5 ವರ್ಷಗಳ ಸಿನಿ ಜರ್ನಿಯಲ್ಲಿ ರಶ್ಮಿಕಾ ಮಂದಣ್ಣ ಕಲಿತ 9 ಮುಖ್ಯ ಪಾಠ..!

ಕೊಡಗಿನ ಕುವರಿ, ಕನ್ನಡ ನಟಿ ರಶ್ಮಿಕಾ ಮಂದಣ್ಣ ಚಿತ್ರರಂಗಕ್ಕೆ ಕಾಲಿಟ್ಟು 5 ವರ್ಷಗಳು ತುಂಬಿದೆ. ಐದು ವರ್ಷಗಳ ಹಿಂದೆ ಡಿಸೆಂಬರ್ 30 ರಂದು ರಶ್ಮಿಕಾ ಮಂದಣ್ಣ ನಟನೆಯ ಚೊಚ್ಚಲ ಸಿನಿಮಾ ‘ಕಿರಿಕ್ ಪಾರ್ಟಿ’ ಬಿಡುಗಡೆಯಾಗಿತ್ತು. ಅಲ್ಲಿಂದ ರಶ್ಮಿಕಾ ಮಂದಣ್ಣ ಅವರ ಸಕ್ಸಸ್‌ಫುಲ್ ಸಿನಿ ಜರ್ನಿ ಶುರುವಾಯಿತು. ಐದು ವರ್ಷಗಳಲ್ಲಿ ಕನ್ನಡ, ತೆಲುಗು, ತಮಿಳು ಹಾಗೂ ಹಿಂದಿ ಭಾಷೆಯ ಚಿತ್ರಗಳಲ್ಲಿ ರಶ್ಮಿಕಾ ಮಂದಣ್ಣ ಅಭಿನಯಿಸಿದ್ದಾರೆ.

ಈ ಐದು ವರ್ಷಗಳಲ್ಲಿ ರಶ್ಮಿಕಾ ಮಂದಣ್ಣ ಕೆಲ ವಿವಾದಗಳಲ್ಲಿ ಸಿಲುಕಿದ್ದಾರೆ. ಅನೇಕ ಬಾರಿ ಟ್ರೋಲ್‌ಗಳಿಗೂ ಒಳಗಾಗಿದ್ದಾರೆ. ಬಹುತೇಕ ಯಶಸ್ಸನ್ನೇ ಕಂಡಿರುವ ನಟಿ ರಶ್ಮಿಕಾ ಮಂದಣ್ಣ ಐದು ವರ್ಷಗಳ ತಮ್ಮ ಸಿನಿ ಕೆರಿಯರ್‌ನಲ್ಲಿ ಒಂಬತ್ತು ಪಾಠಗಳನ್ನು ಕಲಿತಿದ್ದಾರೆ. ಆ 9 ಪಾಠಗಳು ಯಾವುವು ಗೊತ್ತಾ?

Rashmika Mandanna’s Last Name: ಸಮಂತಾ, ಪ್ರಿಯಾಂಕಾ ಬಳಿಕ ರಶ್ಮಿಕಾ ಬಗ್ಗೆ ಈಗ ಗುಲ್ಲೋ ಗುಲ್ಲು!
ರಶ್ಮಿಕಾ ಮಂದಣ್ಣ ಇನ್ಸ್ಟಾಗ್ರಾಮ್ ಪೋಸ್ಟ್
ಚಿತ್ರರಂಗದಲ್ಲಿ ಐದು ವರ್ಷಗಳನ್ನು ಪೂರ್ಣಗೊಳಿಸಿದ ಸಂದರ್ಭದಲ್ಲಿ ನಟಿ ರಶ್ಮಿಕಾ ಮಂದಣ್ಣ ಇನ್ಸ್ಟಾಗ್ರಾಮ್‌ನಲ್ಲಿ ಒಂದು ಪೋಸ್ಟ್ ಹಂಚಿಕೊಂಡಿದ್ದಾರೆ. ಇದೇ ಪೋಸ್ಟ್‌ನಲ್ಲಿ ತಾವು ಕಲಿತ 9 ಪಾಠಗಳ ಬಗ್ಗೆ ನಟಿ ರಶ್ಮಿಕಾ ಮಂದಣ್ಣ ಉಲ್ಲೇಖಿಸಿದ್ದಾರೆ.

ಮುಂಬೈನಲ್ಲಿ ವಿಜಯ್ ದೇವರಕೊಂಡ-ರಶ್ಮಿಕಾ ಮಂದಣ್ಣ ಡಿನ್ನರ್ ಡೇಟ್?
‘’ಸಿನಿಮಾ ರಂಗದಲ್ಲಿ ನಾನು ಐದು ವರ್ಷಗಳನ್ನು ಪೂರೈಸಿದ್ದೇನೆ. ವಾವ್.. ಇದು ಹೇಗಾಯಿತು..? ಈ ಐದು ವರ್ಷಗಳಲ್ಲಿ ನಾನು ಸುಮಾರು ಪಾಠಗಳನ್ನು ಕಲಿತಿದ್ದೇನೆ. ಆ ಪಾಠಗಳು ಏನು ಅಂದ್ರೆ…
1 – ಸಮಯವು ವೇಗವಾಗಿ ಹೋಗುತ್ತಿದೆ. ಪ್ರತಿದಿನವೂ ಮೆಮೊರೀಸ್ ಮಾಡಿಕೊಳ್ಳುವುದು..
2 – ಹೃದಯದಾಳದಿಂದ ನಿಜವಾಗಿಯೂ ಸಂತೋಷವಾಗಿರುವುದು ಹೇಗೆ ಎಂಬುದನ್ನು ಕಲಿತಿದ್ದೇನೆ. ನಾನು ಸಂತೋಷವಾಗಿದ್ದೇನೆ.
3 – ಜೀವನದಲ್ಲಿ ಯಾವುದೂ ಸುಲಭವಲ್ಲ ಎಂದು ನಾನು ಅರಿತಿದ್ದೇನೆ. ನಿಮಗೆ ಬೇಕಾಗಿರುವುದಕ್ಕಾಗಿ ನೀವು ಯಾವಾಗಲೂ ಹೋರಾಡುತ್ತಲೇ ಇರಬೇಕು. ಎಚ್ಚರವಾಗಿದ್ದು ಮತ್ತು ಕೃತಜ್ಞತೆಯೊಂದಿಗೆ ಯಾವಾಗಲೂ ಹೋರಾಡುತ್ತಿರಬೇಕು.
4 – ಕೆಲವು ವಿಷಯಗಳು ಆಯಾ ಸ್ಥಾನಗಳನ್ನು ಪಡೆಯುವವರೆಗೂ ತಾಳ್ಮೆಯಿಂದಿರಬೇಕು.. ಈ ಹಾದಿ ಕಠಿಣವಾಗಿರಬಹುದು. ಆದರೆ ತಾಳ್ಮೆ ಹಾಗೂ ಶಾಂತವಾಗಿರುವುದು ಬಹಳ ಮುಖ್ಯ.
5 – ಬೇರೆಯವರು ನಿಮಗೆ ಏನನ್ನಾದರೂ ಕಲಿಸಲು ಮುಂದಾಗುತ್ತಲೇ ಇರುತ್ತಾರೆ. ಹೀಗಾಗಿ, ಕಲಿಯಲು ಮುಕ್ತವಾಗಿರಬೇಕು. ಇದರಿಂದ ಅನೇಕ ವಿಷಯಗಳನ್ನು ಕಲಿಯಲು ಸಾಧ್ಯವಾಗುತ್ತದೆ.
6 – ದೈಹಿಕ, ಭಾವನಾತ್ಮಕ ಹಾಗೂ ಮಾನಸಿಕ ಭಾರಗಳಿಂದ ದೂರವಿರುವುದನ್ನು ಕಲಿತಿದ್ದೇನೆ.
7 – ಜೀವನದಲ್ಲಿ ನಮಗೆ ಬೇಕಾಗಿರುವ, ನಾವು ಬಯಸುವ ವಿಷಯಗಳಿಗೆ ಸಮಯವನ್ನು ನೀಡಬೇಕು. ಉದಾಹರಣೆಗೆ ವೃತ್ತಿಯಾಗಿದ್ದರೆ – ಅದಕ್ಕೆ ಸಮಯ ನೀಡಬೇಕು. ಪ್ರೀತಿ ಮುಖ್ಯವಾಗಿದ್ದರೆ – ಅದಕ್ಕೆ ಸಮಯ ನೀಡಬೇಕು. ಕುಟುಂಬ ಮುಖ್ಯವಾಗಿದ್ದರೆ – ಅದಕ್ಕೆ ಸಮಯ ನೀಡಬೇಕು. ನಿಮಗೆ ನೀವೇ ಮುಖ್ಯವಾಗಿದ್ದರೆ – ನಿಮಗಾಗಿ ನೀವು ಸಮಯ ಮಾಡಿಕೊಳ್ಳಬೇಕು. ಯಾವುದು ಮುಖ್ಯ ಅಂತ ನೀವೇ ನಿರ್ಧರಿಸಬೇಕು. ಸಮಯ ಮತ್ತು ಫ್ಲೈಟ್ ಯಾರನ್ನೂ ಕಾಯುವುದಿಲ್ಲ.
8 – ಸ್ವಚ್ಛ ಆಹಾರವನ್ನು ತಿನ್ನುವುದು, ಚೆನ್ನಾಗಿ ನಿದ್ದೆ ಮಾಡುವುದು, ಕಠಿಣವಾಗಿ ವರ್ಕೌಟ್ ಮಾಡುವುದು, ಚೆನ್ನಾಗಿ ನಗುವುದು, ಮುಕ್ತವಾಗಿ ಪ್ರೀತಿಸುವುದನ್ನು ನಾನು ಕಲಿತಿದ್ದೇನೆ.
9 – ನೀವು ಯಾರಿಗೂ ಉಪಕಾರ ಮಾಡಬೇಕಾಗಿಲ್ಲ. ನಿಮ್ಮ ಬಗ್ಗೆ ನೀವು ಮೊದಲು ಯೋಚಿಸಬೇಕು ಅಷ್ಟೇ.
ಇವಿಷ್ಟೇ ಅಲ್ಲ.. ಇನ್ನೂ ಹಲವಾರು ವಿಷಯಗಳಿವೆ. ಅದನ್ನೆಲ್ಲಾ ಇನ್ನೊಮ್ಮೆ ಹೇಳುತ್ತೇನೆ’’ ಎಂದು ಇನ್ಸ್ಟಾಗ್ರಾಮ್‌ನಲ್ಲಿ ನಟಿ ರಶ್ಮಿಕಾ ಮಂದಣ್ಣ ಬರೆದುಕೊಂಡಿದ್ದಾರೆ.

ಸದ್ಯ ರಶ್ಮಿಕಾ ಮಂದಣ್ಣ ತೆಲುಗಿನ ‘ಪುಷ್ಪ – ದಿ ರೂಲ್’, ಹಿಂದಿಯ ‘ಮಿಷನ್ ಮಜ್ನು’ ಮತ್ತು ‘ಗುಡ್ ಬೈ’ ಸಿನಿಮಾಗಳಲ್ಲಿ ಬಿಜಿಯಾಗಿದ್ದಾರೆ.