ಟೆಸ್ಟ್‌ ಬೌಲರ್ಸ್‌ ರ‍್ಯಾಂಕಿಂಗ್‌: ಜೀವನ ಶ್ರೇಷ್ಠ ಸಾಧನೆ ಮೆರೆದ ಜೇಮಿಸನ್‌!

ದುಬೈ: ಇತ್ತೀಚೆಗೆ ಆತಿಥೇಯ ನ್ಯೂಜಿಲೆಂಡ್‌ ಮತ್ತು ಬಾಂಗ್ಲಾದೇಶ ನಡುವಣ ಟೆಸ್ಟ್‌ ಕ್ರಿಕೆಟ್‌ ಸರಣಿ ಅಂತ್ಯಗೊಂಡಿದ್ದು, ಇದರ ಬೆನ್ನಲ್ಲೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್‌ (ಐಸಿಸಿ) ನೂತನ ಟೆಸ್ಟ್‌ ರ‍್ಯಾಂಕಿಂಗ್‌ ಪ್ರಕಟ ಮಾಡಿದೆ.

ಕಿವೀಸ್‌ ತಂಡದ ಯುವ ವೇಗದ ಬೌಲರ್‌ ಕೈಲ್‌ ಜೇಮಿಸನ್‌, ಟೆಸ್ಟ್‌ ಕ್ರಿಕೆಟ್‌ ವೃತ್ತಿಬದುಕಿನ ಶ್ರೇಷ್ಠ ಸಾಧನೆ ಮೆರೆದಿದ್ದು ಬರೋಬ್ಬರಿ 8 ಸ್ಥಾನ ಮೇಲೇರುವ ಮೂಲಕ ಬೌಲರ್‌ಗಳ ಪಟ್ಟಿಯಲ್ಲಿ ಮೂರನೇ ರ‍್ಯಾಂಕ್‌ ಗಳಿಸಿದ್ದಾರೆ. ಐಸಿಸಿ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಭಾಗವಾಗಿ ನಡೆದ 2 ಪಂದ್ಯಗಳ ಟೆಸ್ಟ್‌ ಕ್ರಿಕೆಟ್‌ ಸರಣಿಯಲ್ಲಿ ನ್ಯೂಜಿಲೆಂಡ್‌ ಎದುರು ಬಾಂಗ್ಲಾದೇಶ 1-1 ಅಂತರದ ಸಮಬಲ ಸಾಧಿಸಿತ್ತು.

ಬಾಂಗ್ಲಾ ವಿರುದ್ಧದ ಟೆಸ್ಟ್‌ ಸರಣಿಯಲ್ಲಿ 27 ವರ್ಷದ ಬಲಗೈ ವೇಗಿ ಒಟ್ಟು 8 ವಿಕೆಟ್‌ಗಳನ್ನು ಪಡೆದರು. ಕ್ರೀಸ್ಟ್‌ಚರ್ಚ್‌ನಲ್ಲಿ ನಡೆದ ಎರಡನೇ ಟೆಸ್ಟ್‌ನಲ್ಲಿ ಕೈಲ್‌ ಒಟ್ಟು 6 ವಿಕೆಟ್‌ ಕಿತ್ತು ಮಿಂಚಿದ್ದರು. ಇನ್ನು ಟೆಸ್ಟ್‌ ರ‍್ಯಾಂಕಿಂಗ್‌ ರೇಟಿಂಗ್‌ನಲ್ಲಿ 825 ಅಂಕಗಳನ್ನು ಪಡೆದ 5ನೇ ಕಿವೀಸ್‌ ಬೌಲರ್‌ ಎನಿಸಿದ್ದಾರೆ.

79 ರನ್‌ ಗಳಿಸಿದ ಕೊಹ್ಲಿ, ಅಹಂಕಾರ ಬಿಟ್ಟು ಬ್ಯಾಟ್‌ ಮಾಡಿದ್ದಾರೆ: ಗಂಭೀರ್‌!

ಇದಕ್ಕೂ ಮುನ್ನ ರಿಚರ್ಡ್‌ ಹ್ಯಾಡ್ಲೀ (909, 1985ರ ನವೆಂಬರ್‌), ನೇಯ್ಲ್‌ ವ್ಯಾಗ್ನರ್‌ (859, 2019ರ ಡಿಸೆಂಬರ್‌), ಟಿಮ್‌ ಸೌಥೀ (839, 2021 ನವೆಂಬರ್‌) ಮತ್ತು ಟ್ರೆಂಟ್‌ ಬೌಲ್ಟ್‌ (825, 2015ರ ಮೇ) ಈ ಸಾಧನೆ ಮಾಡಿದ ಕಿವೀಸ್‌ ಬೌಲರ್‌ಗಳಾಗಿದ್ದಾರೆ.

ಇತ್ತೀಚೆಗಷ್ಟೇ ಟೆಸ್ಟ್‌ ಕ್ರಿಕೆಟ್‌ನಲ್ಲಿ 300 ವಿಕೆಟ್‌ಗಳ ಸಾಧನೆ ಮೆರೆದ ಎಡಗೈ ವೇಗಿ ಟ್ರೆಂಟ್‌ ಬೌಲ್ಟ್‌ ಕೂಡ ಬೌಲರ್‌ಗಳ ಟೆಸ್ಟ್‌ ರ‍್ಯಾಂಕಿಂಗ್‌ ಪಟ್ಟಿಯಲ್ಲಿ ಮೂರು ಸ್ಥಾನ ಮೇಲೇರಿ 12 ರ‍್ಯಾಂಕಿಂಗ್‌ ಪಡೆದಿದ್ದಾರೆ. ಬಾಂಗ್ಲಾ ವಿರುದ್ಧದ ಸರಣಿಯಲ್ಲಿ ಅವರು ಒಟ್ಟು 9 ವಿಕೆಟ್‌ಗಳನ್ನು ಪಡೆದಿದ್ದರು.

ಮಾರ್ನಸ್‌ ಲಾಬುಶೇನ್‌ಗೆ ಅಗ್ರಸ್ಥಾನ
ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್‌ ಸರಣಿಯ ಎರಡನೇ ಪಂದ್ಯದಲ್ಲಿ 267 ರನ್‌ ಬಾರಿಸಿದ ಕಿವೀಸ್‌ ತಂಡದ ಹಂಗಾಮಿ ನಾಯಕ ಟಾಮ್‌ ಲೇಥಮ್‌ 2 ಸ್ಥಾನ ಸುಧಾರಿಸಿ 11ನೇ ರ‍್ಯಾಂಕಿಂಗ್‌ ಪಡೆದಿದ್ದಾರೆ. ಬ್ಯಾಟ್ಸ್‌ಮನ್‌ಗಳ ಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಆಸ್ಟ್ರೇಲಿಯಾ ತಂಡದ ಯುವ ತಾರೆ ಮಾರ್ನಸ್‌ ಲಾಬುಶೇನ್‌ ಪಡೆದಿದ್ದಾರೆ.

ಶಮಿಗೆ ಪದೇ-ಪದೆ ವಾರ್ನಿಂಗ್‌ ಕೊಡುತ್ತಿದ್ದ ಅಂಪೈರ್‌ ವಿರುದ್ಧ ಕೊಹ್ಲಿ ಗರಂ!

ಬಾಂಗ್ಲಾ ವಿರುದ್ಧದ ಸರಣಿಯ ಎರಡೂ ಪಂದ್ಯಗಳಲ್ಲಿ ಶತಕ ಬಾರಿಸಿದ ಎಡಗೈ ಬ್ಯಾಟ್ಸ್‌ಮನ್‌ ಡೆವೋನ್‌ ಕಾನ್ವೇ 18 ಸ್ಥಾನ ಮೇಲೇರಿ 29ನೇ ರ‍್ಯಾಂಕ್‌ ಪಡೆದಿದ್ದಾರೆ. ನಿವೃತ್ತಿ ಘೋಷಿಸಿರುವ ಅನುಭವಿ ಬ್ಯಾಟ್ಸ್‌ಮನ್‌ ರಾಸ್‌ ಟೇಲರ್‌ 28ನೇ ಸ್ಥಾನದಲ್ಲಿ ಅಭಿಯಾನ ಅಂತ್ಯಗೊಳಿಸಿದ್ದಾರೆ. ಟೇಲರ್‌, 2013ರಲ್ಲಿ ಜೀವನ ಶ್ರೇಷ್ಠ ಸಾಧನೆಯಾಗಿ 871 ರೇಟಿಂಗ್‌ನೊಂದಿಗೆ 4ನೇ ರ‍್ಯಾಂಕ್‌ ಹೊಂದಿದ್ದರು.

ದ್ವಿತೀಯ ಟೆಸ್ಟ್‌ನ ಎರಡನೇ ಇನಿಂಗ್ಸ್‌ನಲ್ಲಿ ಹೋರಾಟದ ಶತಕ ಬಾರಿಸಿದ ಬಾಂಗ್ಲಾದೇಶದ ಬ್ಯಾಟ್ಸ್‌ಮನ್‌ ಲಿಟನ್‌ ದಾಸ್‌ ಜೀವಮಾನದ ಶ್ರೇಷ್ಠ ಸಾಧನೆಯಾಗಿ 15ನೇ ರ‍್ಯಾಂಕ್‌ ಗಳಿಸಿದ್ದಾರೆ. ಬಾಂಗ್ಲಾ ನಾಯಕ ಮೊನಿನುಲ್‌ ಹಕ್‌ (37ನೇ ರ‍್ಯಾಂಕ್‌) ಮತ್ತು ನಜ್ಮುಲ್‌ ಹೊಸೇನ್‌ (87ನೇ ರ‍್ಯಾಂಕ್‌) ತಮ್ಮ ಸ್ಥಾನಗಳಲ್ಲಿ ಭಾರಿ ಸುಧಾರಣೆ ತಂದುಕೊಂಡಿದ್ದಾರೆ.

ನೂತನ ಐಸಿಸಿ ಟೆಸ್ಟ್‌ ಬೌಲರ್ಸ್‌ ರ‍್ಯಾಂಕಿಂಗ್‌ ಪಟ್ಟಿ
1. ಪ್ಯಾಟ್‌ ಕಮಿನ್ಸ್‌ (ಆಸ್ಟ್ರೇಲಿಯಾ): 895 ರೇಟಿಂಗ್‌
2. ಆರ್‌ ಅಶ್ವಿನ್‌ (ಭಾರತ): 861 ರೇಟಿಂಗ್‌
3. ಕೈಲ್‌ ಜೇಮಿಸನ್‌ (ನ್ಯೂಜಿಲೆಂಡ್‌): 825 ರೇಟಿಂಗ್‌
4. ಶಾಹೀನ್‌ ಶಾ ಅಫ್ರಿದಿ (ಪಾಕಿಸ್ತಾನ): 822 ರೇಟಿಂಗ್‌
5. ಕಗಿಸೊ ಬರಬಾಡ (ದಕ್ಷಿಣ ಆಫ್ರಿಕಾ): 810 ರೇಟಿಂಗ್‌
6. ಜೇಮ್ಸ್‌ ಆಂಡರ್ಸನ್‌ (ಇಂಗ್ಲೆಂಡ್‌): 796 ರೇಟಿಂಗ್‌
7. ಟಿಮ್‌ ಸೌಥೀ (ನ್ಯೂಜಿಲೆಂಡ್‌): 795 ರೇಟಿಂಗ್‌
8. ಜಾಶ್‌ ಹೇಝಲ್‌ವುಡ್‌ (ಆಸ್ಟ್ರೇಲಿಯಾ): 794 ರೇಟಿಂಗ್‌
9. ನೇಯ್ಲ್‌ ವ್ಯಾಗ್ನರ್‌ (ನ್ಯೂಜಿಲೆಂಡ್‌): 775 ರೇಟಿಂಗ್‌
10. ಹಸನ್‌ ಅಲಿ (ಪಾಕಿಸ್ತಾನ): 760 ರೇಟಿಂಗ್‌