ಯಾವ ಧಾರಾವಾಹಿ ವೀಕ್ಷಕರಿಂದ ಛೀ..ಥೂ ಅನಿಸಿಕೊಂಡಿತ್ತೋ, ಅದೇ ಧಾರಾವಾಹಿ ಮೈಲಿಗಲ್ಲು ಸೃಷ್ಟಿಸಿದೆ

ಎಂದಿನಂತೆ ವಾರದ ಟಿಆರ್‌ಪಿ ಹೊರಬಿದ್ದಿದೆ. ಯಾವ ಸೀರಿಯಲ್‌ಗೆ ಯಾವ ಸ್ಥಾನ ಸಿಕ್ಕಿದೆ ಎಂದು ಗೊತ್ತಾಗಿದೆ. ಇದರಲ್ಲಿ ಏನು ವಿಶೇಷ ಅನಿಸಬಹುದು. ಹೌದು, ಯಾವ ಧಾರಾವಾಹಿಯ ಚಿತ್ರಕಥೆ ಚೆನ್ನಾಗಿಲ್ಲ, ಹೀರೋ ಬದಲಾಯಿಸಿ, ಧಾರಾವಾಹಿ ನೋಡೋಕೆ ಆಗ್ತಿಲ್ಲ ಎಂದು ಪ್ರೇಕ್ಷಕರು ಸಾಕಷ್ಟು ದೂರು ಕೊಟ್ಟ ನಂತರದಲ್ಲಿ, ಅದೇ ಸೀರಿಯಲ್‌ ಟಾಪ್ 2 ಸ್ಥಾನದಲ್ಲಿದ್ದರೆ ಏನು ಹೇಳೋಣ?

ವೀಕ್ಷಕರ ದೂರು ಏನಾಗಿತ್ತು?
ghum hai kisikey pyaar meiin ಧಾರಾವಾಹಿಯಲ್ಲಿ ವಿರಾಟ್ ಪಾತ್ರ ತುಂಬ ಬೋರು ಹೊಡಿಸುತ್ತಿದೆ. ಕೊಟ್ಟ ಮಾತಿನಂತೆ ಆತ ಎಂದೂ ನಡೆದುಕೊಳ್ಳೋದಿಲ್ಲ, ಸದಾ ನಾಯಕಿ ಸಯಿ ಕಣ್ಣಲ್ಲಿ ನೀರು ತರಿಸುತ್ತಾನೆ ಎಂದು ವೀಕ್ಷಕರು ಬೇಸರ ಮಾಡಿಕೊಂಡಿದ್ದರು. ಬೇಸರ ಹೊಡೆಸುವ ಈ ಜೊಳ್ಳು ಜೊಳ್ಳಾದ ಚಿತ್ರಕಥೆಯೂ ಬೇಡ, ಸದಾ ಅಳುತ್ತ, ಸತ್ಯ ಹೇಳಲಾಗದ ಹೀರೋ ಕೂಡ ನಮಗೆ ಬೇಡ ಎಂದು ವೀಕ್ಷಕರು ದೂರು ನೀಡಿದ್ದರು. ಈಗ ಅದೇ ಸೀರಿಯಲ್‌ ಬಾಲಿವುಡ್‌ನ ಟಾಪ್ 2 ಸ್ಥಾನದಲ್ಲಿ ಒಂದಾಗಿದೆ.

ಧಾರಾವಾಹಿ ಬ್ಯಾನ್ ಮಾಡುವಂತೆ ಆಗ್ರಹ ಮಾಡಲಾಗಿತ್ತು
ಟ್ರೋಲ್ ಮಾಡುವ, ಸದಾ ನೆಗೆಟಿವ್ ಪ್ರತಿಕ್ರಿಯೆ ಪಡೆಯುವ ಸೀರಿಯಲ್‌ಗೆ ಒಳ್ಳೆಯ ಟಿಆರ್‌ಪಿ ಸಿಕ್ಕಿದೆ. ಜನರು ಯಾವ ಸೀರಿಯಲ್ ಬಗ್ಗೆ ಹೆಚ್ಚು ನೆಗೆಟಿವ್ ಮಾತನಾಡುತ್ತಾರೋ ಅದೇ ಸೀರಿಯಲ್‌ ಹೆಚ್ಚೆಚ್ಚು ನೋಡುತ್ತಾರೆ ಅಂತಾಯ್ತು. ಈ ಹಿಂದೆ ಮೈದುನ ಅತ್ತಿಗೆಗೆ ಊಟ ಮಾಡಿಸಲಿ ಎಂದು ಚಿತ್ರಕಥೆಯಲ್ಲಿ ಇದೆ ಎಂದು ghum hai kisikey pyaar meiin ಧಾರಾವಾಹಿ ಬ್ಯಾನ್ ಮಾಡುವಂತೆ ಒತ್ತಾಯ ಮಾಡಲಾಯ್ತು. ಈ ಸೀರಿಯಲ್‌ನಲ್ಲಿ ನೀಲ್ ಭಟ್, ಆಯೇಷಾ ಸಿಂಗ್ ಅಭಿನಯಿಸುತ್ತಿದ್ದಾರೆ.

‘ದಯವಿಟ್ಟು ಹೀರೋ ಬದಲಾಯಿಸಿ, ಧಾರಾವಾಹಿ ಉಳಿಸಿ’ ಎಂದು ಬೇಡಿಕೆಯಿಟ್ಟ ಪ್ರೇಕ್ಷಕರು

ಲಾಜಿಕ್ ಇಲ್ಲದ, ಸತ್ಯಕ್ಕೆ ದೂರವಾದ ಕಥೆ, ಚಿತ್ರಕಥೆಯೇ ಇಷ್ಟ
ಇದು ಕೇವಲ ಹಿಂದಿ ಮಾತ್ರವಲ್ಲದೆ, ಕನ್ನಡದಲ್ಲಿ ಯಾವ ಧಾರಾವಾಹಿಯನ್ನು ಟ್ರೋಲ್ ಮಾಡಲಾಯ್ತೋ, ನೆಗೆಟಿವ್ ಕಾಮೆಂಟ್ಸ್ ಹೇಳಲಾಯ್ತೋ ಆ ಧಾರಾವಾಹಿಯನ್ನು ಜನರು ಹೆಚ್ಚು ವೀಕ್ಷಣೆ ಮಾಡಿ ಉತ್ತಮ ಟಿಆರ್‌ಪಿ ತಂದುಕೊಟ್ಟಿದ್ದಾರೆ. ಜನರಿಗೆ ಇಷ್ಟವಾಗುತ್ತಿದೆ ಎನ್ನುವ ಕಾರಣಕ್ಕೆ ವಾಸ್ತವ, ಸತ್ಯಕ್ಕೆ ದೂರ ಎನಿಸುವ, ಲಾಜಿಕ್ ಇಲ್ಲದ ಚಿತ್ರಕಥೆಯನ್ನು ಧಾರಾವಾಹಿ ತಂಡ ಕೂಡ ಹೆಣೆಯುತ್ತದೆ. ಜನರು ಏನು ನೋಡಬೇಕು, ನೋಡುತ್ತಿದ್ದೇವೆ ಎಂದು ಅವರೇ ಬಯಸಿದಾಗ ಧಾರಾವಾಹಿ ತಂಡವಾದರೂ ಏನು ಮಾಡಲು ಸಾಧ್ಯ? ಅಲ್ಲವೇ!

‘ಅತ್ತಿಗೆಗೆ ಮೈದುನ ಊಟ ಮಾಡಿಸಲಿ’ ಎಂದು ಹೇಳಿದ್ದಕ್ಕೆ ಧಾರಾವಾಹಿ ಬ್ಯಾನ್ ಮಾಡಿ ಎಂದ ನೆಟ್ಟಿಗರು!

ವೀಕ್ಷಕರು ಹೆಚ್ಚು ಏನು ನೋಡುತ್ತಾರೆ?
ಉತ್ತಮ ಸಂದೇಶ ನೀಡುವ, ಪ್ರಾಯೋಗಿಕವಾದ ಧಾರಾವಾಹಿಗಳಿಗೆ ಟಿರ್‌ಪಿ ಕಡಿಮೆ ಬಂದ ಸಾಕಷ್ಟು ಉದಾಹರಣೆಗಳು ಎಲ್ಲ ಭಾಷೆಯ ಕಿರುತೆರೆಯಲ್ಲಿಯೂ ಸಿಗುತ್ತದೆ. ಕಂಟೆಂಟ್ ಇರುವ ಧಾರಾವಾಹಿ ನೋಡುವುದಕ್ಕಿಂತ ಅತ್ತೆ, ಸೊಸೆ ಜಗಳ, ಗಂಡ, ಹೆಂಡತಿ ನಡುವಿನ ಭಿನ್ನಾಭಿಪ್ರಾಯ, ಒಂದು ಸುಂದರ ಸಂಸಾರಕ್ಕೆ ಹುಳಿ ಹಿಂಡುವ ಹೆಂಗಸಿನ ಕುರಿತು ಕಥೆ ಇದ್ದರೆ ಆ ಧಾರಾವಾಹಿ ನೋಡುಗರ ಸಂಖ್ಯೆ ಜಾಸ್ತಿ ಎನ್ನಬಹುದು. ಅದರಲ್ಲಿಯೂ ಇತ್ತೀಚೆಗೆ ಸಿನಿಮಾದಲ್ಲಿ ಇರುವಂತೆ ಅತಿಯಾದ ರೊಮ್ಯಾನ್ಸ್, ಅದ್ದೂರಿತನ ಕೂಡ ಧಾರಾವಾಹಿ ತಂಡ ಸೇರಿಕೊಂಡಿದೆ.