ಹೈಲೈಟ್ಸ್‌:
- ಪಂಚ ರಾಜ್ಯ ಚುನಾವಣೆಗೆ 5 ಲಕ್ಷ ಇಂಕ್‌ ಬಾಟಲ್‌
- ಮೈಸೂರು ಅರಗು ಮತ್ತು ಬಣ್ಣದ ಕಾರ್ಖಾನೆಗೆ 8.96 ಕೋಟಿ ರೂ. ವಹಿವಾಟು
- ಸಾರ್ವತ್ರಿಕ ಚುನಾವಣೆ ಇಲ್ಲದೆ ಸೊರಗಿದ ಸಂಸ್ಥೆಗೆ ಉತ್ತಮ ಆದಾಯ
ಮೈಸೂರು : ಪಂಚ ರಾಜ್ಯ ಚುನಾವಣೆಗೆ ಅಳಿಸಲಾಗದ ಶಾಯಿ ಪೂರೈಸಿದ ಮೈಸೂರು ಅರಗು ಮತ್ತು ಬಣ್ಣದ ಕಾರ್ಖಾನೆಗೆ (ಮೈಲ್ಯಾಕ್‌)ಆದಾಯ ದುಪ್ಪಟ್ಟಾಗಿದೆ. ಕಳೆದ ಎಂಟು ತಿಂಗಳಲ್ಲಿ ಕೇವಲ 6 ಕೋಟಿ ರೂ. ವರೆಗೆ ವಹಿವಾಟು ನಡೆಸಿದ್ದ ಮೈಲ್ಯಾಕ್‌, ದೇಶದಲ್ಲಿ ನಡೆಯಲಿರುವ ಪಂಚ ರಾಜ್ಯ ಚುನಾವಣೆಗೆ ಐದು ಲಕ್ಷಕ್ಕೂ ಹೆಚ್ಚು ಇಂಕ್‌ ಬಾಟಲ್‌ಗಳನ್ನು(ಅಳಿಸಲಾಗದ ಶಾಯಿ)ಪೂರೈಕೆ ಮಾಡಿ ಬರೋಬ್ಬರಿ 8.96 ಕೋಟಿ ರೂ. ವಹಿವಾಟು ನಡೆಸಿದೆ. ವರ್ಷಾಂತ್ಯದ ವೇಳೆಗೆ 15 ಕೋಟಿ ರೂ. ವ್ಯಾಪಾರ ವಹಿವಾಟು ನಡೆಸುವಲ್ಲಿ ಯಶಸ್ವಿಯಾಗಿದೆ.
ಕಳೆದ ವರ್ಷದ ಯಾವುದೇ ಸಾರ್ವತ್ರಿಕ ಚುನಾವಣೆ ನಡೆಯದ ಹಿನ್ನೆಲೆಯಲ್ಲಿ ಶಾಯಿ ಉತ್ಪಾದನೆ ಪ್ರಮಾಣ ಕಡಿಮೆ ಇತ್ತು. ಕರ್ನಾಟಕ ಸೇರಿದಂತೆ ನೆರೆ ರಾಜ್ಯಗಳ ಸ್ಥಳೀಯ ಸಂಸ್ಥೆ ಚುನಾವಣೆ ಮತ್ತು ಉಪ ಚುನಾವಣೆಗೆ ಕೇವಲ 6 ಕೋಟಿ ರೂ. ಮೌಲ್ಯದ ಇಂಕು ಉತ್ಪಾದಿಸಿ ಪೂರೈಕೆ ಮಾಡಿತ್ತು. ಈ ಪಂಚ ರಾಜ್ಯದ ಚುನಾವಣೆ ಒಂದೇ ಬಾರಿ ವ್ಯಾಪಾರ ವಹಿವಾಟು ದುಪ್ಪಟ್ಟುಗೊಳಿಸಿದೆ.
ಕೇಂದ್ರ ಚುನಾವಣಾ ಆಯೋಗದ ನಿರ್ದೇಶನದಂತೆ ಕಳೆದ ಡಿಸೆಂಬರ್‌ನಲ್ಲಿಯೇ ಉತ್ಪಾದನೆ ಆರಂಭಿಸಿದ ಮೈಲ್ಯಾಕ್‌, ಒಂದು ತಿಂಗಳ ಅವಧಿಯಲ್ಲಿ 5,04,400 ಬಾಟಲ್‌ನಷ್ಟು ಅಳಿಸಲಾಗದ ಶಾಯಿ ಉತ್ಪಾದನೆ ಮಾಡಿದ್ದು, ಆಯಾ ರಾಜ್ಯಗಳಿಗೆ ಪೂರೈಕೆ ಮಾಡುವಲ್ಲಿ ನಿರತವಾಗಿದೆ.
ಪಂಚ ರಾಜ್ಯ ಚುನಾವಣೆ ಘೋಷಣೆ, ಉ. ಪ್ರದೇಶದಲ್ಲಿ 7 ಹಂತಗಳಲ್ಲಿ ಮತದಾನ, ಮಾರ್ಚ್‌ 10ಕ್ಕೆ ಫಲಿತಾಂಶ
ಈಗಾಗಲೇ ಗೋವಾ, ಮಣಿಪುರ ಮತ್ತು ಪಂಜಾಬ್‌ ರಾಜ್ಯಗಳಿಗೆ ಪೂರೈಕೆ ಮಾಡಿದ್ದು, ಉತ್ತರ ಪ್ರದೇಶಕ್ಕೆ ಶೇ.50 ರಷ್ಟು ಪೂರೈಕೆ ಮಾಡಿದೆ. ಇನ್ನೊಂದು ವಾರದಲ್ಲಿಉತ್ತರಾಖಂಡ್‌ ಮತ್ತು ಉತ್ತರ ಪ್ರದೇಶಕ್ಕೆ ಪೂರ್ತಿ ಪ್ರಮಾಣದಲ್ಲಿ ಅಳಿಸಲಾಗದ ಶಾಯಿ ಪೂರೈಕೆಯಾಗಲಿದೆ. ಐದು ರಾಜ್ಯಗಳ ಚುನಾವಣೆಯಲ್ಲಿ 18.43 ಕೋಟಿ ಮಂದಿ ಮತದಾನ ಮಾಡಲಿದ್ದು, ಅದರಲ್ಲಿ8.88 ಕೋಟಿ ಮಹಿಳೆಯರಿದ್ದಾರೆ. ಅತಿ ಹೆಚ್ಚು ಮತದಾರರಿರುವ ರಾಜ್ಯ ಉತ್ತರ ಪ್ರದೇಶಕ್ಕೆ ಹೆಚ್ಚಿನ ಪ್ರಮಾಣದಲ್ಲಿಅಳಿಸಲಾಗದ ಶಾಯಿ ಪೂರೈಕೆಯಾಗುತ್ತಿದೆ ಎನ್ನುತ್ತಾರೆ ಮೈಲ್ಯಾಕ್‌ ಅಧ್ಯಕ್ಷ ಎನ್‌.ವಿ.ಫಣೀಶ್‌.
ಕರ್ನಾಟಕ ಸೇರಿದಂತೆ ತಮಿಳುನಾಡು, ರಾಜಸ್ಥಾನ, ಮಧ್ಯಪ್ರದೇಶದಲ್ಲಿ ನಡೆದ ಸ್ಥಳೀಯ ಸಂಸ್ಥೆ ಚುನಾವಣೆ ಮತ್ತು ಉಪ ಚುನಾವಣೆಯೊಂದಿಗೆ ಮಲೇಷಿಯಾಗೂ ಅಳಿಸಲಾಗದ ಶಾಯಿ ಪೂರೈಕೆ ಮಾಡಲಾಗಿತ್ತು. ಚುನಾವಣೆಗೆ 5 ಮತ್ತು 10 ಸಿಸಿ ಬಾಟಲ್‌ನಲ್ಲಿ ಇಂಕು ಪೂರೈಕೆ ಮಾಡಲಿದ್ದು, ಈ ಪಂಚ ರಾಜ್ಯದ ಚುನಾವಣೆಗೆ 10 ಸಿಸಿ ಬಾಟಲ್‌ನಲ್ಲಿ ಇಂಕು ಪೂರೈಕೆ ಮಾಡಿದೆ. ಈ 10 ಸಿಸಿ ಬಾಟಲ್‌ನಲ್ಲಿ ಕನಿಷ್ಠ ಸಾವಿರ ಮಂದಿಗೆ ಅಳಿಸಲಾಗದ ಶಾಯಿ ಬಳಕೆ ಮಾಡಬಹುದಾಗಿದೆ.
ಯಾವ್ಯಾವ ರಾಜ್ಯಕ್ಕೆ ಎಷ್ಟೆಷ್ಟು ?
ಉತ್ತರ ಪ್ರದೇಶ: 4 ಲಕ್ಷ ಬಾಟಲ್‌
ಪಂಜಾಬ್‌: 62000 ಬಾಟಲ್‌
ಉತ್ತರಾಖಂಡ್‌: 30000 ಬಾಟಲ್‌
ಗೋವಾ: 5000 ಬಾಟಲ್‌
ಮಣಿಪುರ್‌: 7400 ಬಾಟಲ್‌
ಮೈಸೂರು: ಗ್ರಾಪಂ ಚುನಾವಣೆಗೆ ಮೈಲ್ಯಾಕ್‌ ಇಂಕ್‌..! 99 ಸಾವಿರ ಬಾಟಲ್‌ಗಳಿಗೆ ಆಯೋಗ ಬೇಡಿಕೆ
ಕೇಂದ್ರ ಚುನಾವಣಾ ಆಯೋಗದ ಆದೇಶದಂತೆ ಪಂಚ ರಾಜ್ಯಗಳ ಚುನಾವಣೆಗೆ ಅಗತ್ಯವಾದ ಅಳಿಸಲಾಗದ ಶಾಯಿಯನ್ನು ಮೈಲ್ಯಾಕ್‌ನಲ್ಲಿ ಉತ್ಪಾದನೆ ಮಾಡಿ ಪೂರೈಕೆ ಮಾಡಲಾಗುತ್ತಿದೆ. ಇದರಿಂದ 8.96 ಕೋಟಿ ರೂ. ವಹಿವಾಟು ನಡೆಸಲಾಗಿದೆ.
-ಎನ್‌.ವಿ.ಫಣೀಶ್‌, ಅಧ್ಯಕ್ಷರು, ಮೈಲ್ಯಾಕ್‌
Read more
[wpas_products keywords=”deal of the day sale today offer all”]