ಬಜೆಟ್ 2022: ಮೂರು ವರ್ಷ ಅವಧಿಯ FDಗೂ ತೆರಿಗೆ ವಿನಾಯಿತಿ ನೀಡಲು ಬ್ಯಾಂಕುಗಳ ಒತ್ತಾಯ!

ಹೊಸದಿಲ್ಲಿ: ಪ್ರಸ್ತುತ ಬ್ಯಾಂಕುಗಳಲ್ಲಿ 5 ವರ್ಷದ ಅವಧಿಯ ನಿಶ್ಚಿತ ಠೇವಣಿ (ಎಫ್‌ಡಿ)ಗಳಿಗೆ ತೆರಿಗೆ ವಿನಾಯಿತಿ ಲಭ್ಯವಿದೆ, ಆದರೆ ಈಗ ಈ ಸೌಲಭ್ಯವನ್ನು 3 ವರ್ಷ ಅವಧಿಯ ಎಫ್‌ಡಿಗೂ ನೀಡಬೇಕು ಎಂಬ ಬೇಡಿಕೆ ಕೇಳಿಬಂದಿದೆ. ELSS ನಂತಹ ಇತರ ಹಣಕಾಸು ಉತ್ಪನ್ನಗಳಿಗೆ ಹೋಲಿಸಿದರೆ, ತೆರಿಗೆ ಉಳಿಸುವ 5 ವರ್ಷಗಳ ಅವಧಿಯ FD ಗಳು ಕಡಿಮೆ ಆಕರ್ಷಕವಾಗಿವೆ. ಬ್ಯಾಂಕುಗಳು ಕೂಡ ಎಫ್‌ಡಿಗಳ ಮೇಲಿನ ಬಡ್ಡಿದರಗಳನ್ನು ಸ್ವಲ್ಪಮಟ್ಟಿಗೆ ಕಡಿಮೆ ಮಾಡಿದೆ. ಆದರೆ, ಎಫ್‌ಡಿಗೆ ಹೋಲಿಸಿದರೆ ಪಿಪಿಎಫ್‌ನಂತಹ ಹೂಡಿಕೆಗಳಲ್ಲಿ ಬಡ್ಡಿ ದರ ಉತ್ತಮವಾಗಿದೆ.

ತೆರಿಗೆ ಮುಕ್ತ ಎಫ್‌ಡಿಗಳ ಲಾಕ್-ಇನ್ ಅವಧಿಯನ್ನು ಕಡಿಮೆ ಮಾಡಬೇಕು ಎಂದು ಭಾರತೀಯ ಬ್ಯಾಂಕ್‌ಗಳ ಸಂಘವು ಒತ್ತಾಯಿಸಿದೆ. ಫೆಬ್ರವರಿ 1ರಂದು 2022ರ ಬಜೆಟ್ ಮಂಡನೆಯಾಗಲಿದ್ದು, ಈ ಮುನ್ನವೇ ಇಂತಹದೊಂದು ಬೇಡಿಕೆ ಕೇಳಿಬಂದಿದೆ. ಪ್ರಸ್ತುತ 5 ವರ್ಷಗಳ ಅವಧಿಯ ಎಫ್‌ಡಿಗಳ ಮೇಲೆ ತೆರಿಗೆ ವಿನಾಯಿತಿ ಲಭ್ಯವಿದ್ದು, ಈಗ ಅದನ್ನು 3 ವರ್ಷ ಅವಧಿಯ ಎಫ್‌ಡಿಗಳಿಗೂ ತೆರಿಗೆ ವಿನಾಯಿತಿ ನೀಡಬೇಕು ಎಂದು ಬ್ಯಾಂಕುಗಳ ಸಂಘ ಬೇಡಿಕೆ ಇಟ್ಟಿದೆ. ಹೀಗಾದಲ್ಲಿ ಮಾತ್ರ 3 ವರ್ಷ ಅವಧಿಯ FD ಉಳಿದ ಹಣಕಾಸು ಉತ್ಪನ್ನಗಳೊಂದಿಗೆ ಸ್ಪರ್ಧಿಸಲು ಸಾಧ್ಯವಾಗುತ್ತದೆ ಎನ್ನಲಾಗಿದೆ.

ELSS ಕಾರಣದಿಂದಾಗಿ, 5-ವರ್ಷ ಅವಧಿಯ FDಗಳಿಗೆ ಬೇಡಿಕೆ ಕಡಿಮೆ
ELSS ನಂತಹ ಇತರೆ ಹಣಕಾಸು ಉತ್ಪನ್ನಗಳಿಗೆ ಹೋಲಿಸಿದರೆ, ತೆರಿಗೆ ಉಳಿತಾಯಕ್ಕೆ 5 ವರ್ಷಗಳ FDಗಳು ಕಡಿಮೆ ಆಕರ್ಷಕವಾಗಿವೆ ಎಂದು IBA ಹೇಳಿದೆ. ಆದರೆ ನಿಶ್ಚಿತ ಠೇವಣಿಗಳ ಲಾಕ್-ಇನ್ ಅವಧಿಯನ್ನು ಕಡಿಮೆ ಮಾಡಿದರೆ, ಜನರ ಒಲವನ್ನು ಹೆಚ್ಚಿಸುತ್ತದೆ. ಈ ನಿಟ್ಟಿನಲ್ಲಿ 2022ರ ಬಜೆಟ್‌ನಲ್ಲಿ 3 ವರ್ಷಗಳ ಎಫ್‌ಡಿ ಮೇಲೆ ತೆರಿಗೆ ವಿನಾಯಿತಿ ಘೋಷಣೆ ಆಗಬಹುದು.

FDಗಳ ಮೇಲೆ ಅತಿ ಕಡಿಮೆ ಬಡ್ಡಿ ದರ
ಬ್ಯಾಂಕುಗಳು ಬಡ್ಡಿದರಗಳನ್ನು ಸ್ವಲ್ಪಮಟ್ಟಿಗೆ ಕಡಿಮೆ ಮಾಡಿದೆ. ಎಫ್‌ಡಿಗೆ ಹೋಲಿಸಿದರೆ ಪಿಪಿಎಫ್‌ನಂತಹ ಉತ್ಪನ್ನಗಳ ಮೇಲಿನ ಬಡ್ಡಿ ದರ ಉತ್ತಮವಾಗಿದೆ. ಇದರಿಂದಾಗಿ ಜನರು ಎಫ್‌ಡಿಗಳಲ್ಲಿ ಕಡಿಮೆ ಹೂಡಿಕೆ ಮಾಡುತ್ತಿದ್ದಾರೆ. ಅನೇಕ ಜನರು ಮ್ಯೂಚುವಲ್ ಫಂಡ್‌ಗಳು ಮತ್ತು ಷೇರುಗಳಲ್ಲಿ ಹೂಡಿಕೆ ಮಾಡುತ್ತಿದ್ದಾರೆ. 5 ವರ್ಷಗಳ ಅವಧಿಯ ಎಫ್‌ಡಿಗೆ ತೆರಿಗೆ ವಿನಾಯಿತಿ ಇದ್ದರೂ, ಹೆಚ್ಚಿನ ಜನರು ಇವುಗಳಲ್ಲಿ ಹೂಡಿಕೆ ಮಾಡುತ್ತಿಲ್ಲ. ಈ ಸಂದರ್ಭದಲ್ಲಿ, ಟ್ಯಾಕ್ಸ್ ಸೇವರ್ ಎಫ್‌ಡಿಯಲ್ಲಿ 3 ವರ್ಷಗಳ ಎಫ್‌ಡಿಯನ್ನು ಸಹ ಸೇರಿಸಬಹುದು.

ಹೂಡಿಕೆದಾರರು ಸಣ್ಣ ಉಳಿತಾಯ ಯೋಜನೆಯತ್ತ ಮುಖ ಮಾಡುತ್ತಿದ್ದಾರೆ
ಡಿಸೆಂಬರ್‌ನಲ್ಲಿ ನಡೆದ ಆರ್‌ಬಿಐ ಹಣಕಾಸು ನೀತಿ ಸಮಿತಿಯ ಕೊನೆಯ ಸಭೆಯಲ್ಲಿ ಸತತ 9ನೇ ಬಾರಿಗೆ ಬಡ್ಡಿದರ ಬದಲಾವಣೆ ಮಾಡದಿರಲು ನಿರ್ಧರಿಸಲಾಗಿದೆ. ಪ್ರಸ್ತುತ, ರೆಪೊ ದರವು 4% ಮತ್ತು ರಿವರ್ಸ್ ರೆಪೊ ದರವು 3.35% ಆಗಿದೆ, ಇದರಿಂದಾಗಿ FD ಮೇಲಿನ ಬಡ್ಡಿಯನ್ನು ಬ್ಯಾಂಕುಗಳು ಕಡಿಮೆ ನೀಡುತ್ತವೆ. ಅದೇ ಸಮಯದಲ್ಲಿ, ಕಳೆದ ಹಲವಾರು ತ್ರೈಮಾಸಿಕಗಳಲ್ಲಿ PPF, ಸುಕನ್ಯಾ ಸಮೃದ್ಧಿ ಯೋಜನೆ, KVP, NSC ನಂತಹ ಸಣ್ಣ ಉಳಿತಾಯ ಯೋಜನೆಗಳ ಮೇಲಿನ ಬಡ್ಡಿ ದರದಲ್ಲಿ ಯಾವುದೇ ಬದಲಾವಣೆ ಇಲ್ಲ, ಇದರಿಂದಾಗಿ FD ಹೂಡಿಕೆದಾರರು ಸಹ ಅದೇ ದಿಕ್ಕಿನಲ್ಲಿದ್ದಾರೆ.