.