ಕೇಕ್‌ ಕತ್ತರಿಸುವ, ಶಾಂಪೇನ್‌ ಚಿಮ್ಮಿಸುವ ಆಚರಣೆಗೆ ಕೊಡವ ಸಮಾಜ ನಿಷೇಧ

ಗೋಣಿಕೊಪ್ಪ (ಕೊಡಗು): ಕೊಡವರ ಮದುವೆ ಪದ್ಧತಿಯಲ್ಲಿ ಇಲ್ಲದ ಕೇಕ್‌ ಕತ್ತರಿಸುವುದು, ಶಾಂಪೇನ್‌ ಚಿಮುಕಿಸುವುದು, ಪಟಾಕಿ ಸಿಡಿಸುವುದು ಇತ್ಯಾದಿ ಅಸಂಬದ್ಧ ಆಚರಣೆಗಳನ್ನು ಟಿ. ಶೆಟ್ಟಿಗೇರಿಯಲ್ಲಿರುವ ತಾವಳಗೇರಿ ಮೂಂದ್‌ ನಾಡ್‌ ಕೊಡವ ಸಮಾಜ ನಿಷೇಧಿಸಿದೆ.

ಸಂಪ್ರದಾಯದಂತೆ ಕೊಡವರ ಮದುವೆಯಲ್ಲಿ ತಲೆಯಲ್ಲಿ ನೀರಿನ ತಂಬಿಗೆಯೊಂದಿಗೆ ಮಂಟಪಕ್ಕೆ ಬಂದ ವಧುವಿನ ತಲೆಯಿಂದ ನೀರಿನ ತಂಬಿಗೆಯನ್ನು ಬೊಳ್ಚ ಕೊಡದ ಕೆಳಗೆ ಇಳಿಸಲಾಗುತ್ತದೆ. ಗುರು ಕಾರೋಣ ಹಾಗೂ ದೇವರನ್ನು ಪ್ರಾರ್ಥಿಸಿ, ಹಿರಿಯರ ಕಾಲಿಗೆ ನಮಸ್ಕರಿಸಿ, ಆಶೀರ್ವಾದ ಪಡೆದು ವರನ ಕೋಣೆಗೆ ತೆರಳಲಾಗುತ್ತದೆ. ಆದರೆ, ಕೆಲವರು ಹಿರಿಯರ ಆಶೀರ್ವಾದ ಪಡೆದ ನಂತರ ಕೊಡವರ ಪದ್ಧತಿಯಲ್ಲಿ ಇಲ್ಲದ ಅಸಂಬದ್ಧ ಆಚರಣೆ ಮಾಡುತ್ತಿದ್ದಾರೆ. ಸಮಾಜದ ಅಧ್ಯಕ್ಷ ಚೊಟ್ಟೆಯಾಂಡಮಾಡ ಬೋಸು ವಿಶ್ವನಾಥ್‌ರವರ ಅಧ್ಯಕ್ಷತೆಯಲ್ಲಿ ಭಾನುವಾರ ನಡೆದ ಮಹಾಸಭೆಯಲ್ಲಿ ಅಸಂಬದ್ಧ ಆಚರಣೆ ನಿಷೇಧಿಸಿ ಒಕ್ಕೊರಲಿನಿಂದ ನಿರ್ಣಯ ಕೈಗೊಳ್ಳಲಾಯಿತು.

ಮಡಿಕೇರಿಯಲ್ಲಿ ನಟಿ ಸಿಂಧೂ ಲೋಕನಾಥ್‌ ಮದುವೆ
ವಧು – ವರರಿಗೆ ವೇದಿಕೆಯಲ್ಲಿ ಉಡುಗೊರೆ ಅಥವಾ ಹಣ ನೀಡಿ ಆಶೀರ್ವದಿಸುವ ಸಂದರ್ಭ ಸ್ತ್ರೀಯರು ತಲೆ ಕೂದಲನ್ನು ಕಟ್ಟದೆ ಬಿಟ್ಟುಕೊಂಡಿರುವುದನ್ನು ಹಾಗೂ ಮದುವೆ ಗಂಡು (ವರ) ಮುಹೂರ್ತಕ್ಕೆ ಕೂರುವಾಗ ಗಡ್ಡ ಬಿಟ್ಟುಕೊಂಡಿರುವುದನ್ನೂ ನಿಷೇಧಿಸಿ ನಿರ್ಣಯ ಕೈಗೊಳ್ಳಲಾಯಿತು. ಕೊಡವರ ಪದ್ದತಿ – ಸಂಸ್ಕೃತಿ, ಹಬ್ಬ ಮತ್ತಿತರ ಆಚರಣೆಗಳಲ್ಲಿ ಅಖಿಲ ಕೊಡವ ಸಮಾಜದ ನಿರ್ಣಯಕ್ಕೆ ಬದ್ಧರಾಗಿರುವಂತೆ ತೀರ್ಮಾನಿಸಲಾಯಿತು.

ಅಧ್ಯಕ್ಷತೆ ವಹಿಸಿದ್ದ ಚೊಟ್ಟೆಯಾಂಡಮಾಡ ಬೋಸು ವಿಶ್ವನಾಥ್‌ ಮಾತನಾಡಿ, ತಾವಳಗೇರಿ ಮೂಂದ್‌ ನಾಡ್‌ ಕೊಡವ ಸಮಾಜವು ಕೇವಲ ಮದುವೆ ಮತ್ತಿತರ ಕಾರ್ಯಕ್ರಮಗಳಿಗೆ ಸಭಾಂಗಣ ನೀಡಲು ಸೀಮಿತವಾಗಿರದೆ ಕೊಡವ ಜನಾಂಗದ ಶ್ರೇಯೋಭಿವೃದ್ಧಿಗಾಗಿ ಹಲವು ಕಾರ್ಯಕ್ರಮಗಳನ್ನು ನಡೆಸುತ್ತಿದೆ. ಕೊಡವ ಆಟ್‌ಪಾಟ್‌ ಶಿಬಿರ, ಯೋಗ ಶಿಬಿರ ಇತ್ಯಾದಿಗಳನ್ನು ನಡೆಸುತ್ತಿರುವುದರ ಜೊತೆಗೆ ಕೊಡವರ ಹಬ್ಬಗಳನ್ನು ಅರ್ಥಪೂರ್ಣವಾಗಿ ಆಚರಿಸುತ್ತಿದೆ. ಕಾವೇರಿ ಚಂಗ್ರಾಂದಿಯ ದಿವಸ ನಮ್ಮ ಕೊಡವ ಸಮಾಜ ಕಾವೇರಿ ತೀರ್ಥ ವಿತರಿಸುವುದರೊಂದಿಗೆ ಜನೋತ್ಸವದ ರೀತಿಯಲ್ಲಿ ಹತ್ತು ದಿನಗಳವರೆಗೆ ನಡೆಸುತ್ತಿರುವ ಸಾಂಸ್ಕೃತಿಕ ಹಾಗೂ ಕ್ರೀಡಾ ಕಾರ್ಯಕ್ರಮಕ್ಕೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ ಎಂದರು.

ಮದುವೆಯಲ್ಲಿ ಕೇಕ್, ಶಾಂಪೇನ್ ಬಳಕೆ ನಿಷೇಧ: ಕೊಡವ ಸಮಾಜದಿಂದ ನಿರ್ಣಯ
ಮಾಜಿ ಸೈನಿಕ ಹಾಗೂ ನಾಡ್‌ ತಕ್ಕರಾಗಿದ್ದ ದಿವಂಗತ ಕೈಬಿಲೀರ ಬೋಪಯ್ಯರವರ ಜ್ಞಾಪಕಾರ್ಥ ಅವರ ಪತ್ನಿ ಪಾರ್ವತಿ ಬೋಪಯ್ಯ ಸ್ಥಾಪಿಸಿರುವ ದತ್ತಿ ನಿಧಿಯಲ್ಲಿ ಹತ್ತನೆ ತರಗತಿಯ ಪರೀಕ್ಷೆಯಲ್ಲಿ ಕನ್ನಡದಲ್ಲಿ ಅತಿ ಹೆಚ್ಚು ಅಂಕ ಪಡೆದು ತೇರ್ಗಡೆಯಾಗಿರುವ ಕೊಡವ ಸಮಾಜದ ಸದಸ್ಯರ ಮಕ್ಕಳಿಗೆ ಬಹುಮಾನ ವಿತರಿಸಲಾಯಿತು.

ಉಪಾಧ್ಯಕ್ಷ ಮಾಣೀರ ವಿಜಯ ನಂಜಪ್ಪ, ಕಾರ್ಯದರ್ಶಿ ಮನ್ನೇರ ರಮೇಶ್‌, ಖಜಾಂಚಿ ಚೊಟ್ಟೆಯಾಂಡಮಾಡ ವಿಶುರಂಜಿ, ಕ್ರೀಡೆ ಸಾಂಸ್ಕೃತಿಕ ಸಮಿತಿ ಅಧ್ಯಕ್ಷ ಕಟ್ಟೇರ ಈಶ್ವರ, ಸಂಚಾಲಕ ಚೆಟ್ಟಂಗಡ ರವಿಸುಬ್ಬಯ್ಯ, ನಿರ್ದೇಶಕರಾದ ತಡಿಯಂಗಡ ಕರುಂಬಯ್ಯ, ಆಂಡಮಡ ಸತೀಶ್‌, ಮನ್ನೇರ ಕಾವೇರಮ್ಮ, ಚಂಗುಲಂಡ ಅಶ್ವಿನಿ ಸತೀಶ್‌, ನಾಡ್‌ ತಕ್ಕ ಕೈಬಿಲೀರ ಹರೀಶ್‌ ಅಪ್ಪಯ್ಯ ಉಪಸ್ಥಿತರಿದ್ದರು.

ಮದುವೆಯಲ್ಲಿ ಮದ್ಯ ಬಳಕೆ ನಿಷೇಧಿಸಿ