ಕೊಟ್ಟ ಮಾತು ಉಳಿಸಿಕೊಂಡ ಬೊಮ್ಮಾಯಿ : ಮಳೆಯಿಂದ ಮನೆ ಕಳೆದುಕೊಂಡ ವೃದ್ದೆಗೆ ಸಿಎಂ ಆಶ್ರಯ

ಬೆಂಗಳೂರು : ಭಾರಿ ಮಳೆಯಿಂದ ಮನೆ ಕಳೆದುಕೊಂಡಿದ್ದ ಹಾವೇರಿ ಜಿಲ್ಲೆಯ ಶಿಗ್ಗಾಂವ್‌ನ ಕಮಲವ್ವ ಅವರಿಗೆ ಕೊಟ್ಟ ಮಾತಿನ ಅನುಸಾರ ಸಿಎಂ ಬಸವರಾಜ ಬೊಮ್ಮಾಯಿ ಹೊಸ ಮನೆ ಒದಗಿಸಿದ್ದಾರೆ. ಇದರಿಂದಾಗಿ ಕಮಲವ್ವ ಸಂಕ್ರಾಂತಿ ಹಬ್ಬದ ಸಂಭ್ರಮದಲ್ಲಿ ಪಾಲ್ಗೊಳ್ಳಲು ಸಾಧ್ಯವಾದಂತಾಗಿದೆ.

ಕಳೆದ ಬಾರಿ ಪ್ರವಾಹ ಬಂದಾಗ ಕಮಲವ್ವನ ಮನೆ ಕೊಚ್ಚಿ ಹೋಯಿತು. ಅದರಿಂದಾಗಿ ಗಣೇಶ ಹಬ್ಬವನ್ನೂ ಆಚರಿಸುವುದು ಕಷ್ಟವಾಯಿತು. ಈ ಬಗ್ಗೆ ಮಾಧ್ಯಮದಲ್ಲಿ ಬಂದ ವರದಿ ಗಮನಿಸಿದ ಸಿಎಂ ಬೊಮ್ಮಾಯಿ, ಮನೆ ಕಟ್ಟಿಸಿ ಕೊಡುವ ಭರವಸೆ ನೀಡಿದ್ದರು. ”ಇಬ್ಬರೂ ಗಂಡುಮಕ್ಕಳು ಸತ್ತ ಹೋಗ್ಯಾರ. ಮನಿ ಕಟ್ಟಸಿಕೊಡ್ರಿ ಸಾಹೇಬ್ರ,” ಎಂದು ಗದ್ಗದಿತಳಾಗಿ ಕಮಲವ್ವ ಕೇಳಿಕೊಂಡಿದ್ದರು.

ಆಗ ಸಾಂತ್ವನ ಹೇಳಿದ್ದ ಸಿಎಂ ಬೊಮ್ಮಾಯಿ, ಆದಷ್ಟು ಬೇಗ ಮನೆ ಕಟ್ಟಿಸಿ ಕೊಡುವುದಾಗಿ ಹೇಳಿದ್ದರು. ಕಮಲವ್ವ ಸಿಎಂ ಸ್ವಕ್ಷೇತ್ರ ಶಿಗ್ಗಾಂವ್‌ನ ಮಂಚಿಕೊಪ್ಪ ಗ್ರಾಮದವರು. ಸಿಎಂ ಸೂಚನೆಯಂತೆ 4 ತಿಂಗಳಲ್ಲಿ ಮನೆ ನಿರ್ಮಿಸಿದ ಜಿಲ್ಲಾಡಳಿತ ಕಮಲವ್ವ ಅವರಿಗೆ ಹಸ್ತಾಂತರಿಸಿದೆ. ಹ್ಯಾಬಿಟ್ಯಾಟ್‌ ಸೆಂಟರ್‌ ಮೂಲಕ ನಿರ್ಮಿಸಲಾದ ಸುಸಜ್ಜಿತ ಮನೆಯನ್ನು ಸವಣೂರ ಉಪ ವಿಭಾಗಾಧಿಕಾರಿ ಅನ್ನಪೂರ್ಣ ಮುದಕಮ್ಮನವರ ಅವರು ಹಸ್ತಾಂತರಿಸಿದರು. ಸಂಕ್ರಾಂತಿಯಂದು ಕಮಲವ್ವನಿಗೆ ಮನೆಯನ್ನು ಹಸ್ತಾಂತರಿಸಿದ್ದಾರೆ.