ಒಡಿಐ ರನ್‌ ಗಳಿಕೆಯಲ್ಲಿ ಸಚಿನ್‌ ದಾಖಲೆ ಮುರಿದ ‘ಕಿಂಗ್‌ ಕೊಹ್ಲಿ’!

ಪಾರ್ಲ್‌ (ದಕ್ಷಿಣ ಆಫ್ರಿಕಾ): ಭಾರತ ಒಡಿಐ ತಂಡದ ಕ್ಯಾಪ್ಟನ್ಸಿ ಕಳೆದುಕೊಂಡ ಬಳಿಕ ಮೊದಲ ಏಕದಿನ ಕ್ರಿಕೆಟ್‌ ಸರಣಿಯಲ್ಲಿ ಆಡುತ್ತಿರುವ ವಿರಾಟ್‌ ಕೊಹ್ಲಿ, 63ನೇ ಒಡಿಐ ಫಿಫ್ಟಿ ಬಾರಿಸುವ ಜೊತೆಗೆ ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ತೆಂಡೂಲ್ಕರ್‌ ಹೆಸರಲ್ಲಿದ್ದ ಬಹುದೊಡ್ಡ ದಾಖಲೆ ಒಂದನ್ನು ನುಚ್ಚು ನೂರು ಮಾಡಿದ್ದಾರೆ.

ಕಳೆದ ನವೆಂಬರ್‌ನಲ್ಲಿ ವಿರಾಟ್‌ ಕೊಹ್ಲಿ ಅವರನ್ನು ಭಾರತ ಒಡಿಐ ತಂಡದ ನಾಯಕತ್ವದಿಂದ ಕೆಳಗಿಳಿಸಲಾಯಿತು. ಇದರೊಂದಿಗೆ ಬರೋಬ್ಬರಿ 5 ವರ್ಷಗಳ ಬಳಿಕ ಏಕದಿನ ಕ್ರಿಕೆಟ್‌ನಲ್ಲಿ ನಾಯಕತ್ವ ಇಲ್ಲದೆ ಬರಿ ಆಟಗಾರನಾಗಿ ಕೊಹ್ಲಿ ಕಾಣಿಸಿಕೊಂಡಿದ್ದಾರೆ.

ಇಲ್ಲಿನ ಬೋಲೆಂಡ್‌ ಪಾರ್ಕ್‌ ಕ್ರೀಡಾಂಗಣದಲ್ಲಿ ಬುಧವಾರ ತಮ್ಮ ಶ್ರೇಷ್ಠ ಲಯ ಕಂಡುಕೊಂಡವರಂತೆ ಬ್ಯಾಟ್‌ ಮಾಡಿದ ಕೊಹ್ಲಿ 60 ಎಸೆತಗಳಲ್ಲಿ 51 ರನ್‌ ಗಳಿಸಿ ಔಟ್‌ ಆದರು. ಇದರಲ್ಲಿ ಮೂರು ಫೋರ್‌ಗಳು ಮೂಡಿ ಬಂದವು. ಆದರೆ, ಸ್ಪಿನ್ನರ್‌ ತಬ್ರೇಝ್‌ ಶಾಮ್ಸಿ ಬೌಲಿಂಗ್‌ನಲ್ಲಿ ಸ್ಲಾಗ್‌ ಸ್ವೀಪ್‌ಗೆ ಕೈ ಹಾಕಿ ಮಿಡ್‌ ವಿಕೆಟ್‌ ಫೀಲ್ಡರ್‌ ತೆಂಬಾ ಬವೂಮಗೆ ಕ್ಯಾಚಿತ್ತ ಕೊಹ್ಲಿ ನಿರಾಶೆ ಅನುಭವಿಸಿದರು. ಇದು ಅವರ ಒಡಿಐ ವೃತ್ತಿ ಬದುಕಿನ 63ನೇ ಅರ್ಧಶತಕವಾಗಿದೆ.

ಪ್ರಥಮ ಒಡಿಐನಲ್ಲಿ ತೆಂಬಾ ಬವೂಮ ಜೊತೆಗೆ ಕೊಹ್ಲಿ ಕಿರಿಕ್‌!

ಕೊಹ್ಲಿ ತಮ್ಮ ಈ ಜವಾಬ್ದಾರಿಯುತ ಇನಿಂಗ್ಸ್‌ ವೇಳೆ ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ತೆಂಡೂಲ್ಕರ್‌ ಅವರನ್ನು ಹಿಂದಿಕ್ಕಿದ್ದಾರೆ. ಭಾರತದಿಂದ ಆಚೆ ಟೀಮ್ ಇಂಡಿಯಾ ಪರ ಅತಿ ಹೆಚ್ಚು ಒಡಿಐ ರನ್‌ ಗಳಿಸಿದ ಬ್ಯಾಟ್ಸ್‌ಮನ್‌ ಎಂಬ ಹೆಗ್ಗಳಿಕೆ ಈಗ ಕಿಂಗ್‌ ಕೊಹ್ಲಿ ಪಾಲಾಗಿದೆ. ವಿರಾಟ್‌ ವಿದೇಶದಲ್ಲಿ 104 ಇನಿಂಗ್ಸ್‌ಗಳಿಂದ ಒಟ್ಟು 5108 ರನ್‌ಗಳನ್ನು ಬಾರಿಸಿದ್ದಾರೆ. ಹರಿಣಗಳ ಎದುರು ಪ್ರಥಮ ಒಡಿಐನಲ್ಲಿ ಭಾರತ ಬ್ಯಾಟ್‌ ಮಾಡುವಾಗ 13ನೇ ಓವರ್‌ನ ಕೊನೇ ಎಸೆತದಲ್ಲಿ ಲುಂಗಿ ಎನ್ಗಿಡಿ ಎದುರು ಒಂದು ರನ್‌ ಕದಿಯುವ ಮೂಲಕ ಕೊಹ್ಲಿ, ದಿಗ್ಗಜ ಸಚಿನ್‌ ತೆಂಡೂಲ್ಕರ್‌ ದಾಖಲೆ ಮುರಿದರು.

ಪಂದ್ಯದಲ್ಲಿ 297 ರನ್‌ಗಳ ಕಠಿಣ ಗುರಿ ಬೆನ್ನತ್ತಿದ್ದ ಭಾರತ ತಂಡಕ್ಕೆ ಆಸರೆಯಾಗಿ ನಿಂತ ಕೊಹ್ಲಿ, ಎರಡನೇ ವಿಕೆಟ್‌ಗೆ ಶಿಖರ್‌ ಧವನ್‌ (79) ಅವರೊಟ್ಟಿಗೆ 96 ರನ್‌ಗಳ ಜೊತೆಯಾಟವಾಡಿದರು. ಇದಕ್ಕೂ ಮುನ್ನ ತೆಂಬಾ ಬವೂಮ (110) ಮತ್ತು ರಾಸಿ ವ್ಯಾನ್‌ ಡೆರ್‌ ಡುಸೆನ್‌ (129*) ಶತಕಗಳ ನೆರವಿನಿಂದ ದಕ್ಷಿಣ ಆಫ್ರಿಕಾ 50 ಓವರ್‌ಗಳಲ್ಲಿ 296/4 ರನ್‌ಗಳ ದೊಡ್ಡ ಮೊತ್ತ ಗಳಿಸಿತು.

ಪ್ಲೇಯಿಂಗ್‌ XIನಿಂದ ಧವನ್‌ ಕೈಬಿಡುವುದರಲ್ಲಿ ಅರ್ಥವಿಲ್ಲ ಎಂದ ಗಂಭೀರ್‌!

ಒಡಿಐನಲ್ಲಿ ವಿರಾಟ್‌ ವೈಭವ
2008ರಲ್ಲೇ ಭಾರತ ತಂಡಕ್ಕ ಪದಾರ್ಪಣೆ ಮಾಡಿದ 33 ವರ್ಷದ ಬಲಗೈ ಬ್ಯಾಟ್ಸ್‌ಮನ್‌ ವಿರಾಟ್‌, ಒಡಿಐ ಕ್ರಿಕೆಟ್‌ನಲ್ಲಿ ಈವರೆಗೆ 255 ಪಂದ್ಯಗಳಲ್ಲಿ 12178* ರನ್‌ಗಳನ್ನು ಬಾರಿಸಿದ್ದಾರೆ. 59.07ರ ಸರಾಸರಿಯಲ್ಲಿ ಬ್ಯಾಟ್‌ ಬೀಸಿರುವ ವಿರಾಟ್‌ ಒಟ್ಟಾರೆ 43 ಶತಕಗಳನ್ನು ಬಾರಿಸಿದ್ದಾರೆ. 2018ರಲ್ಲಿ ಅತಿ ವೇಗದ 10 ಸಾವಿರ ರನ್‌ಗಳನ್ನು ಬಾರಿಸಿದ ಭಾರತೀಯ ಬ್ಯಾಟ್ಸ್‌ಮನ್‌ ಎನಿಸಿ ಸಚಿನ್ ದಾಖಲೆ ಮುರಿದಿದ್ದರು. ವಿರಾಟ್‌ ಕೊಹ್ಲಿ ವಿದೇಶದಲ್ಲಿ ಒಟ್ಟು ಒಡಿಐ 20 ಶತಕಗಳನ್ನು ಬಾರಿಸಿದ್ದಾರೆ.

2012ರಲ್ಲಿ ನಿವೃತ್ತಿ ಘೋಷಿಸಿದ ಸಚಿನ್‌ ತೆಂಡೂಲ್ಕರ್‌, ಏಕದಿನ ಕ್ರಿಕೆಟ್‌ನಲ್ಲಿ ದಾಖಲೆಯ 463 ಪಂದ್ಯಗಳನ್ನು ಆಡಿ ಬರೋಬ್ಬರಿ 18426 ರನ್‌ಗಳನ್ನು ಬಾರಿಸಿದ್ದಾರೆ. ಇದರಲ್ಲಿ 49 ಅರ್ಧಶತಕಗಳು ಮತ್ತು 96 ಅರ್ಧಶತಕಗಳು ಸೇರಿವೆ.

ವಿದೇಶದಲ್ಲಿ ಅತಿ ಹೆಚ್ಚು ಒಡಿಐ ರನ್‌ಗಳಿಸಿದ ಭಾರತೀಯ ಬ್ಯಾಟ್ಸ್‌ಮನ್‌ಗಳು
1. ವಿರಾಟ್‌ ಕೊಹ್ಲಿ: 5108 ರನ್‌
2. ಸಚಿನ್‌ ತೆಂಡೂಲ್ಕರ್‌: 5065 ರನ್‌
3. ಎಂಎಸ್‌ ಧೋನಿ: 4520 ರನ್‌
4. ರಾಹುಲ್‌ ದ್ರಾವಿಡ್‌: 3998 ರನ್‌
5. ಸೌರವ್ ಗಂಗೂಲಿ: 3468 ರನ್‌