ಪೂಜಾರ ಬ್ಯಾಟಿಂಗ್‌ನಲ್ಲಿ ಹಾಶೀಮ್‌ ಆಮ್ಲಾ ಕಂಡಿದ್ದೇನೆ ಎಂದ ಗವಾಸ್ಕರ್‌!

ಹೊಸದಿಲ್ಲಿ: ದಕ್ಷಿಣ ಆಫ್ರಿಕಾ ವಿರುದ್ಧ ಎರಡನೇ ಟೆಸ್ಟ್‌ ಪಂದ್ಯದಲ್ಲಿ ಭಾರತ ತಂಡ 7 ವಿಕೆಟ್‌ ಸೋಲು ಅನುಭವಿಸಿದ ಹೊರತಾಗಿಯೂ ಬ್ಯಾಟಿಂಗ್‌ ದಿಗ್ಗಜ ಸುನೀಲ್ ಗವಾಸ್ಕರ್‌ ಹಿರಿಯ ಬ್ಯಾಟ್ಸ್‌ಮನ್‌ ಚೇತೇಶ್ವರ್‌ ಪೂಜಾರ ಅವರ ದ್ವಿತೀಯ ಇನಿಂಗ್ಸ್‌ ಬ್ಯಾಟಿಂಗ್‌ ಪ್ರದರ್ಶನವನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದ್ದಾರೆ.

ಭಾರತದ ವಿರುದ್ಧ ಸೆಂಚೂರಿಯನ್‌ ಟೆಸ್ಟ್‌ ಪಂದ್ಯದಲ್ಲಿ113 ರನ್‌ಗಳಿಂದ ಸೋಲು ಅನುಭವಿಸಿದ್ದ ದಕ್ಷಿಣ ಆಫ್ರಿಕಾ ತಂಡ, ಎರಡನೇ ಹಣಾಹಣಿಯಲ್ಲಿ ಗೆಲುವು ಪಡೆಯುವ ಮೂಲಕ ಮೂರು ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ 1-1 ಸಮಬಲ ಸಾಧಿಸಿದೆ. ಎರಡನೇ ಟೆಸ್ಟ್‌ ದ್ವಿತೀಯ ಇನಿಂಗ್ಸ್‌ನ ಒತ್ತಡದ ಸನ್ನಿವೇಶದಲ್ಲಿ ಅಜೇಯ 96 ರನ್‌ ಗಳಿಸಿದ್ದ ನಾಯಕ ಡೀನ್ ಎಲ್ಗರ್‌ ಹರಿಣಗಳ ಗೆಲುವಿನಲ್ಲಿ ಮಹತ್ತರ ಪಾತ್ರವಹಿಸಿದ್ದರು.

ಅಂದಹಾಗೆ ಈ ಟೆಸ್ಟ್‌ ಸರಣಿಯಲ್ಲಿ ಭಾರತ ತಂಡದ ಮಧ್ಯಮ ಕ್ರಮಾಂಕದ ಬ್ಯಾಟಿಂಗ್‌ ಸಮಸ್ಯೆ ಇದೆ. ಅಷ್ಟೇ ಅಲ್ಲದೆ ಹಿರಿಯ ಬ್ಯಾಟ್ಸ್‌ಮನ್‌ಗಳಾದ ಚೇತೇಶ್ವರ್‌ ಪೂಜಾರ ಹಾಗೂ ಅಜಿಂಕ್ಯ ರಹಾನೆ ಕಳೆದ ಒಂದು ವರ್ಷದಿಂದ ವೈಫಲ್ಯ ಅನುಭವಿಸುವ ಮೂಲಕ ಸಾಕಷ್ಟು ಟೀಕೆಗೆ ಗುರಿಯಾಗಿದ್ದರು. ಆದರೆ ಜೊಹಾನ್ಸ್‌ಬರ್ಗ್‌ ಟೆಸ್ಟ್‌ ದ್ವಿತೀಯ ಇನಿಂಗ್ಸ್‌ನಲ್ಲಿ ಈ ಇಬ್ಬರೂ ತಲಾ ಅರ್ಧಶತಕಗಳನ್ನು ಸಿಡಿಸುವ ಮೂಲಕ ದಕ್ಷಿಣ ಆಫ್ರಿಕಾ ತಂಡಕ್ಕೆ ಸ್ಪರ್ಧಾತ್ಮಕ ಗುರಿ ನೀಡುವಲ್ಲಿ ನೆರವಾಗಿದ್ದರು.

ಆಫ್ರಿಕಾ ವಿರುದ್ಧ ಭಾರತ 2ನೇ ಟೆಸ್ಟ್‌ ಸೋಲಲು 3 ಕಾರಣ ತಿಳಿಸಿದ ಗಂಭೀರ್‌!

ಕಳೆದ ಒಂದು ವರ್ಷದಿಂದ ದೊಡ್ಡ ಇನಿಂಗ್ಸ್‌ ಆಡುವಲ್ಲಿ ಚೇತೇಶ್ವರ್‌ ಪೂಜಾರ ಸತತ ವೈಫಲ್ಯ ಅನುಭವಿಸುತ್ತಿದ್ದಾರೆ. ಇದರ ಹೊರತಾಗಿಯೂ ಭಾರತ ತಂಡದ ಮಾಜಿ ನಾಯಕ ಸುನೀಲ್‌ ಗವಾಸ್ಕರ್‌, ಹಿರಿಯ ಬ್ಯಾಟ್ಸ್‌ಮನ್‌ ಅನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದ್ದು, ದಕ್ಷಿಣ ಆಫ್ರಿಕಾ ದಿಗ್ಗಜ ಹಾಶೀಮ್‌ ಆಮ್ಲಾಗೆ ಹೋಲಿಕೆ ಮಾಡಿದ್ದಾರೆ.

“ನಾನು ಪೂಜಾರರನ್ನು ನೋಡಿದಾಗಲೆಲ್ಲಾ ಅವರು ಹಾಶೀಮ್‌ ಆಮ್ಲಾರನ್ನು ನೆನಪಿಸುತ್ತಾರೆ. ಹಾಶೀಮ್‌ ಆಮ್ಲಾ ಬ್ಯಾಟಿಂಗ್‌ ಸಾಕಷ್ಟು ಶಾಂತವಾಗಿದ್ದು, ಎಲ್ಲವೂ ನಿಯಂತ್ರಣದಲ್ಲಿರುತ್ತಿತ್ತು. ಭಾರತವಾಗಲೇ ಅಥವಾ ಬೇರೆ ಯಾವುದೇ ದೇಶವಿರಲಿ ಅಲ್ಲಿ ಬಾಲ್‌ ತುಂಬಾ ಬೌನ್ಸ್‌ ಆಗಲಿ ಅಥವಾ ಹೆಚ್ಚು ಟರ್ನ್ ಆಗಲಿ ಈ ಎಲ್ಲಾ ಸ್ಥಳಗಳಲ್ಲಿ ಹಾಶೀಮ್‌ ಆಮ್ಲಾ ಶಾಂತವಾಗಿ ಬ್ಯಾಟ್‌ ಮಾಡುತ್ತಿದ್ದರು. ಇದೇ ಸ್ವಭಾವವನ್ನು ಚೇತೇಶ್ವರ್ ಪೂಜಾರ ಹೊಂದಿದ್ದಾರೆ,” ಎಂದು ಸೂಪರ್‌ಸ್ಪೋರ್ಟ್‌ಗೆ ತಿಳಿಸಿದ್ದಾರೆ.

ವಿರಾಟ್ ಕೊಹ್ಲಿ ಗುಣಮುಖ, ಸಿಹಿ ಸುದ್ದಿ ನೀಡಿದ ಕೆಎಲ್ ರಾಹುಲ್!

ಚೇತೇಶ್ವರ್‌ ಪೂಜಾರ ಅವರ ಆಟದ ಮನೋಧರ್ಮ ಭಯಾನಕವಾಗಿದೆ ಎಂದು ಇದೇ ವೇಳೆ ಸುನೀಲ್ ಗವಾಸ್ಕರ್‌ ಹೇಳಿದರು. “ಇಂಥಾ ಮನೋಧರ್ಮವನ್ನು ಹೊಂದಿರುವ ಆಟಗಾರನನ್ನು ಡ್ರೆಸ್ಸಿಂಗ್ ಕೊಠಡಿಯಲ್ಲಿ ಹೊಂದಿರುವುದು ದೊಡ್ಡ ಆಶಿರ್ವಾದ. ಮೈದಾನದಲ್ಲಿ ಅಷ್ಟೇ ಅಲ್ಲದೆ, ಡ್ರೆಸ್ಸಿಂಗ್‌ ಕೊಂಠಡಿಯಲ್ಲಿ ಈ ರೀತಿಯ ಆಟಗಾರ ಅಗತ್ಯವಿರುತ್ತದೆ. ಏಕೆಂದರೆ ಇಂಟರ್‌ನ್ಯಾಷನಲ್‌ ಕ್ರಿಕೆಟ್‌ನಲ್ಲಿ ಸಾಕಷ್ಟು ಒತ್ತಡದ ಸನ್ನಿವೇಶಗಳು ಇರುತ್ತವೆ. ಈ ವೇಳೆ ಪೂಜಾರ ಅವರಂಥಾ ಆಟಗಾರರು ಇರುವುದು ತಂಡಕ್ಕೆ ಪ್ಲಸ್ ಪಾಯಿಂಟ್‌. ಶಾಂತ ಸ್ವಭಾವದ ವ್ಯಕ್ತಿ ತಮ್ಮದೇ ಆದ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರೆ, ಡ್ರೆಸ್ಸಿಂಗ್‌ ಕೊಠಡಿಯಲ್ಲಿ ದೊಡ್ಡ ವ್ಯತ್ಯಾಸವನ್ನು ತಂದುಕೊಡುತ್ತದೆ,” ಎಂದು ಸುನೀಲ್‌ ಗವಾಸ್ಕರ್‌ ಹೇಳಿದ್ದಾರೆ.

‘ಕೊಹ್ಲಿ ಇಲ್ಲದೆ ಇನ್ನೇನಾಗುತ್ತೆ’ ನೆಟ್ಟಿಗರಿಂದ ಟ್ರೋಲಾದ ಭಾರತದ ಆಟಗಾರರು!