ಅಮೆರಿಕದಲ್ಲಿ ಸಿಖ್ ಟ್ಯಾಕ್ಸಿ ಚಾಲಕನ ಮೇಲೆ ಹಲ್ಲೆ: ಟರ್ಬನ್ ಕೆಡವಿದ ದುಷ್ಕರ್ಮಿ

ನ್ಯೂಯಾರ್ಕ್: ಅಮೆರಿಕದಲ್ಲಿ ಮತ್ತೊಂದು ದ್ವೇಷ ಅಪರಾಧ ಪ್ರಕರಣ ವರದಿಯಾಗಿದ್ದು, ಭಾರತ ಮೂಲದ ಸಿಖ್ ಟ್ಯಾಕ್ಸಿ ಚಾಲಕನ ಮೇಲೆ ಅಪರಿಚಿತ ವ್ಯಕ್ತಿಯೊಬ್ಬ ಹಲ್ಲೆ ನಡೆಸಿದ್ದಾನೆ. ಆತನ ಟರ್ಬನ್ ಬೀಳಿಸಿದ್ದು, ಸಿಖ್ ವ್ಯಕ್ತಿಯನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾನೆ. ಈ ಘಟನೆ ಜೆಕೆಎಫ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಹೊರಭಾಗದಲ್ಲಿ ನಡೆದಿದ್ದು, ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ.

ಈ ಘಟನೆ ಬಹಳ ಆಘಾತಕಾರಿಯಾಗಿದೆ ಎಂದಿರುವ ಅಮೆರಿಕದಲ್ಲಿನ ಭಾರತದ ಕಾನ್ಸುಲೇಟ್ ಜನರಲ್, ಅಮೆರಿಕದ ಅಧಿಕಾರಿಗಳ ಜತೆಗೆ ಈ ವಿಚಾರ ಚರ್ಚಿಸಿದ್ದು, ಘಟನೆ ಬಗ್ಗೆ ತನಿಖೆ ನಡೆಸುವಂತೆ ಮನವಿ ಮಾಡಿರುವುದಾಗಿ ತಿಳಿಸಿದ್ದಾರೆ.
ಅಮೆರಿಕದ ರೈಲು ಯಾರ್ಡ್‌ನಲ್ಲಿ ಗುಂಡಿನ ದಾಳಿ: ಭಾರತ ಮೂಲದ ವ್ಯಕ್ತಿ ಸೇರಿ 8 ಮಂದಿ ಬರ್ಬರ ಹತ್ಯೆ
ಈ ಘಟನೆ ಯಾವಾಗ ನಡೆದಿದೆ ಎನ್ನುವುದು ಗೊತ್ತಾಗಿಲ್ಲ. ನವಜೋತ್ ಪಾಲ್ ಕೌರ್ ಎಂಬುವವರು ಜನವರಿ 4ರಂದು ಟ್ವಿಟ್ಟರ್‌ನಲ್ಲಿ ವಿಡಿಯೋ ಹಂಚಿಕೊಂಡಿದ್ದಾರೆ. ಇದರಲ್ಲಿ ವಿಮಾನ ನಿಲ್ದಾಣದ ಹೊರಗೆ ವ್ಯಕ್ತಿಯೊಬ್ಬ ಸಿಖ್ ಟ್ಯಾಕ್ಸಿ ಚಾಲಕನ ಮೇಲೆ ಹಲ್ಲೆ ನಡೆಸುವುದು ಸೆರೆಯಾಗಿದೆ. ವಿಮಾನ ನಿಲ್ದಾಣದಲ್ಲಿ ವ್ಯಕ್ತಿಯೊಬ್ಬರು ಈ ವಿಡಿಯೋ ಚಿತ್ರೀಕರಿಸಿರುವುದಾಗಿ ಅವರು ತಿಳಿಸಿದ್ದಾರೆ.

ದಾಳಿಕೋರ, ಸಿಖ್ ವ್ಯಕ್ತಿ ಮೇಲೆ ಕೀಳು ಪದಗಳನ್ನು ಬಳಸುವುದು ಸೆರೆಯಾಗಿದೆ. ಆತ ಪದೇ ಪದೇ ಗುದ್ದುವುದಲ್ಲದೆ, ಅವರ ಟರ್ಬನ್ ಅನ್ನು ಕೆಳಗೆ ಬೀಳಿಸಿದ್ದಾನೆ. ಈ ವಿಡಿಯೋವನ್ನು ಅನೇಕರು ಹಂಚಿಕೊಂಡಿದ್ದು, ಹಲ್ಲೆ ನಡೆಸಿದ ವ್ಯಕ್ತಿ ವಿರುದ್ಧ ಕ್ರಮ ತೆಗೆದುಕೊಳ್ಳುವಂತೆ ಆಗ್ರಹಿಸಿದ್ದಾರೆ.

‘ಜಾನ್ ಎಫ್ ಕೆನಡಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವ್ಯಕ್ತಿಯೊಬ್ಬರು ಈ ವಿಡಿಯೋ ಚಿತ್ರೀಕರಿಸಿದ್ದಾರೆ. ನನಗೆ ಈ ವಿಡಿಯೋದ ಮೇಲೆ ಹಕ್ಕು ಇಲ್ಲ. ಆದರೆ ನಮ್ಮ ಸಮಾಜದಲ್ಲಿ ದ್ವೇಷ ಕಾರುವುದು ಮುಂದುವರಿಸಿದೆ ಎಂಬ ವಾಸ್ತವವನ್ನು ಉಲ್ಲೇಖಿಸಲು ಬಯಸುತ್ತೇನೆ. ದುರದೃಷ್ಟವಶಾತ್ ಸಿಖ್ ಕ್ಯಾಬ್ ಚಾಲಕರು ಮತ್ತೆ ಮತ್ತೆ ದೌರ್ಜನ್ಯಕ್ಕೆ ಒಳಗಾಗುತ್ತಿದ್ದಾರೆ’ ಎಂದು ಕೌರ್ ಟ್ವೀಟ್ ಮಾಡಿದ್ದಾರೆ.
ಅಮೆರಿಕದಲ್ಲಿ ಗುಂಡಿನ ದಾಳಿ: ಭಾರತೀಯ ಮೂಲದ ನಾಲ್ವರು ಸಿಖ್ಖರು ದುರ್ಮರಣ, ಮಾಜಿ ಉದ್ಯೋಗಿಯಿಂದ ಕೃತ್ಯ!
ಈ ಘಟನೆ ತೀವ್ರ ಖೇದಕರ ಎಂದು ಅಮೆರಿಕ ಪ್ರತಿಕ್ರಿಯೆ ನೀಡಿದೆ. ‘ಜೆಎಫ್‌ಕೆ ವಿಮಾನ ನಿಲ್ದಾಣದಲ್ಲಿ ಕಳೆದ ವಾರ ವಿಡಿಯೋದಲ್ಲಿ ಸೆರೆಯಾದ ಸಿಖ್ ಕ್ಯಾಬ್ ಚಾಲಕನ ಮೇಲಿನ ದಾಳಿಯ ವರದಿಗಳಿಂದ ನಮಗೆ ಬಹಳ ಆಘಾತವಾಗಿದೆ. ನಮ್ಮ ವೈವಿಧ್ಯವು ಅಮೆರಿಕವನ್ನು ಬಲಗೊಳಿಸುತ್ತದೆ. ಹಿಂಸೆ ಆಧಾರಿತ ದ್ವೇಷದ ಯಾವುದೇ ಸ್ವರೂಪವನ್ನು ನಾವು ಖಂಡಿಸುತ್ತೇವೆ’ ಎಂದು ದಕ್ಷಿಣ ಮತ್ತು ಕೇಂದ್ರ ಏಷ್ಯಾ ವ್ಯವಹಾರಗಳ ಬ್ಯೂರೋದ ವಿದೇಶಾಂಗ ಇಲಾಖೆ ಹೇಳಿದೆ.

ಈ ಘಟನೆ ಎಲ್ಲಿಯೇ ನಡೆದಿರಲಿ. ದ್ವೇಷ ಅಪರಾಧದ ತಪ್ಪಿತಸ್ಥರನ್ನು ಅವರ ಕೃತ್ಯಗಳಿಗೆ ಹೊಣೆಗಾರರನ್ನಾಗಿ ಮಾಡುವುದು ನಮ್ಮೆಲ್ಲರ ಜವಾಬ್ದಾರಿ ಎಂದು ತಿಳಿಸಿದೆ. 2017 ಮತ್ತು 2019ರಲ್ಲಿ ಸಿಖ್ ಚಾಲಕರ ವಿರುದ್ಧ ಇದೇ ರೀತಿಯ ದ್ವೇಷ ಪ್ರಕರಣಗಳು ವರದಿಯಾಗಿದ್ದವು.