ಸರಕಾರಿ ಶಾಲೆಗಳಲ್ಲಿ ಹೆಚ್ಚುತ್ತಿದೆ ಕಂಪ್ಯೂಟರ್‌ ಕಳವು ಪ್ರಕರಣ: ಕಡಿವಾಣ ಹಾಕಲು ಹೊಸ ಯೋಜನೆ..!

ಗಂಗಾಧರ ಬಂಡಿಹಾಳ
ಕೊಪ್ಪಳ: ಸರಕಾರಿ ಶಾಲೆಗಳಲ್ಲಿ ನಡೆಯುತ್ತಿರುವ ಕಂಪ್ಯೂಟರ್‌ ಕಳ್ಳತನಕ್ಕೆ ಬ್ರೇಕ್‌ ಹಾಕಲು ಪೊಲೀಸ್‌ ಇಲಾಖೆ ಯೋಜನೆ ರೂಪಿಸಿದೆ.

ಸರಕಾರಿ ಶಾಲೆಗಳಲ್ಲಿ ವಿದ್ಯಾರ್ಥಿಗಳ ಕಲಿಕೆಗೆ ನೆರವಾಗುವ ಉದ್ದೇಶದಿಂದ ಲಕ್ಷಾಂತರ ರೂ. ವ್ಯಯಿಸಿ ಕಂಪ್ಯೂಟರ್‌ ಪೂರೈಸುತ್ತಿದೆ. ಇತ್ತೀಚೆಗೆ ಕಂಪ್ಯೂಟರ್‌ ಕಳ್ಳತನ ಪ್ರಕರಣಗಳು ವರದಿಯಾಗುತ್ತಿರುವುದು ಪೊಲೀಸ್‌ ಇಲಾಖೆಯನ್ನು ನಿದ್ದೆಗೆಡಿಸಿದೆ. ಗಂಗಾವತಿ, ಕುಷ್ಟಗಿ ತಾಲೂಕಿನಲ್ಲಿ ತಲಾ ಎರಡು ಶಾಲೆಗಳಲ್ಲಿ ಕಂಪ್ಯೂಟರ್‌ ಕಳ್ಳತನ ಪ್ರಕರಣ ವರದಿಯಾಗಿವೆ. ಇನ್ನೂ ಕೆಲವೆಡೆ ಕಳ್ಳತನ ನಡೆದಿದ್ದು, ಕಂಪ್ಯೂಟರ್‌ ಕಳ್ಳತನಕ್ಕೆ ಬ್ರೇಕ್‌ ಹಾಕಲು ಪೊಲೀಸ್‌ ಇಲಾಖೆ ಯೋಜನೆ ರೂಪಿಸಿದೆ.

ಕೊಪ್ಪಳ ತಾಲೂಕಿನ ಸುಮಾರು 30 ಸರಕಾರಿ ಪ್ರೌಢ ಶಾಲೆಗಳ ವ್ಯಾಪ್ತಿಯಲ್ಲಿ ಪ್ರಾಯೋಗಿಕವಾಗಿ ಕೈಗೊಳ್ಳಲು ಗ್ರಾಮೀಣ ಪೊಲೀಸ್‌ ಠಾಣೆಯ ಸಿಪಿಐ ವಿಶ್ವನಾಥ್‌ ಹಿರೇಗೌಡರ್‌ ಮುಂದಾಗಿದ್ದಾರೆ. ಈಗಾಗಲೇ ಸಾರ್ವಜನಿಕ ಶಿಕ್ಷಣ ಇಲಾಖೆಯ ಅಧಿಕಾರಿಗಳ ಜತೆಗೆ ಚರ್ಚಿಸಿದ್ದು, ಇಲಾಖೆಯ ಅಧಿಕಾರಿಗಳು ಹಸಿರು ನಿಶಾನೆ ತೋರಿಸಿದ್ದಾರೆ.

ಯೋಜನೆ: ಒಂದೊಂದು ಶಾಲೆಗಳಲ್ಲಿ ಸುಮಾರು 10 ಕ್ಕೂ ಅಧಿಕ ಕಂಪ್ಯೂಟರ್‌ಗಳಿದ್ದು, ಒಂದು ಕಂಪ್ಯೂಟರ್‌ಗೆ ಸುಮಾರು 30 ರಿಂದ 40 ಸಾವಿರ ರೂ. ವ್ಯಯಿಸಲಾಗುತ್ತಿದೆ. ಶಾಲೆಯೊಂದರಲ್ಲಿ ಸುಮಾರು 2 ರಿಂದ 3 ಲಕ್ಷ ರೂ.ವರೆಗೆ ಬೆಲೆ ಬಾಳುವ ಕಂಪ್ಯೂಟರ್‌ಗಳಿವೆ. ಕಂಪ್ಯೂಟರ್‌ ಕಳ್ಳತನವಾದರೆ ಪತ್ತೆ ಕಾರ್ಯವೂ ಸುಗಮವಾಗಿಲ್ಲ. ಆದ್ದರಿಂದ ಬೆಲೆ ಬಾಳುವ ಕಂಪ್ಯೂಟರ್‌ ರಕ್ಷಣೆಗೆ ಗಮನ ಹರಿಸಬೇಕಾಗಿರುವುದರಿಂದ ಕಂಪ್ಯೂಟರ್‌ಗೆ ಜಿಪಿಎಸ್‌ ಅಳವಡಿಸಲು ಯೋಜನೆ ರೂಪಿಸಿದೆ.

ಶಾಲೆಯಲ್ಲಿ ಹಣ, ಟಿವಿ ಕಳ್ಳತನ
ಪತ್ತೆಗೆ ನೆರವು: ತಾಲೂಕಿನ ಸುಮಾರು 30 ಸರಕಾರಿ ಶಾಲೆಗಳಲ್ಲಿ ಈ ಯೋಜನೆ ಅನುಷ್ಠಾನಗೊಳಿಸಲು ಮುಂದಾಗಿದ್ದು, ಶಾಲೆಯೊಂದರ ಸುಮಾರು 10 ಕಂಪ್ಯೂಟರ್‌ಗಳ ಪೈಕಿ ಒಂದೆರಡು ಕಂಪ್ಯೂಟರ್‌ಗಳಿಗೆ ಜಿಪಿಎಸ್‌ ಅಳವಡಿಸಲಾಗುತ್ತದೆ. ಒಂದು ಶಾಲೆಗೆ ಸುಮಾರು 3,500 ದಿಂದ 4 ಸಾವಿರ ರೂ.ವೆಚ್ಚ ತಗಲಬಹುದೆಂಬ ಅಂದಾಜಿದೆ. ಜಿಪಿಎಸ್‌ ಅಳವಡಿಕೆಯಿಂದ ಮೂರು ಹಂತದಲ್ಲಿ ಕಳ್ಳರ ಪತ್ತೆ ಹಚ್ಚಲು ನೆರವಾಗಲಿದೆ. ಕಳ್ಳರು ಕಂಪ್ಯೂಟರ್‌ ಕಳ್ಳತನ ಮಾಡಿದರೂ ಎಲ್ಲಿ ಹೋದರೂ ಅವರನ್ನು ಜಿಪಿಎಸ್‌ ಮೂಲಕ ಪತ್ತೆ ಹಚ್ಚಬಹುದಾಗಿದೆ. ಇನ್ನೂ ಒಂದು ಹಂತದಲ್ಲಿ ಕಂಪ್ಯೂಟರ್‌ ಅಲುಗಾಡಿಸಿದರೆ ಸುಮಾರು 5 ಜನರ ಮೊಬೈಲ್‌ಗೆ ಕರೆ ಹೋಗುವ ರೀತಿಯಲ್ಲಿ ಅಳವಡಿಸಬಹುದಾಗಿದೆ.

ಶೀಘ್ರ ಪ್ರಸ್ತಾವನೆ: ಕಳ್ಳರು ಕಂಪ್ಯೂಟರ್‌ ಕದಿಯುವ ವೇಳೆಯಲ್ಲಿ ಹೊತ್ತುಕೊಂಡು ಹೋಗುವಾಗ ಜಿಪಿಎಸ್‌ ತಂತ್ರಾಂಶದಿಂದ ಐದು ಮೊಬೈಲ್‌ಗೆ ಕರೆಗಳು ಸ್ವಯಂ ಪ್ರೇರಿತವಾಗಿ ಹೋಗಲಿವೆ. ಇದರಿಂದ ಪೊಲೀಸರು ತಕ್ಷಣವೇ ಸಂಬಂಧಿಸಿದ ಶಾಲೆಗೆ ಭೇಟಿ ನೀಡಿ ಕಳ್ಳರನ್ನು ಹಿಡಿಯಲು ಬಲೆ ಬೀಸಬಹುದಾಗಿದೆ. ಇಲ್ಲವೆ ಶಾಲೆಗೆ ಬಾಗಿಲಿನ ಮೂಲಕ ಹೊರ ಹೋಗುವ ವೇಳೆಯಲ್ಲಿ ಸೈರನ್‌ ಕೂಗುವ ರೀತಿಯಲ್ಲಿ ಅಳವಡಿಕೆ ಮಾಡಬಹುದಾಗಿದೆ. ಈ ರೀತಿ ಸರಕಾರಿ ಶಾಲೆಗಳಲ್ಲಿ ಕಂಪ್ಯೂಟರ್‌ ಕಳ್ಳತನಕ್ಕೆ ಬ್ರೇಕ್‌ ಹಾಕಲು ಪ್ರಸ್ತಾವನೆ ಸಿದ್ಧಗೊಂಡಿದ್ದು, ಅನುದಾನ ಲಭ್ಯತೆಗಾಗಿ ಕಾಯುತ್ತಿದೆ. ಸಾರ್ವಜನಿಕ ಇಲಾಖೆಯ ಮೂಲದ ಪ್ರಕಾರ, ಕಂಪ್ಯೂಟರ್‌ ಕಳ್ಳತನ ತಡೆಯುವುದಕ್ಕಾಗಿ ಉತ್ತಮ ಯೋಜನೆಯಾಗಿದೆ. ಪೊಲೀಸ್‌ ಅಧಿಕಾರಿಗಳು ಈ ಕುರಿತು ಚರ್ಚಿಸಿದ್ದಾರೆ. ಜಿಲ್ಲಾ ಪಂಚಾಯತ್‌ಗೆ ಅನುದಾನ ಲಭ್ಯತೆ ಆಧರಿಸಿ ಶೀಘ್ರದಲ್ಲಿಯೇ ಪ್ರಸ್ತಾವನೆ ಸಲ್ಲಿಸಲಾಗುವುದು ಎಂದು ತಿಳಿಸಿವೆ.

ಶಾಲೆ ಕಂಪ್ಯೂಟರ್‌ ಕಳ್ಳತನ, ದಾಖಲೆಗೆ ಬೆಂಕಿ
‘ಸರಕಾರಿ ಶಾಲೆಗಳಲ್ಲಿ ಲಕ್ಷಾಂತರ ರೂ. ಬೆಲೆ ಬಾಳುವ ಕಂಪ್ಯೂಟರ್‌ಗಳಿವೆ. ಕಂಪ್ಯೂಟರ್‌ ಕಳ್ಳತನ ತಡೆಗೆ ಪೊಲೀಸ್‌ ಇಲಾಖೆಯಿಂದ ಜಿಪಿಎಸ್‌ ಅಳವಡಿಕೆಗೆ ಸಂಬಂಧಿಸಿದಂತೆ ಯೋಜನೆ ಮುಂದಿಟ್ಟಿದ್ದಾರೆ. ಈ ಕುರಿತು ಅನುದಾನ ಲಭ್ಯತೆ ಆಧರಿಸಿ ಜಿಲ್ಲಾ ಪಂಚಾಯತ್‌ಗೆ ಪ್ರಸ್ತಾವನೆ ಸಲ್ಲಿಸಲಾಗುವುದು’ ಎಂದು ಕೊಪ್ಪಳ ಡಿಡಿಪಿಐ ದೊಡ್ಡಬಸಪ್ಪ ನೀರಲಕೇರಿ ಮಾಹಿತಿ ನೀಡಿದ್ದಾರೆ.

‘ಕೊಪ್ಪಳ ತಾಲೂಕಿನಲ್ಲಿ ಸರಕಾರಿ ಶಾಲೆಗಳಲ್ಲಿ ಕಂಪ್ಯೂಟರ್‌ ಕಳ್ಳತನ ತಡೆಯಲು ಜಿಪಿಎಸ್‌ ತಂತ್ರಜ್ಞಾನ ಅಳವಡಿಸುವಂತೆ ಶಿಕ್ಷಣ ಇಲಾಖೆಗೆ ಹೇಳಿದೆ. ಜಿಪಿಎಸ್‌ ತಂತ್ರಜ್ಞಾನ ಅಳವಡಿಕೆಯಿಂದ ಲಕ್ಷಾಂತರ ರೂ. ಬೆಲೆ ಬಾಳುವ ಕಂಪ್ಯೂಟರ್‌ ಕಳ್ಳತನ ತಡೆಯಬಹುದಾಗಿದೆ’ ಎಂದು ಕೊಪ್ಪಳ ಗ್ರಾಮೀಣ ಪೊಲೀಸ್‌ ಠಾಣೆ ಸಿಪಿಐ ವಿಶ್ವನಾಥ ಹಿರೇಗೌಡರ್‌ ತಿಳಿಸಿದ್ದಾರೆ.

ಬಂದ್ ಆಗಿದ್ದ ಸರ್ಕಾರಿ ಶಾಲೆಯೊಳಗಿದ್ದ 4 ಲ್ಯಾಪ್‌ಟಾಪ್‌ಗಳು ಮಂಗಮಾಯ..!