5,000 ಕೋಟಿ ರೂ. ಮೊತ್ತದ ಷೇರು ಮಾರಾಟಕ್ಕೆ ಮುಂದಾದ ಅರಬಿಂದೋ ಫಾರ್ಮಾ

ಹೈದರಾಬಾದ್‌ ಮೂಲಕ ಅರಬಿಂದೋ ಫಾರ್ಮಾ ತನ್ನ ಚುಚ್ಚುಮದ್ದಿನ ವ್ಯವಹಾರದಲ್ಲಿನ ಸುಮಾರು ಶೇ. 30 ರಿಂದ 35ರಷ್ಟು ಷೇರನ್ನು 4,500-5,250 ಕೋಟಿ ರೂ.ಗೆ ($600-700 ಮಿಲಿಯನ್) ಮಾರಾಟ ಮಾಡಲು ಖಾಸಗಿ ಇಕ್ವಿಟಿ ಫಂಡ್‌ಗಳೊಂದಿಗೆ ಮಾತುಕತೆಗಳನ್ನು ಪ್ರಾರಂಭಿಸಿದೆ. ಈ ಔಷಧ ತಯಾರಕ ಸಂಸ್ಥೆ ತನ್ನ ಪ್ರಮುಖ ವ್ಯವಹಾರಗಳಲ್ಲಿರುವ ಮೌಲ್ಯವನ್ನು ಬಳಸಿಕೊಂಡು ಹಣ ಸಂಗ್ರಹಿಸಲು ಮುಂದಾಗಿದೆ.

ಸಂಭಾವ್ಯ ಡೀಲ್‌ಗಾಗಿ ಟಿಪಿಜಿ ಕ್ಯಾಪಿಟಲ್‌ ಮ್ಯಾನೇಜ್‌ಮೆಂಟ್‌, ಅಡ್ವೆಂಟ್‌ ಇಂಟರ್‌ನ್ಯಾಷನಲ್‌, ಬೇನ್‌ ಕ್ಯಾಪಿಟಲ್‌ ಮತ್ತು ಬ್ಲಾಕ್‌ಸ್ಟೋನ್‌ಗಳನ್ನು ಸಂಪರ್ಕಿಸಲಾಗಿದೆ. ಕಂಪನಿ ಮೌಲ್ಯವನ್ನು 15,000 ಕೋಟಿ ರೂ. ಎಂದು ಅಂದಾಜಿಸಲಾಗಿದ್ದು, ಇದೇ ಲೆಕ್ಕಾಚಾರದಲ್ಲಿ ಷೇರು ಮಾರಾಟಕ್ಕೆ ಅರಬಿಂದೋ ಫಾರ್ಮಾ ಮುಂದಾಗಿದ್ದು ಕಾರ್ಲೈಲ್‌ ಗ್ರೂಪ್‌ ಮತ್ತು ಪಿಎಜಿಯನ್ನೂ ಸಂಪರ್ಕಿಸಿದೆ.

ಷೇರು ಖರೀದಿದಾರರನ್ನು ಪತ್ತೆ ಹಚ್ಚಲು ಅರಬಿಂದೋ ಕೋಟಕ್‌ ಮಹೀಂದ್ರಾ ಕ್ಯಾಪಿಟಲ್‌ನ್ನು ಆಯ್ಕೆ ಮಾಡಿಕೊಂಡಿದೆ.

ಈ ಸಂಬಂಧ ಅರಬಿಂದೋಗೆ ಮತ್ತು ಅದರ ವ್ಯವಸ್ಥಾಪಕ ನಿರ್ದೇಶಕ ಕೆಎನ್‌ ರೆಡ್ಡಿಗೆ ಕಳುಹಿಸಿದ ಇ-ಮೇಲ್‌ಗೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. ಈ ಸಂಬಂಧ ಪ್ರತಿಕ್ರಿಯಿಸಲು ಟಿಪಿಜಿ, ಅಡ್ವೆಂಟ್‌, ಬೇನ್‌, ಬ್ಲ್ಯಾಕ್‌ಸ್ಟೋನ್‌, ಕಾರ್ಲೈಲ್‌ ಮತ್ತು ಪಿಎಜಿ ನಿರಾಕರಿಸಿವೆ.

ವೈಜಾಗ್‌ನಲ್ಲಿ ಚುಚ್ಚುಮದ್ದು ಘಟಕ ಸ್ಥಾಪನೆಗೆ ಸಿದ್ಧತೆ

ಈ ಹಣಕಾಸು ವರ್ಷದ ಜುಲೈ-ಸೆಪ್ಟೆಂಬರ್ ಎರಡನೇ ತ್ರೈಮಾಸಿಕದಲ್ಲಿ ಕಂಪನಿಯು ಜಾಗತಿಕವಾಗಿ 105 ಮಿಲಿಯನ್‌ ಡಾಲರ್‌ (ಸುಮಾರು 776 ಕೋಟಿ ರೂ.) ಮೊತ್ತದ ಚುಚ್ಚುಮದ್ದನ್ನು ಮಾರಾಟ ಮಾಡಿದೆ. 2024ರ ಆರ್ಥಿಕ ವರ್ಷದಲ್ಲಿ (ಬಯೋಸಿಮಿಲರ್‌ಗಳು ಮತ್ತು ಲಸಿಕೆಗಳನ್ನು ಹೊರತುಪಡಿಸಿ) ವಾರ್ಷಿಕ 650-700 ಮಿಲಿಯನ್‌ ಡಾಲರ್‌ ಆದಾಯ ಪಡೆಯುವ ಗುರಿಯನ್ನು ಕಂಪನಿ ಹಾಕಿಕೊಂಡಿದೆ.

ಚುಚ್ಚುಮದ್ದಿನ ವ್ಯವಹಾರವನ್ನು ವಿಸ್ತರಿಸುವ ಸಲುವಾಗಿ, ಅರಬಿಂದೋ ಫಾರ್ಮಾ ಯುರೋಪಿಯನ್ ಯೂನಿಯನ್ ಮತ್ತು ಇತರ ಜಾಗತಿಕ ಮಾರುಕಟ್ಟೆಗಳಿಗಾಗಿ ವೈಜಾಗ್‌ನಲ್ಲಿ ಚುಚ್ಚುಮದ್ದಿಗೆಂದೇ ಮೀಸಲಾದ ಘಟಕವನ್ನು ಸ್ಥಾಪಿಸುತ್ತಿದೆ.

ಲಿಕ್ವಿಡ್‌ ಮತ್ತು ಲೈಫಿಲೈಸ್ಡ್ ಸೀಸೆಗಳು, ಬ್ಯಾಗ್‌ಗಳು, ಆಂಪೂಲ್‌ಗಳು ಮತ್ತು ಪ್ರಿಫಿಲ್ಲ್‌ಡ್‌ ಸಿರಿಂಜ್‌ಗಳಂತಹ ಚುಚ್ಚುಮದ್ದು ವ್ಯವಹಾರ ಕ್ಷೇತ್ರಗಳಲ್ಲಿ ಅರಬಿಂದೋ ಗಟ್ಟಿಯಾಗಿ ನೆಲೆವೂರಿದೆ. ಅಮೆರಿಕದಲ್ಲಿಯೂ ಚುಚ್ಚುಮದ್ದಿನ ಘಟಕವನ್ನು ಕಂಪನಿ ಪೂರ್ಣಗೊಳಿಸಿದ್ದು, ಮುಂದಿನ 15-18 ತಿಂಗಳುಗಳಲ್ಲಿ ವೈಜಾಗ್‌ನ ಘಟಕ ವಾಣಿಜ್ಯ ಉತ್ಪಾದನೆಗೆ ಸಿದ್ಧವಾಗಲಿದೆ ಎಂದು ನಿರೀಕ್ಷಿಸಲಾಗಿದೆ.

2019ರಲ್ಲಿ, ಅರಬಿಂದೋ ಸ್ಪೆಕ್ಟ್ರಮ್ ಫಾರ್ಮಾಸ್ಯುಟಿಕಲ್ಸ್‌ನಿಂದ ಏಳು ಬ್ರಾಂಡ್ ಆಂಕೊಲಾಜಿ ಚುಚ್ಚುಮದ್ದಿನ ಉತ್ಪನ್ನಗಳನ್ನು 160 ಮಿಲಿಯನ್‌ ಡಾಲರ್‌ಗೆ ಪಡೆದುಕೊಂಡಿತು. ಈ ಡೀಲ್‌ ಅಮೆರಿಕದಲ್ಲಿ ಬ್ರ್ಯಾಂಡ್‌ ಆಂಕೊಲಾಜಿ ಮಾರುಕಟ್ಟೆಯನ್ನು ಪ್ರವೇಶಿಸಲು ಕಂಪನಿಗೆ ಸಹಾಯ ಮಾಡಿತ್ತು.

ಕಳೆದ ವರ್ಷ ಕಂಪನಿಯು ತನ್ನ ಚುಚ್ಚುಮದ್ದಿನ ಸ್ವತ್ತುಗಳನ್ನು ಸಂಪೂರ್ಣ ಸ್ವಾಮ್ಯದ ಅಂಗಸಂಸ್ಥೆಯಾದ ಯುಜಿಯಾ ಫಾರ್ಮಾ ಸ್ಪೆಷಾಲಿಟೀಸ್‌ಗೆ ವರ್ಗಾಯಿಸುವುದಾಗಿ ಘೋಷಿಸಿತ್ತು. ಜನರಿಕ್ ಚುಚ್ಚುಮದ್ದು ಮತ್ತು ಆಪ್ತ್ಲಾಮಿಕ್ಸ್‌ ತಯಾರಿಸುವ ಘಟಕ IVನ್ನು 876 ಕೋಟಿ ರೂ. ಮೌಲ್ಯದಲ್ಲಿ ವರ್ಗಾವಣೆ ಮಾಡಲಾಗಿತ್ತು. ಈ ಘಟಕವು 2021ನೇ ಅರ್ಥಿಕ ವರ್ಷದಲ್ಲಿ 926 ಕೋಟಿ ರೂ. ಆದಾಯ ಗಳಿಸಿತ್ತು. ಕಂಪನಿಯ ಒಟ್ಟು ವಹಿವಾಟಿನಲ್ಲಿ ಇದರ ಪಾಲು ಶೇ. 5.86ರಷ್ಟಿದೆ.

1986ರಲ್ಲಿ ವಿ ರಾಮ್‌ಪ್ರಸಾದ್‌ ರೆಡ್ಡಿ ಮತ್ತು ಕೆ ನಿತ್ಯಾನಂದ ರೆಡ್ಡಿ ಅವರಿಂದ ಆರಂಭವಾದ ಅರಬಿಂದೋ, ಸಂಯೋಜಿತ ಔಷಧೀಯ (ಫಾರ್ಮುಲೇಷನ್) ತಯಾರಕ ಕಂಪನಿಯಾಗಿದ್ದು, ಒಟ್ಟು 14 ಉತ್ಪಾದನಾ ಘಟಕಗಳನ್ನು ಹೊಂದಿದೆ. ಇವುಗಳಲ್ಲಿ ಮೂರು ಅಮೆರಿಕದಲ್ಲಿದ್ದರೆ, ಬ್ರೆಜಿಲ್ ಮತ್ತು ಪೋರ್ಚುಗಲ್‌ನಲ್ಲಿ ತಲಾ ಒಂದು ಘಟಕಗಳಿವೆ. 11 ಎಪಿಐ ಉತ್ಪಾದನಾ ಘಟಕಗಳೂ ಕಂಪನಿ ಬಳಿಯಲ್ಲಿವೆ. ಇವುಗಳು ಪ್ರಮುಖ ಅಂತಾರಾಷ್ಟ್ರೀಯ ಏಜೆನ್ಸಿಗಳಿಂದ ನಿಯಂತ್ರಕ ಅನುಮೋದನೆಗಳನ್ನೂ ಪಡೆದುಕೊಂಡಿವೆ.

ಫಾರ್ಮುಲೇಷನ್‌ ವ್ಯವಹಾರವು ಕಂಪನಿಯ ಆದಾಯದಲ್ಲಿ ಶೇ. 88ರಷ್ಟು ಪಾಲನ್ನು ಹೊಂದಿದ್ದು, ರಫ್ತಿನ ಮೂಲಕವೇ ಸಂಸ್ಥೆ ಶೇ. 90ರಷ್ಟು ಆದಾಯವನ್ನು ಪಡೆಯುತ್ತಿದೆ. ಅಮೆರಿಕ ದೇಶವು ಕಂಪನಿಯ ಪ್ರಮುಖ ಮಾರುಕಟ್ಟೆಯಾಗಿದ್ದು, ಅರ್ಧಕ್ಕಿಂತ ಹೆಚ್ಚು ಆದಾಯ ಇದೊಂದೇ ದೇಶದಿಂದ ಬರುತ್ತಿದೆ. ಜತೆಗೆ 681 ಜೆನೆರಿಕ್ ಔಷಧಿಗಳೂ ಕಂಪನಿಯ ಶಕ್ತಿಯಾಗಿವೆ.

ಚುಚ್ಚುಮದ್ದಿನ ವ್ಯವಹಾರವು ಕಳೆದ ಒಂದು ದಶಕದಲ್ಲಿ ಗಮನಾರ್ಹವಾಗಿ ಬೆಳವಣಿಗೆ ಕಂಡಿದೆ. 2010ರಲ್ಲಿ ಅಮೆರಿಕ ಮೂಲದ ಮೈಲಾನ್ ಬೆಂಗಳೂರು ಮೂಲದ ಸ್ಟ್ರೈಡ್ಸ್ ಆರ್ಕೊಲಾಬ್‌ನ ಇಂಜೆಕ್ಟಬಲ್ ಘಟಕವಾದ ಅಜಿಲಾ ಸ್ಪೆಷಾಲಿಟೀಸ್ ಅನ್ನು ಸುಮಾರು 10,000 ಕೋಟಿ ರೂ.ಗೆ ಖರೀದಿಸಿತ್ತು. ಈ ಮೂಲಕ ಇದು ಭಾರತೀಯ ಫಾರ್ಮಾ ವಲಯದ ಬೃಹತ್‌ ಡೀಲ್‌ಗಳಲ್ಲಿ ಒಂದೆನಿಸಿತ್ತು. 2016ರಲ್ಲಿ, ಅಮೆರಿಕ ಮೂಲದ ಬಾಕ್ಸ್ಟೆರ್‌ ಇಂಟರ್ನ್ಯಾಷನಲ್ ಅಹಮದಾಬಾದ್ ಮೂಲದ ಕ್ಲಾರಿಸ್ ಲೈಫ್ ಸೈನ್ಸಸ್‌ನ ಸಂಪೂರ್ಣ ಸ್ವಾಮ್ಯದ ಅಂಗಸಂಸ್ಥೆ ಕ್ಲಾರಿಸ್ ಇಂಜೆಕ್ಟಬಲ್ಸ್ ಅನ್ನು 625 ಮಿಲಿಯನ್‌ ಡಾಲರ್‌ಗೆ ಸ್ವಾಧೀನಪಡಿಸಿಕೊಂಡಿತ್ತು.

ಕಳೆದ ವರ್ಷದ ನವೆಂಬರ್‌ನಲ್ಲಿ ಅಮೆರಿಕದ ಮತ್ತೊಂದು ಕಂಪನಿ ಅಮ್ನಿಯಲ್ ಫಾರ್ಮಾಸ್ಯುಟಿಕಲ್ಸ್ ಅಹಮದಾಬಾದ್ ಮೂಲದ ಚುಚ್ಚುಮದ್ದಿನ ಔಷಧ ತಯಾರಕ ಪುನಿಸ್ಕಾ ಹೆಲ್ತ್‌ಕೇರ್ ಅನ್ನು ರೂ. 700 ಕೋಟಿಗೆ ಸ್ವಾಧೀನಪಡಿಸಿಕೊಂಡಿತ್ತು.

ಖಾಸಗಿ ಹೂಡಿಕೆ ಸಂಸ್ಥೆಗಳಾದ ಅಡ್ವೆಂಟ್, ಪಿಎಜಿ ಮತ್ತು ಟಿಪಿಜಿಯಂತಹ ಸಂಸ್ಥೆಗಳು ಫಾರ್ಮಾ ಕಂಪನಿಗಳ ಮೇಲೆ ಹೂಡಿಕೆಗೆಂದೇ ನಿರ್ದಿಷ್ಟ ವೇದಿಕೆಗಳನ್ನು ರಚಿಸಿಕೊಂಡಿದ್ದು, ಭಾರತೀಯ ಆರೋಗ್ಯ ಮತ್ತು ಜೀವ ವಿಜ್ಞಾನ ವಲಯದಲ್ಲಿ ಆಕ್ರಮಣಕಾರಿ ಹೂಡಿಕೆ ಮಾಡುತ್ತಿವೆ. ವೆಂಚರ್ ಇಂಟೆಲಿಜೆನ್ಸ್ ಸಂಗ್ರಹಿಸಿದ ಮಾಹಿತಿಯ ಪ್ರಕಾರ, ಖಾಸಗಿ ಇಕ್ವಿಟಿ ಮತ್ತು ವೆಂಚರ್ ಕ್ಯಾಪಿಟಲ್ ಫಂಡ್‌ಗಳು 2020ರಲ್ಲಿ ಆರೋಗ್ಯ 2.7 ಶತಕೋಟಿ ಡಾಲರ್‌ ಹೂಡಿಕೆ ಮಾಡಿದ್ದರೆ 2021ರಲ್ಲಿ ಈ ಮೊತ್ತ ಏಕಾಏಕಿ 3.23 ಶತಕೋಟಿ ಡಾಲರ್‌ಗೆ ಏರಿಕೆಯಾಗಿದೆ.

ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ ‘ಎಕನಾಮಿಕ್ ಟೈಮ್ಸ್‘ ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.