ಹೈಲೈಟ್ಸ್‌:
- ಅಮೆರಿಕದ ಓಹಿಯೋದ ರಾಜಧಾನಿ ಕೊಲಂಬಸ್‌ನಲ್ಲಿ ದುರಂತ ಘಟನೆ
- ಕಳ್ಳ ಬಂದಿದ್ದಾನೆ ಎಂದು ಭಾವಿಸಿ ನಸುಕಿನ ವೇಳೆ ಗುಂಡು ಹಾರಿಸಿದ ವ್ಯಕ್ತಿ
- ತಂದೆ ಹಾರಿಸಿದ ಗುಂಡಿಗೆ ಮಾರಣಾಂತಿಕವಾಗಿ ಗಾಯಗೊಂಡ ಬಾಲಕಿ
- ಅಮೆರಿಕದಲ್ಲಿ ಬಂದೂಕು ಹಿಂಸಾಚಾರ ಪ್ರಕರಣಗಳ ಸಂಖ್ಯೆಯಲ್ಲಿ ಏರಿಕೆ
ಜಾನೇ ಹೇರ್‌ಸ್ಟನ್ ತಂದೆಯ ಬಂದೂಕಿನ ಗುಂಡಿಗೆ ಬಲಿಯಾದ ನತದೃಷ್ಟೆ. ಅಮೆರಿಕದಲ್ಲಿ 2021ರಲ್ಲಿ ಬಂದೂಕು ಹಿಂಸಾಚಾರಕ್ಕೆ ಬಲಿಯಾದವರ ದೊಡ್ಡ ಪಟ್ಟಿಗೆ ವರ್ಷದ ಕೊನೆಯಲ್ಲಿ ಮತ್ತೊಂದು ಹೆಸರು ಸೇರ್ಪಡೆಯಾದಂತಾಗಿದೆ.
ಮಿಚಿಗನ್ ಹೈಸ್ಕೂಲಿನಲ್ಲಿ ವಿದ್ಯಾರ್ಥಿಯಿಂದ ಗುಂಡಿನ ದಾಳಿ: ಮೂವರು ಮಕ್ಕಳ ಸಾವು
ಬಾಲಕಿಯ ಮಗಳು ಬುಧವಾರ ನಸುಕಿನ 4.30ರ ವೇಳೆಗೆ ತುರ್ತು ಸೇವೆಗೆ ಕರೆ ಮಾಡಿದ್ದರು. ತಮ್ಮ ಮಗಳು ಗ್ಯಾರೇಜ್‌ನ ನೆಲದ ಮೇಲೆ ರಕ್ತದ ಮಡುವಿನಲ್ಲಿ ಬಿದ್ದಿರುವುದಾಗಿ, ಅಕ್ರಮ ನುಸುಳುಕಾರ ಎಂದು ತಪ್ಪಾಗಿ ಭಾವಿಸಿ ಆಕೆಯ ತಂದೆಯೇ ಗುಂಡು ಹಾರಿಸಿದ್ದಾಗಿ ತಿಳಿಸಿದ್ದರು.
ಎಚ್ಚರಗೊಳ್ಳುವಂತೆ ಮಗಳನ್ನು ಪೋಷಕರು ಹತಾಶೆ ಮತ್ತು ದುಃಖದಿಂದ ಬೇಡಿಕೊಳ್ಳುವ ಸ್ಥಿತಿ ಮನಕಲಕುವಂತಿತ್ತು ಎಂದು ಸ್ಥಳೀಯ ಪತ್ರಿಕೆ ದಿ ಕೊಲಂಬಸ್ ಡಿಸ್‌ಪ್ಯಾಚ್ ವರದಿ ಮಾಡಿದೆ. ಐದು ನಿಮಿಷದಲ್ಲಿಯೇ ತುರ್ತು ಸೇವಾ ಸಿಬ್ಬಂದಿ ಸ್ಥಳಕ್ಕೆ ತಲುಪಿದ್ದು, ಕೂಡಲೇ ಬಾಲಕಿಯನ್ನು ಸಮೀಪದ ಆಸ್ಪತ್ರೆಗೆ ಸಾಗಿಸಿದರು. ಆದರೆ 5.42ರ ವೇಳೆಗೆ ಆಕೆ ಮೃತಪಟ್ಟಿರುವುದಾಗಿ ವೈದ್ಯರು ಘೋಷಿಸಿದರು.
ಬಾಲಕಿ ನಸುಕಿನಲ್ಲಿ ಗ್ಯಾರೇಜ್‌ಗೆ ಏಕೆ ಹೋಗಿದ್ದು ಎಂದು ಮನೆಯವರಿಗೆ ಗೊತ್ತಾಗಿಲ್ಲ. ಅಲ್ಲಿ ಅಲಾರಂ ಮೊಳಗಿದ್ದರಿಂದ ಬಾಲಕಿಯ ತಂದೆ, ಯಾರೋ ನುಸುಳಿ ಬಂದಿರಬೇಕು ಎಂದು ಗಾಬರಿಯಲ್ಲಿ ಗುಂಡು ಹಾರಿಸಿದ್ದಾನೆ.
ಚಿತ್ರೀಕರಣದಲ್ಲಿ ದುರಂತ: ನಟನ ಗನ್‌ನಿಂದ ಸಿಡಿದ ಗುಂಡಿಗೆ ಛಾಯಾಗ್ರಾಹಕಿ ಸಾವು, ನಿರ್ದೇಶಕನಿಗೆ ಗಾಯ
‘ಈ ದುರಂತ ಘಟನೆಯಿಂದ ನಮಗೆ ಬಹಳ ದುಃಖವಾಗಿದೆ. ಈ ಸಂಕಷ್ಟದ ಸಂದರ್ಭದಲ್ಲಿ ವಿದ್ಯಾರ್ಥಿಗಳು ಮತ್ತು ಪೋಷಕರಿಗೆ ನೆರವಾಗಲು ಎಲ್ಲ ರೀತಿಯ ಪ್ರಯತ್ನ ಮಾಡುತ್ತೇವೆ’ ಎಂದು ಹೇರ್‌ಸ್ಟನ್ ಓದುತ್ತಿದ್ದ ಶಾಲೆ, ಎಲ್ಲ ಪೋಷಕರಿಗೆ ಪತ್ರ ಬರೆದಿದೆ.
ಇದೇ ಜಾಗದಿಂದ ಕೇವಲ ಒಂದು ಕಿಮಿ ದೂರದಲ್ಲಿ ಡಿಸೆಂಬರ್ 7ರಂದು 6, 9 ಮತ್ತು 22 ವರ್ಷದ ಮೂವರನ್ನು ಗುಂಡಿಕ್ಕಿ ಹತ್ಯೆ ಮಾಡಲಾಗಿತ್ತು. ಇವರಲ್ಲಿ ಇಬ್ಬರು ಚಿಕ್ಕಮಕ್ಕಳು ಓಹಿಯೋ ರಾಜಧಾನಿ ಕೊಲಂಬಸ್‌ನಲ್ಲಿನ ಇದೇ ಶಾಲೆಯಲ್ಲಿ ಓದುತ್ತಿದ್ದರು. ಕೊಲಂಬಸ್ ನಗರದಲ್ಲಿ 2021ರಲ್ಲಿ ಇತಿಹಾಸದಲ್ಲಿಯೇ ಅತಿ ಹೆಚ್ಚಿನ ಶೂಟಿಂಗ್‌ಗಳು ಮತ್ತು ಹತ್ಯಾಕಾಂಡಗಳು ನಡೆದಿವೆ ಎಂದು ಪೊಲೀಸರು ಹೇಳಿದ್ದಾರೆ.
ಎರಡು ದಿನಗಳ ಹಿಂದಷ್ಟೇ ನಾರ್ತ್ ಕೆರೋಲಿನಾದಲ್ಲಿ ಪೊಲೀಸ್ ಅಧಿಕಾರಿಯೊಬ್ಬರು ಆಕಸ್ಮಿಕವಾಗಿ ಗುಂಡು ಹಾರಿಸಿ ತಮ್ಮ 15 ವರ್ಷದ ಮಗನನ್ನು ಗಾಯಗೊಳಿಸಿದ್ದರು.
ಕೋವಿಡ್ 19 ಸಾಂಕ್ರಾಮಿಕದ ಆರಂಭದಿಂದಲೂ ಅಮೆರಿಕದಲ್ಲಿ ಬಂದೂಕು ಹಿಂಸಾಚಾರ ಗಣನೀಯವಾಗಿ ಹೆಚ್ಚಾಗಿದೆ. ಗನ್ ವಯೋಲೆನ್ಸ್ ಆರ್ಕೈವ್ ಜಾಲತಾಣದ ಪ್ರಕಾರ, ಆತ್ಮಹತ್ಯೆಗಳು ಸೇರಿದಂತೆ ಅಮೆರಿಕ 44,000ಕ್ಕೂ ಅಧಿಕ ಬಂದೂಕಿನಿಂದ ಸಾವುಗಳನ್ನು ಕಂಡಿದೆ. ಇವುಗಳಲ್ಲಿ 1,517 ಅಪ್ರಾಪ್ತ ವಯಸ್ಸಿನವರಾಗಿದ್ದಾರೆ.