ಕಾಂಗ್ರೆಸ್ ರೀತಿ ಮಹಾ ಪುರುಷರನ್ನು ನಾವು ರಾಜಕೀಯಕ್ಕೆ ಬಳಸಿಕೊಳ್ಳಲ್ಲ: ಮಾಜಿ ಸಿಎಂ ಸಿದ್ದುಗೆ ಸಿ.ಟಿ. ರವಿ ಚಾಟಿ

ಬೆಂಗಳೂರು: ಸಮಾಜ ಸುಧಾರಕ ನಾರಾಯಣ ಗುರುಗಳ ಹೆಸರಲ್ಲಿ ಬಿಜೆಪಿ ಹಾಗೂ ಕಾಂಗ್ರೆಸ್ ಪಕ್ಷಗಳ ಜಂಗೀಕುಸ್ತಿ ಜೋರಾಗಿದೆ. ನಾರಾಯಣ ಗುರುಗಳ ಸ್ತಬ್ಧಚಿತ್ರ ನಿರಾಕರಿಸಿ ಗುರುಗಳಿಗೆ ಅವಮಾನ ಮಾಡಲಾಗಿದೆ ಎಂಬ ಕಾಂಗ್ರೆಸ್ ಪಕ್ಷದ ಆರೋಪಕ್ಕೆ ಬಿಜೆಪಿ ತಿರುಗೇಟು ನೀಡಿದೆ.

ಹಿಂದೂ ಧರ್ಮದ ಸುಧಾರಕ ನಾರಾಯಣ ಗುರುಗಳ ಸ್ತಬ್ಧ ಚಿತ್ರಕ್ಕೆ ಅವಕಾಶ ನಿರಾಕರಿಸಿ ಅವಮಾನ ಮಾಡಿರುವುದು ‘ಹಿಂದೂ ಹೃದಯ ಸಾಮ್ರಾಟ’ ಎಂದು ಕರೆಸಿಕೊಳ್ಳುವ ಪ್ರಧಾನಿ ನರೇಂದ್ರ ಮೋದಿ ಅವರ ಗಮನಕ್ಕೆ ಬಂದಿಲ್ಲವೇ ಎಂದು ಭಾನುವಾರವಷ್ಟೇ ಪ್ರತಿ ಪಕ್ಷ ನಾಯಕ ಸಿದ್ದರಾಮಯ್ಯ ಸವಾಲೆಸೆದಿದ್ದರು.

‘ಶತಮಾನದ ಹಿಂದೆಯೇ ಅಸ್ಪೃಶ್ಯತೆ ಮತ್ತು ಪುರೋಹಿತ ಶಾಹಿ ವ್ಯವಸ್ಥೆ ವಿರುದ್ಧ ಸಿಡಿದೆದ್ದು ಹಿಂದೂ ಧರ್ಮದ ಸುಧಾರಣೆಗೆ ಅರ್ಪಿಸಿಕೊಂಡಿದ್ದವರು ನಾರಾಯಣ ಗುರುಗಳು. ಅಂಥವರನ್ನು ಅಪಮಾನಿಸಿರುವ ಬಿಜೆಪಿ ಮತ್ತು ಕೇಂದ್ರ ಸರಕಾರಕ್ಕೆ ಹಿಂದೂ ಧರ್ಮದ ಬಗ್ಗೆ ಮಾತನಾಡಲು ಯಾವ ನೈತಿಕತೆಯಿದೆ? ತಮ್ಮ ಮೂಗಿನಡಿಯಲ್ಲೇ ನಾರಾಯಣ ಗುರುಗಳಿಗೆ ಮಾಡಿರುವ ಅವಮಾನಕ್ಕೆ ಪ್ರಧಾನಿ ಇನ್ನೂ ಪ್ರತಿಕ್ರಿಯಿಸದಿರುವುದು ಆಶ್ಚರ್ಯಕರ. ಇದರ ಅರ್ಥವೇನು? ಈ ಅವಮಾನಕ್ಕೆ ಅವರ ಸಹಮತ ಇದೆಯೆಂದೇ?’ ಎಂದು ಸಿದ್ದರಾಮಯ್ಯ ಪ್ರಶ್ನಿಸಿದ್ದರು.

ಸಿದ್ದರಾಮಯ್ಯ ಅವರ ಈ ಸವಾಲಿಗೆ ಬಿಜೆಪಿ ನಾಯಕ ಸಿ. ಟಿ. ರವಿ ಜವಾಬು ನೀಡಿದ್ದಾರೆ. ಅಷ್ಟೇ ಅಲ್ಲ, ಕಾಂಗ್ರೆಸ್ ಪಕ್ಷಕ್ಕೆ ಟ್ವಿಟರ್‌ನಲ್ಲಿ ತಿರುಗೇಟನ್ನೂ ನೀಡಿದ್ದಾರೆ.

‘ನಮಗೆ ಸಮಾಜ ಸುಧಾರಕ ಶ್ರೀ ನಾರಾಯಣ ಗುರುಗಳು ನಿತ್ಯ ಸ್ಮರಣೀಯರು. ಅವರ ಆದರ್ಶ ನಮಗೆ ದಾರಿದೀಪ ಸಿದ್ದರಾಮಯ್ಯನವರೇ..’ ಎಂದು ಚಾಟಿ ಬೀಸಿರುವ ಸಿ. ಟಿ. ರವಿ, ಏಕಾತ್ಮತಾ ಸ್ತೋತ್ರ ಒಮ್ಮೆ ಓದಿ ಕೃತಾರ್ಥರಾಗಿ.. ಆ ಮೂಲಕವಾದರೂ ಮಹಾ ಪುರುಷರನ್ನು ಸ್ಮರಿಸಿಕೊಳ್ಳಿ ಎಂದು ತಾಕೀತು ಮಾಡಿದ್ದಾರೆ.

ನಿಮ್ಮ ಕಾಂಗ್ರೆಸ್ ಪಕ್ಷದ ರೀತಿ ನಾವು ಮಹಾ ಪುರುಷರನ್ನು ರಾಜಕೀಯಕ್ಕೆ ಬಳಸಿಕೊಳ್ಳುವುದಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿರುವ ಸಿ. ಟಿ. ರವಿ, ಸಂಘದಲ್ಲಿ ನಿತ್ಯ ಮುಂಜಾನೆಯ ಪ್ರಾರ್ಥನೆಯಲ್ಲಿ ನಡೆಸುವ ಏಕಾತ್ಮತಾ ಸ್ತೋತ್ರ ಹೇಗಿರುತ್ತದೆ, ಅದರಲ್ಲಿ ನಮ್ಮ ಭಾರತ ಭೂಮಿಯ ಮಹಾ ಪುರುಷರನ್ನು ಸ್ಮರಿಸಿ ಪ್ರಾರ್ಥಿಸುವ ಪುಸ್ತಿಕೆಯ ಕೆಳ ಸಾಲುಗಳನ್ನೊಮ್ಮೆ ನೋಡಿ ಮಾಜಿ ಮುಖ್ಯಮಂತ್ರಿಗಳಾದ ಸಿದ್ದರಾಮಯ್ಯ ಹಾಗೂ ಕುಮಾರಸ್ವಾಮಿ ಅವರೇ ಎಂದು ಸ್ತೋತ್ರವನ್ನು ಟ್ವಿಟರ್‌ನಲ್ಲಿ ಪ್ರಕಟಿಸಿದ್ದಾರೆ.

ಅಷ್ಟೇ ಅಲ್ಲ, ಪ್ರಧಾನಿ ನರೇಂದ್ರ ಮೋದಿ ಅವರು ಕೇರಳದ ಶಿವಗಿರಿಗೆ ಭೇಟಿ ನೀಡಿದ್ದ ವೇಳೆ ನಾರಾಯಣ ಗುರುಗಳ ಕುರಿತಾಗಿ ಆಡಿದ ಮಾತುಗಳ ವಿಡಿಯೋವನ್ನು ಸಿ. ಟಿ. ರವಿ ಟ್ಯಾಗ್ ಮಾಡಿದ್ದಾರೆ.

ಗಣರಾಜ್ಯೋತ್ಸವದ ಸ್ತಬ್ದ ಚಿತ್ರಗಳ ಆಯ್ಕೆ ಪ್ರಕ್ರಿಯೆ ಹೇಗೆ ನಡೆಯುತ್ತದೆ ಎಂಬ ಮಾಹಿತಿ ಸಂವಿಧಾನಿಕ ಹುದ್ದೆ ಅಲಂಕರಿಸಿ ಮಾಜಿಗಿರುವ ತಮಗೆ ಇಲ್ಲದಿರುವುದು ಖೇದಕರ ಸಿದ್ದರಾಮಯ್ಯಅವರೇ ಎಂದು ವ್ಯಂಗ್ಯವಾಡಿರುವ ಸಿ. ಟಿ. ರವಿ, ಕೇರಳ ಸರಕಾರ ಮಾಡಿದ ಎಡವಟ್ಟು ಏನೆಂದು ತಮಗೆ ತಿಳಿದಿಲ್ಲ ಎಂದಾದರೆ ತಮ್ಮ ಮಿತ್ರರಾದ ಸಿಎಂ ಪಿಣರಾಯಿ ವಿಜಯನ್ ಅವರಿಂದ ಮಾಹಿತಿ ತರಿಸಿಕೊಂಡು ತಿಳಿದುಕೊಳ್ಳಿ ಎಂದಿದ್ದಾರೆ.

ಗಣರಾಜ್ಯೋತ್ಸವ ಪರೇಡ್‌ಗೆ ನಾರಾಯಣ ಗುರುಗಳ ಟ್ಯಾಬ್ಲೋ ತಿರಸ್ಕರಿಸಿದ ಕೇಂದ್ರ! ವ್ಯಾಪಕ ಆಕ್ರೋಶ
ತಳ ಹಂತಕ್ಕೆ ಸೇರಿದ ನಮ್ಮ ಪ್ರಧಾನಿಗಳಿಗೆ ನಿಮ್ಮಿಂದ ಪ್ರಶಂಸಾ ಪತ್ರ ಬೇಕಾಗಿಲ್ಲ ಎಂದೂ ತಿರುಗೇಟು ನೀಡಿರುವ ಸಿ. ಟಿ. ರವಿ, ನಾರಾಯಣ ಗುರುಗಳ ಪ್ರತಿಮೆಗೆ ರಕ್ಷಣೆ ನೀಡಲಾಗದ ನಿಮ್ಮ ಸನ್ಮಿತ್ರ ಕಮ್ಯುನಿಸ್ಟ್ ಪಕ್ಷದ ಹಿಡನ್ ಅಜೆಂಡಾ ಏನು? ಸ್ತಬ್ಧ ಚಿತ್ರದ ಹೊಸ ವಿವಾದದ ಹಿಂದಿನ ಮಸಲತ್ತು ಏನು? ಈ ಪ್ರಶ್ನೆಗಳಿಗೆ ನಿಮ್ಮ ಬಳಿ ಉತ್ತರವಿದೆಯೇ ಎಂದೂ ಸಿದ್ದರಾಮಯ್ಯ ಅವರಿಗೆ ಸಿ. ಟಿ. ರವಿ. ಕುಟುಕಿದ್ದಾರೆ.

ನಾರಾಯಣ ಗುರುಗಳ ಸ್ತಬ್ಧಚಿತ್ರವನ್ನು ಕೇಂದ್ರದ ಗಣರಾಜ್ಯೋತ್ಸವ ಸಮಿತಿ ತಿರಸ್ಕಾರ; ಎಚ್‌ಡಿಕೆ ಆಕ್ಷೇಪ
ಏನಿದು ವಿವಾದ?: ಕೇಂದ್ರ ಸರಕಾರ ನಡೆಸುವ ಗಣ ರಾಜ್ಯೋತ್ಸವದ ಮೆರವಣಿಗೆಯಲ್ಲಿ ನಾನಾ ರಾಜ್ಯದ ಸ್ತಬ್ಧ ಚಿತ್ರಗಳು ಪ್ರದರ್ಶನಗೊಳ್ಳುತ್ತವೆ. ಆದರೆ ಈ ವರ್ಷ ಕೇರಳ ರಾಜ್ಯವು ಕಳಿಸಿದ್ದ ಸ್ತಬ್ಧ ಚಿತ್ರವು ತಿರಸ್ಕೃತಗೊಂಡಿದ್ದು ವಿವಾದ ಸೃಷ್ಟಿಯಾಗಿದೆ. ಸ್ತಬ್ಧ ಚಿತ್ರದಲ್ಲಿ ಮಹಿಳೆಯರ ಸುರಕ್ಷತೆಯ ವಿಷಯದೊಂದಿಗೆ ಜಟಾಯು ಪಕ್ಷಿಯ ಪ್ರತಿಮೆ ಮತ್ತು ನಾರಾಯಣ ಗುರು ಪ್ರತಿಮೆಯನ್ನು ಕೇರಳ ಸಿದ್ಧಪಡಿಸಿತ್ತು. ಆದರೆ, ಕೇಂದ್ರ ಸರಕಾರವು ನಾರಾಯಣ ಗುರು ಬದಲಿಗೆ ಶಂಕರಾಚಾರ್ಯರ ಮೂರ್ತಿಯನ್ನು ಬಳಸಲು ಸೂಚಿಸಿತ್ತು. ಬಳಿಕ ಕೇರಳಕ್ಕೆ ಸ್ತಬ್ಧ ಚಿತ್ರ ಪ್ರದರ್ಶನಕ್ಕೆ ಅನುಮತಿ ನಿರಾಕರಿಸಿತ್ತು ಎನ್ನಲಾಗಿದೆ.

ನಾರಾಯಣ ಗುರುವಿಗೆ ಅವಮಾನ ಆಗಿರೋದು ಮೋದಿ ಗಮನಕ್ಕೆ ಬಂದಿಲ್ಲವೇ..? ಸಿದ್ದರಾಮಯ್ಯ ಪ್ರಶ್ನೆ