ಹೈಲೈಟ್ಸ್‌:
- ಬಾಂಬೆ ಷೇರುಪೇಟೆ ಸೂಚ್ಯಂಕ ಸೆನ್ಸೆಕ್ಸ್‌ ಸೋಮವಾರ ಬರೋಬ್ಬರಿ 503 ಅಂಕ ಇಳಿಕೆ
- 58,283 ಅಂಕಗಳಿಗೆ ದಿನದ ವಹಿವಾಟು ಮುಗಿಸಿದ ಸೆನ್ಸೆಕ್ಸ್‌
- ಬ್ಯಾಂಕಿಂಗ್‌, ಹಣಕಾಸು ಮತ್ತು ಲೋಹದ ಕಂಪನಿಗಳ ಷೇರುಗಳು ಮುಗ್ಗರಿಸಿದ್ದೇ ಈ ಬೃಹತ್‌ ಕುಸಿತಕ್ಕೆ ಪ್ರಮುಖ ಕಾರಣ
- 143 ಅಂಕ ಕುಸಿತ ಕಂಡು ದಿನದಂತ್ಯಕ್ಕೆ 17,368 ಅಂಕಗಳಿಗೆ ಸ್ಥಿರವಾದ ನಿಫ್ಟಿ
ಇನ್ನೊಂದೆಡೆ ರಾಷ್ಟ್ರೀಯ ಷೇರುಪೇಟೆ ಸೂಚ್ಯಂಕ ನಿಫ್ಟಿ 143 ಅಂಕ ಅಥವಾ ಶೇ. 0.82ರಷ್ಟು ಕುಸಿತ ಕಂಡು ದಿನದಂತ್ಯಕ್ಕೆ 17,368 ಅಂಕಗಳಿಗೆ ಸ್ಥಿರವಾಯಿತು.
ಬಜಾಜ್‌ ಫೈನಾನ್ಸ್‌, ಬಜಾಜ್‌ ಫಿನ್‌ಸರ್ವ್‌, ಮಹೀಂದ್ರಾ ಆಂಡ್‌ ಮಹೀಂದ್ರಾ, ನೆಸ್ಟ್ಲೆ ಇಂಡಿಯಾ ಮತ್ತು ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಷೇರುಗಳು ಗರಿಷ್ಠ ಶೇ. 2.97ರಷ್ಟು ಮೌಲ್ಯ ಕಳೆದುಕೊಂಡವು. ಇದು ಷೇರುಪೇಟೆಯ ಕುಸಿತಕ್ಕೆ ಪ್ರಮುಖ ಕಾರಣವಾಯಿತು.
ಅಮೆರಿಕದ ಫೆಡರಲ್‌ ರಿಸರ್ವ್‌ ಘೋಷಣೆಗಳು ಷೇರುಪೇಟೆ ದಿಕ್ಕನ್ನು ನಿರ್ಧರಿಸಲಿವೆ!
ಇದರ ನಡುವೆಯೂ ಆಕ್ಸಿಸ್‌ ಬ್ಯಾಂಕ್‌, ಟೆಕ್‌ ಮಹೀಂದ್ರಾ, ಮಾರುತಿ, ಪವರ್‌ ಗ್ರಿಡ್‌, ಟೈಟಾನ್‌, ಸನ್‌ ಫಾರ್ಮಾ ಮತ್ತು ಡಾ ರೆಡ್ಡೀಸ್‌ ಷೇರುಗಳು ಗಳಿಕೆ ದಾಖಲಿಸಿದ್ದು ವಿಶೇಷವಾಗಿತ್ತು.
ರಾಷ್ಟ್ರೀಯ ಷೇರು ಮಾರುಕಟ್ಟೆಯ ಉಪ ಸೂಚ್ಯಂಕಗಳತ್ತ ನೋಡುವುದಾದರೆ, ನಿಫ್ಟಿ ಮೀಡಿಯಾ, ಪಿಎಸ್‌ಯು ಬ್ಯಾಂಕ್‌ (ಸರಕಾರಿ ಸ್ವಾಮ್ಯದ ಬ್ಯಾಂಕ್‌), ಆಯಿಲ್‌ & ಗ್ಯಾಸ್‌ ಮತ್ತು ರಿಯಾಲ್ಟಿ ವಲಯದ ಷೇರುಗಳು ಶೇ. 1.81ರಷ್ಟು ಕುಸಿತಕ್ಕೀಡಾದವು.
ಬ್ರಿಟನ್‌ನಲ್ಲಿ ಓಮಿಕ್ರಾನ್‌ ಕೊರೊನಾ ರೂಪಾಂತರಿ ಪ್ರಕರಣಗಳು ಒಂದೇ ಸಮನೆ ಏರಿಕೆಯಾಗುತ್ತಿರುವುದು ಜಾಗತಿಕ ಮಟ್ಟದಲ್ಲಿ ಕಳವಳ ಹುಟ್ಟುಹಾಕಿದೆ. ಇದು ಕೂಡ ಷೇರು ಮಾರುಕಟ್ಟೆ ಮೇಲೆ ಪರಿಣಾಮ ಬೀರಿದೆ ಎಂದು ತಜ್ಞರು ಹೇಳಿದ್ದಾರೆ.
ಇದರ ಜತೆಗೆ ಅಮೆರಿಕಾದ ಕೇಂದ್ರೀಯ ಬ್ಯಾಂಕ್‌ ಫೆಡರಲ್‌ ಬ್ಯಾಂಕ್‌, ಇಸಿಬಿ, ಬ್ಯಾಂಕ್‌ ಆಫ್‌ ಇಂಗ್ಲೆಂಡ್‌ ಮತ್ತು ಬ್ಯಾಂಕ್‌ ಆಫ್‌ ಜಪಾನ್‌ ಈ ವಾರ ಸಭೆ ಸೇರಲಿದ್ದು, ಮುಂಬರುವ ದಿನಗಳ ಬಡ್ಡಿದರಗಳು, ಬಾಂಡ್ ಗಳಿಕೆ ಮತ್ತು ಮಾರುಕಟ್ಟೆಗಳು ಯಾವ ರೀತಿಯಲ್ಲಿ ಇರಲಿವೆ ಎಂಬುದರ ಸುಳಿವು ನೀಡಲಿವೆ. ಇದರ ಬಗ್ಗೆ ಕೂಡ ಹೂಡಿಕೆದಾರರು ಕಣ್ಣು ನೆಟ್ಟಿದ್ದಾರೆ.
ಇದೇ ಅವಧಿಯಲ್ಲಿ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಕ್ಯಾಪಿಟಲ್‌ ಮಾರ್ಕೆಟ್‌ನಲ್ಲೇ ಗರಿಷ್ಠ ಪ್ರಮಾಣದಲ್ಲಿ ಷೇರು ಮಾರುತ್ತಿರುವ ಹೂಡಿಕೆದಾರರಾಗಿ ಮೂಡಿ ಬಂದಿದ್ದಾರೆ. ಶುಕ್ರವಾರ ಕೂಡ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು 1,092.40 ಕೋಟಿ ರೂ. ಮೊತ್ತದ ಷೇರುಗಳನ್ನು ಮಾರಾಟ ಮಾಡಿದ್ದರು ಎಂದು ವಿನಿಮಯ ಮಾರುಕಟ್ಟೆಯ ದಾಖಲೆಗಳು ಹೇಳುತ್ತಿವೆ.
ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ದೊಡ್ಡ ಮೊತ್ತದ ಷೇರುಗಳನ್ನು ಮಾರಾಟ ಮಾಡುತ್ತಿರುವುದು ಮಾರುಕಟ್ಟೆಯಲ್ಲಿ ಅಲ್ಲೋಲ ಕಲ್ಲೋಲವೇ ಸೃಷ್ಟಿಸುತ್ತಿದೆ. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ನವೆಂಬರ್‌ನಲ್ಲಿ 33,799 ಕೋಟಿ ರೂ. ಮೊತ್ತದ ಷೇರುಗಳನ್ನು ಮಾರಾಟ ಮಾಡಿದ್ದರೆ ಡಿಸೆಂಬರ್‌ನಲ್ಲಿ ಮೊದಲ 10 ದಿನಗಳಲ್ಲಿ 17,644 ಕೋಟಿ ರೂ. ಮೊತ್ತದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ.