ಬಿಜೆಪಿ ಸರ್ಕಾರದ ವಿರುದ್ಧ ಮಾತನಾಡಿದ್ದಕ್ಕೆ ಧಾರಾವಾಹಿಯಿಂದ ತೆಗೆದುಹಾಕಲಾಗಿದೆ: ನಟ ಕಿರಣ್ ಮಾನೆ

ರಾಜಕೀಯ ಪಾರ್ಟಿ ವಿರುದ್ಧ ಸೋಶಿಯಲ್ ಮೀಡಿಯಾದಲ್ಲಿ ಮಾತನಾಡಿದ್ದಕ್ಕೆ ನನ್ನನ್ನು ಧಾರಾವಾಹಿಯಿಂದ ತೆಗೆದು ಹಾಕಲಾಗಿದೆ ಎಂದು ನಟ ಕಿರಣ್ ಮಾನೆ ಆರೋಪ ಮಾಡಿದ್ದಾರೆ. ಕಿರಣ್ ಮಾನೆ ಅವರು ಸೋಶಿಯಲ್ ಮೀಡಿಯಾದಲ್ಲಿ ಬಿಜೆಪಿ ಕೇಂದ್ರ ಸರ್ಕಾರದ ವಿರುದ್ಧ ಅವರ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದರು.

ಯಾವ ಧಾರಾವಾಹಿ? ಏನು ಕಥೆ?
ಕಿರಣ್ ಮಾನೆ ಸೋಶಿಯಲ್ ಮೀಡಿಯಾದಲ್ಲಿ ಕಾಮೆಂಟ್ ಹಾಕಿದ್ದಕ್ಕೆ ಮಹಾರಾಷ್ಟ್ರದ ಸತಾರಾ ಎಂಬ ಹಳ್ಳಿ ವೈಚಾರಿಕವಾಗಿ ಭಾಗ ಆಗಿದೆಯಂತೆ. ಅಲ್ಲಿಯೇ ಕಿರಣ್ ಮಾನೆ ನಟನೆಯ ಮರಾಠಿ ಧಾರಾವಾಹಿ ‘Mulgi Zali Ho’ ಶೂಟಿಂಗ್ ಕೂಡ ನಡೆಯುತ್ತಿದ್ದು, ಒಂದು ವರ್ಗದವರು ಶೂಟಿಂಗ್ ನಿಲ್ಲಿಸಿ ಎಂದರೆ, ಇನ್ನೊಬ್ಬರು ಬೆಂಬಲ ನೀಡುತ್ತಿದ್ದಾರೆ. ಇನ್ನು ಕಿರಣ್ ಮಾನೆ ಕಾಮೆಂಟ್ ಕುರಿತಾಗಿ ಶೂಟಿಂಗ್ ನಡೆಯುತ್ತಿದ್ದ ಹಳ್ಳಿಯ ಗ್ರಾಮ ಪಂಚಾಯತ್‌ದಲ್ಲಿಯೂ ದೂರು ದಾಖಲಾಗಿದೆ.

ಕಿರಣ್ ಮಾನೆ ಕಾಮೆಂಟ್ ಏನು?
ಕಿರಣ್ ಮಾನೆ ಅವರು ಪಂಜಾಬ್‌ನಲ್ಲಿ ನರೇಂದ್ರ ಮೋದಿ ಸೆಕ್ಯುರಿಟಿ ವಿಚಾರಕ್ಕೆ ಸಂಬಂಧಪಟ್ಟಂತೆ ಫೇಸ್‌ಬುಕ್‌ನಲ್ಲಿ ಪೋಸ್ಟ್ ಹಂಚಿಕೊಂಡಿದ್ದರು. “ಥಿಯೇಟರ್‌ನಲ್ಲಿ ಒಬ್ಬರು ಅಥವಾ ಇಬ್ಬರು ವೀಕ್ಷಕರು ಇದ್ದರೆ ಭಯವೇ ಇಲ್ಲದೆ ನಾವು ಶೋ ಕ್ಯಾನ್ಸಲ್ ಮಾಡೋದಿಲ್ಲ. ಥಿಯೇಟರ್ ಹೌಸ್‌ಫುಲ್ ಆಗಿದೆ ಎಂಬಂತೆ ನಾವು ನಟಿಸುತ್ತೇವೆ. ಶೋ ಮುಗಿದ ನಂತರ ನಾವು ಮನೆಗೆ ಮರಳುತ್ತೇವೆ” ಎಂದು ಕಿರಣ್ ಮಾನೆ ಹೇಳಿದ್ದರು. ಒಟ್ಟಿನಲ್ಲಿ ಇದನ್ನು ಓದಿದವರಲ್ಲಿ ಕೆಲವರು ನರೇಂದ್ರ ಮೋದಿ ಅವರ ಸೆಕ್ಯುರಿಟಿ ವಿಚಾರ ಅಂತಹ ದೊಡ್ಡ ವಿಷಯವಲ್ಲ ಎಂದು ಕಿರಣ್ ಹೇಳುತ್ತಿದ್ದಾರೆ ಎಂದು ಅರ್ಥೈಸಿಕೊಂಡಿದ್ದಾರೆ.

ಪ್ರತಿಭಟನೆಯಿಂದ ಪಂಜಾಬ್‌ ಫ್ಲೈಓವರ್‌ನಲ್ಲಿ 20 ನಿಮಿಷ ಸಿಲುಕಿದ ಪ್ರಧಾನಿ ಮೋದಿ; ಭದ್ರತಾ ಲೋಪ ಎಂದ ಕೇಂದ್ರ

ಪಂಜಾಬ್ ಘಟನೆ ಏನು?
ಜನವರಿಯಲ್ಲಿಯೇ ಪಂಜಾಬ್‌ನ ಮೇಲು ರಸ್ತೆಯೊಂದರ ಮೇಲೆ ಪ್ರತಿಭಟನಾಕಾರರ ಕಾರಣದಿಂದ ಪ್ರಧಾನಿ ನರೇಂದ್ರ ಮೋದಿ 20 ನಿಮಿಷಗಳ ಕಾಲ ಕಾಯುವಂತಾದ ಘಟನೆ ರಾಜಕೀಯ ವಲಯದಲ್ಲಿ ಅಲ್ಲೋಲ ಕಲ್ಲೋಲ ಸೃಷ್ಟಿಸಿತ್ತು. ಆ ಬಗ್ಗೆ ಸಾಕಷ್ಟು ಚರ್ಚೆ ಉಂಟಾಗಿತ್ತು.

ಪದೇ ಪದೇ ಕೇಂದ್ರದ ವಿರುದ್ಧ ಕಿರಣ್ ಮಾನೆ ಕಾಮೆಂಟ್
ಇನ್ನು ಕಳೆದ ಲಾಕ್‌ಡೌನ್‌ನಲ್ಲಿ ಮನೆಯ ಬಾಲ್ಕನಿಗೆ ಬಂದು ಪ್ಲೇಟ್ ಹಿಡಿದು ಬಡಿಯುತ್ತ ಚಪ್ಪಾಳೆ ತಟ್ಟುತ್ತ ದೀಪ ಹಚ್ಚುವುದು, ಸಾಮಾಜಿಕ ಅಂತರ ಕಾಪಾಡಿಕೊಳ್ಳುವುದು ಪ್ರಾಯೋಗಿಕವಾಗಿ ಪ್ರಯೋಜನಕ್ಕೆ ಬರೋದಿಲ್ಲ ಎಂದು ದೇವೇಂದ್ರ ಜಿ. ಫಡ್ನವಿಸ್, ನರೇಂದ್ರ ಮೋದಿ ವಿರುದ್ಧ ವರ್ಷದ ಹಿಂದೆ ಕಿರಣ್ ಮಾನೆ ಮಾತನಾಡಿರೋದು ಕೂಡ ಈಗ ಬೆಳಕಿಗೆ ಬಂದಿದೆ. ಒಟ್ಟಿನಲ್ಲಿ ಕೇಂದ್ರ ಸರ್ಕಾರದ ವಿರುದ್ಧ ಇರೋದಿಕ್ಕೆ ಕಿರಣ್ ಮಾನೆ ಬಗ್ಗೆ ಪರ-ವಿರೋಧ ಚರ್ಚೆಗಳು ನಡೆಯುತ್ತಿವೆ.

ಜನಪ್ರಿಯ ಧಾರಾವಾಹಿ ವಿರುದ್ಧ ದೂರು ದಾಖಲು; ವಿವಾದಕ್ಕೆ ಕಾರಣವಾಯ್ತು ಆ ದೃಶ್ಯ

ಕಿರಣ್ ಮಾನೆ ಏನಂತಾರೆ?
“ಸೋಶಿಯಲ್ ಮೀಡಿಯಾದಲ್ಲಿ ರಾಜಕೀಯ ಅಭಿಪ್ರಾಯ ವ್ಯಕ್ತಪಡಿಸಿದ್ದಕ್ಕೆ ನನ್ನನ್ನು ಧಾರಾವಾಹಿಯಿಂದ ತೆಗೆದು ಹಾಕಲಾಗಿದೆ. ಧಾರಾವಾಹಿಯ ಟಿಆರ್‌ಪಿ ಚೆನ್ನಾಗಿತ್ತು, ನನ್ನ ಪಾತ್ರ ಕೂಡ ತುಂಬ ಮುಖ್ಯವಾಗಿತ್ತು” ಎಂದು ಕಿರಣ್ ಮಾನೆ ಹೇಳಿದ್ದಾರೆ.

ಪ್ರೊಡಕ್ಷನ್ ಹೌಸ್ ಕಿರಣ್ ಮಾನೆಯನ್ನು ತೆಗೆದಿದ್ದು ಯಾಕೆ?
ಟೀಂನಲ್ಲಿ ಕಿರಣ್ ಮಾನೆ ಅನುಚಿತ ವರ್ತನೆ ಮಾಡಿದ್ದಕ್ಕೆ ಅವರನ್ನು ಧಾರಾವಾಹಿಯಿಂದ ತೆಗೆದು ಹಾಕಲಾಗಿದೆ. ಅದನ್ನು ಬಿಟ್ಟು ಬೇರೆ ಯಾವುದೇ ಕಾರಣ ಇಲ್ಲ ಎಂದು ಪ್ರೊಡಕ್ಷನ್ ಹೌಸ್ ಹೇಳಿಕೆ ನೀಡಿದೆ.