ಟೆಸ್ಟ್‌ ಚಾಂಪಿಯನ್ಸ್‌ ನ್ಯೂಜಿಲೆಂಡ್‌ಗೆ ಸೋಲುಣಿಸಿದ ಬಾಂಗ್ಲಾದೇಶ!

ಮೌಂಟ್‌ ಮೌಂಗನುಯಿ(ನ್ಯೂಜಿಲೆಂಡ್‌): ಎಬಾದತ್‌ ಹುಸೇನ್‌(46ಕ್ಕೆ 6) ಅವರ ಮಾರಕ ದಾಳಿಯ ಸಹಾಯದಿಂದ ಬಾಂಗ್ಲಾದೇಶ ತಂಡ ಪ್ರಥಮ ಟೆಸ್ಟ್‌ ಪಂದ್ಯದಲ್ಲಿ ವಿಶ್ವ ಟೆಸ್ಟ್‌ ಚಾಂಪಿಯನ್ಸ್‌ ನ್ಯೂಜಿಲೆಂಂಡ್‌ ವಿರುದ್ಧ 8 ವಿಕೆಟ್‌ಗಳಿಂದ ಭರ್ಜರಿ ಗೆಲುವು ಪಡೆದುಕೊಂಡಿದೆ.

ಇದರೊಂದಿಗೆ 2017ರ ಮಾರ್ಚ್‌ ಬಳಿಕ ನ್ಯೂಜಿಲೆಂಡ್‌ ನೆಲದಲ್ಲಿ ಕಿವೀಸ್‌ ವಿರುದ್ಧ ಟೆಸ್ಟ್‌ ಪಂದ್ಯ ಗೆದ್ದ ಮೊದಲ ತಂಡ ಎಂಬ ಕೀರ್ತಿಗೆ ಬಾಂಗ್ಲಾದೇಶ ಬುಧವಾರ ಪಾತ್ರವಾಯಿತು. ಅಷ್ಟೇ ಅಲ್ಲದೆ ಕಿವೀಸ್‌ ವಿರುದ್ಧ ಬಾಂಗ್ಲಾದೇಶ ತಂಡಕ್ಕೆ ಮೊದಲ ಟೆಸ್ಟ್‌ ಗೆಲುವು ಕೂಡ ಇದಾಯಿತು. ಈ ಗೆಲುವಿನೊಂದಿಗೆ ಬಾಂಗ್ಲಾ ಎರಡು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.

ಬುಧವಾರ ಬೆಳಗ್ಗೆ ಕೇವಲ 40 ರನ್‌ ಸುಲಭ ಗುರಿ ಹಿಂಬಾಲಿಸಿದ ಬಾಂಗ್ಲಾದೇಶ ತಂಡ 16.5 ಓವರ್‌ಗಳಿಗೆ ಎರಡು ವಿಕೆಟ್‌ ನಷ್ಟಕ್ಕೆ 42 ರನ್‌ ಗಳಿಸಿ ಐತಿಹಾಸಿಕ ಗೆಲುವು ಪಡೆಯಿತು. ನಾಯಕ ಮೊಮಿನುಲ್ ಹಕ್(13*) ಹಾಗೂ ಮುಷ್ಫಿಕರ್‌ ರಹೀಮ್‌ (5*) ಅಜೇಯರಾಗಿ ಉಳಿದರು. ಇನ್ನು ನ್ಯೂಜಿಲೆಂಡ್‌ ಪರ ಟಿಮ್‌ ಸೌಥೀ ಮತ್ತು ಕೈಲ್‌ ಜೇಮಿಸನ್ ತಲಾ ಒಂದೊಂದು ವಿಕೆಟ್‌ ಪಡದುಕೊಂಡರು.

ಆಫ್ರಿಕಾ 229ಕ್ಕೆ ಆಲ್‌ಔಟ್‌, ಭಾರತಕ್ಕೆ ಪೂಜಾರ-ರಹಾನೆ ಆಸರೆ!

ಇದಕ್ಕೂ ಮುನ್ನ ದ್ವಿತೀಯ ಇನಿಂಗ್ಸ್‌ನಲ್ಲಿ 5 ವಿಕೆಟ್‌ ನಷ್ಟಕ್ಕೆ 147 ರನ್‌ಗಳೊಂದಿಗೆ 5ನೇ ದಿನದಾಟವನ್ನು ಆರಂಭಿಸಿದ ನ್ಯೂಜಿಲೆಂಡ್‌ ತಂಡ ದೊಡ್ಡ ಮೊತ್ತ ಕಲೆಹಾಕುವಲ್ಲಿ ವಿಫಲವಾಯಿತು. ಐದನೇ ಹಾಗೂ ಅಂತಿಮ ದಿನ ಕೇವಲ 22 ರನ್ ಕಲೆ ಹಾಕುವ ಹೊತ್ತಿಗೆ ತನ್ನೆಲ್ಲಾ ವಿಕೆಟ್‌ಗಳನ್ನು ಕಳೆದುಕೊಂಡಿತು. ಕೈಲ್‌ ಜೇಮಿಸನ್‌ ಹಾಗೂ ಟಿಮ್‌ ಸೌಥೀ ಡಕ್‌ಔಟ್‌ ಆಗಿದ್ದು, ಕಿವೀಸ್‌ ಪಾಲಿಗೆ ಭಾರಿ ಹಿನ್ನಡೆಯಾಯಿತು.

ಬಾಂಗ್ಲಾದೇಶ ಪರ ದ್ವಿತೀಯ ಇನಿಂಗ್ಸ್‌ನಲ್ಲಿ ಅತ್ಯುತ್ತಮ ಬೌಲಿಂಗ್‌ ದಾಳಿ ನಡೆಸಿದ ಎಬಾದತ್‌ ಹುಸೇನ್‌ 6 ವಿಕೆಟ್‌ ಸಾಧನೆ ಮಾಡಿದರು. ವಿಲ್‌ ಯಂಗ್‌(69), ಡೆವೋನ್‌ ಕಾನ್ವೇ(13), ರಾಸ್‌ ಟೇಲರ್‌(40), ಹೆನ್ರಿ ನಿಕೋಲ್ಸ್‌(0), ಟಾಮ್‌ ಬ್ಲಂಡೆಲ್‌(0), ಕೈಲ್‌ ಜೇಮಿಸನ್‌(0) ಸೇರಿ ಪ್ರಮುಖ ಆರು ವಿಕೆಟ್‌ಗಳನ್ನು ಹುಸೇನ್‌ ಪಡೆಯುವ ಮೂಲಕ ಬಾಂಗ್ಲಾ ಗೆಲುವಿನಲ್ಲಿ ಮಹತ್ತರ ಪಾತ್ರವನ್ನು ವಹಿಸಿದರು ಹಾಗೂ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.

ಇದಕ್ಕೂ ಮುನ್ನ ಮೊದಲು ಬ್ಯಾಟ್‌ ಮಾಡಿದ್ದ ನ್ಯೂಜಿಲೆಂಡ್‌ ತಂಡ ಪ್ರಥಮ ಇನಿಂಗ್ಸ್‌ನಲ್ಲಿ 108.1 ಓವರ್‌ಗಳಿಗೆ 328 ರನ್‌ಗಳಿಗೆ ಆಲ್‌ಔಟ್‌ ಆಗಿತ್ತು. ಆತಿಥೇಯರ ಪರ ಡೆವೋನ್ ಕಾನ್ವೇ(122) 2022ರ ವರ್ಷದ ಮೊದಲ ಸೆಂಚುರಿ ಬಾರಿಸಿದ್ದರು ಹಾಗೂ ಮಧ್ಯಮ ಕ್ರಮಾಂಕದಲ್ಲಿ ಹೆನ್ರಿ ನಿಕೋಲ್ಸ್‌(75) ಅರ್ಧಶತಕ ಸಿಡಿಸಿದ್ದರು. ಬಾಂಗ್ಲಾ ಪರ ಶೋರಿಫುಲ್‌ ಇಸ್ಲಾಮ್ ಮತ್ತು ಮೆಹಡಿ ಹಸನ್‌ ತಲಾ ಮೂರು ವಿಕೆಟ್‌ ಕಬಳಿಸಿದ್ದರು.

ಇದಕ್ಕೆ ಪ್ರತ್ಯುತ್ತಮವಾಗಿ ಪ್ರಥಮ ಇನಿಂಗ್ಸ್‌ ಮಾಡಿದ್ದ ಬಾಂಗ್ಲಾದೇಶ ತಂಡ ಅದ್ಭುತ ಬ್ಯಾಟಿಂಗ್‌ ಪ್ರದರ್ಶನ ತೋರಿತ್ತು. ಮಹಮ್ಮದುಲ್ ಹಸನ್‌ ಜಾಯ್‌(78), ಶಾಂಟೊ(64), ಮೊಮಿನುಲ್‌(88), ಲಟಾನ್‌ ದಾಸ್‌(86) ಅವರ ಅರ್ಧಶತಕಗಳಿಂದ ಬಾಂಗ್ಲಾದೇಶ 176.2 ಓವರ್‌ಗಳಿಗೆ 458 ರನ್‌ಗಳಿಗೆ ಆಲ್‌ಔಟ್‌ ಆಗಿತ್ತು. ಆ ಮೂಲಕ ಪ್ರಥಮ ಇನಿಂಗ್ಸ್‌ನಲ್ಲಿ 130 ರನ್ ಮುನ್ನಡೆ ಪಡೆದಿತ್ತು. ಇದು ಪಂದ್ಯದ ಪಾಲಿಗೆ ಟರ್ನಿಂಗ್‌ ಪಾಯಿಂಟ್‌ ಆಗಿತ್ತು.

ಪೆವಿಲಿಯನ್‌ಗೆ ತೆರಳುತ್ತಿದ್ದ ರಾಹುಲ್‌ ಜೊತೆ ಎಲ್ಗರ್‌ ಕಿರಿಕ್‌! ವಿಡಿಯೋ

ಸಂಕ್ಷಿಪ್ತ ಸ್ಕೋರ್‌

ನ್ಯೂಜಿಲೆಂಡ್‌: ಪ್ರಥಮ ಇನಿಂಗ್ಸ್‌ 108.1 ಓವರ್‌ಗಳಿಗೆ 328/10; ಡೆವೋನ್ ಕಾನ್ವೇ 122, ಹೆನ್ರಿ ನಿಕೋಲ್ಸ್‌ 75; ಶೋರಿಫುಲ್‌ ಇಸ್ಲಾಮ್ 69ಕ್ಕೆ 3, ಮೆಹಡಿ ಹಸನ್‌ ಮೆಹಡಿ ಹಸನ್‌ 86ಕ್ಕೆ 3)

ಬಾಂಗ್ಲಾದೇಶ: ಪ್ರಥಮ ಇನಿಂಗ್ಸ್ 176.2 ಓವರ್‌ಗಳಿಗೆ 458/10 (ಮಹಮ್ಮದುಲ್ ಹಸನ್‌ ಜಾಯ್‌ 78, ಶಾಂಟೊ 64, ಮೊಮಿನುಲ್‌ 88, ಲಟಾನ್‌ ದಾಸ್‌ 86; ಟ್ರೆಂಟ್‌ ಬೌಲ್ಟ್‌ 85 ಕ್ಕೆ 4, ನೀಲ್‌ ವ್ಯಾಗ್ನರ್‌ 101ಕ್ಕೆ 3)

ನ್ಯೂಜಿಲೆಂಡ್‌: ದ್ವಿತೀಯ ಇನಿಂಗ್ಸ್‌ 169/10 (ವಿಲ್‌ ಯಂಗ್‌ 69, ರಾಸ್‌ ಟೇಲರ್‌ 40; ತಸ್ಕಿನ್‌ ಅಹ್ಮದ್‌ 36ಕ್ಕೆ 3, ಎಬಾದತ್‌ ಹುಸೇನ್‌ 46ಕ್ಕೆ 6)

ಬಾಂಗ್ಲಾದೇಶ: ದ್ವಿತೀಯ ಇನಿಂಗ್ಸ್‌ 16.5 ಓವರ್‌ಗಳಿಗೆ 42/2 (ನಜ್ಮುಲ್‌ ಹುಸೇನ್‌ 17, ಮೊಮಿನುಲ್‌ ಹಕ್‌ 13*; ಕೈಲ್ ಜೇಮಿಸನ್‌ 12 ಕ್ಕೆ 1, ಟಿಮ್‌ ಸೌಥೀ 21 ಕ್ಕೆ 1)