ಈ ವರದಿ, ಓಲಾ ಹಾಗೂ ಊಬರ್‌ನಲ್ಲಿ ಕೆಲಸ ಮಾಡುವ ಚಾಲಕರು ಹಾಗೂ ಇನ್ನಿತರ ತಾತ್ಕಾಲಿಕ ನೌಕರರ ಕೆಲಸದ ಸ್ವಾತಂತ್ರ್ಯ, ವೇತನ ಪಾವತಿ ಹಾಗೂ ಕೆಲಸ ಒತ್ತಡವನ್ನು ಪ್ರಶ್ನೆ ಮಾಡುವಂತಿದೆ.
ಕ್ಯಾಬ್‌ ಸೇವೆ, ಡೆಲಿವರಿ ಸೇವೆ ಒದಗಿಸುವ ಒಟ್ಟು 11 ಕಂಪನಿಗಳ ಕೆಲಸದ ವಾತಾವರಣವನ್ನು ಅಧ್ಯಯನ ಮಾಡಿ ಈ ವರದಿ ತಯಾರಿಸಲಾಗಿದ್ದು, ಯಾವ ಕಂಪನಿಯೂ ಕೂಡ ‘ಫೇರ್‌ವರ್ಕ್ ಇಂಡಿಯಾ ರೇಟಿಂಗ್ಸ್‌ 2021’ (Fair work India Ratings 2021) ನಲ್ಲಿ ಹತ್ತರಲ್ಲಿ ಏಳಕ್ಕಿಂತ ಹೆಚ್ಚಿನ ಅಂಕಗಳು ಪಡೆದಿಲ್ಲ.
ನ್ಯಾಯೋಚಿತ ವೇತನ, ನ್ಯಾಯೋಚಿತ ಕೆಲಸದ ವಾತಾವರಣ, ನ್ಯಾಯೋಚಿತ ಗುತ್ತಿಗೆ, ನ್ಯಾಯೋಚಿತ ಆಡಳಿತ ಹಾಗೂ ನ್ಯಾಯೋಚಿತ ಪ್ರಾತಿನಿಧ್ಯ ಹೀಗೆ ಒಟ್ಟು ಐದು ಮಾನದಂಡಗಳ ಮೂಲಕ ಕಂಪನಿಗಳನ್ನು ಅಧ್ಯಯನ ಮಾಡಿ ಈ ವರದಿ ತಯಾರಿಸಲಾಗಿದೆ.
ಫೇರ್‌ ವರ್ಕ್‌ ಫೌಂಡೇಶನ್‌ ಎನ್ನುವ ಸಂಸ್ಥೆ ಈ ವರದಿ ತಯಾರಿಸಿದೆ. ಮೇಲಿನ ಐದು ಮಾನದಂಡಗಳನ್ನು ಆಧರಿಸಿ, ಬೇರೆ ಬೇರೆ ಕಂಪನಿಗಳಲ್ಲಿ ಕೆಲಸ ಮಾಡುತ್ತಿರುವ 222 ನೌಕರರನ್ನು ಸಂದರ್ಶಿಸಿ ಈ ವರದಿ ತಯಾರಿಸಿದೆ. ಈ ಹಿಂದೆ ಫೌಂಡೇಶನ್‌ ಎರಡು ಬಾರಿ ಈ ರೀತಿಯ ವರದಿ ತಯಾರಿಸಿತ್ತು. ಮೂರನೇ ವರ್ಷದ ವರದಿ ಇದಾಗಿದ್ದು, ಈ ವರದಿಯ ಅಂಶಗಳು ಕ್ಯಾಬ್‌, ಆನ್‌ಲೈನ್‌ ಡೆಲಿವರಿ ಸೇವೆ ಒದಗಿಸುವ ಕಂಪನಿಗಳಲ್ಲಿ ಕೆಲಸ ಮಾಡುತ್ತಿರುವ ತಾತ್ಕಾಲಿಕ ನೌಕಕರ ಸಂಕಷ್ಟವನ್ನು ಬಿಚ್ಚಿಟ್ಟಿದೆ.
| ಕಂಪನಿ | ಅಂಕ (10 ರಲ್ಲಿ) |
| ಫ್ಲಿಪ್ ಕಾರ್ಟ್‌ | 5 |
| ಅರ್ಬನ್‌ ಕಂಪನಿ | 5 |
| ಬಿಗ್ ಬಾಸ್ಕೆಟ್‌ | 4 |
| ಸ್ವಿಗ್ಗಿ | 4 |
| ಝೊಮ್ಯಾಟೋ | 3 |
| ಅಮೆಜಾನ್‌ | 1 |
| ಡುಂಝೋ | 1 |
| ಫಾರ್ಮ್‌ ಈಸಿ | 1 |
| ಓಲಾ | 0 |
| ಪೋರ್ಟರ್‌ | 0 |
| ಊಬರ್‌ | 0 |
ಆನ್‌ಲೈನ್‌ ಫುಡ್ ಡೆಲಿವರಿ ಸಂಸ್ಥೆಗಳಾದ ಸ್ವಿಗ್ಗಿ ಹಾಗೂ ಜ್ಯೋಮ್ಯಾಟೋ ಕೂಡ ತನ್ನ ಡೆಲಿವರಿ ಪಾರ್ಟ್‌ನರ್‌ಗಳನ್ನು ಕರ್ಮಠವಾಗಿ ನಡೆಸಿಕೊಳ್ಳುತ್ತಿದ್ದು, ಈ ಎರಡೂ ಸಂಸ್ಥೆಗಳು ಕ್ರಮವಾಗಿ ನಾಲ್ಕು ಹಾಗೂ ಮೂರು ಅಂಕಗಳು ಪಡೆದಿವೆ. ಕೆಲ ವರ್ಷಗಳಿಂದ ಈ ಎರಡೂ ಕಂಪನಿಗಳು ತಮ್ಮ ಡೆಲಿವರಿ ಪಾರ್ಟ್‌ನರ್‌ಗಳನ್ನು ನಡೆಸಿಕೊಳ್ಳುವರ ರೀತಿ ಬಗ್ಗೆ ಹಲವು ದೂರುಗಳು ಕೇಳಿ ಬಂದಿದ್ದವು.
ಒಟ್ಟು ಹನ್ನೊಂದು ಕಂಪನಿಗಳ ಪೈಕಿ ಫ್ಲಿಪ್ ಕಾರ್ಟ್‌ ಹಾಗೂ ಅರ್ಬನ್‌ ಕಂಪನಿ ಹೆಚ್ಚು ಅಂಕ ಪಡೆದಿದೆ. ಫ್ಲಿಪ್ ಕಾರ್ಟ್‌ 10 ರಲ್ಲಿ 7 ಅಂಕ ಪಡೆದರೆ, ಅರ್ಬನ್‌ ಕಂಪನಿ 5 ಅಂಕ ಪಡೆದಿದೆ.
ವಿಪರ್ಯಾಸವೆಂದರೆ ಒಟ್ಟು ಸರ್ವೆಗೊಳಪಟ್ಟ 11 ಕಂಪನಿಗಳ ಪೈಕಿ ಯಾವುದೇ ಒಂದು ಕಂಪನಿ ಕೂಡ ಐದು ಮಾನದಂಡಗಳಲ್ಲಿ ಎಲ್ಲ ಅಂಕಗಳನ್ನು ಪಡೆಯಲು ವಿಫಲವಾಗಿವೆ.
ಇನ್ನು ಅಮೇಜಾನ್‌, ಡುಂಝೋ ಹಾಗೂ ಫಾರ್ಮ್‌ ಈಸಿ ಕಂಪನಿಗಳು ಹತ್ತರಲ್ಲಿ ಒಂದು ಅಂಕ ಪಡೆದಿವೆ.
ಮಾಹಿತಿ ತಂತ್ರಜ್ಞಾನ ಹಾಗೂ ಸಾರ್ವಜನಿಕ ನೀತಿ ಕೇಂದ್ರ (Centre for IT and Public Policy ) ಹಾಗೂ ಐಐಐಟಿ ಬೆಂಗಳೂರು ಜಂಟಿಯಾಗಿ ಈ ವರದಿಯನ್ನ ಆಕ್ಸ್‌ಫರ್ಡ್‌ ವಿವಿಯ ಸಹಯೋಗದಿಂದ ತಯಾರು ಮಾಡಿದೆ. ಡೆಸ್ಕ್‌ ರಿಸರ್ಚ್‌, ಕೆಲಸಗಾರರ ಸಂದರ್ಶನ ಹಾಗೂ ವಿವಿಧ ಕಂಪನಿಗಳು ನೀಡಿದ ಮಾಹಿತಿ ಆಧರಿಸಿ ಈ ವರದಿ ತಯಾರಾಗಿದೆ.
ತೀಕ್ಷ್ಣ ಒಳನೋಟ ಹಾಗೂ 20ಕ್ಕೂ ಹೆಚ್ಚು ವಲಯಗಳ ವಿಸ್ತೃತ ಮಾಹಿತಿ ಒಳಗೊಂಡ
ವಿಶೇಷ ಲೇಖನಗಳಿಗಾಗಿ ಈಗಲೇ ಸಬ್‌ಸ್ಕ್ರೈಬ್ ಆಗಿ.